Agosti Ũgakorũo ũrĩ Mweri Tũtakariganĩrũo!

1. Tũkĩniina mĩaka 100 kuuma hĩndĩ ĩrĩa Ũthamaki wa Ngai waambĩrĩirie gwathana-rĩ, tũgakorũo na kambĩini ĩrĩkũ ya mwanya?

¹ Tũrĩ hakuhĩ kũniina mĩaka 100 kuuma hĩndĩ ĩrĩa Ũthamaki wa Ngai waambĩrĩirie gwathana. Na githĩ ndũkĩrĩ ũndũ mwega tũkorũo na kambĩini ya mwanya nĩ getha tũgoocithie Jehova! Mweri-inĩ wa Agosti nĩ tũkaaheana trakti njerũ thĩinĩ wa thĩ yothe ĩrĩ na kĩongo, Tũngĩruta Kũ Macokio ma Ciũria Iria Nditũ Ũtũũro-inĩ? Trakti ĩno ĩrekĩra andũ ngoro methe macokio ma ciũria ciao kuuma Bibilia-inĩ, na ĩgataarĩria ũrĩa Rĩarĩro rĩa jw.org rĩngĩmateithia.

2. Tũkaanyitanĩra atĩa ‘kwanĩrĩra rĩanĩrĩra inene mũno rĩa kũgooca Jehova,’ rĩrĩa rĩgaakorũo kuo mweri wa Agosti?

² Rĩanĩrĩra Inene rĩa Kũgooca: Nĩ getha ahunjia mahote kwandandũra ũtungata wao, nĩ kũrĩ na mũbango wa mwanya harĩ arĩa mangĩenda gũtuĩka mapainia a gũteithĩrĩria mweri-inĩ ũcio wa Agosti. Ahunjia arĩa makoya ũpainia wa gũteithĩrĩria, nĩ magetĩkĩrio kũhunjia mathaa 30. Tondũ mweri ũcio ũgakorũo na mĩthia ĩtano ya kiumia, ahunjia aingĩ arĩa marutaga wĩra kana arĩa mathiaga cukuru, no mahũthĩre mweke ũcio kuoya ũpainia wa gũteithĩrĩria. Angĩkorũo ũrĩ na mwana kana mũrutwo wa Bibilia ũngĩagĩrĩra gũtuĩka mũhunjia, aranĩria o na ihenya na mũtabarĩri wa kĩama gĩa athuri. Na githĩ to tũkene mũno kũnyitanĩra nao kũhunjia mweri-inĩ ũcio wa mwanya! O na gũtuĩka mapainia aingĩ a hĩndĩ ciothe nĩ mahurũkaga mweri wa Agosti thutha wa kũhingia mathaa mao ma o mwaka, no magarũrĩre mĩbango yao nĩguo makanyitanĩra na ahunjia arĩa angĩ hĩndĩ ya kambĩini ĩyo ya mwanya. Rĩrĩ nĩrĩo ihinda rĩa famĩlĩ kũbanga ũrĩa makaanyitanĩra na ahunjia arĩa angĩ ‘makĩanĩrĩra rĩanĩrĩra inene mũno rĩa kũgooca Jehova,’ rĩrĩa rĩgaakorũo kuo mweri wa Agosti.—Ezar. 3:11; Thim. 15:22.

3. Nĩ ũndũ ũrĩkũ tũngĩrĩgĩrĩra ũkoniĩ kambĩini ĩno ya mwanya?

³ O na gũtuĩka twanakorũo na kambĩini ta icio hĩndĩ ĩngĩ, tũrerĩgĩrĩra atĩ ĩno ndĩkariganĩra. Hihi no kũhoteke tũgakorũo na mũigana mwerũ wa mathaa, wa ahunjia, na wa mapainia a gũteithĩrĩria mweri-inĩ wa Agosti? Tũgĩtiriha mwaka wa ũtungata wa 2014, tũkwĩrĩgĩrĩra atĩ Jehova nĩ ekũrathima kĩyo kĩa andũ ake gĩa gũtua Agosti mweri wa mwanya makĩria, wa kũhunjia thĩinĩ wa thĩ yothe!—Mat. 24:14.