Irathimo Iria Andũ Arĩa Mathĩkagĩra Ngai Monaga

Mũnabii Musa ooigire atĩ tũngĩathĩkagĩra maathani ma Ngai, Ngai nĩ arĩtũrathimaga. (Gũcokerithia Maathani 10:13; 11:27) Tũtiagĩrĩirũo gwathĩkagĩra Ngai tondũ nĩ tũretigĩra ndagatũherithie. Kũmenya ũrĩa Ngai atariĩ nĩkuo gũtũmaga tũmwathĩkĩre nĩ ũndũ wa kũmwenda na gwĩthema gwĩka ũndũ ũngĩtũma arakare. Kiugo kĩa Ngai kiugaga: “Kwenda Ngai nĩ atĩrĩ, tũrũmagĩrĩre maathani make.”—1 Johana 5:3.

No gwathĩkĩra Ngai gũtũrehagĩra irathimo na njĩra irĩkũ? Reke twarĩrĩrie njĩra igĩrĩ.

1. GWATHĨKĨRA NGAI NĨ KŨRĨTŨMAGA TŨGĨE NA ŨŨGĨ

“Niĩ Jehova, nĩ niĩ Ngai waku, o we Ũrĩa ũkũrutaga nĩguo ũgunĩke wee mwene, . . . Ũrĩa ũgũtongoragia njĩra-inĩ ĩrĩa wagĩrĩirũo kũgerera.”—ISAIA 48:17.

Jehova Ngai, o we Mũũmbi witũ nĩ atũĩ na nĩ atũheaga ũtaaro ũrĩa tũrabatara. Angĩkorũo nĩ tũkwenda morutani make matũteithie gũtua matua ma ũũgĩ, nĩ twagĩrĩirũo gũthoma Maandĩko Matheru nĩguo tuone ũrĩa Ngai endaga twĩke, na tũcoke twĩke maũndũ macio.

2. GWATHĨKA NĨ KŨRĨTŨMAGA TŨGĨE NA GĨKENO

“Gũkena-rĩ, nĩ arĩa maiguaga kiugo kĩa Ngai na magakĩrũmia!”—LUKA 11:28.

Andũ aingĩ ũmũthĩ arĩa mathĩkagĩra Kiugo kĩa Ngai nĩ makoragwo na gĩkeno kĩa ma. Kwa ngerekano, ta wĩcirie ũhoro wa mũndũrũme ũmwe bũrũri-inĩ wa Spain warakaraga na ihenya na agakorũo arĩ mũrũrũ mũno harĩ andũ arĩa angĩ o hamwe na mũtumia wake. Mũthenya ũmwe nĩ aathomire maandĩko ma mũnabii Musa akĩona ũrĩa Jusufu mũrũ wa Jakubu aarĩ mũhooreri. Jusufu eendetio arĩ ngombo na akohwo njera na njĩra ĩtarĩ ya kĩhooto, ĩndĩ o na kũrĩ ũguo aatũũrire arĩ mũhooreri, mwendi thayũ, na muohanĩri. (Kĩambĩrĩria, mũrango wa 37-45) Mũndũrũme ũcio kuuma Spain ooigire ũũ: “Gwĩciria ũhoro wa kĩonereria kĩa Jusufu nĩ kwandeithirie gũkorũo ndĩ mũhooreri, mũtugi, na ngĩhota kwĩgirĩrĩria. Ũndũ ũcio nĩ ũndeithĩtie gũkorũo na ũtũũro ũrĩ na gĩkeno.”

Maandĩko Matheru nĩ matuonagia ũrĩa twagĩrĩirũo kwenda andũ arĩa angĩ. Wĩrute ũndũ ũcio na njĩra ndikĩru thĩinĩ wa gĩcunjĩ kĩrĩa kĩrũmĩrĩire.