Ihinda rĩa Kĩririkano nĩ Mweke wa Kuongerera Ũtungata!
1. Twagĩrĩirũo gwĩciria ũrĩa tũngĩongerera ũtungata witũ mweri wa Gatatũ, wa Kana, na wa Gatano nĩkĩ?
1 Ihinda rĩrĩ rĩũkĩte rĩa Kĩririkano-rĩ, hihi no wongerere mahinda marĩa ũhũthagĩra ũtungata-inĩ? Ahunjia aingĩ magaakorũo marĩ rũtha kuuma wĩra-inĩ kana cukuru na no mahũthĩre mahinda macio ũtungata-inĩ. Kwambĩrĩria Ĩpuro 2, nĩ tũgakorũo na wĩra wa mwanya wa gwĩta andũ Kĩririkano kĩrĩa tũgakorũo nakĩo Ĩpuro 17. Thutha ũcio-rĩ, nĩ tũkageria gũkũria wendi wa arĩa magooka Kĩririkano na tũmanyite ũgeni magooka gũthikĩrĩria mĩario ya mwanya ĩrĩa ĩkaheanwo kiumia kĩa Ĩpuro 25. Hatarĩ nganja, kũrĩ na itũmi nyingĩ cia gũtũma twĩcirie kuongerera ũtungata witũ mweri wa Gatatũ, wa Kana, na wa Gatano.
2. Njĩra ĩmwe njega ya kwandandũra ũtungata witũ nĩ ĩrĩkũ?
2 Ũpainia-wa-Gũteithĩrĩria: Njĩra ĩmwe njega ya kwandandũra ũtungata witũ nĩ gũtuĩka painia-wa-gũteithĩrĩria. Tondũ ithuothe nĩ tũkoragwo na maũndũ maingĩ ma gwĩka-rĩ, gũtungata tũrĩ painia nĩ gũkũbatara tũbange maũndũ kabere na tũgarũrĩre mwĩkĩre witũ wa maũndũ. (Thim. 21:5) No wambe ũtige gwĩka maũndũ marĩa matarĩ ma bata mũno marĩa wĩkaga. (Afil. 1:9-11) Hihi no wĩre arĩa angĩ thĩinĩ wa kĩũngano wendi waku wa gũtuĩka painia na ũmoorie kana no manyitanĩre nawe o nao matuĩke mapainia-a-gũteithĩrĩria?
3. Famĩlĩ cingĩbanga atĩa kuongerera ũtungata?
3 Hĩndĩ ya hwaĩ-inĩ wa Ũthathaiya wa Famĩlĩ ũrĩa ũrũmĩrĩire-rĩ, no akorũo arĩ wega mwarĩrĩrie mĩoroto yanyu mũrĩ ta famĩlĩ. (Thim. 15:22) Inyuothe thĩinĩ wa famĩlĩ mũngĩrutithania wĩra hamwe-rĩ, hihi amwe a famĩlĩ yanyu no matuĩke mapainia-a-gũteithĩrĩria mweri ũmwe kana makĩria. Ĩ mũngĩona atĩ ũndũ ũcio ndũngĩhoteka? Famĩlĩ no ĩbange kuongerera ũtungata wao na njĩra ya kũhunjia hwaĩ-inĩ kana kũhunjia mathaa maingaingĩ mĩthenya ya Njuuma na Kiumia.
4. Nĩ irathimo irĩkũ tũkoona tuongerera ũtungata witũ ihinda rĩa Kĩririkano?
4 Jehova nĩ onaga maũndũ marĩa mothe twĩkaga tũkĩmũtungatĩra na nĩ akenagio nĩ kwĩima gwitũ. (Ahib. 6:10) Kwĩheana gwitũ harĩ Jehova na andũ arĩa angĩ nĩ kũrehaga gĩkeno. (1 Maũ. 29:9; Atũm. 20:35) Hihi no wongerere ũtungata waku ihinda rĩrĩ rĩa Kĩririkano na wone gĩkeno na irathimo nyingĩ nĩ ũndũ wa gwĩka ũguo?