ŨRĨA TŨNGĨTOORIA RŨMENA

2 | Ndũkerĩhagĩrie

Ũrutani wa Bibilia:

“Mũtikanarĩhe ũũru na ũũru harĩ mũndũ o na ũrĩkũ. . . . Kũngĩhoteka, ĩkagai o ũrĩa wothe mũngĩhota mũkoragwo na thayũ hamwe na andũ othe. . . . Mũtikanerĩhĩrie, . . . tondũ nĩ kwandĩke ũũ: ‘“Kũrĩhanĩria nĩ gwakwa; nĩ niĩ ngaarĩhanĩria,” ũguo nĩguo Jehova ekuuga.’”—AROMA 12:17-19.

Ũguo nĩ Kuuga Atĩa?

O na gũtuĩka nĩ ũndũ wa ndũire kũrakara rĩrĩa twahĩtĩrio, Ngai ndendaga twĩrĩhĩrie. Handũ ha ũguo, atwĩraga tũkorũo na wetereri, tondũ ica ikuhĩ nĩ ekũrũnga maũndũ mothe.—Thaburi 37:7, 10.

Ũrĩa Ũngĩka:

Rĩrĩa andũ matarĩ akinyanĩru merĩhĩria, ũndũ ũcio ũtũmaga rũmena rũthereme. Kwoguo mũndũ angĩkũhĩtĩria kana agwĩke ũũru, ndũkerĩhĩrie. Geria kwĩgirĩrĩria, na wĩke maũndũ na njĩra ya thayũ. Rĩmwe na rĩmwe, no akorũo arĩ wega kwaga gũtindanĩra na ũndũ ũcio. (Thimo 19:11) O na kũrĩ ũguo, maũndũ-inĩ mamwe, no wone kwagĩrĩire gũcaria ũteithio. Kwa ngerekano, angĩkorũo nĩ wĩkĩtwo ũndũ mũũru ta wa wĩki-naĩ, no ũthuure kũmenyithia borithi kana anene angĩ a thirikari.

Kwĩrĩhĩria no gũtuurithia gũtuurithagia mũndũ

Ĩ hihi kũngĩaga njĩra ya thayũ ya kũniina thĩna ũcio? Kana hihi ũkorũo nĩ wĩkĩte o ũrĩa wothe ũngĩhota kũniina thĩna ũcio no ũkaringa ihiga. Ndũkerĩhĩrie. Gwĩka ũguo no gũthũkia gũgũthũkia maũndũ makĩria. Geria gwĩka ũrĩa wothe ũngĩhota nĩguo ũgirĩrĩrie rũmena rũtigathereme. Wĩrute kwĩhoka atĩ Ngai nĩ arĩniina thĩna ũcio na njĩra yake. Bibilia yugaga: “Mwĩhokage, nake nĩ arĩgũteithagia.”—Thaburi 37:3-5.

Ũndũ Wonetwo—ADRIÁN

Nĩ Aahotire Kwaga Kwĩrĩhĩria

Arĩ mũndũ mwĩthĩ, Adrián aarĩ mũndũ waiyũirũo nĩ rũmena na wendete mbaara nĩguo erĩhĩrie. Aaugire ũũ: “Kaingĩ nĩ ndeingĩranagia na haaro cia mĩcinga, na maita maingĩ ndatigagwo ngomete barabara-inĩ njiyũire thakame ndigĩtie hanini gũkua.”

Adrián nĩ aambĩrĩirie kwĩruta Bibilia arĩ na mĩaka 16. Aaugire ũũ: “O ũrĩa ndathiire na mbere kwĩruta Bibilia, noguo ndonire bata wa kũgarũrĩra.” Nĩ aabataraga gũtooria rũmena na gũtiga kũhũthĩra mbaara akĩgeria kũniina ngucanio. Nĩ aakenirio makĩria nĩ ũrĩa eerutire kuumana na ibuku rĩa Aroma 12:17-19 igũrũ rĩgiĩ kwaga kwĩrĩhĩria. Aaugire ũũ: “Nĩ ndamenyire atĩ Jehova nĩ akaanina wagi wothe wa kĩhooto na njĩra yake, ihinda rĩake rĩakinya. O kahora kahora, ngĩtooria mũtũũrĩre wakwa wa ũhinya.”

Hwaĩ-inĩ ũmwe, Adrián nĩ aatharĩkĩirũo nĩ gĩkundi kĩmwe kĩa andũ ethĩ kĩrĩa kĩarĩ ũthũ na gĩkundi kĩrĩa aatiganĩte nakĩo. Mũtongoria wa gĩkundi kĩu akĩgũthũka akĩmwĩra: “Wĩrũĩrĩre!” Adrián aaugire: “Nĩ ndaiguaga mũno ngĩenda kwĩrĩhĩria.” No handũ ha kwĩrĩhĩria, nĩ aahoire Jehova na njĩra nguhĩ na akĩhota kwehera handũ hau.

Adrián aathiire na mbere kuuga ũũ: “Mũthenya ũyũ ũngĩ, nĩ ndacemanirie na mũtongoria wa gĩkundi kĩu arĩ wiki. Ngĩigua ndĩ na marũrũ maingĩ mũno ngĩenda kwĩrĩhĩria, no o rĩngĩ ngĩhoya Jehova andeithie kwĩgirĩrĩria. Nĩ ndagegire mũno rĩrĩa mwanake ũcio ookire akĩnjĩra: ‘Njohera nĩ ũndũ wa maũndũ marĩa marekĩkire ira hwaĩ-inĩ. Ũhoro wa ma nĩ atĩ, no nyende kũhaana ta we. Ndĩrenda kwĩruta Bibilia.’ Nĩ ndakenire mũno tondũ nĩ ndahotete kũgirĩrĩria marakara makwa! Nĩ ũndũ ũcio, tũkĩambĩrĩria kwĩruta Bibilia nake.”