Reke Gĩkeno Gĩaku Kĩongerereke Ihinda-inĩ Rĩrĩ rĩa Kĩririkano
1. Ũndũ ũmwe ũngĩongerera gĩkeno gĩaku ihinda-inĩ rĩrĩ rĩa Kĩririkano nĩ ũrĩkũ?
1 Hihi no wende gĩkeno gĩaku kĩongerereke mweri-inĩ wa Machi, Ĩpuro, na Mĩĩ? Ũndũ ũmwe ũngĩongerera gĩkeno gĩaku, nĩ kwandandũra ũtungata waku, na kũngĩhoteka ũtungatĩre ũrĩ painia wa gũteithĩrĩria. Ũndũ ũcio ũkuongerera gĩkeno gĩaku na njĩra ĩrĩkũ?
2. Kwandandũra ũtungata kũngĩongerera gĩkeno giitũ na njĩra ĩrĩkũ?
2 Reke Gĩkeno Gĩaku Kĩongerereke: Jehova atũmbĩte ũndũ tũrĩhotaga kũgĩa na gĩkeno na kũiganĩra kũrĩa kuumanaga na kũmũthathaiya rĩrĩa tũrahingia mabataro maitũ ma kĩĩroho. (Mat. 5:6) Ningĩ aatũmbire ũndũ tũrĩgĩaga na gĩkeno nĩ ũndũ wa kũheana. (Atũm. 20:35) Wĩra wa kũhunjia nĩ ũtũteithagia kũhingia maũndũ macio merĩ—gũthathaiya Ngai, na gũteithia andũ arĩa angĩ. Ma nĩ atĩ, kwandandũra ũtungata witũ nĩ gũtũmaga gĩkeno giitũ kĩongerereke. Ningĩ, o ũrĩa tũrahunjia maita maingĩ, noguo ũhoti witũ wa kũrutana ũkũraga. Na o ũrĩa tũrakũria ũhoti ũcio, noguo tũgĩaga na ũmĩrĩru na tũgathirathirũo nĩ guoya. Hĩndĩ ta ĩyo nĩ tũkoragwo na mĩeke mĩingĩ ya kũhunjia na kwambĩrĩria kũruta andũ Bibilia. Maũndũ macio mothe nĩ matũmaga ũtungata ũgĩe na cama makĩria.
3. Machi na Ĩpuro ĩgaakorũo ĩrĩ mĩeri mĩega ya gũtuĩka painia wa gũteithĩrĩria nĩkĩ?
3 Machi na Ĩpuro ĩgũkorũo ĩrĩ mĩeri mĩega mũno ya gũtuĩka painia wa gũteithĩrĩria tondũ no tũthuure kũhunjia mathaa 30 kana 50. Makĩria ma ũguo, kwambĩrĩria Njuuma ya Machi 22 nginya mũthenya wa Kĩririkano Njumatatũ Ĩpuro 14, nĩ tũgaakorũo na wĩra wa mwanya wa kũnyita andũ ũgeni magooka Kĩririkano. Nĩ gũgaakorũo na gĩkeno kĩnene thĩinĩ wa ciũngano, tondũ ahunjia aingĩ magaakorũo makĩrutithania wĩra marĩ ‘kĩrĩko kĩmwe’ nĩguo mahunjie gĩcigo kĩnene o ũrĩa kũngĩhoteka thĩinĩ wa ihinda rĩu.—Zef. 3:9.
4. Mũndũ angĩenda gũtuĩka painia wa gũteithĩrĩria-rĩ, agĩrĩirũo gwĩka atĩa?
4 Wĩhaarĩrie: Angĩkorũo ndwĩharĩirie-rĩ, rora maũndũ maku nĩguo wone nĩ mogarũrũku marĩkũ ũngĩka nĩguo wandandũre ũtungata waku, mweri ũmwe kana makĩria ihinda-inĩ rĩa Kĩririkano. Hoya igũrũ rĩgiĩ ũndũ ũcio. (Jak. 1:5) Aria ũndũ ũcio na andũ a famĩlĩ yanyu na arĩa angĩ thĩinĩ wa kĩũngano. (Thim. 15:22) Nĩ ũkuona atĩ, o na ũrĩ na mathĩna ma mwĩrĩ kana mĩhangʼo mĩingĩ, o nawe no ũgĩe na gĩkeno kĩrĩa kiumanaga na gũtuĩka painia wa gũteithĩrĩria.
5. Moimĩrĩro nĩ marĩkũ tũngĩandandũra ũtungata witũ hĩndĩ ya Kĩririkano?
5 Jehova endaga ndungata ciake ikoragwo na gĩkeno. (Thab. 32:11) Twerutanĩria kwandandũra ũtungata witũ ihinda-inĩ rĩrĩ rĩa Kĩririkano, gĩkeno giitũ nĩ gĩkuongerereka na ningĩ nĩ tũgũkenia Ithe witũ wa igũrũ.—Thim. 23:24; 27:11.