“Ndirĩ Ndamũkora Mũciĩ Rĩngĩ!”

Hihi nĩ ũrĩ woiga ũguo nĩ ũndũ wa mũndũ woonanĩtie nĩ akenio nĩ ndũmĩrĩri? O na gũtuĩka wanageria kũmũcokera, ndũrĩ wahota gũitĩrĩria mbegũ ĩyo wahandire maĩ. (1 Kor. 3:6) Rĩmwe na rĩmwe, ahunjia marĩ na ũmenyeru mangĩaga gũkora mũndũ mũciĩ, nĩ mamwandĩkagĩra marũa, kana makandĩka koohoro kanini karatathi-inĩ magaikia rungu rwa mũrango. Ahunjia amwe nĩ ũndũ wa kuona ta matakamũkora hĩndĩ ĩngĩ, nĩ mamũhoyaga namba cia thimũ, rĩngĩ na njĩra ya kũmũũria ũũ: “Hihi nĩ ũrĩ thimũ?” Tũngĩkora mũndũ, kana tũmwandĩkĩre marũa, tũmũtũmĩre e-mail, kana tũmwandĩkĩre ndũmĩrĩri na thimũ, kana tũmwandĩkĩre koohoro kanini tũikie rungu rwa mũrango, kana kũmũhũũrĩra thimũ, no tũtare atĩ nĩ twamũcokera. O na rĩrĩa arĩ hinya kũmũkora mũciĩ, no tũhote kũmũteithia athiĩ na mbere gũkenio nĩ ndũmĩrĩri.