Ithandũkũ rĩa Kĩũria

◼ Ciana ibataire kũrutwo maũndũ marĩkũ nĩ getha igimare kĩĩroho?

Aciari Akristiano nĩ merutanagĩria mũno nĩ getha marere ciana ciao na “mũrutanĩre o na mũtaarĩre ũrĩa wa Mwathani.” (Ef. 6:4) Nĩ monaga arĩ wega gũthuthuria rĩandĩko rĩa o mũthenya hamwe na ciana ciao o rũcinĩ. Hĩndĩ ya ũthathaiya, famĩlĩ nĩ ciĩroragĩra na ikaarĩrĩria video ciitũ, icunjĩ cia Vijana Huuliza, makageria gũthaaka mĩthaako ya Bibilia, kana makemenyeria icunjĩ cia ũtungata. O na kũrĩ ũguo, nĩ getha ciana igimare kĩĩroho no mũhaka irutwo ma iria ndikĩru cia Bibilia.—Ahib. 6:1.

Ta wĩcirie ũrĩa tũrutaga andũ arĩa twakora ũtungata-inĩ. Tũgeragia kwambĩrĩria wĩruti wa Bibilia tũkĩhũthĩra Bibilia Ĩrutanaga Atĩa Kũna? iceera-inĩ riitũ rĩa mbere kana rĩa kerĩ. Twarĩkia ibuku rĩu, tũkeruta nake ‘Mwĩigei Wendo-inĩ wa Ngai.’ Nĩkĩ? Ibuku rĩa Bibilia Ĩrutanaga, rĩteithagia mũrutwo kũmenya ma cia mũthingi cia Bibilia. Narĩo ibuku rĩa ‘Wendo wa Ngai’ rĩmũteithagia kũhũthĩra motaaro ma Bibilia mũtũũrĩre-inĩ wake wa o mũthenya. Gũthoma mabuku macio merĩ gũteithagia arutwo ‘mehande wega’ thĩinĩ wa Kristo na ‘magwatĩrie ũhoro ũrĩa metĩkĩtie.’ (Kol. 2:6, 7) Na githĩ ũguo toguo twagĩrĩire gũteithia ciana ciitũ? O na cio nĩ irabatara kũrutwo ũhoro wĩgiĩ ũkũũri, Ũthamaki, na ũrĩa gũthiaga rĩrĩa twakua. Ciana ningĩ nĩ ciagĩrĩire kũmenya kĩrĩa gĩtũmaga Ngai etĩkĩrie mĩnyamaro na ũrĩa tũngĩmenya kana tũratũũra matukũ-inĩ ma kũrigĩrĩria. No mũhaka tũciteithie ciĩtĩkie atĩ Aira a Jehova nĩo marutanaga ma. Ningĩ no mũhaka tũciteithie itaũkĩrũo nĩ motaaro ma Bibilia, nĩguo cimenye ũrĩa cingĩhota “gũkũũrana wega na ũũru.” (Ahib. 5:14) Aciari nĩ magĩrĩirũo gwĩciria ũhoro wa mĩaka ya ciana ciao, na ũhoti wa cio wa kũnyita maũndũ. No o na kũrĩ ũguo, ciana nĩ ikoragwo na ũhoti wa kwĩruta maũndũ maingĩ marikĩru ma Bibilia, o na irĩ o nini.—Luk. 2:42, 46, 47.