Ũrĩa Ũngĩhũthĩra Icunjĩ cia Gũteereta na Mũndũ Ũtungata-inĩ

Kuuma Janũarĩ 2018, icunjĩ cia gũteereta na mũndũ ũtungata-inĩ nĩ ikoretwo ikĩoneka ngothi-inĩ ya Ũtũũro na Ũtungata Witũ wa Gĩkristiano​—Kabuku ka Mũcemanio. Ũngĩcihũthĩra atĩa?

Rĩrĩa Ũrĩ na Gĩcunjĩ kĩa Mũrutwo: Wagĩrĩirũo kũhũthĩra kĩũria, rĩandĩko, na ũndũ ũrĩa mũkaarĩrĩria kuuma gĩcunjĩ-inĩ gĩa gũteereta na mũndũ ũtungata-inĩ. O na kũrĩ ũguo, ũguo ti kuuga atĩ wagĩrĩirũo kũhũthĩra ciugo o iria ihũthĩrĩtwo video-inĩ ya gĩcunjĩ kĩu. No ũhũthĩre gĩikaro ngũrani, ciugo ngũrani cia kwambĩrĩria, njĩra ngũrani ya gũtaarĩria rĩandĩko, na maũndũ mangĩ ta macio. Ningĩ no ũheane kĩndũ kuuma Gathandũkũ-inĩ Gaitũ ka Indo cia Kũrutana, o na angĩkorũo gĩcunjĩ kĩrĩa ũheetwo gĩtionanĩtie ũguo.

Rĩrĩa Ũrĩ Ũtungata-inĩ: Icunjĩ cia gũteereta na mũndũ ũtungata-inĩ ihaarĩirio nĩguo itũteithie kuona maũndũ tũngĩhũthĩra ũtungata-inĩ. Mũndũ angĩonania wendi, kana ende kũmenya makĩria, no ũtwarithie ndeereti na mbere, hihi ũkĩhũthĩra ũhoro ũrĩa ũrĩ gacunjĩ-inĩ ga gũcokera mũndũ. No ũgarũre ũhoro ũrĩa ũrĩ gacunjĩ-inĩ ga gũteereta na mũndũ ũtungata-inĩ kana ũhũthĩre ũndũ ũngĩ ngũrani. Hihi andũ a gĩcigo kĩanyu no mahutio ngoro makĩria nĩ ũndũ waarĩrĩirio mweri-inĩ ũngĩ, kana rĩandĩko rĩngĩ ngũrani? Hihi andũ a gĩcigo kĩanyu mangĩkenio nĩ ũndũ wĩkĩkĩte ica ikuhĩ, kana ũndũ ũrĩ mohoro-inĩ? O ũrĩa ũngĩenda kũhũthĩra icunjĩ cia gũteereta na mũndũ ũtungata-inĩ, muoroto waku wagĩrĩire gũkorũo ũrĩ ‘gwĩka maũndũ mothe nĩ ũndũ wa ũhoro ũrĩa mwega, nĩguo ũũhunjĩrie andũ arĩa angĩ.’​—1Ko 9:22, 23.