Trakti Njerũ Irĩtũteithagia Ũtungata-inĩ!
1. Nĩ kĩĩ kĩarutirũo Kĩgomano-inĩ gĩa thikũ ithatũ gĩa gũtũteithia ũtungata-inĩ?
1 Trakti ithano nĩ ciarutirũo Kĩgomano-nĩ gĩa thikũ ithatũ gĩa “Kiugo kĩa Ngai Nĩkĩo Ma!” Ningĩ trakti ya Ndũmĩrĩri ya Ũthamaki Na. 38, ĩrĩ na kĩongo “Hihi Arĩa Makuĩte no Macoke Muoyo?” nĩ yongereirũo harĩ trakti icio. Trakti icio ciothe ithathatũ ithondeketwo na njĩra ĩragucĩrĩria. Nĩkĩ gĩtũmĩte ithondeketwo na njĩra ĩyo? Tũngĩhũthĩra atĩa trakti icio njerũ, na tũgĩe na moimĩrĩro mega, rĩrĩa tũrahunjia nyũmba kwa nyũmba?
2. Trakti icio njerũ ithondeketwo itũteithie na njĩra irĩkũ?
2 Ithondeketwo na Njĩra Njerũ Nĩkĩ?: Njĩra ĩrĩa ĩrĩ moimĩrĩro mega ya kũhunjia nyũmba kwa nyũmba, ĩrũmagĩrĩra makinya maya mana: (1) Kũũria kĩũria kĩa mawoni ũkĩambĩrĩria ndeereti. (2) Gũthoma rĩandĩko. (3) Gũtigĩra mwene nyũmba kĩndũ angĩthoma. (4) Kũũria kĩũria gĩa gũkaarĩrĩria hĩndĩ ĩyo ĩngĩ, na kũbanga gũkaamũcokera. Trakti icio njerũ, ithondeketwo ũndũ igũtũteithia kũrũmĩrĩra makinya macio mana.
3. Tũngĩheana atĩa trakti citũ njerũ tũrĩ ũtungata-inĩ?
3 Ũrĩa Tũngĩcihũthĩra: (1) Wageithia mwene nyũmba, muonie kĩũria kĩrĩa kĩrĩ mbere ya trakti ĩyo, ũcoke ũmũũrie mawoni make. (2) Humbũria trakti na mwarĩrĩrie gacunjĩ ka “Ũrĩa Bibilia Yugaga.” Ũngĩona kwagĩrĩire no mũthome rĩandĩko rĩrĩa rĩonanĩtio hau. Mwene nyũmba angĩkorũo arĩ na mahinda, no mwarĩrĩrie gacunjĩ ka “Ũrĩa Ũndũ Ũcio Ũngĩgũteithia.” (3) Mũnengere trakti na ũmwĩkĩre ngoro amĩthome hĩndĩ ĩrĩa arĩ na ihinda. (4) Mũtanatigana, muonie kĩũria kĩrĩa kĩrĩ na thutha wa trakti ĩyo, rungu rwa kĩongo kĩa “Ta Wĩyũrie,” na ũbange gũkaamũcokera hĩndĩ ĩyo ĩngĩ, nĩguo mwarĩrĩrie kĩũria kĩu.
4. Tũngĩhũthĩra atĩa trakti citũ njerũ rĩrĩa twacokera andũ?
4 Ningĩ nĩ irĩtũteithagia rĩrĩa tũracokera andũ. Hũthĩra maandĩko marĩa monanĩtio na thutha wa trakti ĩyo, gũcokia kĩũria kĩrĩa worĩtie mwene nyũmba mũgĩtigana. Ũtanamũtiga, muonie mbica ya broshua Ũhoro Mwega ĩrĩa ĩrĩ trakti-inĩ, na ũmuonie ithomo rĩrĩa rĩrĩ na ũhoro ũcio mũkwaragĩrĩria ũcoke ũmũtigĩre broshua ĩyo. Angĩmĩtĩkĩra, banga gũkaamũcokera hĩndĩ ĩyo ĩngĩ, nĩguo mwarĩrĩrie ũhoro makĩria broshua-inĩ ĩyo. Na njĩra ĩyo, nĩ wambĩrĩria wĩruti wa Bibilia. Kana handũ ha kũmũtigĩra broshua, mũtigĩre trakti ĩngĩ na ũbange gũgaacoka nĩguo mũmĩarĩrĩrie.
5. Trakti ikoretwo na moimĩrĩro marĩkũ ũtungata-inĩ witũ?
5 Trakti ihũthĩrĩtwo ũtungata-inĩ kwa makĩria ma mĩaka 130 mĩhĩtũku. O na gũtuĩka nĩ ithiaga igĩcenjagia ũrĩa ihaana na ũrĩa ithondeketwo, nĩ ikoretwo na moimĩrĩro mega mũno. Rekei tũhũthĩre trakti icio njerũ, nĩguo tũthiĩ na mbere gũtheremia ma cia Bibilia thĩinĩ wa thĩ yothe.—Thim. 15:7a.