Hũthĩra Menya Kĩrĩa Kĩrĩ Kiugo-inĩ kĩa Ngai—Kwambĩrĩria Ndeereti
1. Nĩ ũteithio ũrĩkũ mwerũ tũrĩ naguo wa gũtũteithia ũtungata-inĩ?
1 Kĩgomano-inĩ gĩa thikũ ithatũ gĩa “Caragiai Ũthamaki wa Ngai Mbere,” nĩ twarutĩirũo kabuku getagwo Menya Kĩrĩa Kĩrĩ Kiugo-inĩ kĩa Ngai. Tũngĩhũthĩra atĩa kabuku kau kerũ kwĩhaarĩrĩria nĩ ũndũ wa ũtungata? O ta ibuku rĩa Kutoa Sababu, kabuku gaka karĩ na ciongo itiganĩte cia morutani ma Bibilia na maandĩko makoniĩ morutani macio, kwoguo no gatũteithie mũno kwambĩrĩria ndeereti.
2. Tũngĩhũthĩra atĩa ũhoro ũrĩa ũrĩ thĩinĩ wa Menya Kĩrĩa Kĩrĩ Kiugo-inĩ kĩa Ngai ũtungata-inĩ?
2 No ũhũthĩre kĩũria gĩa 8 na uuge ũũ: “Tũracerera andũ na njĩra nguhĩ tũkĩarĩrĩria kĩũria gĩkĩ, ‘Hihi Ngai nĩwe ũtũmaga andũ manyamarĩke?’ [Icigo-inĩ imwe, nĩ wega kuonia mwene nyũmba kĩũria kuuma ibuku-inĩ.] Ũngiuga atĩa? [Eterera acokie.] Bibilia nĩ ĩcoketie kĩũria kĩu.” Thoma na warĩrĩrie rĩandĩko na arĩ rĩmwe rĩa marĩa monanĩtio, ĩmwe kwa ĩmwe kuuma Bibilia-nĩ. Ũrĩa ũrahunjĩria angĩonania gũkenio nĩ ũhoro, no ũmuonie ciũria ciothe 20 iria cionanĩtio kĩambĩrĩria-inĩ, na ũmũũrie athuure kĩmwe mũkaarĩrĩria hĩndĩ ĩyo ĩngĩ. Kana ũmũtigĩre rĩmwe rĩa mabuku marĩa tũhũthagĩra kwĩruta na andũ Bibilia, rĩrĩa rĩarĩrĩirie ũhoro ũcio makĩria.
3. Tũngĩhũthĩra atĩa ũhoro ũrĩa ũrĩ thĩinĩ wa Menya Kĩrĩa Kĩrĩ Kiugo-inĩ kĩa Ngai tũkĩaria na andũ matetĩkĩtie Ũkristiano?
3 Ũkĩaria na andũ matetĩkĩtie Ũkristiano, no ũhũthĩre kĩũria gĩa 4 na gĩa 13 nginya 17. Kwa mũhiano, no ũhũthĩre kĩũria gĩa 17 na uuge ũũ: “Tũracerera andũ na njĩra nguhĩ tũkĩarĩrĩria ũhoro wĩgiĩ famĩlĩ. Hihi wee nĩ wonete atĩ ũmũthĩ famĩlĩ irĩ na mathĩna maingĩ? [Eterera acokie.] Famĩlĩ nyingĩ nĩ cionete ũtaaro ũyũ ũgĩciteithia mũno: “Mũtumia ndakaage gwĩtigĩra mũthuriwe.” [To mũhaka uuge atĩ ũtaaro ũcio ũrĩ thĩinĩ wa Aefeso 5:33. Angĩkorũo ũrahunjĩria mũtumia, no ũgwete ciugo iria irĩ thĩinĩ wa Aefeso 5:28 o ũrĩa ciandĩkĩtwo Bibilia-inĩ.] Hihi nĩ ũkuona kũhũthĩra ũtaaro ũcio ta kũngĩteithia famĩlĩ?”
4. Nĩ ũndũ ũrĩkũ ũngĩka mũkĩrĩkĩrĩria kwaria na mũndũ ũtetĩkĩtie Ũkristiano?
4 Ũtanamũtiga, banga ũrĩa ũngĩmũcokera hĩndĩ ĩyo ĩngĩ nĩguo mũtwarithie ndeereti na mbere. No ũthuure gũkaarĩrĩria rĩandĩko rĩmwe rĩa macio mangĩ marĩ rungu rwa kĩũria kĩrĩa mũkwaragĩrĩria. Ihinda rĩrĩa rĩagĩrĩire rĩakinya, reke mwene nyũmba amenye atĩ motaaro macio mothe mwaragĩrĩria nake moimĩte Bibilia-inĩ. Wathima kũringana na ndeereti iria mũkoretwo nacio, o hamwe na ũrĩa onaga Bibilia, mũtigĩre ibuku rĩrĩa ũkuona rĩngĩmũkenia.—Rora karatathi ga thĩinĩ ka Ũtungata Witũ wa Ũthamaki wa Dicemba 2013.