Nĩ Tũrutĩtwo nĩ Mũrutani Witũ Ũrĩa Mũnene

KĨONERERIA GĨA ACIARI AKWA

Mũthia-inĩ wa mĩaka ya 1950, aciari akwa nĩ maathamire Italy magĩthiĩ Kindersley, gĩcigo-inĩ kĩa Saskatchewan, bũrũri-inĩ wa Canada. Ihinda inini thutha ũcio makĩĩruta ũhoro wa ma, na ũgĩtuĩka ũndũ ũrĩa wa bata mũno ũtũũro-inĩ witũ. Nĩ ndirikanaga ndĩ mũnini nĩ ndahũthagĩra mahinda maingĩ ũtungata-inĩ twĩ hamwe na famĩlĩ itũ, na kwoguo rĩmwe nĩ ningaga andũ itherũ ngamera “ndambĩrĩirie ũpainia wa gũteithĩrĩria” ndĩ na mĩaka ĩnana.

O na gũtuĩka aciari akwa matiarĩ na mbeca nyingĩ, maarĩ kĩonereria kĩega harĩ kwĩima nĩ ũndũ wa Jehova. Kwa ngerekano, mwaka-inĩ wa 1963 nĩ meendirie indo nyingĩ ciao nĩguo mone mbeca cia gũthiĩ kĩgomano gĩa kĩĩmabũrũri kĩrĩa kĩarĩ Pasadena, California, bũrũri-inĩ wa Amerika (US). Na mwaka-inĩ wa 1972 nĩ twathamĩire gĩcigo-inĩ kĩa Trail, British Columbia, Canada, kĩrĩa kĩarĩ kĩndũ kilomita ta 1,000 kuuma kũrĩa twarĩ, nĩguo tũteithĩrĩrie wĩra-inĩ wa kũhunjĩria andũ arĩa maaragia Kĩitaliano. Baba aarutaga wĩra wa caretaker, na nĩ aaregaga mĩeke ya kũgĩa na mbeca nyingĩ, nĩgetha ahote kũiga meciria ũtungata-inĩ wa Jehova.

Nĩ njokagia ngatho nĩ ũndũ wa kĩonereria kĩrĩa aciari aitũ maatũigĩire tũrĩ na ciana icio ingĩ citũ ithatũ. Kĩonereria kĩao kĩarĩ mũthingi wa maũndũ maingĩ marĩa ndĩrutĩte ũtungata-inĩ wa Jehova, nginya ũndũ ũyũ wa bata: Ingĩcaragia Ũthamaki mbere, Jehova nĩ arĩhingagĩria mabataro makwa.—Mat. 6:33.

GŨCAMA ŨTUNGATA WA MAHINDA MOTHE RĨA MBERE

Mwaka-inĩ wa 1980, nĩ ndahikirie Debbie, mwarĩ wa Ithe witũ mũthaka weigĩire mĩoroto ya kĩĩroho. Tondũ nĩ twendaga kũingĩra ũtungata-inĩ wa mahinda mothe, mĩeri ĩtatũ thutha wa kũhikania, Debbie nĩ aambĩrĩirie gũpainia. Mwaka ũmwe thutha wa kũhikania, nĩ twathamĩire kĩũngano-inĩ kĩnini kĩabataraga gũteithĩrĩrio, na o na niĩ ngĩambĩrĩria gũpainia.

No thutha wa ihinda nĩ twakuire ngoro na tũgĩciria kuuma kuo. Ĩndĩ tũkĩamba kwaria na mũrori wa mũthiũrũrũko. Aatwĩrire ũũ atekũhithĩrĩra ĩndĩ na njĩra ya wendo: “O na inyuĩ nĩ mũreritũhĩria ũtũũro, tondũ mũrerekeria meciria harĩ o mathĩna marĩa mũracemania namo. Mũngĩerekeria meciria manyu harĩ maũndũ ma gwĩkĩra ngoro, nĩ mũkũmona.” Ũcio warĩ ũtaaro o ũrĩa twabataraga. (Thab. 141:5) Twarũmĩrĩire ũtaaro ũcio o rĩo, na thutha wa ihinda inini tũkĩona atĩ nĩ ma kwarĩ na maũndũ maingĩ ma gwĩkĩra ngoro. Andũ aigana ũna kĩũngano-inĩ kĩu nĩ meendaga kwandandũra ũtungata wao harĩ Jehova, nginya andũ ethĩ na aarĩ a Ithe witũ amwe arĩa athuri ao mateerutĩte ũhoro wa ma. Ũndũ ũcio nĩ watũrutire ũndũ wa bata mũno. Nĩ twerutire bata wa kũroraga maũndũ marĩa mega, na gweterera Jehova arũnge thĩna o wothe tũngĩona ũgĩtũritũhĩra. (Mik. 7:7) Nĩ twacokereirũo nĩ gĩkeno gitũ, na maũndũ makĩagĩra.

Arutani a kĩrathi gitũ kĩa mbere gĩa cukuru ya mapainia nĩ maatungatĩte mabũrũri-inĩ mangĩ. Kwoguo rĩrĩa maatuonirie mbica ciao na magĩtwĩra ũhoro wĩgiĩ moritũ marĩa maagereire na irathimo iria maakeneire, ũndũ ũcio ũgĩtũma twende gũgaatuĩka amishonarĩ. Nĩ ũndũ ũcio tũkĩĩigĩra muoroto wa kũingĩra ũtungata-inĩ ũcio.

Nĩgetha tũkinyĩre muoroto ũcio, mwaka-inĩ wa 1984 nĩ twathamĩire Quebec, gĩcigo kĩarĩ na andũ aingĩ maaragia Kĩfaranja, na kĩarĩ makĩria ma kilomita 4,000 kuuma gĩcigo-inĩ kĩa British Columbia. Ũguo nĩ kuuga twabataraga kũhĩmbĩria ũndũire mwerũ o hamwe na rũthiomi rũngĩ. Ũritũ ũngĩ twacemanagia naguo nĩ atĩ kaingĩ tũtiakoragwo na mbeca njiganu cia kũhingia mabataro maitũ. O na harĩ hĩndĩ twagunirũo nĩ mũrĩmi ũmwe watwĩtĩkĩririe tũhaarage waru mũgũnda-inĩ wake. Debbie aarugaga waru icio na njĩra itiganĩte nĩguo tũkagarũrĩra. O na tũgĩcemanagia na moritũ macio, nĩ twatuire itua rĩa gũkirĩrĩria tũrĩ na gĩkeno. Makĩria ma ũguo, nĩ tweyoneire Jehova agĩtũrũmbũiya.—Thab. 64:10.

Mũthenya ũmwe nĩ twahũũrĩirũo thimũ tũterĩgagĩrĩra, tũkĩĩrũo nĩ twanyitwo ũgeni tũgatungate Betheli ya Canada. O na gũtuĩka nĩ twakenire twerũo ũguo, nĩ twaiguire twatukanĩrũo tondũ nĩ twaiyũrĩtie fomu ya gũthiĩ cukuru ya Gileadi. O na kũrĩ ũguo, nĩ twetĩkĩrire gũthiĩ Betheli. Rĩrĩa twakinyire, tũkĩũria mũrũ wa Ithe witũ Kenneth Little wa Kamĩtĩ ya Wabici ya Rũhonge atĩrĩ, “Ĩ tũngĩtwo Gileadi na nĩ twaiyũrĩtie fomu?” Agĩtwĩra atĩ tũngĩgeetwo nĩ tũkamenya ũrĩa tũkahiũrania na ũndũ ũcio.

Kiumia kĩmwe thutha ũcio, twĩ na Debbie nĩ twetirũo cukuru ya Gileadi, na kwoguo nĩ twabataraga gũtua itua. Mũrũ wa Ithe witũ Little aatwĩrire ũũ: “Mweke o wothe mũrĩthuura, kũrĩ mahinda mũrĩonaga kaba mũngĩathuurire mweke ũcio ũngĩ mwarĩ naguo. Kwoguo mĩeke ĩyo yerĩ nĩ mĩega; gũtirĩ Jehova atangĩrathima.” Nĩ twetĩkĩrire mweke ũcio wa gũthiĩ Gileadi, na mĩaka-inĩ yothe nĩ tuonete ũũma wa ciugo icio cia mũrũ wa Ithe witũ Little. O na kaingĩ nĩ tũhũthagĩra ciugo icio ciake rĩrĩa tũraria na andũ arĩa marabatara gũtua itua rĩgiĩ nĩ mweke ũrĩkũ wa ũtungata megũthuura.

ŨTŨŨRO WITŨ TŨRĨ AMISHONARĨ

Nĩ twakenire mũno mweri-inĩ wa Ĩpuro 1987 gũkorũo tũrĩ amwe a arutwo 24 a kĩrathi kĩa 83 kĩa Gileadi, kĩrĩa kĩarĩ Brooklyn, New York. Mũrũ wa Ithe witũ Ulysses Glass na Jack Redford nĩo maarĩ arutani arĩa maarũgamĩrĩire kĩrathi kĩu. Mĩeri ĩtano yathirire o na ihenya, tũkĩrĩkia cukuru ĩyo Septemba 6, 1987, na tũgĩtũmwo Haiti hamwe na mũrũ wa Ithe witũ John na mũtumia wake Marie Goode.

Gũtierĩgĩte gũtũmwo amishonarĩ Haiti kuuma 1962 rĩrĩa amishonarĩ a mũico maaingatirũo bũrũri-inĩ ũcio. Ciumia ithatũ thutha wa kũrĩkia Gileadi, twathiire gũtungata kĩũngano-inĩ kĩnini kĩa ahunjia 35 kĩarĩ kũndũ thĩinĩ irĩma-inĩ. Hĩndĩ ĩyo twarĩ andũ ethĩ mataarĩ na ũmenyeru, na twaikaraga mũciĩ wa amishonarĩ tũrĩ o ithuerĩ. Andũ a kũu maarĩ athĩni, na aingĩ ao matioĩ gũthoma. Tũrĩ kũu, nĩ gwakoragwo na mbaara cia gĩĩkabira, aregani meendaga kũgarũra thirikari, arũrũngani marahinga barabara na mĩaki, na ihuhũkanio.

Nĩ twerutire maũndũ maingĩ kuumana na aarĩ na ariũ a Ithe witũ a Haiti, nĩ ũndũ wa ũkirĩrĩria wao na gĩkeno kĩao. Aingĩ ao maarĩ na ũtũũro mũritũ, no nĩ meendete Jehova o hamwe na ũtungata. Mwarĩ wa Ithe witũ ũmwe mũkũrũ ndooĩ gũthoma, no nĩ ooĩ maandĩko ta 150 na mũtwe. Maũndũ marĩa maahaanĩkaga o mũthenya maatũmaga tũkorũo na wendi makĩria wa kũhunjia ndũmĩrĩri ya atĩ Ũthamaki wa Ngai noguo tu kĩhonia kĩa mathĩna mothe ma andũ. Nĩ tũkenaga mũno kuona atĩ andũ amwe twerutaga nao Bibilia hĩndĩ ĩyo nĩ maatuĩkire mapainia a hĩndĩ ciothe, mapainia a mwanya, na athuri a ciũngano.

Tũrĩ o kũu Haiti nĩ ndacemanirie na mwanake mũmishonarĩ wa kanitha ya Mormon wetagwo Trevor, na tũgĩteereta nake maũndũ ma Bibilia maita maigana ũna. Mĩaka ĩigana ũna thutha ũcio, akĩndũmĩra marũa maaugaga ũũ: “Nĩ ndĩrabatithio kĩgomano-inĩ kĩrĩa gĩũkĩte! Na nĩ ndĩrerirĩria gũcoka Haiti, ndungate ndĩ painia wa mwanya gĩcigo-inĩ kĩrĩa ndarĩ mũmishonarĩ wa kanitha wa Mormon.” Na ũguo nĩguo eekire kwa ihinda rĩa mĩaka mĩingĩ hamwe na mũtumia wake.

GŨTUNGATA EUROPE NA THUTHA ŨCIO AFRIKA

Twatũmirũo tũgatungate gĩcigo-inĩ kĩa Europe kũrĩa wĩra wa Ũthamaki wathiaga wĩtĩkĩrĩtio. Mwaka-inĩ wa 1992 nĩ twathiire Ljubljana, bũrũri-inĩ wa Slovenia, hakuhĩ na kũrĩa aciari akwa maarereirũo matanathamĩra Italy. Mahinda-inĩ macio, mbaara no yathiaga na mbere icigo-inĩ iria ciarĩ kũrĩa gwetagwo Yugoslavia. Wabici ya rũhonge ya Vienna, bũrũri-inĩ wa Austria, o hamwe na wabici ya Zagreb, bũrũri-inĩ wa Croatia, na ya Belgrade, bũrũri-inĩ wa Serbia, nĩcio ciarũgamagĩrĩra wĩra wa kũhunjia gĩcigo-inĩ kĩu. Gũgĩcoka gũgĩtuĩka o bũrũri kũgĩe na Betheli ya kuo.

Kwoguo nĩ twabataraga kwĩruta rũthiomi rũngĩ na kũmenyera ũndũire ngũrani. Andũ a kũu maaugaga, “Jezik je težek,” na ũguo nĩ kuuga “Rũthiomi rũrũ nĩ rũritũ.” Na nĩ ma rwarĩ rũritũ! Nĩ twakenirio nĩ wĩhokeku wa aarĩ na ariũ a Ithe witũ nĩ ũndũ wa ũrĩa meehaarĩirie gwĩtĩkĩra mogarũrũku ma ithondeka, na tũkĩĩyonera ũrĩa Jehova aamarathimire. O rĩngĩ nĩ tweyoneire ũrĩa hingo ciothe Jehova arũngaga maũndũ na njĩra ya wendo, na ihinda-inĩ rĩrĩa rĩagĩrĩire. Mĩaka-inĩ ĩrĩa twatungatire Slovenia nĩ twahũthĩrire maũndũ maingĩ marĩa twerutĩte na tũkĩĩruta mangĩ merũ.

Ĩndĩ kwarĩ o na mogarũrũku mangĩ maarĩ mbere. Mwaka wa 2000 nĩ twatũmirũo tũgatungate bũrũri-inĩ wa Côte d’Ivoire, Afrika ya Ithũĩro. No nĩ ũndũ wa mbaara ya gĩĩkabira, mweri-inĩ wa Novemba 2002 nĩ twathamĩirio bũrũri-inĩ wa Sierra Leone. Kũu Sierra Leone mbaara yakoretwo yathira, ĩrĩa yarũĩtwo mĩaka 11. Hatiarĩ hahũthũ kuuma Côte d’Ivoire o rĩmwe. O na kũrĩ ũguo, maũndũ marĩa twerutĩte nĩ maatũteithirie gũtũũria gĩkeno.

Twathuurire kũiga meciria harĩ ũtungata tondũ kwarĩ na maumĩrĩro mega, na harĩ aarĩ na ariũ a Ithe witũ arĩa maakirĩrĩirie mbaara mĩaka mĩingĩ tondũ nĩ maatuonagia wendo. O na gũtuĩka maarĩ athĩni, nĩ meehaarĩirie kũgayana kĩrĩa maarĩ nakĩo. Harĩ mwarĩ wa Ithe witũ waheire Debbie nguo. Debbie nĩ aambĩte kũrega, no mwarĩ wa Ithe witũ ũcio akĩmwĩra: “Aarĩ na ariũ a Ithe witũ kuuma mabũrũri-inĩ mangĩ nĩo maatũteithagia hĩndĩ ya mbaara, no rĩu nĩ ihinda ritũ rĩa gũteithia.” Nĩ twatuire itua rĩa kwĩgerekania na kĩonereria kĩao.

Mũthia-inĩ tũgĩcoka Côte d’Ivoire, no mbaara ĩgĩtuthũka o rĩngĩ nĩ ũndũ wa ngahĩha cia gĩũteti. Kwoguo mweri-inĩ wa Novemba 2004, nĩ twathamirio na ndege ya helikopta, na o mũndũ aahotire gũkuua mondo ĩmwe tu. Ũtukũ ũcio twakomire thĩ thimiti-inĩ kambĩ-inĩ ya njeshi cia Faranja, na mũthenya ũyũ ũngĩ tũgĩtwarũo Switzerland na ndege. Rĩrĩa twakinyire wabici-inĩ ya rũhonge ya kũu kĩndũ thaa thita cia ũtukũ, ariũ a Ithe witũ a Kamĩtĩ ya Wabici ya Rũhonge na arutani a Cukuru ya Kũmenyeria Maũndũ ma Ũtungata hamwe na atumia ao magĩtũnyita ũgeni macanjamũkĩte, magĩtũhĩmbĩria, na magĩtũhe irio na chocolate nyingĩ. Ũndũ ũcio nĩ watũhutirie mũno.

Twambire gũtũmwo Ghana kwa ihinda, thutha ũcio tũgĩcokio Côte d’Ivoire mbaara yanyihanyiha. Ũteithio ũrĩa twaheirũo nĩ ariũ a Ithe witũ nĩ watũhotithirie kũhiũrania na moritũ ma gũthamĩrio kũndũ gũtiganĩte. Twĩ na Debbie tweranire atĩ o na gũtuĩka no twĩrĩgĩrĩre kuonio wendo nĩ aarĩ na ariũ a Ithe witũ, tũtibatiĩ kuona ũndũ ũcio ta arĩ o wa kawainda. O na mahinda-inĩ macio maritũ nĩ twerutire maũndũ ma bata.

GŨTUNGATA ASIA YA GATAGATĨ

Mwaka wa 2006 nĩ twamũkĩrire marũa kuuma wabici itũ nene, tũkĩĩrũo tũthiĩ tũgatungate Asia ya Gatagatĩ. O rĩngĩ, twabataraga kũhiũrania na moritũ matiganĩte, kwĩruta thiomi ingĩ, na kũmenyera ũndũire ngũrani. Twarĩ na maũndũ maingĩ ma kwĩruta gĩcigo-inĩ kĩu kĩarĩ na mathĩna nĩ ũndũ wa maũndũ ma gĩũteti na ma kĩĩndini. Nĩ twakeneire gũkorũo ciũngano-inĩ ciarĩ na andũ maaragia thiomi itiganĩte, na tũkĩĩyonera ũrũmwe ũrĩa uumanaga na kũrũmĩrĩra ũtongoria wa ithondeka. Nĩ twekĩragwo ngoro kuona ũrĩa ariũ a Ithe witũ maakiragĩrĩria, tondũ aingĩ ao nĩ mookagĩrĩrũo famĩlĩ-inĩ, cukuru, wĩra-inĩ, na itũũra-inĩ.

Mwaka-inĩ wa 2012 nĩ twathiire kĩgomano kĩa mwanya taũni-inĩ ya Tel Aviv, Israel. Rĩu nĩrĩo rĩarĩ riita rĩa mbere andũ a Jehova kũgomana marĩ aingĩ ũguo gĩcigo-inĩ kĩu kuuma hĩndĩ ya Pentekoste ya mwaka wa 33 M.M. Rĩarĩ ihinda rĩa mwanya mũno!

Mĩaka-inĩ ĩyo, nĩ twerirũo tũgaceerere bũrũri ũmwe wĩra witũ wekĩrĩirũo mĩkaana. Tũgĩthiĩ na mabuku, tũkĩhunjia nao, na tũgĩka igomano itaarĩ na andũ aingĩ. O na gũtuĩka kũndũ kũingĩ gwakoragwo na thigari irĩ na matharaita na gũkaigwo nyambo, tũtietigagĩra mũno tondũ twathiaga hamwe na ahunjia a kũu.

GŨCOKA AFRIKA

Mwaka wa 2013 nĩ twatũmirũo tũgatungate wabici-inĩ ya rũhonge ya Kinshasa, bũrũri-inĩ wa Congo, ũrĩa ũkoragwo ũrĩ mũnene na mũthaka, ĩndĩ andũ kũu nĩ mahiũranagia na ũthĩni mũnene na mbaara. Kĩambĩrĩria-inĩ tweĩrire, “Nĩ tũĩ Afrika, kwoguo nĩ twĩhaarĩirie gũthiĩ kuo.” No twarĩ na maũndũ maingĩ ma kwĩruta, makĩria ũhoro-inĩ wĩgiĩ gũthiĩ thabarĩ tondũ twageragĩra barabara itaarĩ njega. Nĩ twakeneire maũndũ maingĩ mega, ta kuona ariũ a Ithe witũ matũũrĩtie gĩkeno na ũkirĩrĩria o na marĩ na mathĩna ma mbeca, kuona ũrĩa mendete ũtungata, na ũrĩa merutanagĩria gũthiĩ mĩcemanio na igomano. Nĩ tweyoneire ũrĩa Jehova aarathimaga wĩra wa Ũthamaki gũkagĩa na wongerereku mũnene. Mĩaka ĩrĩa twatungatire Congo nĩ twerutire maũndũ maingĩ na tũkĩgĩa na arata aingĩ.

Mũthia-inĩ wa 2017, nĩ twatũmirũo tũgatungate South Africa. Ĩyo nĩyo wabici ĩrĩa nene ya rũhonge twanatungata, na o na mawĩra marĩa twehokeirũo Betheli maarĩ mageni harĩ ithuĩ. O rĩngĩ, nĩ twabataraga kwĩruta maũndũ maingĩ, no maũndũ marĩa twerutĩte na hau kabere nĩ maatũteithirie mũno. Nĩ twendete aarĩ na ariũ a Ithe witũ gũkũ tondũ nĩ makirĩrĩirie marĩ na wĩhokeku mĩaka mĩingĩ. Ningĩ nĩ tũkenaga kuona famĩlĩ ya Betheli ĩkĩrutithania wĩra na ũrũmwe o na andũ marĩ a rangi ngũrani na maumĩte ũndũire-inĩ ũtiganĩte. Jehova nĩ arathimĩte andũ ake magakorũo na thayũ, nĩ ũndũ wa gũkorũo makĩĩhumba ũmũndũ mwerũ na kũrũmĩrĩra motaaro ma Bibilia.

Kwa ihinda rĩa mĩaka mĩingĩ, twĩ na Debbie nĩ twamũkĩrĩte mĩeke ĩtiganĩte ya ũtungata, tũkabatara kwĩruta thiomi njerũ, na kũmenyera ũndũire ngũrani. O na gũtuĩka gwĩka ũguo gũtikoretwo gwĩ kũhũthũ, nĩ twĩyoneire wendo mwĩhokeku wa Jehova kũgerera ithondeka rĩake na aarĩ na ariũ a Ithe witũ. (Thab. 144:2) Twĩ na ma atĩ maũndũ marĩa twĩrutĩte ũtungata-inĩ wa mahinda mothe nĩ matũteithĩtie kwagagĩria ũtungata witũ harĩ Jehova.

Nĩ njokagia ngatho nĩ ũndũ wa ũrĩa aciari akwa maanderire, ũrĩa mũtumia wakwa andiirĩrĩire, na nĩ ũndũ wa kĩonereria kĩega kĩa aarĩ na ariũ a Ithe witũ thĩinĩ wa thĩ yothe. O twetereire ihinda rĩũkĩte, nĩ tũtuĩte itua rĩa gũthiĩ na mbere kũrutwo nĩ Mũrutani Witũ Ũrĩa Mũnene.