Kenagĩra Kĩheo Gĩaku kĩa Mahoya

1. Twagĩrĩirũo kũigua atĩa nĩ ũndũ wa mweke ũrĩa tũheetwo wa kwaranĩria na Jehova kũgerera mahoya?

NĨ TŨHEETWO kĩheo kĩa mwanya mũno gĩa kwaranĩria na Mũũmbi wa igũrũ na thĩ kũgerera mahoya. Ta wĩcirie ũndũ ũyũ: No tũitũrũrĩre Jehova ngoro citũ ihinda o rĩothe tũkĩhũthĩra rũthiomi o ruothe, tũtekũbatara kwamba kũhoya rũtha. No tũmũhoe rĩrĩa tũkomete thibitarĩ kana rĩrĩa tuohetwo njera, tũrĩ na ma atĩ Ithe witũ ũrĩ wendo nĩ egũtũthikĩrĩria. Nĩ tũcokagia ngatho mũno nĩ ũndũ wa kĩheo kĩu atũheete.

2. Mũthamaki Daudi oonanirie atĩa atĩ nĩ aakenagĩra kĩheo kĩa mahoya?

² Mũthamaki Daudi nĩ aakenaga nĩ ũndũ wa kĩheo kĩa mahoya. Aaugire ũũ akĩinĩra Jehova: “Reke ihoya rĩakwa rĩkorũo rĩtariĩ ta ũbumba mũhaarĩrie mbere yaku.” (Thab. 141:1, 2) Matukũ-inĩ ma Daudi, ũbumba mũtheru ũrĩa wahũthagĩrũo nĩ athĩnjĩri-Ngai wakoragwo ũhaarĩrĩirio na ũbacĩrĩru mũnene. (Tham. 30:34, 35) Gũkorũo atĩ Daudi aaringithanirie mahoya na ũbumba kũronania atĩ nĩ eendaga gwĩcũrania igũrũ rĩgiĩ maũndũ marĩa ekũgweta akĩhoya Jehova. Ũguo nĩguo o na ithuĩ tũngĩenda gwĩkaga nĩguo mahoya maitũ makenagie Jehova.

3. Twagĩrĩirũo gũkorũo na mwerekera ũrĩkũ rĩrĩa tũrahoya Jehova, na nĩkĩ?

³ Rĩrĩa tũrahoya Jehova twagĩrĩirũo kuonania gĩtĩo kĩnene. Ta wĩcirie ũhoro wĩgiĩ cioneki cia magegania iria Isaia, Ezekieli, Danieli, na Johana moonire. Moonire cioneki ngũrani, no harĩ ũndũ wahaanaine harĩ cioneki icio. Ciothe cionanĩtie Jehova arĩ Mũthamaki mũtũũgĩru. Isaia “[oonire] Jehova aikarĩire gĩtĩ kĩa ũnene kĩrĩ handũ igũrũ na gĩtũũgĩrĩtio.” (Isa. 6:1-3) Ezekieli oonire Jehova aikarĩire ngaari yake ya igũrũ, athiũrũrũkĩirio “nĩ ũtheri mũkengu watariĩ ta wa mũkũnga-mbura.” (Ezek. 1:26-28) Danieli oonire “Ũrĩa Ũtũũraga Kuuma o Tene” ehumbĩte nguo cia rangi mwerũ, na nĩnĩmbĩ cia mwaki ikiuma gĩtĩ-inĩ gĩake kĩa ũnene. (Dan. 7:9, 10) Nake Johana akĩona Jehova aikarĩire gĩtĩ kĩa ũnene, gĩthiũrũrũkĩirio nĩ kĩndũ kĩahaanaga ta mũkũnga-mbura watariĩ ta ihiga rĩa emeradi. (Kũg. 4:2-4) Tũngĩĩcũrania ũrĩa riri wa Jehova ũrĩ mũnene na ũtangĩringithanio na ũngĩ o wothe, nĩ tũrĩririkanaga ũrĩa arĩ mweke wa mwanya kwaranĩria nake kũgerera mahoya na bata wa gwĩka ũguo tũrĩ na gĩtĩo kĩnene. No nĩ maũndũ marĩkũ twagĩrĩirũo kũhoya igũrũ rĩamo?

“NĨ ŨNDŨ ŨCIO, HOYAGAI NA NJĨRA ĨNO”

4. Tũreruta atĩa kuumana na ciugo iria Jesu aagwetire kĩambĩrĩria-inĩ kĩa ihoya rĩa kĩonereria rĩrĩa rĩrĩ thĩinĩ wa Mathayo 6:9, 10?

⁴ Thoma Mathayo 6:9, 10. Hĩndĩ ya Mahunjio ma Kĩrĩma-inĩ, Jesu nĩ aarutire arutwo ake ũrĩa mangĩhoya na njĩra ĩretĩkĩrĩka nĩ Ngai. Thutha wa kuuga “nĩ ũndũ ũcio, hoyagai na njĩra ĩno,” Jesu aambire kũgweta maũndũ ma bata makonainie ĩmwe kwa ĩmwe na muoroto wa Jehova. Maũndũ macio nĩ gũtherio kwa rĩĩtwa rĩa Ngai, gũka kwa Ũthamaki ũrĩa ũkaaniina arĩa othe mareganaga na Ngai, na irathimo iria Jehova akaarehera andũ thĩinĩ wa thĩ mahinda mokĩte. Kũgweta maũndũ ta macio mahoya-inĩ maitũ, nĩ kuonanagia atĩ nĩ tũrona wendi wa Ngai ũrĩ wa bata harĩ ithuĩ.

5. Hihi nĩ wega kũhoya igũrũ rĩgiĩ maũndũ maitũ kĩũmbe?

⁵ Gĩcunjĩ-inĩ kĩu kĩngĩ kĩa ihoya rĩu, Jesu nĩ oonanirie atĩ nĩ wega kũhoya igũrũ rĩgiĩ maũndũ maitũ kĩũmbe. No tũhoe Jehova atũhe irio cia o mũthenya, atuohere mehia maitũ, atũgitĩre kuumana na magerio, na atũhonokie kuuma kũrĩ ũrĩa mũũru. (Mat. 6:11-13) Rĩrĩa twahoya Jehova maũndũ macio, nĩ tuonanagia atĩ nĩ tũĩ nĩ tũbataraga ũteithio kuuma kũrĩ we na atĩ nĩ twendaga kũmũkenia.

6. Hihi maũndũ marĩa magwetetwo ihoya-inĩ rĩa kĩonereria nomo tu twagĩrĩirũo kũhoya igũrũ rĩamo? Taarĩria.

⁶ Jesu ndeerĩgagĩrĩra arũmĩrĩri ake macokagĩre ihoya rĩu rĩa kĩonereria kiugo gwa kiugo. Mahoya-inĩ maingĩ marĩa Jesu aahoire, nĩ aagwetire maũndũ mangĩ ngũrani marĩa aatangĩkagĩra hĩndĩ ĩyo. (Mat. 26:39, 42; Joh. 17:1-26) O ta Jesu, o na ithuĩ no tũhoe igũrũ rĩgiĩ ũndũ o wothe ũratũma tũtangĩke. Hĩndĩ ĩrĩa tũrabatara gũtua itua, no tũhoe Jehova atũhe ũũgĩ na ũtaũku. (Thab. 119:33, 34) Rĩrĩa tũrenda kwambĩrĩria ũtungata mũna mũritũ, no tũhoe tũheo ũmenyo na ũtaũku wa kũũhingia. (Thim. 2:6) Aciari no mahoere ciana ciao, ciana no ihoere aciari a cio, na ithuothe no tũhoere arutwo aitũ a Bibilia na andũ arĩa tũhunjagĩria na nĩ twagĩrĩirũo gwĩka ũguo. No tũtiagĩrĩirũo kũhoya o igũrũ rĩgiĩ maũndũ marĩa tũbataraga tu.

7. Nĩkĩ nĩ twagĩrĩirũo kũgooca Jehova rĩrĩa tũrahoya?

⁷ Nĩ twagĩrĩirũo kũririkanaga kũgooca Jehova rĩrĩa tũrahoya. Ngai witũ nĩ agĩrĩire mũno kwamũkĩra rũgooco. Jehova nĩ ‘mwega na akoragwo ehaarĩirie kuohanĩra.’ Ningĩ nĩ Ngai ‘mũigua tha na mũcayanĩri, ndahiũhaga kũrakara na nĩ aiyũirũo nĩ wendo o na wĩhokeku.’ (Thab. 86:5, 15) Hatarĩ nganja, tũrĩ na gĩtũmi kĩega gĩa kũgooca Jehova nĩ ũndũ wa ũrĩa atariĩ na maũndũ marĩa ekaga.

8. Nĩ maũndũ marĩkũ mamwe tũngĩcokeria Jehova ngatho nĩ ũndũ wamo? (Thaburi 104:12-15, 24)

⁸ Makĩria ma kũgooca Jehova mahoya-inĩ maitũ, nĩ wega kũmũcokeria ngatho nĩ ũndũ wa indo njega iria atũheaga. Kwa ngerekano, no tũmũcokerie ngatho nĩ ũndũ marangi mathaka marĩa tuonaga mahũa-inĩ, irio nyingĩ cia mĩthemba ĩtiganĩte, na arata ega. Ithe witũ ũrĩ wendo atũheaga indo icio na ingĩ nyingĩ nĩguo tũkenagĩre. (Thoma Thaburi 104:12-15, 24.) Na ũndũ wa bata o na makĩria, nĩ tũcokagĩria Jehova ngatho nĩ ũndũ wa irio nyingĩ cia kĩĩroho iria atũheaga na nĩ ũndũ wa kĩĩrĩgĩrĩro kĩega kĩa ihinda rĩũkĩte.

9. Nĩ kĩĩ kĩngĩtũteithia kũririkanaga gũcokeria Jehova ngatho? (1 Athesalonike 5:17, 18)

⁹ Nĩ ũhũthũ kũriganĩrũo gũcokia ngatho nĩ ũndũ wa maũndũ mothe marĩa Jehova atwĩkĩire. Nĩ kĩĩ kĩngĩgũteithia kũririkanaga? No wandĩke maũndũ marĩa ũhoete na ũgaikara ũkĩroraga ũrĩa Jehova acoketie mahoya maku. Ũcoke ũmũcokerie ngatho kũgerera mahoya nĩ ũndũ wa gũgũteithia. (Thoma 1 Athesalonike 5:17, 18.) Ta wĩcirie ũndũ ũyũ: Nĩ tũiguaga tũkenete rĩrĩa andũ arĩa angĩ matũcokeria ngatho na tũkaigua atĩ nĩ matuonaga tũrĩ a bata. Ũndũ ũmwe na ũcio, rĩrĩa twaririkana gũcokeria Jehova ngatho nĩ ũndũ wa gũcokia mahoya maitũ, nĩ akenaga mũno. (Kol. 3:15) No nĩ harĩ ũndũ ũngĩ wa bata mũno wagĩrĩire gũtũma tũcokerie Ngai ngatho.

COKAGĨRIA JEHOVA NGATHO NĨ ŨNDŨ WA MŨRŨWE

10. Kũringana na 1 Petero 2:21, tũrĩ na gĩtũmi kĩrĩkũ gĩa gũcokeria Jehova ngatho nĩ ũndũ wa gũtũma Jesu gũkũ thĩ?

¹⁰ Thoma 1 Petero 2:21. Nĩ twagĩrĩirũo gũcokagĩria Jehova ngatho nĩ ũndũ wa gũtũma Mũrũwe gũkũ thĩ nĩguo atũrute. Rĩrĩa twathoma ũhoro wĩgiĩ Jesu, nĩ twĩrutaga maũndũ maingĩ megiĩ Jehova na ũrĩa tũngĩmũkenia. Tũngĩonanagia wĩtĩkio harĩ igongona rĩa Kristo, no tũgĩe na ũrata wa hakuhĩ hamwe na Jehova Ngai na tũkenagĩre thayũ hamwe nake.​—Rom. 5:1.

11. Jesu ahingagia itemi rĩrĩkũ rĩrĩa twahoya Jehova?

¹¹ Nĩ tũcokagĩria Jehova ngatho tondũ nĩ tũhotaga kũmũhoya kũgerera harĩ Mũrũwe. Jesu nĩwe Jehova ahũthagĩra gũtũhingĩria mahoya maitũ. Jehova nĩ athikagĩrĩria na agacokia mahoya marĩa twahoya kũgerera harĩ rĩĩtwa rĩa Jesu. Jesu aaugire ũũ: “Ũndũ o wothe mũrĩhoyaga na rĩĩtwa rĩakwa, nĩ ndĩrĩmũhingagĩria, nĩguo Awa agoocithio kũgerera harĩ Mũriũ.”​—Joh. 14:13, 14.

12. Tũrĩ na gĩtũmi kĩrĩkũ kĩngĩ gĩa gũcokeria Jehova ngatho nĩ ũndũ wa Mũrũwe?

¹² Jehova atuohagĩra mehia maitũ kũgerera igongona rĩa ũkũũri rĩa Jesu. Maandĩko mataaragĩria Jesu arĩ ‘mũthĩnjĩri-Ngai witũ mũnene, ũikarĩte thĩ guoko-inĩ kwa ũrĩo gwa gĩtĩ kĩa ũnene kĩa Ũrĩa ũrĩ Hinya Mũno igũrũ.’ (Ahib. 8:1) Jesu nĩ “mũteithia ũrĩ hamwe na Ithe witũ.” (1 Joh. 2:1) Nĩ tũcokagĩria Jehova ngatho mũno nĩ ũndũ wa gũtũhe Mũthĩnjĩri-Ngai Mũnene ũtũcayagĩra, agataũkĩrũo nĩ mawathe maitũ, na “ũtũthaithanagĩrĩra.” (Rom. 8:34; Ahib. 4:15) Tiga nĩ igongona rĩa ũkũũri rĩa Jesu, tũtingĩhota gũkuhĩrĩria Jehova kũgerera mahoya tondũ tũrĩ andũ matarĩ akinyanĩru. Hatarĩ nganja no twĩtĩkanĩrie atĩ tũtingĩona ciugo njiganu cia gũcokeria Jehova ngatho nĩ ũndũ wa kĩheo kĩa magegania kĩrĩa atũheete kĩa Mũrũwe.

HOYAGĨRA AARĨ NA ARIŨ A ITHE WITŨ

13. Ũtukũ wa mũico Jesu atanakua oonanirie atĩa atĩ nĩ endete arutwo ake?

¹³ Ũtukũ wa mũico Jesu atanakua nĩ aahoire ihinda iraihu akĩhoera arutwo ake, na akĩũria Ithe “[amagitagĩre] kuumana na ũrĩa mũũru.” (Joh. 17:15) Ũndũ ũcio woonanirie atĩ Jesu nĩ aamendete mũno. O na gũtuĩka nĩ aamenyaga moritũ marĩa angĩagereire, no aarũmbũyagia arutwo ake mũno.

14. Tũngĩonania atĩa atĩ nĩ twendete aarĩ na ariũ a Ithe witũ?

¹⁴ Tũkĩĩgerekania na Jesu, tũtiĩciragia o ũhoro wa mabataro maitũ tu rĩrĩa tũrahoya. Handũ ha ũguo, nĩ tũhoyagĩra aarĩ na ariũ a Ithe witũ kaingĩ. Rĩrĩa tweka ũguo, tũkoragwo tũgĩathĩkĩra watho wa Jesu wa kwendana ithuĩ ene na tũkonia Jehova atĩ nĩ twendete aarĩ na ariũ a Ithe witũ. (Joh. 13:34) Kũhoera aarĩ na ariũ a Ithe witũ ti gũte mahinda. Kiugo kĩa Ngai gĩtwĩraga atĩ “ithaithana rĩa mũndũ mũthingu nĩ rĩrĩ ũhoti mũnene.”​—Jak. 5:16.

15. Aarĩ na ariũ a Ithe witũ mabataraga mahoya maitũ nĩkĩ?

¹⁵ Aarĩ na ariũ a Ithe witũ nĩ mabataraga mahoya maitũ tondũ nĩ mahiũranagia na moritũ maingĩ. No tũhoe Jehova amateithie gũkirĩrĩria mĩrimũ, icanjama cia ndũire, mbaara, kũnyarirũo, kana moritũ mangĩ. Ningĩ no tũhoere aarĩ na ariũ a Ithe witũ arĩa meimaga magathiĩ gũteithĩrĩria hĩndĩ ya icanjama. No gũkorũo nĩ ũĩ andũ amwe marahĩtũkĩra moritũ ta macio. Na githĩ to ũmahoere ũkĩmagwetaga na marĩĩtwa rĩrĩa ũrahoya ũrĩ wiki? Tuonanagia atĩ nĩ tũmendete kuuma ngoro rĩrĩa twahoya Jehova amateithie gũkirĩrĩria.

16. Twagĩrĩirũo kũhoera arĩa matongoragia maũndũ gatagatĩ-inĩ gaitũ nĩkĩ?

¹⁶ Arĩa matongoragia maũndũ kĩũngano-inĩ nĩ makenaga mũno rĩrĩa twamagweta mahoya-inĩ maitũ, na mahoya macio nĩ mamateithagia. Mũtũmwo Paulo nĩ aamenyaga ũguo o nake. Aandĩkire ũũ: “Ningĩ hoyagai nĩ ũndũ wakwa, nĩguo heagwo ciugo hĩndĩ ĩrĩa ndatumũra kanua, nĩgetha hotage kwaria na ũcamba ngĩmenyithania hitho ĩrĩa theru ĩgiĩ ũhoro ũrĩa mwega.” (Ef. 6:19) O na ũmũthĩ, nĩ kũrĩ ariũ a Ithe witũ aingĩ marĩ kĩyo matongoragia maũndũ gatagatĩ-inĩ gaitũ. Nĩ tuonanagia nĩ tũmendete na njĩra ya kũũria Jehova arathime wĩra wao.

RĨRĨA TWAHEO MWEKE WA KŨHOITHIA

17-18. Nĩ hĩndĩ ta ĩrĩkũ tũngĩheo mweke wa kũhoithia arĩa angĩ, na nĩ maũndũ marĩkũ twagĩrĩirũo kũririkana?

¹⁷ Rĩmwe na rĩmwe, nĩ tũheagwo mweke wa kũhoithia arĩa angĩ. Kwa ngerekano, mwarĩ wa Ithe witũ ũrĩ na mũrutwo wa Bibilia no orie mwarĩ wa Ithe witũ ũcio ũngĩ marĩ nake ahoithie. Mwarĩ wa Ithe witũ ũcio ũngĩ no akorũo atoĩ mũrutwo ũcio wega, kwoguo no orie ahoithie makĩrĩkĩrĩria wĩruti arĩ guo. Angĩka ũguo, no ahote kũmenya maũndũ marĩa angĩgweta akĩhoera mũrutwo ũcio.

¹⁸ Mũrũ wa Ithe witũ no aheo mweke wa kũhoithia hĩndĩ ya mũcemanio wa kĩũngano kana wa gũthiĩ kũhunjia. Ariũ a Ithe witũ arĩa maheo mweke ta ũcio, nĩ magĩrĩirũo kũririkana muoroto wa mũcemanio ũcio nĩ ũrĩkũ. Mahoya matiagĩrĩire kũhũthĩrũo kũhe kĩũngano ũtaaro kana kũmenyithania maũndũ. Mĩcemanio-inĩ mĩingĩ ya kĩũngano, mahoya na rwĩmbo ikoragwo igaĩirũo ndagĩka ithano, kwoguo mũrũ wa Ithe witũ ũrĩa ũkũhoithia ndagĩrĩirũo kũhũthĩra “ciugo nyingĩ,” makĩria kĩambĩrĩria-inĩ kĩa mũcemanio.​—Mat. 6:7.

TIGĨRĨRA ATĨ MAHOYA NĨ MA BATA ŨTŨŨRO-INĨ WAKU

19. Nĩ ũndũ ũrĩkũ ũrĩtũteithagia gũikara twĩhaarĩirie nĩ ũndũ wa mũthenya wa Jehova wa ituĩro?

¹⁹ Nĩ twagĩrĩirũo gũtigĩrĩra atĩ mahoya nĩ ma bata mũno ũtũũro-inĩ witũ o ũrĩa tũrakuhĩrĩria mũthenya wa Jehova wa ituĩro. Ũhoro-inĩ ũcio, Jesu aaugire ũũ: “Nĩ ũndũ ũcio-rĩ, ikaragai mwĩiguĩte, mũgĩthaithaga Ngai hĩndĩ ciothe nĩguo mũkaahota kũhonoka maũndũ-inĩ macio mothe marĩa arĩ o mũhaka mekĩke.” (Luk. 21:36) Kũhoyaga kaingĩ nĩ kũrĩtũteithagia gũikara twarahũkĩte kĩĩroho na gũkorũo twĩhaarĩirie nĩ ũndũ wa mũthenya wa Jehova wa ituĩro.

20. Tũngĩka atĩa nĩguo mahoya maitũ makoragwo matariĩ ta ũbumba ũranunga wega?

²⁰ Twarĩrĩria maũndũ marĩkũ? Nĩ tũkenagĩra mũno kĩheo kĩa mahoya. Maũndũ ma bata mũno marĩa twagĩrĩirũo kũhoya igũrũ rĩamo nĩ marĩa mahutanĩtie ĩmwe kwa ĩmwe na muoroto wa Jehova. Ningĩ nĩ tũcokagia ngatho nĩ ũndũ wa Mũrũ wa Ngai na Wathani wake, na tũkahoera nginya aarĩ na ariũ a Ithe witũ. Na no tũhoe nĩ ũndũ wa mabataro maitũ ma kĩĩmwĩrĩ na ma kĩĩroho. Rĩrĩa twecũrania na kinyi maũndũ marĩa tũkuuga mahoya-inĩ maitũ, nĩ tuonanagia atĩ nĩ tũkenagĩra kĩheo kĩu kĩa bata. Ciugo citũ nĩ ‘irĩkenagia’ Jehova o ta ũbumba ũranunga wega.​—Thim. 15:8.