Hunjagia na Kĩyo o ta Jesu

1. Nĩ ũndũ ũrĩkũ ũmwe ũtũmaga andũ a Jehova makorũo marĩ ngũrani na andũ arĩa meĩtaga Akristiano?

ŨNDŨ ũmwe ũtũmaga ndungata cia Jehova ikorũo irĩ ngũrani na andũ arĩa meĩtaga Akristiano, nĩ gũkorũo na kĩyoa wĩra-inĩ wa kũhunjia. (Tit. 2:14) No rĩmwe no ũigue ũtarĩ na wendi mũnene wa kũhunjia. Kwahoteka wanaigua ta ũrĩa mũthuri ũmwe wa kĩũngano ũrĩ kĩyo aiguaga. Aaugire, “Rĩmwe njiguaga itarĩ na wendi wa kũhunjia.”

2. Nĩkĩ kĩngĩtũma rĩmwe tũigue tũkĩritũhĩrũo gũtũũria kĩyo ũtungata-inĩ?

² No tũkorũo tũgĩkenera kũruta mawĩra mangĩ ũtungata-inĩ wa Jehova gũkĩra ũrĩa tũkenagĩra wĩra wa kũhunjia. Nĩkĩ? Tondũ rĩrĩa twateithĩrĩria wĩra-inĩ wa gwaka na kũmenyerera Nyũmba cia Ũthamaki, twateithĩrĩria harĩ kũheana ũteithio hĩndĩ ya icanjama, kana twekĩra aarĩ na ariũ a Ithe witũ ngoro, nĩ tuonaga o rĩo maumĩrĩro mega na tũkaigua tũkenete. Makĩria ma ũguo, nĩ tũkenagĩra thayũ na wendo ũrĩa tuonagio rĩrĩa tũrarutithania wĩra na aarĩ na ariũ a Ithe witũ, na tũkamenya nĩ marakenio nĩ maũndũ marĩa tũramekĩra. O na kũrĩ ũguo, no kũhoteke tũkoretwo tũkĩhunjia gĩcigo kĩna kwa ihinda rĩa mĩaka mĩingĩ, ĩndĩ no andũ anini matũthikagĩrĩria, na angĩ makarega. Ningĩ no twĩrĩgĩrĩre gũcemania na ũkararia mũingĩ o ũrĩa mũico ũrathiĩ ũkuhĩrĩirie. (Mat. 10:22) Hihi nĩ kĩĩ kĩngĩtũteithia gũtũũria kana kuongerera kĩyo wĩra-inĩ wa kũhunjia?

3. Ngerekano ĩrĩa ĩrĩ thĩinĩ wa Luka 13:​6-9 ĩratũruta atĩa igũrũ rĩgiĩ Jesu?

³ Gũthuthuria kĩonereria kĩa Jesu no gũtũteithie gũkorũo na kĩyo wĩra-inĩ wa kũhunjia. Rĩrĩa Jesu aarĩ gũkũ thĩ, ndaanyihirie kĩyo gĩake gĩa kũhunjia, ĩndĩ aathiire o na mbere kuongerera kĩyo o ũrĩa mahinda maathiaga. (Thoma Luka 13:​6-9.) Jesu akĩheana ngerekano, nĩ eeringithanirie na mũruti wĩra mũgũnda-inĩ wa mĩthabibũ, ũrĩa wahũthĩrire mĩaka ĩtatũ gũtungata mũtĩ wa mũkũyũ ĩndĩ ndwarutire maciaro. Na njĩra o ta ĩyo, Jesu aahunjĩirie Ayahudi mĩaka ĩtatũ no aingĩ ao matiamwĩtĩkirie. O na kũrĩ ũguo, o ta ũrĩa mũruti wĩra ũcio ataanogire gũtungata mũtĩ ũcio wa mũkũyũ, no taguo Jesu ataanogirio nĩ andũ arĩa aahunjagĩria kana akĩnyihia kĩyo ũtungata-inĩ. O na nĩ kuongerera oongereire kĩyo nĩguo akinyĩre ngoro ciao.

4. Nĩ maũndũ marĩkũ mana megiĩ Jesu tũkwarĩrĩria?

⁴ Gĩcunjĩ-inĩ gĩkĩ, tũkwarĩrĩria ũrĩa Jesu oonanirie kĩyo, makĩria mĩeri-inĩ ĩtandatũ ya mũico ya ũtungata wake. (Luk. 10:1) Gũthuthuria maũndũ marĩa aarutanire na kwĩgerekania nake nĩ gũgũtũteithia gũtũũria kĩyo ũmũthĩ. Rekei tũthuthurie kĩonereria kĩa Jesu maũndũ-inĩ maya mana: (1) Nĩ aaigaga wendi wa Jehova mbere, (2) nĩ eecũranagia ũrathi wa Bibilia, (3) nĩ eehokaga ũteithio wa Jehova, na (4) nĩ aatũũririe mawoni mega kwerekera andũ arĩa aahunjagĩria.

AAIGAGA WENDI WA JEHOVA MBERE

5. Jesu oonanirie atĩa atĩ nĩ aaigaga wendi wa Jehova mbere?

⁵ Jesu aahunjirie na kĩyo “ũhoro ũrĩa mwega wa Ũthamaki” tondũ nĩ aamenyaga ũguo nĩguo Ngai eendaga eke. (Luk. 4:43) Ũndũ ũrĩa warĩ wa bata mũno ũtũũro-inĩ wa Jesu warĩ kũhunjia. O na mĩeri-inĩ ya mũico ya ũtungata wake, nĩ aathiaga “kuuma itũũra rĩmwe nginya rĩrĩa rĩngĩ na kuuma gĩcagi kĩmwe nginya kĩrĩa kĩngĩ” akĩrutanaga. (Luk. 13:22) Ningĩ nĩ aamenyeririe andũ angĩ nĩguo manyitanĩre nake wĩra-inĩ wa kũhunjia.—Luk. 10:1.

6. Wĩra wa kũhunjia ũhutanĩtie atĩa na mawĩra mangĩ tũngĩĩhokerũo ũtungata-inĩ wa Jehova? (Ningĩ rora mbica.)

⁶ O na mahinda-inĩ maya, Jehova na Jesu mendaga tũige mbere wĩra wa kũhunjia ũhoro ũrĩa mwega. (Mat. 24:14; 28:​19, 20) Wĩra ũcio wa kũhunjia nĩ ũhutanĩtie na njĩra ya ĩmwe kwa ĩmwe na mawĩra mangĩ tũngĩĩhokerũo ũtungata-inĩ wa Jehova. Kwa ngerekano, nĩ tũnyitaga mbaru wĩra wa kũhunjia rĩrĩa twateithĩrĩria mawĩra marĩa marutagwo Betheli kana rĩrĩa twanyitanĩra gwaka Nyũmba cia Ũthamaki. Ningĩ rĩrĩa twateithĩrĩria aarĩ na ariũ a Ithe witũ arĩa mahutĩtio nĩ icanjama, nĩ mahotaga gũcokerera mũtaratara wao wa maũndũ ma kĩĩroho na nĩ hamwe na kũhunjia. Rĩrĩa twaririkana atĩ wĩra wa kũhunjia nĩguo wĩra ũrĩa wa bata makĩria Jehova endaga tũrute, nĩ tũrĩiguaga twĩ na wendi mũnene wa kũhunjia maita maingĩ o ũrĩa kwahoteka. Mũthuri ũmwe wa kĩũngano kuuma Hungary wĩtagwo János aaugire: “Nĩ ndĩririkanagia atĩ gũtirĩ wĩra ũngĩ ũtungata-inĩ wa Jehova ũngĩoya ithenya rĩa wĩra wa kũhunjia; nĩguo wĩra ũrĩa tũbatiĩ kũiga mbere.”

7. Jehova endaga tũthiĩ na mbere kũhunjia nĩkĩ? (1 Timotheo 2:​3, 4)

⁷ No tuongerere kĩyo gitũ ũtungata-inĩ tũngĩonaga andũ ta ũrĩa Jehova amonaga. Endaga andũ aingĩ o ũrĩa kwahoteka maigue ũhoro ũrĩa mwega na mawathĩkĩre. (Thoma 1 Timotheo 2:​3, 4.) Nĩ ũndũ ũcio, Jehova nĩ atũmenyeragia kwagagĩria njĩra citũ cia kũhunjia ndũmĩrĩri ĩyo ĩrĩa ĩhonokagia mĩoyo ya andũ. Kwa ngerekano, broshua ya Enda Andũ Nĩguo Ũmatue Arutwo nĩ ĩkoragwo na maũndũ mangĩtũteithia kwambĩrĩria ndeereti, tũrĩ na muoroto wa gũtua andũ arutwo. O na andũ mangĩaga gwĩtĩkĩra ũhoro ũcio mwega ihinda-inĩ rĩrĩ, no magĩe na mweke ũcio mbere ya thĩna ũrĩa mũnene gũthira. Maũndũ marĩa tũrameera ihinda-inĩ rĩrĩ, no matũme mageetĩkĩra kwĩruta ihinda rĩũkĩte. No ũndũ ũcio ũngĩhoteka tu angĩkorũo nĩ tũgũthiĩ na mbere kũhunjia.

NĨ EECŨRANAGIA ŨRATHI WA BIBILIA

8. Jesu aahũthagĩra mahinda make atĩa nĩ ũndũ wa gũtaũkĩrũo nĩ morathi ma Bibilia?

⁸ Jesu nĩ aamenyaga ũrĩa morathi ma Bibilia mangĩahingire. Nĩ ooĩ atĩ ũtungata wake ũngĩoire ihinda rĩa mĩaka ĩtatũ na nuthu tu. (Dan. 9:​26, 27) Ningĩ nĩ aamenyaga maũndũ marĩa maarathĩtwo megiĩ rĩrĩa angĩakuire na ũrĩa angĩakuire. (Luk. 18:​31-34) Nĩ ũndũ wa kũmenya maũndũ macio, nĩ aahũthagĩra mahinda make wega. Kwoguo nĩ aahunjagia na kĩyo nĩguo arĩkie wĩra ũcio aaheetwo.

9. Nĩkĩ gũtaũkĩrũo nĩ morathi ma Bibilia no gũtũtindĩke kũhunjia na kĩyo?

⁹ Gũtaũkĩrũo nĩ morathi ma Bibilia no gũtũtindĩke kũhunjia na kĩyo. Nĩ tũĩ atĩ mũtabarĩre ũyũ wa maũndũ wĩ hakuhĩ gũthira. Nĩ tũtaũkagĩrũo atĩ maũndũ marĩa marekĩka ũmũthĩ o hamwe na mĩerekera ya andũ nĩ marahingia morathi ma Bibilia megiĩ matukũ ma kũrigĩrĩria. Na rĩrĩa tuona Thirikari ya Thĩ ya Ngeretha na Amerika ĩkĩgucania na Russia na mabũrũri marĩa mamĩnyitaga mbaru, nĩ tũtaũkagĩrũo atĩ nĩ marahingia ũrathi wĩgiĩ ũrĩa mũthamaki wa mwena wa mũhuro mangĩgatindĩkana na mũthamaki wa mwena wa rũgongo “ihinda-inĩ rĩa mũthia.” (Dan. 11:40) Ningĩ nĩ tũtaũkagĩrũo atĩ Thirikari ya Thĩ ya Ngeretha na Amerika nĩyo ĩrũgamĩrĩirũo nĩ makinya ma mũhianano ũrĩa ũtaarĩirio thĩinĩ wa Danieli 2:​43-45. O ta ũrĩa ũrathi ũcio wonanĩtie, tũrĩ na ma atĩ ica ikuhĩ Ũthamaki wa Ngai nĩ ũkũniina thirikari ciothe cia andũ. Morathi macio mothe maronania atĩ mũthia wĩ hakuhĩ mũno, na kwoguo nĩ tũbatiĩ kũhũthĩra mahinda maitũ wega kũhunjia ũhoro mwega wa Ũthamaki.

10. Nĩ na njĩra irĩkũ ingĩ morathi ma Bibilia matwĩkĩraga ngoro kũhunjia na kĩyo?

¹⁰ Ningĩ morathi ma Bibilia nĩ makoragwo na ndũmĩrĩri twĩriragĩria kũhe arĩa angĩ. Mwarĩ wa Ithe witũ ũmwe ũtungataga arĩ Dominican Republic wĩtagwo Carrie aaugire: “Ciĩranĩro cia Jehova cia gũcanjamũra ciĩgiĩ mahinda mega mokĩte nĩ indindĩkaga kwĩra arĩa angĩ ũhoro wacio.” Aacokire akiuga: “Rĩrĩa ndona moritũ marĩa andũ maragerera ũmũthĩ, nĩ menyaga atĩ o nao nĩ marabatara kũmenya ũhoro wĩgiĩ ciĩranĩro icio.” Morathi ma Bibilia nĩ matwĩkĩraga ngoro gũthiĩ na mbere kũhunjia tondũ Jehova nĩ atũteithagia kũruta wĩra ũcio. Mwarĩ wa Ithe witũ Leila ũrĩa ũikaraga Hungary aaugire ũũ: “Isaia 11:​6-9 nĩ ĩnjĩkĩraga ngoro kũhunjia ũhoro ũrĩa mwega nginya kũrĩ arĩa nyonaga ta matangĩwĩtĩkĩra. Nĩ njũĩ atĩ gũtirĩ mũndũ ũtangĩcenjia agĩteithio nĩ Jehova.” Nake mũrũ wa Ithe witũ wĩtagwo Christopher ũrĩa ũikaraga Zambia aaugire: “Ũrathi wa Mariko 13:10 wĩgiĩ ũhoro ũrĩa mwega kũhunjio thĩinĩ wa thĩ yothe, nĩ ũtũmaga nyone arĩ gĩtĩo kũnyita itemi harĩ kũhingia ũrathi ũcio.” Hihi nĩ morathi marĩkũ ma Bibilia magwĩkĩraga ngoro gũthiĩ na mbere kũhunjia?

NĨ EEHOKAGA ŨTEITHIO WA JEHOVA

11. Jesu aabataraga kwĩhoka ũteithio wa Jehova nĩkĩ nĩguo athiĩ na mbere kũhunjia na kĩyo? (Luka 12:​49, 53)

¹¹ Jesu aarĩ na ma atĩ Jehova nĩ angĩamũteithirie gũthiĩ na mbere kũhunjia na kĩyo. O na gũtuĩka Jesu nĩ aathuuraga ciugo ciake wega akĩhunjia, nĩ aamenyaga atĩ ũhoro mwega wa Ũthamaki nĩ ũngĩatũmire andũ amwe marakare na ũtũme kũgĩe na ũkararia mũnene. (Thoma Luka 12:​49, 53.) Atongoria a ndini matiakenagio nĩ ndũmĩrĩri ya Jesu, na kwoguo nĩ maageragia kaingĩ kũmũũraga. (Joh. 8:59; 10:​31, 39) No Jesu nĩ aathiire na mbere kũhunjia tondũ nĩ aamenyaga atĩ Jehova aarĩ hamwe nake. Jesu aaugire: “Ndikoragwo ndĩ nyiki, no Awa ũrĩa wandũmire akoragwo hamwe na niĩ. . . . Ndaandiganĩirie ndĩ nyiki, nĩ gũkorũo hingo ciothe njĩkaga maũndũ marĩa mamũkenagia.”—Joh. 8:​16, 29.

12. Jesu aahaarĩirie arutwo ake atĩa nĩguo mahote gũthiĩ na mbere kũhunjia nginya rĩrĩa manyarirũo?

¹² Jesu nĩ aaririkanirie arutwo ake bata wa kwĩhoka Jehova amateithie. Nĩ aamatĩtĩrithĩirie rĩngĩ na rĩngĩ atĩ Jehova nĩ angĩamateithirie nginya rĩrĩa maranyarirũo. (Mat. 10:​18-20; Luk. 12:​11, 12) O na kũrĩ ũguo, nĩ aameerire mehũgage. (Mat. 10:16; Luk. 10:3) Ningĩ nĩ aameerire atĩ matibatiĩ gũtindĩkĩrĩria andũ mathikĩrĩrie ndũmĩrĩri yao angĩkorũo matirenda. (Luk. 10:​10, 11) Na nĩ aameerire atĩ mangĩnyarirũo itũũra-inĩ rĩmwe, morĩre itũũra-inĩ rĩngĩ. (Mat. 10:23) O na gũtuĩka Jesu aarĩ na kĩyo na nĩ eehokete Jehova, nĩ eekaga ũrĩa wothe angĩhota kwaga kwĩingĩria ũgwati-inĩ.—Joh. 11:​53, 54.

13. Ũngĩkorũo na ma atĩa atĩ Jehova nĩ arĩgũteithagia?

¹³ O na ũmũthĩ, nĩ tũbataraga ũteithio wa Jehova nĩguo tũthiĩ na mbere kũhunjia na kĩyo nginya rĩrĩa tũracemania na ũkararia. (Kũg. 12:17) Ũngĩkorũo na ma atĩa atĩ Jehova nĩ arĩgũteithagia? Ta wĩcirie ihoya rĩa Jesu rĩrĩa rĩrĩ thĩinĩ wa Johana mũrango wa 17. Jesu eerire Jehova agitagĩre atũmwo ake, na Jehova nĩ aacokirie ihoya rĩu. Ibuku rĩa Atũmwo nĩ rĩonanagia ũrĩa Jehova aateithirie atũmwo kũhunjia na kĩyo o na makĩnyariragwo. Ihoya-inĩ rĩu, Jesu nĩ eerire Jehova agitĩre nginya arĩa mangĩagĩire na wĩtĩkio thutha wa kũigua ndũmĩrĩri ya atũmwo. Kwoguo o nawe Jehova nĩ arĩkũgitagĩra. Na tondũ Jehova ndatigĩte gũcokia ihoya rĩu rĩa Jesu, nĩ arĩgũteithagia o ta ũrĩa aateithagia atũmwo.—Joh. 17:​11, 15, 20.

14. Tũngĩkorũo na ma atĩa atĩ nĩ tũrĩhotaga gũthiĩ na mbere kũhunjia na kĩyo? (Ningĩ rora mbica.)

¹⁴ O ũrĩa mũthia ũrakuhĩrĩria, no ũkorũo ũrĩ ũndũ mũritũ kũhunjia ũhoro ũrĩa mwega, ĩndĩ nĩ tũrĩamũkagĩra ũteithio ũrĩa wothe tũrabatara. (Luk. 21:​12-15) O ta Jesu na arutwo ake, tũrekaga andũ methurĩre kana nĩ megũthikĩrĩria kana matigũthikĩrĩria, na tũgeka ũrĩa wothe twahota kwaga kwĩingĩria ngarari-inĩ. Aarĩ na ariũ a Ithe witũ nĩ mahotaga gũthiĩ na mbere kũhunjia nginya kũrĩa wĩra witũ wĩkĩrĩirũo mĩkaana, tondũ mehokaga hinya wa Jehova no ti wao ene. Na o ta ũrĩa Jehova aaheaga ndungata ciake hinya hĩndĩ ya karine ya mbere, noguo arĩtũheaga hinya nĩguo “wĩra wa kũhunjia ũhingio biũ” nginya rĩrĩa akauga wĩra ũcio nĩ warĩka. (2 Tim. 4:17) Korũo na ma atĩ ũngĩhokaga Jehova, nĩ ũrĩhotaga gũthiĩ na mbere kũhunjia ũrĩ na kĩyo.

NĨ AATŨŨRIRIE MAWONI MEGA

15. Nĩ kĩĩ kĩonanagia atĩ Jesu aarĩ na mawoni mega kwerekera andũ arĩa aahunjagĩria?

¹⁵ Jesu nĩ aatũũririe mawoni mega kwerekera andũ arĩa aahunjagĩria. Ũndũ ũcio nĩ wamũteithirie gũtũũria gĩkeno na kĩyo ũtungata-inĩ wake. Kwa ngerekano, mũthia-inĩ wa mwaka wa 30 M.M., Jesu nĩ oonire atĩ andũ aingĩ nĩ meehaarĩirie gũthikĩrĩria ndũmĩrĩri yake, na akĩmaringithania na mũgũnda werũhĩte ũndũ ũngĩgethwo. (Joh. 4:35) Kĩndũ mwaka ũmwe thutha ũcio, eerire arutwo ake ũũ: “Magetha nĩ maingĩ.” (Mat. 9:​37, 38) Na thutha-inĩ nĩ aatĩtĩrithirie ũndũ ũcio rĩngĩ akiuga ũũ: “Magetha nĩ maingĩ . . . Hoyai Mwene magetha atũme aruti wĩra magetha-inĩ make.” (Luk. 10:2) Hĩndĩ ciothe Jesu nĩ aakoragwo na ma atĩ nĩ kũrĩ andũ mangĩetĩkĩrire ũhoro ũrĩa mwega, na nĩ aakenaga rĩrĩa meka ũguo.—Luk. 10:21.

16. Ngerekano cia Jesu cionanagia ũndũ ũrĩkũ mwega wĩgiĩ ũtungata? (Luka 13:​18-21) (Ningĩ rora mbica.)

¹⁶ Jesu nĩ aarutire arutwo ake gũkoragwo na mawoni mega megiĩ ndũmĩrĩri ĩrĩa maahunjagia, na ũndũ ũcio nĩ ũngĩamateithirie gũtũũria kĩyo kĩao. Ta wĩcirie ngerekano igĩrĩ iria Jesu aahũthĩrire. (Thoma Luka 13:​18-21.) Ngerekano ĩmwe aahũthĩrire nĩ ya mbegũ ya karatarĩ, kuonania atĩ andũ aingĩ nĩ mangĩgetĩkĩra ndũmĩrĩri ya Ũthamaki na atĩ gũtirĩ mũhĩnga ũngĩagirĩrĩirie ũndũ ũcio. Ningĩ nĩ aahũthĩrire ngerekano ya ndawa ya kũimbia kuonania ũrĩa ndũmĩrĩri ya Ũthamaki ĩngĩgaatherema thĩinĩ wa thĩ na ĩtũme andũ meke mogarũrũku ũtũũro-inĩ wao, o na gũtuĩka mogarũrũku macio no mage kuoneka o rĩo. Kwoguo Jesu nĩ aateithirie arutwo ake kuona atĩ ndũmĩrĩri ĩrĩa maahunjagia nĩ ĩngĩagĩire na maumĩrĩro mega.

17. Nĩ maũndũ marĩkũ matwĩkĩraga ngoro gũthiĩ na mbere kũhunjia?

¹⁷ Gwĩciria ũrĩa wĩra wa kũhunjia ũteithĩtie andũ aingĩ thĩinĩ wa thĩ nĩ gũtwĩkĩraga ngoro gũthiĩ na mbere kũhunjia na kĩyo. O mwaka, andũ milioni nyingĩ arĩa marakenio nĩ ũhoro nĩ mokaga Kĩririkano gĩa gĩkuũ kĩa Jesu, na makambĩrĩria kwĩruta Bibilia hamwe na ithuĩ. Andũ ngiri nyingĩ nĩ mabatithagio na makanyitanĩra na ithuĩ wĩra-inĩ wa kũhunjia. O na gũtuĩka tũtiũĩ nĩ andũ aigana megwĩtĩkĩra ũhoro ũrĩa mwega, nĩ tũĩ atĩ Jehova nĩ aracokanĩrĩria andũ kĩrĩndĩ kĩnene arĩa makaahonoka hĩndĩ ya thĩna ũrĩa mũnene. (Kũg. 7:​9, 14) Tũrĩ na gĩtũmi kĩega gĩa gũthiĩ na mbere kũhunjia, tondũ Mwene magetha no arona kũrĩ na andũ aingĩ mangĩtĩkĩra ũhoro ũrĩa mwega.

18. Nĩ ũndũ ũrĩkũ tũngĩenda andũ arĩa angĩ mone ũtwĩgiĩ?

¹⁸ Kuuma o tene, arũmĩrĩri a Jesu nĩ moĩkaine nĩ ũndũ wa kĩyo kĩao gĩa kũhunjia. Kwa ngerekano, rĩrĩa andũ moonire ũrĩa atũmwo maaragia marĩ na ũmĩrĩru, nĩ ‘maataũkĩirũo atĩ maakoragwo hamwe na Jesu.’ (Atũm. 4:13) O na ithuĩ tũngĩhunjagia tũrĩ na kĩyo na ũmĩrĩru, andũ arĩa angĩ no mone atĩ nĩ tũregerekania na Jesu.