Ũrĩa Tũngĩhũthĩra Indo Iria Irekondetwo?
1. Tiga mabuku-rĩ, nĩ indo irĩkũ ingĩ tũkoragwo nacio ingĩtũguna?
1 Andũ aingĩ nĩ makenaga kũhũthĩra jw.org/ki gũthoma ũhoro wa ma. (Koh. 12:10) O na kũrĩ ũguo-rĩ, hihi we nĩ ũhũthagĩra ũhoro ũrĩa ũrekondetwo? Tondũ indo nyingĩ nĩ irekondetwo, no ũthikĩrĩrie ũhoro mũingĩ mũno thĩinĩ wa website itũ. Indo iria irekondetwo ingĩtũteithia atĩa?
2. Tũngĩhũthĩra ũhoro ũrĩa ũrekondetwo atĩa wĩruti-inĩ witũ kĩũmbe kana wa famĩlĩ?
2 Wĩruti-inĩ Witũ Kĩũmbe Kana wa Famĩlĩ: Gũthikĩrĩria Bibilia ĩrĩa ĩrekondetwo, ngathĩti, kana kĩndũ kĩngĩ hĩndĩ ĩrĩa tũrĩ rũgendo-inĩ kana tũgĩka maũndũ maitũ ma o mũthenya, no gũtũteithie kũhũthĩra mahinda maitũ wega. (Ef. 5:15, 16) Ũthathaiya wa famĩlĩ citũ no wagĩre makĩria angĩkorũo nĩ tũgũthikĩrĩria ũhoro ũrĩa ũrekondetwo tũgĩtwaranaga naguo mabuku-inĩ maitũ. Kũhũthĩra ũhoro ũrĩa ũrekondetwo hĩndĩ ya wĩruti witũ kĩũmbe, no gũtũteithie mũno angĩkorũo nĩ tũrenda kũhota gũthoma wega kana angĩkorũo nĩ tũreruta rũthiomi rũngĩ.
3. Nĩ andũ arĩkũ gĩcigo-inĩ gitũ mangĩgunĩka na ũhoro ũrĩa ũrekondetwo?
3 Ũtungata-inĩ: Andũ arĩa moigaga atĩ matingĩhota gũthoma nĩ ũndũ wa mĩhangʼo thĩinĩ wa gĩcigo gitũ, no gũkorũo no mende gũthikĩrĩria ũhoro ũrĩa ũrekondetwo. O na no tũcemanie na andũ arĩa maaragia thiomi ingĩ na no makenio nĩ ndũmĩrĩri ya Ũthamaki mangĩmĩigua na ‘mwarĩrie wao.’ (Atũm. 2:6-8) Gũthikĩrĩria gũkoragwo kũrĩ ũndũ wa bata mũno ũndũire-inĩ wa kũndũ kũmwe. Kwa ngerekano, thĩinĩ wa ũndũire wa Hmong, andũ nĩ mataaragĩria njiaro ciao maũndũ marĩa maarĩ kuo tene na nĩ cihotaga kũiga ũhoro ũcio meciria-inĩ ma cio. Thĩinĩ wa ũndũire mũingĩ wa Africa andũ nĩ makenaga kwĩruta kũgerera ngʼano.
4. Nĩ ciũria irĩkũ tũngĩyũria rĩrĩa tũrateithia andũ gĩcigo-inĩ gitũ?
4 Hihi gĩcigo-inĩ kĩanyu andũ no magunĩke mangĩthaakĩrũo ũhoro mũrekonde na rũthiomi rwao? Hihi mũndũ no agunĩke tũngĩmũtũmĩra kĩndũ kĩrekondetwo kũgerera e-mail? Hihi no tũrute ũhoro ũrekondetwo wa ibuku rĩna na tũũkobie CD-inĩ, tũcoke tũtigĩre mwene nyũmba o hamwe na ibuku rĩu? Tũngĩtigĩra mũndũ ibuku, broshua, ngathĩti, kana trakti ĩrekondetwo, nĩ twagĩrĩire kũmĩandĩka thĩinĩ wa riboti. Indo iria irekondetwo ihaarĩirio nĩguo itũteithie wĩruti-inĩ wa mũndũ kĩũmbe na harĩ kũhunjia.—1 Kor. 3:6.