Wĩgerekanie na Anabii—Zefania
1. Zefania aheanaga ndũmĩrĩri ya Jehova ihinda-inĩ rĩatariĩ atĩa, na twagĩrĩirũo nĩ kwĩgerekania nake nĩkĩ?
1 Gatagatĩ-inĩ ga karine ya mũgwanja mbere ya Kristo, ũthathaiya wa Baali nĩ watheremete mũno Juda. Mũthamaki mũũru wetagwo Amoni akoretwo oragwo, na Mũthamaki Josia ũrĩa warĩ mwĩthĩ nĩwe wathanaga. (2 Maũ. 33:21–34:1) Kĩhinda-inĩ kĩu, nĩrĩo Jehova aatũmire Zefania akaheane ndũmĩrĩri yake ya ituĩro. O na gũtuĩka Zefania aarĩ wa rũrĩrĩ rwa Juda rũrĩa rwathanaga, ndaahũthirie ndũmĩrĩri ĩyo ya Jehova ya kũmenereria wathani wa Juda. (Zef. 1:1; 3:1-4) O na ithuĩ twagĩrĩirũo nĩ kwĩrutanĩria gũkũria ngumo ta ya Zefania ya ũcamba, na kwaga kũreka andũ a famĩlĩ maingĩrĩre ũthathaiya witũ harĩ Jehova. (Mat. 10:34-37) Nĩ ndũmĩrĩri ĩrĩkũ Zefania aaheanaga, na aagĩire na moimĩrĩro marĩkũ?
2. Twagĩrĩirũo kuoya ikinya rĩrĩkũ nĩguo tũkaahithwo mũthenya wa marakara ma Jehova?
2 Caria Jehova: Jehova no we ũngĩhota kũhonokia andũ mũthenya wa marakara make. Nĩkĩo Zefania aahatĩrĩirie andũ a Juda macarie Jehova, macarie ũthingu, na macarie ũhoreri ihinda rĩtanathira. (Zef. 2:2, 3) Ũmũthĩ noguo kũhaana. O ta Zefania, twĩkĩraga andũ ngoro macarie Jehova, ĩndĩ o na ithuĩ no mũhaka twĩke o taguo, na twĩrutanĩrie tũtigatuĩke arĩa “macokaga na thutha magatiga kũrũmĩrĩra Jehova.” (Zef. 1:6) Handũ ha ũguo, tũcaragia Jehova na njĩra ya kwĩruta Kiugo gĩake na kĩyo, na kũmũhoya atũtongoragie. Tũcaragia ũthingu na njĩra ya gũkorũo na mĩthiĩre ĩrĩa yagĩrĩire. Tũcaragia ũhoreri na njĩra ya kwĩnyihia, na gũikaraga twĩhaarĩirie gwathĩkĩra ũtongoria o wothe wa ithondeka rĩa Jehova.
3. Twagĩrĩirũo nĩ gũkorũo na mwerekera ũrĩa wagĩrĩire wĩgiĩ ũtungata nĩkĩ?
3 Moimĩrĩro Mega: Ndũmĩrĩri ya ituĩro ĩrĩa Zefania aaheanaga nĩ yatũmire andũ amwe moe ikinya, na makĩria ĩgĩtũma Josia ũrĩa warĩ mwĩthĩ aambĩrĩrie gũcaria Jehova arĩ o kahĩĩ kanini. Thutha-inĩ Josia akĩoya ikinya rĩa kweheria ũthathaiya wa mĩhianano bũrũri-inĩ wa Juda. (2 Maũ. 34:2-5) O na gũtuĩka ũmũthĩ mbeũ ya Ũthamaki ĩrĩa tũhuraga nĩ ĩgũaga mũkĩra-inĩ wa njĩra, mahiga-inĩ, na mĩigua-inĩ, nĩ ĩrĩgũaga tĩri-inĩ mũnoru na ĩgaciara. (Mat. 13:18-23) Tũrĩ na ma atĩ, Jehova nĩ egũthiĩ na mbere kũrathima kĩyo giitũ tũkĩĩrutanĩria kũhanda mbeũ ya Ũthamaki.—Thab. 126:6.
4. Twagĩrĩirũo nĩ ‘gũikaraga twetereire’ Jehova nĩkĩ?
4 Andũ amwe a Juda meeciragia atĩ Jehova ndarĩ hingo akoya ikinya. O na kũrĩ ũguo, Jehova nĩ aamerire na ma atĩ mũthenya wake warĩ hakuhĩ. (Zef. 1:12, 14) Arĩa meehokete rĩĩtwa rĩake no o tu mangĩahonokire. (Zef. 3:12, 17) Nĩ tũgĩkenagĩre gũtungata tũrĩ hamwe na athathaiya arĩa angĩ a Ngai witũ, o ‘tũgĩikaraga twetereire’ Jehova!—Zef. 3:8, 9.