Hihi Wee nĩ Ũgũtuĩka Painia wa Gũteithĩrĩria?

1. Nĩkĩ hĩndĩ ya Kĩririkano nĩ ihinda rĩega rĩa kwandandũra ũtungata witũ?

¹ Hĩndĩ ya Kĩririkano nĩ ihinda rĩega rĩa kwandandũra ũtungata witũ. Nĩ twĩririkanagia wendo mũnene ũrĩa Jehova onanirie nĩ kũruta Mũrũwe atũkũũre. (Joh. 3:16) Ũndũ ũcio nĩ ũtũmaga tũgĩe na ngatho nyingĩ ngoro-inĩ citũ, ũkongerera wendi witũ wa kwĩra arĩa angĩ igũrũ rĩgiĩ Jehova na ũrĩa arekĩra andũ. (Isa. 12:4, 5; Luk. 6:45) Ningĩ ihinda-inĩ rĩu nĩ tũkenagĩra gũkorũo na kambĩini ya mwanya ya gwĩta arata na andũ gĩcigo-inĩ gitũ nĩguo moke Kĩririkano-inĩ. Thutha ũcio nĩ tũgeragia gũkũria wendi wa arĩa moka. Hihi nĩ ũkaandandũra ũtungata waku na njĩra ya gũtuĩka painia wa gũteithĩrĩria mweri wa Machi, Ĩpuro, kana Mĩĩ?

2. Nĩkĩ Machi nĩ mweri mwega harĩ mũndũ gũtuĩka painia wa gũteithĩrĩria?

² Tua Machi Mweri wa Mwanya Harĩ Wee: Machi ũgaakorũo wĩ mweri mwega mũno wa mũndũ gũtuĩka painia wa gũteithĩrĩria. Arĩa makeyandĩkithia no mathuure kũhunjia mathaa 30 kana 50. Iceera rĩa mũrori wa mũthiũrũrũko rĩngĩringana na Machi, mapainia a gũteithĩrĩria no makorũo kuo mũcemanio-inĩ wothe ũrĩa ekaga na mapainia a hĩndĩ ciothe na a mwanya. Kambĩini ya gwĩta andũ Kĩririkano-inĩ, kĩrĩa gĩgeekwo Njumaine, Machi 26, 2013, nĩ ĩraiha-raihĩtio gũkĩra ya mĩaka ĩrĩa mĩhĩtũku na ĩkaambĩrĩria Machi 1. Makĩria ma ũguo, Machi ĩgaakorũo na mĩthia ĩtano ya ciumia. Kwoguo-rĩ, githĩ ti wega wĩcirie kana no ũnyitanĩre harĩ gũtua mweri ũcio ũrĩa wa mwanya biũ mwaka ũyũ?

3. Tũngĩbanga maũndũ atĩa nĩguo tuongerere ũtungata witũ?

³ Ambĩrĩria Kwĩbanga: Rĩrĩ nĩrĩo ihinda rĩa gũthuthuria maũndũ maku nĩguo wone nĩ mogarũrũku marĩkũ marabatarania nĩguo ũhote gũtuĩka painia. Ũnyitanĩri thĩinĩ wa famĩlĩ nĩ wa bata, kwoguo hũthĩrai ihinda hĩndĩ ya Ũthathaiya wanyu wa Famĩlĩ kwarĩrĩria mĩoroto yanyu na kũbanga maũndũ. (Thim. 15:22) Ũngĩkaremwo nĩ gũtuĩka painia wa gũteithĩrĩria-rĩ, ndũkanakue ngoro. Hihi no ũgarũrĩre mĩbango yaku nĩguo ũkahũthĩra mathaa mainga-ingĩ mĩthenya ĩrĩa ũthiaga kũhunjia? Hihi no wongerere mũthenya ũngĩ ũmwe wa kũhunjia harĩ kiumia?

4. Nĩ ũguni ũrĩkũ ũkoimana na kwandandũra ũtungata witũ mweri wa Machi, Ĩpuro, na Mĩĩ?

⁴ O ũrĩa tũkandandũra ũtungata witũ mweri wa Machi, Ĩpuro, na Mĩĩ, noguo tũkaagĩa na gĩkeno na kũiganĩra kũrĩa kuumanaga na gũtungatĩra Jehova o hamwe na kũheana. (Joh. 4:34; Atũm. 20:35) Ũndũ ũrĩa wa bata makĩria nĩ atĩ, kĩyo gitũ gĩa kwĩima nĩ gĩgaakenia Jehova.—Thim. 27:11.