Mbeũ no Mũhaka Citĩrĩrio Maĩ Nĩguo Ikũre
1. Nĩ kĩndũ kĩrĩkũ arĩ o mũhaka gĩitĩrĩrio maĩ nĩguo gĩkũre?
1 Mbeũ ingĩhandwo mũgũnda no mũhaka citĩrĩrio maĩ nĩguo ikũre. Ũguo noguo twagĩrĩirũo gũitĩrĩria maĩ mbeũ cia ma iria ihandĩtwo ngoro-inĩ cia andũ arĩa tũhunjagĩria. (1 Kor. 3:6) No mũhaka tũcokere andũ arĩa twahunjĩria na tũitĩrĩrie maĩ mbeũ icio cia mũhaano tũkĩhũthĩra Kiugo kĩa Ngai angĩkorũo nĩ tũkwenda igĩe na mĩri, ikũre, na igacĩre.
2. Tũngĩiga mũthingi wa gũcokera mũndũ ũrĩa twahunjĩria atĩa?
2 Ũria Kĩũria: Rĩrĩa ũrahaarĩria harĩa mũgaathoma-rĩ, hihi no ũhaarĩrie kĩũria gĩa gũcanjamũra kĩrĩa ũgaacokia rĩrĩa ũkaamũcokera? Mũrie kĩũria kĩu ũgĩtiriha ndeereti yanyu ya mbere, na ũbange gũkamũcokera. Andũ aingĩ nĩ monaga arĩ wega gũthuura ũndũ ũmwe kuuma ibuku-inĩ rĩa Bibilia Ĩrutanaga ũrĩa ũngĩmahotithia kuonania ũrĩa mũndũ angĩĩruta Bibilia.
3. Nĩ ũhoro ũrĩkũ ũngĩandĩka rĩrĩa mwaria na mũndũ ũrakenio nĩ ũhoro ũrĩa tũhunjagia?
3 Andĩka Rekodi: Warĩkia o ũguo kũhunjĩria mũndũ rĩa mbere, andĩka rekodi. Andĩka rĩĩtwa rĩa mũndũ ũcio na andirethi yake. Ningĩ nĩ wega kwandĩka tarĩki na mahinda marĩa mwaria, ũndũ ũrĩa mwarĩrĩria, na mabuku marĩa wamũtigĩra angĩkorũo nĩ harĩ. Hihi nĩ mũndũ wa ndini? Nĩ akoragwo na famĩlĩ? Hihi nĩ agwetire maũndũ marĩa mamũkenagia kana mamũgiaga? Ũhoro ũcio nĩ ũgaagũteithia kũhaarĩria maũndũ marĩa mũkaarĩrĩria nake hĩndĩ ĩyo ĩngĩ. Ningĩ andĩka rĩrĩa mwarĩkanĩra gũkaamũcokera na kĩũria kĩrĩa ũkaamũcokeria.
4. Twagĩrĩirũo gũkorũo na ũkirĩrĩria tũgĩcokera andũ arĩa marakenio nĩ ndũmĩrĩri ĩrĩa tũhunjagia nĩkĩ?
4 Korũo na Ũkirĩrĩria: Shaitani ndegũtigithĩria kũgeria ‘kũruta ũhoro ũrĩa ũhurĩtwo’ ngoro-inĩ ya mũndũ. (Mar. 4:14, 15) Kwoguo, ndũgakue ngoro ũngĩaga gũkora mũndũ ũcio wakenirio nĩ ũhoro riita rĩa mbere. Hihi no ũmũtũmĩre marũa kana ũmũtigĩre ndũmĩrĩri nguhĩ mũrango-inĩ? Painia ũmwe nĩ aambĩrĩirie kwĩruta Bibilia na mũtumia ũmwe mũrango-inĩ no tondũ ndaacokire kũmũkora mũciĩ rĩngĩ, akĩmũtũmĩra marũa. Thutha-inĩ rĩrĩa mwarĩ ũcio wa Ithe witũ aamũkorire mũciĩ, mũtumia ũcio agĩtaarĩria ũrĩa aahutirio ngoro nĩ wendo ũrĩa onirio. O ũrĩa tũgũitĩrĩria mbeũ cia ma maĩ, noguo tũkũgĩa na gĩkeno kĩrĩa kĩumanaga na kuona ikĩmera, igĩkũra, na ‘igĩciara maciaro, imwe ikaruta maita mĩrongo ĩtatũ, na ingĩ maita mĩrongo ĩtandatũ na ingĩ igana.’—Mar. 4:20.