Arĩa Tũtwaragĩra Ngathĩti no Merute Bibilia
1. Nĩ kĩĩ gĩtũmĩte ithondeka rĩa Jehova rĩkorũo rĩgĩkĩra ahunjia ngoro matwaragĩre andũ ngathĩti?
1 Andũ aingĩ matikoragwo mehaarĩirie gũthoma Bibilia hamwe na ithuĩ no nĩ makenagĩra gũthoma ngathĩti citũ. Nĩ ũndũ ũcio, kwa ihinda iraya ithondeka rĩa Jehova nĩ rĩkĩrĩte ahunjia ngoro matwaragĩre andũ ngathĩti. O ũrĩa andũ mathiaga na mbere gũthoma ngathĩti noguo manyotagĩra Kiugo kĩa Ngai. (1 Pet. 2:2) Hĩndĩ ĩmwe no mathome ũndũ mũna ũrurumũre wendi wao wa gwĩtĩkĩra kwĩruta Bibilia hamwe na ithuĩ.
2. Tũngĩkũria atĩa nyota thiĩnĩ wa arĩa tũtwaragĩra ngathĩti?
2 ‘Itagĩrĩria Maĩ’ Mbeũ cia Ũhoro wa Ma: Handũ ha o kũnengera mwene nyũmba ngathĩti, ambĩrĩiria ndeereti na ũgerie gũthondeka ũrata hamwe nake. Weka ũguo nĩ ũkũmũmenya wegega, ũmenye maũndũ marĩa endete, marĩa etĩkĩtie, na kwoguo warie nake na njĩra ya ũũgĩ. (Thim. 16:23) Wĩhaarĩrie ũgĩcokera mũndũ o wothe. Kũngĩhoteka muonie na njĩra nguhĩ ũndũ ũmwe na ũthome rĩandĩko kuuma ngathĩti-inĩ. Hĩndĩ ĩyo ũgũkorũo ũgĩitĩrĩria maĩ mbeũ cia ũhoro wa ma ngoro-inĩ yake. (1 Kor. 3:6) Andĩka tarĩki ciothe iria ũmũceereire, kĩrĩa ũmũtigĩire, maũndũ na maandĩko marĩa mwarĩrĩirie.
3. Twagĩrĩirũo gũcokera rĩ andũ arĩa tũtwaragĩra ngathĩti?
3 Twagĩrĩirũo Gũcoka Rĩ? Wagĩrĩirũo gũcoka rita rĩmwe harĩ mweri nĩguo ũmatwarĩre ngathĩti cia ica ikuhĩ. O na kũrĩ ũguo no ũcoke maita maingĩ makĩria gũkĩringana na wendi wa mũndũ ũcio na mĩbango yaku. No ũcoke thutha wa kiumia kĩmwe kana igĩrĩ ũmwĩre ũũ: “Ndoka gũkuonia na njĩra nguhĩ kaũndũ kamwe ngathĩti-inĩ ĩrĩa njĩrĩgĩte gũgũtigĩra.” Gwĩka ũguo nĩ gũgũtũma mũndũ ũcio ende gũthoma gĩcunjĩ kĩna ngathĩti-inĩ ĩyo. Angĩkorũo nĩ agĩthomete no ũmũũrie mawoni make na ũkĩarĩrĩrie na njĩra nguhĩ. Kana angĩkorũo mũndũ ũcio nĩ akenagĩra gũthoma mabuku maitũ no ũmũcokere na ũmuonie trakti, broshua, kana ibuku rĩrĩa tũratigĩra andũ mweri ũcio.
4. Tũngĩka atĩa nĩguo tũmenye kana arĩa tũtwaragĩra ngathĩti marĩ na wendi wa kwĩrũta Bibilia?
4 Ndũgeterere nginya rĩrĩa mwene nyũmba agakwĩra atĩ no ende kwĩruta Bibilia. Oya ikinya rĩa mbere. O na angĩkorũo nĩ aregaga kwĩruta Bibilia hamwe na ithuĩ, angĩenda rĩmwe na rĩmwe no warĩrĩrie nake gĩcunjĩ “Macokio ma Ciũria cia Bibilia” kuuma ngathĩti-inĩ ya Mũrangĩri. No gũkorũo wahota kwambĩrĩria kwĩruta Bibilia nake mũrango-inĩ. O na kũrĩ ũguo, ũngĩremwo biũ kwambĩrĩria kwĩruta Bibilia nake no ũthiĩ na mbere kũmũtwarĩra ngathĩti nĩguo akũrie wendi.