Hũthĩra Rĩarĩro Ritũ Kũrũta Ciana Ciaku
1. Muoroto wa gĩcunjĩ kĩrĩ na kĩongo “Ciana” Rĩarĩro-inĩ ritũ nĩ ũrĩkũ?
1 Rĩarĩro ritũ rĩa jw.org rĩthondeketwo ũndũ rĩgũteithia andũ a mariika mothe. Gĩcunjĩ kĩrĩ na kĩongo “Ciana” (thiĩ harĩ Morutani ma Bibilia > Ciana) nĩ gĩteithagia ciana nini kũgĩa na ũrata wa hakuhĩ makĩria na aciari a cio na harĩ Jehova. (Gũcok. 6:6, 7) Ũngĩhũthĩra atĩa gĩcunjĩ kĩu kũruta ciana ciaku?
2. Ũngĩthuura atĩa ũhoro wa kwĩruta ũraringana na mĩaka ya mwana waku?
2 Hũthĩra Ũtaũku: Mabata ma ciana makoragwo marĩ ngũrani. (1 Kor. 13:11) Kwoguo-rĩ, ũngĩthuura atĩa ũhoro ũrĩa ũraringana na mĩaka ya mwana waku? Wĩyũrie ũũ: ‘Nĩ ũndũ ũrĩkũ ũngĩmũkenia? Hihi arĩ na ũhoti wa kũnyita maũndũ maingĩ? Angĩĩruta kwa ihinda rĩigana atĩa atekũnoga meciria?’ Ũkĩĩruta na ciana cia mĩaka ĩtatũ gũcoka na thĩ, no mwarĩrĩrie tũrũgano tũrĩa tũrĩ rungu rwa kĩongo “Ndĩĩrutaga Kuumana na Bibilia” thĩinĩ wa Rĩarĩro ritũ. Kũrĩ famĩlĩ ingĩ ikenagĩra kwarĩrĩria tũrũgano twa Bibilia gĩcunjĩ-inĩ kĩa “Ruta Ciana Ciaku.” Ningĩ no mwarĩrĩrie maũndũ maya marũmĩrĩire.
3. Aciari mangĩhũthĩra wega atĩa ũhoro ũrĩa ũrĩ gĩcunjĩ-inĩ gĩa “Tũmaũndũ twa Gwĩka,” Rĩarĩro-inĩ ritũ?
3 Tũmaũndũ twa Gwĩka: Tũmaũndũ tũu nĩ twa gũteithia mũciari erute na ciana ciake. Hihinya harĩa handĩkĩtwo “ruta” nĩguo ũthome motaaro marĩa maronania ũrĩa aciari mangĩhũthĩra tũmaũndũ tũu twa gwĩka. Hũthĩra tũmaũndũ ta, kũgemia mbica iria irĩ ho ũkĩĩruta na twana tũnini. Teithĩrĩria ciana iria nene rĩrĩa iraihũria tũmaũndũ twa kwĩruta. Kaũndũ kamwe ga gwĩka karĩ na tũmaũndũ tũingĩ twa kwĩruta, twarĩrĩirie ũrutani ũmwe wa Bibilia, kwoguo ciana cia mariika mothe nĩ ikũgunĩka nĩ ũrutani ũcio ũmwe wa Bibilia.
4. Nĩ maũndũ marĩkũ marĩ gĩcunjĩ-inĩ gĩa “Tuĩka Mũrata wa Jehova” Rĩarĩro-inĩ ritũ?
4 Tuĩka Mũrata wa Jehova: Video, nyĩmbo, na tũmaũndũ tũngĩ twa gĩcunjĩ gĩkĩ kĩa Rĩarĩro ritũ, nĩ iteithagia aciari gũtĩtĩrithia Kiugo kĩa Ngai harĩ ciana ciao. (Gũcok. 31:12) Video ciothe nini cia katuni nĩ irutanaga maũndũ ma bata. Mĩthaako ta ya gwetha indo mũkĩhũthĩra mbica nĩ ĩtĩtĩrithagia maũndũ macio ma bata. Nyĩmbo cia Ũthamaki na ingĩ itungĩtwo nĩ ũndũ wa ciana, nĩ ciĩkĩragwo rĩarĩro-inĩ kaingĩ, tondũ ciana nĩ ciendete kũina, na nyĩmbo nĩ iciteithagia kũririkana maũndũ marĩa cieruta.
5. Nĩkĩ aciari nĩ magĩrĩirũo kũhoyaga Jehova amateithie mahote kũruta ciana ciao ũhoro wa ma?
5 Inyuĩ aciari, Jehova arenda mũgaacĩre mũkĩrera ciana cianyu. Nĩ ũndũ ũcio, mũhoyagei amũteithie mũhote kũruta ciana cianyu ũhoro wa ma. (Atiir. 13:8) Jehova nĩ arĩmũteithagia mũhote kũmenyeria ciana cianyu ‘ciũhĩge, nĩguo ikaahonokio nĩ ũndũ wa kwĩhoka Kristo Jesu.’—2 Tim. 3:15; Thim. 4:1-4.