Gathandũkũ Gaitũ ka Indo cia Kũrutana
1. Nĩ na njĩra ĩrĩkũ ahunjia mahanaine na aturi?
1 Andũ arĩa maturaga indo nĩ mahũthagĩra indo itiganĩte. O na gũtuĩka mabataraga indo imwe nĩ ũndũ wa wĩra mũna, nĩ kũrĩ indo ingĩ mahũthagĩra kaingĩ. Hingo ciothe aturi arĩa marĩ ũmenyeru mũingĩ nĩ makoragwo makuuĩte indo iria mahũthagĩra kaingĩ tũthandũkũ-inĩ twao, na indo icio nĩcio makoragwo na ũmenyeru mũingĩ wa kũhũthĩra. Bibilia nĩ ĩkĩraga ngoro Mũkristiano o wothe akorũo na kĩyo ũtungata-inĩ na arĩ “mũruti wa wĩra ũtaconokaga nĩ ũndũ wa wĩra ũrĩa arutaga.” (2 Tim. 2:15) Nĩ kĩndũ kĩrĩkũ kĩa bata mũno gathandũkũ-inĩ gaitũ? Nĩ Kiugo kĩa Ngai na nĩkĩo tũhũthagĩra ‘gũtua andũ arutwo.’ (Mat. 28:19, 20) Nĩ ũndũ ũcio, twagĩrĩirũo kwĩrutanĩria gũtuĩka andũ ‘marutanaga ũhoro wa ma marũngĩrĩirie.’ O na kũrĩ ũguo, gathandũkũ-inĩ gaitũ ka indo cia kũrutana, nĩ kũrĩ indo ingĩ tũhũthagĩra kaingĩ na Akristiano othe magĩrĩirũo kwĩruta gũcihũthĩra na njĩra njega nĩguo marute andũ ũhoro ũrĩa wa ma.—Thim. 22:29.
2. Nĩ indo irĩkũ tũhũthagĩra kaingĩ kũrutana?
2 Indo Iria Tũhũthagĩra Kaingĩ Kũrutana: Tiga Bibilia-rĩ, nĩ kĩĩ kĩngĩ twagĩrĩirũo kũhũthĩra? Kĩndũ kĩrĩa tũhũthagĩra kaingĩ kũrutana ma cia Bibilia nĩ Bibilia Ĩrutanaga Atĩa Kũna? Twarĩkia kwĩruta ibuku rĩu na mũrutwo, tũcokaga tũkeruta nake ‘Mwĩigei Wendo-inĩ wa Ngai’ nĩguo tũmũteithie kũhũthĩra ũtaaro wa Bibilia ũtũũro-inĩ wake wa o mũthenya. Nĩ ũndũ ũcio, twagĩrĩirũo kwĩmenyeria kũhũthĩra mabuku macio merĩ wega. Ningĩ nĩ twagĩrĩire gũkorũo na broshua imwe gathandũkũ-inĩ gaitũ ka indo cia kũrutana. Broshua Ũhoro Mwega Kuuma Kũrĩ Ngai! nĩ ĩmwe ya indo iria tũhũthagĩra kwambĩrĩria kwĩruta Bibilia na andũ. Angĩkorũo gĩcigo-inĩ gitũ gĩa kũhunjia nĩ kũrĩ andũ matarĩ ũhoti mũnene wa gũthoma kana maaragia rũthiomi tũtarĩ mabuku maingĩ ma ruo kana o na tũtirĩ, no tũhũthĩre broshua Thikĩrĩria Ngai kana Thikĩrĩria Ngai na Ũtũũre Tene na Tene. Kĩndũ kĩmwe gĩa kũrutana kĩrĩa tũhũthagĩra kaingĩ kwerekeria arutwo thĩinĩ wa ithondeka nĩ Nĩa Mareka Wendi wa Jehova Ũmũthĩ? Video ingĩtũteithia gũtua andũ arutwo na twagĩrĩirũo kwĩruta kũhũthĩra nĩ ta, Wagĩrĩirũo Kwĩruta Bibilia Nĩkĩ?, Nĩ Maũndũ Marĩkũ Mekagwo Nyũmba-inĩ ya Ũthamaki?, na Ngai Hihi nĩ arĩ Rĩĩtwa?
3. Icunjĩ cia Ũtungata Witũ wa Ũthamaki irĩtũteithagia gwĩka atĩa?
3 Thĩinĩ wa Ũtungata Witũ wa Ũthamaki nĩ tũrĩkoragwo na icunjĩ cia gũtũteithia gũkorũo na ũmenyeru wa kũhũthĩra mabuku maingĩ marĩa tũkoragwo namo gathandũkũ-inĩ gaitũ ka indo cia kũrutana. O ũrĩa tũgũthiĩ tũkĩĩrutanagĩria kũhũthĩra indo ici na njĩra njega, noguo tũgũkorũo tũkĩrũmĩrĩra ũtaaro ũyũ: “Wĩmenyagĩrĩre wee mwene, na ũmenyagĩrĩre ũrutani ũrĩa ũrutanaga. Tũũra o wĩkaga maũndũ macio: nĩ ũndũ weka ũguo nĩũkwĩhonokia wee mwene, o na andũ arĩa makũiguaga.”—1 Tim. 4:16.