Ũrĩa Ũngĩambĩrĩria Ndeereti Ũkĩhũthĩra Trakti

Kuuma Janũarĩ 2018, ngothi ya Kabuku ka Mũcemanio wa Ũtũũro na Ũtungata Witũ nĩ ĩkoragwo na gacunjĩ ga Gũteereta na Mũndũ Ũtungata-inĩ. Tũkoretwo tũgĩkĩrũo ngoro kwaranĩria na andũ handũ ha o kũmahe mabuku tu. Nĩ kũrutĩtwo video cia gũteereta na mũndũ ũtungata-inĩ iria cionanagia ũrĩa mũhunjia angĩambĩrĩria ndeereti akĩhũthĩra o Bibilia tu. No hihi ũguo nĩ kuuga atĩ tũtiagĩrĩirũo kũhũthĩra mabuku tũkĩhunjia nyũmba kwa nyũmba? Aca. Kwa ngerekano, trakti no ikorũo irĩ njega harĩ kwambĩrĩria ndeereti. No ũhũthĩre njĩra ĩno ĩrũmĩrĩire ũkĩhunjia na trakti o yothe:

1. Ũria kĩũria kĩrĩa kĩrĩ mwena wa mbere.

2. Muonie macokio ma Bibilia kuuma maandĩko-inĩ marĩa monanĩtio kĩambĩrĩria-inĩ gĩa karatathi ga kerĩ. Mahinda mangĩtĩkĩria, thomai na mwarĩrĩrie maũndũ mamwe marĩa marĩ thĩinĩ wa trakti ĩyo.

3. He mwene nyũmba trakti ĩyo na ũmwĩkĩre ngoro athome gacunjĩ karĩa gatigara thutha-inĩ.

4. Mũtanatigana, muonie kĩũria kĩrĩa kĩrĩ gacunjĩ-inĩ ga “Ta Wĩyũrie,” na ũmwĩre nĩ mũkaarĩrĩria macokio ma Bibilia hĩndĩ ĩyo ĩngĩ.

Wacoka, arĩrĩriai macokio na ũmũtigĩre kĩũria kĩngĩ gĩa gũkaarĩrĩria hĩndĩ ĩyo ĩngĩ. No ũthuure kĩũria kuuma thĩinĩ wa website itũ kana kuuma ibuku-inĩ rĩrĩa rĩonanĩtio mwena wa thutha wa trakti ĩyo. Ihinda rĩrĩa rĩagĩrĩire rĩakinya, no ũmũingĩrie harĩ broshua ya Ũhoro Mwega Kuuma Kũrĩ Ngai! kana ibuku rĩngĩ tũhũthagĩra kũrutana Bibilia kuuma Gathandũkũ Gaitũ ka Indo cia Kũrutana