Hũthagĩra jw.org Ũtungata-inĩ Waku—“Tuĩka Mũrata wa Jehova”

Gĩcunjĩ kĩa “Morutani ma Bibilia” thĩinĩ wa jw.org nĩ gĩkoragwo na gacunjĩ ga ciana getagwo “Tuĩka Mũrata wa Jehova.” Gakoragwo na nyĩmbo, video, na tũmaũndũ twa gwĩka. Hihi nĩ ũrĩ wahũthĩra gacunjĩ kau ũtungata-inĩ waku? Angĩkorũo nĩ ũreruta Bibilia na mũciari ũrĩ na twana, nĩ wega ũmuonie gacunjĩ kau. Ũndũ ũcio no ũtũme ambĩrĩrie kũingĩra nginya kũndũ kũngĩ thĩinĩ wa Web site itũ.

Rĩrĩa twaheanaga trakti namba 38, mũrũ wa Ithe witũ ũmwe nĩ aakorire mũtumia ũmwe na amũhe trakti ĩyo akĩambĩrĩria kũmĩthoma o hĩndĩ ĩyo. Mũtumia ũcio aarĩ na twana tũigana ũna, na nĩ twendaga mũno kũmenya kĩrĩa kĩarĩ thĩinĩ wa trakti ĩyo. Mũrũ wa Ithe witũ ũcio aarĩrĩirie na njĩra nguhĩ maũndũ marĩa marĩ thĩinĩ wa trakti ĩyo, agĩcoka akĩonia mũtumia ũcio andirethi cia Web site itũ iria irĩ na thutha wa trakti ĩyo. Tondũ mũtumia ũcio nĩ onanirie wendi mũnene, mũrũ wa Ithe witũ akĩoya mweke ũcio kũmonia marĩ na twana twake video ĩmwe ya Kamau akĩhũthĩra thimũ yake.

Mwarĩ wa Ithe witũ ũmwe nĩ eerire mũtumia marutithanagia wĩra nake ũhoro wa Web site itũ na maũndũ marĩa makoragwo thĩinĩ wayo megiĩ famĩlĩ. Mũtumia ũcio hamwe na twana twake nĩ maahingũrire jw.org. Thutha ũcio, eerire mwarĩ wa Ithe witũ atĩ twana twake twathiũrũrũkaga nyũmba tũkĩinaga rũmwe rwa nyĩmbo iria irĩ thĩinĩ wa gacunjĩ “Tuĩka Mũrata wa Jehova” rũrĩa rũkoragwo na kĩongo “Nĩ Tũhunjagie Ũhoro.”

Nĩ wega ũhingũre gĩcunjĩ kĩu thĩinĩ wa jw.org ũrute video, nyĩmbo, kana tũmaũndũ twa gwĩka wĩkĩre thimũ-inĩ yaku. Weka ũguo nĩ ũrĩhotaga kũhũthĩra gĩcunjĩ kĩu kĩa jw.org ũrĩ ũtungata-inĩ. Web site ĩyo nĩ ya bata mũno ya gũtũteithia gũtungatĩra Mwathani.—Atũm. 20:19.