Gĩcunjĩ Gĩkĩ Kĩngĩteithia Ũ?

1. Tũgĩthoma ngathĩti ya Mũrangĩri kana Amkeni! twagĩrĩirũo gwĩciria ũndũ ũrĩkũ, na nĩkĩ?

¹ Ngathĩti cia Mũrangĩri na Amkeni! iharagĩrio gũteithia andũ a mĩthemba yothe thĩinĩ wa thĩ. Kwoguo, icunjĩ ciacio ciaragĩrĩria maũndũ matiganĩte. Tũgĩthoma o gĩcunjĩ, twagĩrĩirũo gwĩciria nĩ a mangĩkenio nĩkĩo na tuone ũrĩa tũngĩmatwarĩra ngathĩti ĩo.

2. Nĩ maũndũ marĩkũ makoragwo ngathĩti-inĩ ciitũ mangĩgucĩrĩria andũ?

² Hihi nĩ kũrĩ Mũrangĩri wa ica ikuhĩ ũrarĩrĩria kaũndũ ka Bibilia mwanarĩrĩria na mũndũ mũrutaga wĩra nake? Nĩ kũrĩ gĩcunjĩ kĩgiĩ mũtũũrĩre wa famĩlĩ kĩngĩteithia mũndũ mwĩtainwo? Nĩ ũrĩ mũrata ũrabanga gũthiĩ bũrũri warĩrĩirio thĩinĩ wa Amkeni!? Nĩ harĩ ngathĩti ĩngĩgucĩrĩria arĩa makoragwo wonjoria-inĩ kana rũhonge rwa thirikari gĩcigo-inĩ kĩanyu? Kwa ngerekano, ngathĩti ĩrarĩrĩria mathĩna marĩa andũ akũrũ macemanagia namo no ĩgucĩrĩrie mũno andũ arĩa matumberagia andũ akũrũ. Arĩa marutaga wĩra wa ũgitĩri no makenio nĩ ngathĩti ĩrarĩrĩria ũhoro wa wĩki-naĩ.

3. Taarĩria ũndũ wonetwo ũrĩa ũronania bata wa kũheana ngathĩti kũrĩ mũndũ tũngĩcirĩria atĩ no agũcĩrĩrĩrio nĩ gĩcunjĩ kĩna.

³ Moimĩrĩro: Thutha wa kwamũkĩra ngathĩti ya Amkeni! ya Oktomba 2011 ĩrĩa yaragĩrĩria “Kuwalea Watoto Wenye Kutegemeka,” mũthuri ũmwe na mũtumia wake kuuma bũrũri wa Afrika ya Mũhuro nĩ maahũrĩire cukuru 25 thimũ itũũra-inĩ rĩao. Cukuru 22 nĩ cietĩkĩrire ngathĩti icio na ikĩheanwo kũrĩ arutwo. Mũthuri ũngĩ na mũtumia wake bũrũri-inĩ oro ũcio nĩ maarĩ na rĩciria o ta rĩu na makĩheana ngathĩti kũrĩ arutani a cukuru iria irĩ gĩcigo-inĩ kĩao. Arutani cukuru-inĩ ũmwe wa icio nĩ maahũthĩrire ngathĩti ĩyo mathomo-inĩ mao ma o kiumia. Mũthuri ũcio na mũtumia wake nĩ mataarĩirie mũrori wa mũthiũrũrũko nake agĩkĩra ngoro ciũngano mũthiũrũrũko-inĩ wake maheane ngathĩti icio cukuru iria imarigicĩirie. Ngathĩti nyingĩ mũno nĩ cietirio wabici-inĩ ya rũhonge ũũ atĩ igĩcabwo ingĩ!

4. Tũrenda kwĩrutanĩria kũheana ngathĩti ciitũ kũrĩ andũ aingĩ nĩkĩ?

⁴ Ngathĩti ciitũ nĩ ciaragĩrĩria gĩtũmi kĩa maũndũ marĩa marekĩka ũmũthĩ na ikerekeria andũ harĩ Bibilia na Ũthamaki wa Ngai. Gũtirĩ ngathĩti ingĩ ihaana ta cio thĩinĩ wa thĩ iria “ihunjanagĩria ũhoro wa kũhonokania.” (Isa. 52:7) Nĩ ũndũ ũcio, tũrenda kũheana ngathĩti ciitũ kũrĩ andũ aingĩ o ũrĩa kũngĩhoteka. Ũndũ ũrĩa mwega wa kwĩyũria nĩ, ‘Gĩcunjĩ gĩkĩ kĩngĩteithia ũũ?’