Hunjagĩria ‘Andũ a Mĩthemba Yothe’
1. Ahunjia marĩ na ũhoti matariĩ ta mũturi njorua atĩa?
1 Mũturi njorua akoragwo na indo nyingĩ cia ũturi, na nĩ oĩ rĩrĩa angĩhũthĩra na ũrĩa angĩhũthĩra o kĩmwe gĩacio. No taguo, tũkoragwo na indo itiganĩte cia gũtũteithia kũruta wĩra witũ tũrĩ ahunjia. Kwa ngerekano, broshua ciarĩrĩirie maũndũ ma mĩthemba mĩingĩ nĩ irutĩtwo cia gũtũteithia kũhunjĩria ‘andũ a mĩthemba yothe.’ (1 Kor. 9:22) Karatathi ga thĩinĩ ka riuma rĩrĩ rĩa Ũtungata Witũ wa Ũthamaki nĩ konanĩtie broshua imwe, gagataarĩria ihaarĩrĩirio nĩ ũndũ wa andũ arĩkũ, na gakonania ũrĩa broshua icio ingĩheanwo.
2. Nĩ hĩndĩ ĩrĩkũ tũngĩhũthĩra broshua ũtungata-inĩ?
2 Rĩrĩa Tũngĩhũthĩra Broshua: Mũturi ahũthagĩra kĩndũ hĩndĩ o yothe ĩrĩa kĩagĩrĩire. O na ithuĩ, no tũheane broshua hĩndĩ o yothe rĩrĩa tuona atĩ mũndũ no agunĩke, to rĩrĩa tu ĩngĩkorũo nĩyo ĩraheanwo mweri ũcio. Kwa ngerekano-rĩ, angĩkorũo mweri ũcio tũraheana ibuku rĩa Bibilia Ĩrutanaga tũkĩhunjia kũndũ gũtarĩ kwa Akristiano kũrĩa andũ aingĩ matangĩkenio nĩ Bibilia, no hakorũo arĩ wega kũheana broshua, na thutha wa gũteithia mũndũ ũcio ende ũhoro tũmwonie ibuku rĩa Bibilia Ĩrutanaga.
3. Twagĩrĩirũo nĩ gũkũria ũhoti witũ wa kũhũthĩra indo ciitũ cia kũhunjia nĩkĩ?
3 Maandĩko nĩ magathagĩrĩria arĩa marutaga wĩra wao na ũũgĩ. (Thim. 22:29) Hatarĩ nganja, ũmũthĩ gũtirĩ wĩra ũngĩ wa bata gũkĩra wĩra mũtheru wa “ũhoro ũrĩa mwega.” (Rom. 15:16) Nĩguo tũtuĩke ‘aruti wĩra matarĩ na ũndũ ũngĩmaconora,’ tũgũthiĩ na mbere kwĩrutanĩria gũkũria ũhoti wa kũhũthĩra indo ciitũ cia wĩra.—2 Tim. 2:15.