ŨTŨŨRO WA GĨKRISTIANO
Ũrĩa Ũngĩtuĩka Mũthomi ũrĩ Kĩyo wa Bibilia
Hihi no wende gũkorũo ũrĩ mwĩhokeku hĩndĩ ĩrĩa ũracemania na magerio o ta Danieli? Danieli aarĩ na kĩyo gĩa kwĩruta Kiugo kĩa Ngai, nginya ũrathi ũrĩa mũrikĩru. (Da 9:2) Kwĩruta Bibilia na kĩyo no gũgũteithie ũtũũre ũrĩ mwĩhokeku. Na njĩra ĩrĩkũ? No gũtũme ũkorũo na ma biũ atĩ ciĩranĩro cia Jehova nĩ ikahinga. (Jos 23:14) Ningĩ no gũgũteithie kwenda Ngai makĩria, na ũndũ ũcio no ũtũme wendage gwĩka ũrĩa kwagĩrĩire. (Thab 97:10) Ta wĩcirie ũhoro wa maũndũ maya marũmĩrĩire marĩa mangĩgũteithia gũtuĩka mũthomi ũrĩ kĩyo wa Bibilia.
Nĩ maũndũ marĩkũ ingĩĩruta? Kũhaarĩria mĩcemanio ya kĩũngano nĩ gĩcunjĩ kĩmwe kĩa mũtaratara mwega wa kwĩruta. No ũgunĩke mũno kuumana na ũthomi wa Bibilia wa o kiumia angĩkorũo nĩ ũrĩthuthuragia maũndũ marĩa ũtarataũkĩrũo. Ningĩ andũ amwe nĩ mabangaga kwĩruta makĩria ũhoro wĩgiĩ ũrathi wa Bibilia, maciaro matiganĩte ma roho wa Ngai, ngʼendo cia ũmishonarĩ cia mũtũmwo Paulo, o na kana ũũmbi wa Jehova. Ũngĩgĩa na kĩũria kĩgiĩ Bibilia no ũkĩandĩke handũ, nĩguo ũgaagĩthuthuria hĩndĩ ya wĩruti waku ũrĩa ũrũmĩrĩire.
Ingĩka ũthuthuria kũ? Nĩguo wone kũndũ kũigana ũna kũrĩa ũngĩka ũthuthuria, wĩrorere video, Indo cia Gwĩka Ũthuthuria cia Kũhithũria Mĩthithũ ya Kĩĩroho. Nĩguo wone kana no ũhote kũhũthĩra indo cia gwĩka ũthuthuria, tuĩria nĩ mothamaki marĩkũ marũgamĩrĩirũo nĩ nyamũ iria irĩ thĩinĩ wa Danieli mũrango wa 7.
Njagĩrĩirũo kwĩrutaga ihinda rĩigana atĩa? Kwĩrutaga ũtegũtĩrĩria nĩ kũrĩgũteithagia gũkũra kĩĩroho. No wambĩrĩrie na kwĩrutaga mahinda makuhĩ, ũcoke ũthiĩ ũkĩongagĩrĩra ũraihu wamo kahora kahora. Kwĩruta Kiugo kĩa Ngai nĩ ta kwenjera mĩthithũ mĩhithe; o ũrĩa ũkuona mĩthithũ mĩingĩ, noguo ũkwĩrirĩria kwenja makĩria! (Thi 2:3-6) Wendo waku harĩ Kiugo kĩa Ngai nĩ ũkuongerereka, na kwĩruta Bibilia ũtegũtĩrĩria kũrĩkoragwo kũrĩ mũtaratara waku wa o mũthenya.—1Pe 2:2.
NYAMŨ IRIA IRĨ THĨINĨ WA DANIELI MŨRANGO WA 7 IRŨGAMĨRĨIRE KĨĨ?
KĨŨRIA KĨNGĨ:
Danieli 7:8, 24 yahingire atĩa?
WĨRUTI WAKU ŨRĨA ŨKŨRŨMĨRĨRA:
Nyamũ iria irĩ thĩinĩ wa Kũguũrĩrio mũrango wa 13 irũgamĩrĩire kĩĩ?