Teithia Andũ Mathikĩrĩrie Ngai
1. Nĩ broshua irĩkũ ciarutirũo Kĩrũrũngano-inĩ kĩa Ngʼongo kĩa ‘Ũthamaki wa Ngai nĩ Ũũke!’, na nĩ ũndũ ũrĩkũ ũtũmaga ikorũo irĩ cia bata?
1 Kĩrũrũngano-inĩ kĩa Ngʼongo kĩa ‘Ũthamaki wa Ngai nĩ Ũũke!’ broshua igĩrĩ njerũ nĩ ciarutirũo, Thikĩrĩria Ngai na Ũtũũre Tene na Tene na caba ĩrĩa hũthie ya Thikĩrĩria Ngai. Tondũ broshua icio itirĩ na ciugo nyingĩ, no itaũrũo na ihenya ningĩ na njĩra hũthũ. Ũrĩa kũrĩ nĩ atĩ, broshua ya Thikĩrĩria Ngai na Ũtũũre Tene na Tene yetĩkĩririo gũtaũrũo na thiomi 431 rĩrĩa yaarutirũo.
2. Nĩ a mekũgunĩka nĩ broshua icio?
2 Nĩ a mekũgunĩka nĩ broshua icio? Wĩcirie ũhoro wa maũndũ maya monekaga kaingĩ thĩinĩ wa thĩ:
• Mũhunjia ũraranĩria na mwene nyũmba, hihi akĩaria nake riita rĩa mbere kana amũcokerete, akamenya atĩ mwene nyũmba ti mũthomu kana ndoĩ gũthoma wega.
• Mũhunjia ũrahunjĩria andũ maragia rũthiomi tũtaũrĩte mabuku manini naruo kana tũtataũrĩte o na rĩmwe. Kana andũ arĩa aingĩ gĩcigo-inĩ kĩu makorũo matingĩhota gũthoma rũthiomi rũrĩa mahotaga kwaria wega.
• Mũhunjia ũhũthagĩra rũthiomi rwa kwaria na ciĩko kũhunjĩria arĩa matarĩ ũhoti wa kũigua gĩcigo-inĩ kĩao.
• Mũciari ũrerirĩria kũruta kaana gake kanini karĩa gatarĩ karamenya gũthoma.
3. Broshua ya Thikĩrĩria Ngai ĩharĩrĩirio atĩa?
3 Ũrĩa Ciharĩrĩirio: Thikĩrĩria Ngai ndĩrĩ na ciugo nyingĩ, o karatathi karĩ na kohoro kanini na Rĩandĩko hau mũhuro rĩrĩa rĩonanĩtie maũndũ marĩa mekĩrĩirũo mũno. Nĩkĩ hihi? Ta wĩcirie mũndũ akũheete broshua yandĩkĩtwo na rũthiomi ũtangĩhota gũthoma, na hihi ĩrĩ na ndemwa ngʼeni harĩ wee. Hihi no ũkenio nĩyo, o na ĩngĩkorũo na mbica thaka? Kwahoteka ca. No taguo andũ arĩa matoĩ gũthoma mahiũhaga gwĩtigĩra ibuku rĩna ciugo. Nĩ ũndũ ũcio, o karatathi karĩ na mbica ihaarĩrĩirio wega, irĩ na tũmĩguĩ twa gũtongoria ndeereti kuuma mbica ĩmwe nginya ĩrĩa ĩngĩ.
4. Broshua ya Thikĩrĩria Ngai na Ũtũũre Tene na Tene ĩhaarĩrĩirio atĩa?
4 Thikĩrĩria Ngai na Ũtũũre Tene na Tene ĩrĩ na mbica o ta cia Thikĩrĩria Ngai. Ĩhaarĩrĩirio ĩrĩ ya kwĩruta na arĩa moĩ gũthoma o hanini kana mareruta gũthoma. Ningĩ mũrutani no ahũthĩre broshua ĩno akĩĩruta na mũndũ ũrathoma broshua ya Thikĩrĩria Ngai. O ithoma, rĩrĩa rĩrĩ tũratathi-inĩ twĩrĩ, rĩrĩ na kĩũria harĩa igũrũ mwena wa ũmotho, kĩrĩa gĩcoketio tũratathi-inĩ tũu. Mbica nacio irĩ na ũhoro wa gũcitaarĩria o na maandĩko. Tũratathi-inĩ tũingĩ harĩa mũhuro harĩ na gathandũkũ karĩ na rangi mũcamu karĩa karĩ na ũhoro makĩria na Maandĩko mangĩarĩrĩrio, kũringana na ũhoti wa mũrutwo.
5. Nĩ rĩ na nĩ na njĩra ĩrĩkũ tũngĩheana broshua icio?
5 Ũrĩa Tũngĩcihũthĩra: Ũkĩhunjia nyũmba kwa nyũmba, no ũtigĩre mũndũ broshua o yothe harĩ icio rĩrĩa rĩothe wona kwagĩrĩire, o na akorũo ti broshua iratigĩrũo andũ mweri ũcio. (Rora ithandũkũ “Ũrĩa Cingĩheanwo.”) No ũmĩgwete rĩrĩa wacokera mũndũ ũrakenio nĩ ũhoro na njĩra ya kũmwĩra atĩ wĩna kĩndũ ũngĩenda kũmuonia, ũcoke ũmũhe broshua ĩyo.
6. Tũrĩhũthagĩra broshua icio atĩa tũkĩĩruta na andũ Bibilia?
6 Tondũ broshua ya Thikĩrĩria Ngai ndĩrĩ na ciũria icabĩtwo-rĩ, ndeereti ndĩrĩkoragwo ĩrĩ ya ciũria na macokio ta ũrĩa ĩkoragwo rĩrĩa tũrahũthĩra ibuku rĩa Bibilia Ĩrutanaga. Andũ kuuma kũndũ guothe nĩ makenaga gũthikĩrĩria ngʼano. Kwoguo, hũthĩra mbica kũgana ngʼano itongoretio nĩ roho iria ciandĩkĩtwo Bibilia-inĩ. Taarĩria kĩrĩa mbica ĩrũgamĩrĩire. Korũo ũrĩ mũcanjamũku. Ũria mũrutwo ataarĩrie mawoni make. Thoma maandĩko marĩa marĩ mũhuro wa karatathi, na mũmaarĩrĩrie hamwe. Ũria ciũria ingĩtũma mũrutwo eyarie nĩguo ũtigĩrĩre atĩ nĩ aranyita. Angĩkorũo areruta broshua ya Thikĩrĩria Ngai na Ũtũũre Tene na Tene, thomai hamwe kohoro karĩa karingaine na mbica hamwe na maandĩko mũkĩarĩrĩria o mbica.
7. Tũngĩteithĩrĩria atĩa arutwo aitũ a Bibilia gũthiĩ na mbere?
7 Teithĩrĩria Mũrutwo Ũcio Gũthiĩ na Mbere: No gũkorũo ndeereti yaku hamwe na mũrutwo ũcio nĩ ĩgũtũma agĩe na wendi wa kwĩruta gũthoma nĩguo erutage ũhoro wĩgiĩ Jehova we mwene. (Mat. 5:3; Joh. 17:3) Nĩ ũndũ ũcio, mũngĩkorũo mũreruta broshua ya Thikĩrĩria Ngai, thutha wa kahinda no wĩrutĩre kũmũruta gũthoma, na no mwambĩrĩrie kwĩruta broshua ya Thikĩrĩria Ngai na Ũtũũre Tene na Tene. O na mũngĩkorũo mũrathoma broshua ĩrĩkũ, mũrutwo ũcio ndangĩkorũo agĩrĩire kũbatithio mũkĩrĩkia kũmĩthoma. Nĩ mwagĩrĩirũo kwambĩrĩria gũthoma ibuku rĩa Bibilia Ĩrutanaga kana ibuku rĩngĩ rĩagĩrĩru rĩrĩa rĩngĩmũteithia agĩe na ũtaũku makĩria wa Bibilia.
8. Nĩ ũndũ ũrĩkũ ũtũmaga ũcokie ngatho nĩ ũndũ wa broshua icio njerũ tũngĩhũthĩra ũtungata-inĩ?
8 No mũhaka andũ mathikĩrĩrie Mwathani wa igũrũ na thĩ nĩguo magaatũũra tene na tene. (Isa. 55:3) Naguo wendi wa Jehova nĩ atĩ “andũ othe,” nginya arĩa matoĩ gũthoma, merute kũmũthikĩrĩria. (1 Tim. 2:3, 4) Githĩ tũticokagia ngatho nĩ ũndũ wa broshua icio njerũ tũngĩhũthĩra kũruta andũ ũrĩa mangĩthikĩrĩria Ngai!
[Ithandũkũ rĩrĩ karatathi ga 3]
Ũrĩa Cingĩheanwo
Onia mwene nyũmba karatathi ga 2-3, ũcoke uuge: “No wende gũtũũra thĩinĩ wa thĩ ĩtariĩ ũũ? [Eterera acokie.] Maandĩko nĩ meranĩire [kana, ibuku rĩrĩ itheru nĩ rĩĩranagĩra] atĩ ica ikuhĩ Ngai nĩ arĩtũma thĩ ĩno ĩtuĩke kũndũ gũthaka, kwĩna thayũ gũtarĩ ũthĩni o na kana mĩrimũ. Ta rora ũrĩa tũrabatara gwĩka nĩguo tũgaatũũra kuo. [Thoma Isaia 55:3, rĩrĩa rĩonanĩtio harĩa igũrũ karatathi-inĩ ga 3.) Rĩandĩko rĩrĩ rĩtwĩraga ‘tũthengerere’ Ngai na ‘tũmũthikĩrĩrie.’ No tũngĩthikĩrĩria Ngai atĩa?” Humbũria karatathi ga 4-5, na mwarĩrĩrie macokio hamwe nake. Angĩkorũo ndarĩ na ihinda, mũtigĩre broshua ĩyo na ũbange rĩrĩa ũrĩcoka mwarĩrĩrie macokio.