Ũrĩa Tũngĩhũthĩra Ibuku rĩa Bibilia Ĩtũrutaga

Ibuku rĩa Bibilia Ĩtũrutaga na rĩa Bibilia Ĩrutanaga nĩ mahanaine. Indo ici cierĩ kuuma gathandũkũ gaitũ ka indo cia kũrutana ikoragwo na ndũmĩrĩri ĩmwe na ibangĩtwo o ũndũ ũmwe. O na kũrĩ ũguo, ibuku Bibilia Ĩtũrutaga rĩhũthagĩra ciugo hũthũ na irataũkĩka. Rĩhaarĩirio nĩ ũndũ wa andũ arĩa matahotaga gũtaũkĩrũo wega nĩ ibuku Bibilia Ĩrutanaga. Handũ ha kũhũthĩra ũhoro muongerere, ibuku Bibilia Ĩtũrutaga nĩ rĩkoragwo na ũhoro mũico-inĩ wa ibuku ũrĩa ũtaaragĩria ciugo imwe na maũndũ mamwe maarĩrĩirio. Icunjĩ itikoragwo na ciũria cia kwambĩrĩria kana gathandũkũ ga ciũria cia gũcokera. Handũ ha ũguo, maũndũ ma kũririkana matirihaga na ũhoro ũrĩa warĩrĩrio gĩcunjĩ-inĩ kĩu. O ta Bibilia Ĩrutanaga, ibuku Bibilia Ĩtũrutaga no rĩheanwo hĩndĩ o yothe, o na angĩkorũo ti rĩo rĩraheanwo mweri-inĩ ũcio. Tũngĩhũthĩra atĩa maũndũ ma mwanya marĩa marĩ thĩinĩ wa ibuku Bibilia Ĩtũrutaga rĩrĩa tũraruta mũndũ Bibilia?

MAŨNDŨ MA KŨRIRIKANA: No tũthiĩ na mbere kũhũthĩra njĩra o ĩrĩa tũmenyerete tũkĩrutana ibuku Bibilia Ĩrutanaga, ya gũthoma ibungo na thutha ũcio tũkoria ciũria. Ĩ angĩkorũo mũrutwo ndaranyita wega, kana akorũo ndoĩ gũthoma wega? Hĩndĩ ta ĩyo no ũhũthĩre ibuku Bibilia Ĩtũrutaga. No mũhũthĩre gĩcunjĩ kĩa maũndũ ma kũririkana ũcoke wĩkĩre mũrutwo ngoro ethomere ũhoro ũrĩa ũrĩ gĩcunjĩ-inĩ kĩu gĩothe. O gacunjĩ thĩinĩ wa maũndũ ma kũririkana no karutanwo na ndagĩka ta 15. Tondũ gacunjĩ ka maũndũ ma kũririkana gatikoragwo na ũhoro mũingĩ ũrĩa ũrĩ gĩcunjĩ-inĩ kĩu, ũrĩa ũrarutana agĩrĩirũo kwĩhaarĩria wega agĩciragia mabataro ma mũrutwo. Angĩkorũo mũgũthoma gĩcunjĩ kĩrĩ gĩothe, no mũhũthĩre gacunjĩ ka maũndũ ma kũririkana gũcokera maũndũ marĩa mweruta.

ŨHORO MŨICO-INĨ WA IBUKU: Ciugo na maũndũ marĩa marĩ gacunjĩ-inĩ gaka mabangĩtwo kũringana na ũrĩa marũmanĩrĩire. Ũrĩa ũrarutana no atue itua rĩa kwarĩrĩria gacunjĩ gaka hĩndĩ ĩrĩa mareruta.