GĨCUNJĨ KĨA WĨRUTI KĨA 41
RWĨMBO NA. 108 Wendo Mwĩhokeku wa Ngai
Wendo wa Ngai Ũtũũraga Tene na Tene
“Cokeriai Jehova ngatho, tondũ nĩ mwega; wendo wake mwĩhokeku ũtũũraga tene na tene.”—THAB. 136:1
ŨNDŨ ŨRĨA WARĨRĨIRIO
Gĩcunjĩ gĩkĩ nĩ gĩgũtaarĩria ũrĩa kuona wendo wa Jehova ũrĩ ũrutani wa mũthingi kũngĩtũteithia kwaga gũkua ngoro rĩrĩa tũrahiũrania na moritũ.
1-2. Akristiano aingĩ maiguaga atĩa rĩrĩa maragerera moritũ manene?
TA HŨŨRA mbica meri ĩrĩ gatagatĩ wa iria rĩrĩ na kĩhuhũkanio kĩnene. Kũrĩ na makũmbĩ manene maracũgia meri ĩyo mwena na mwena. Mũndũ angĩaga kũhũthĩra nanga, meri ĩyo ndĩngĩtiga gũcũgacũgio nĩ makũmbĩ. Nanga no ĩteithie meri ĩyo gũikara ĩĩhandĩte o na kũrĩ na makũmbĩ manene.
2 Rĩrĩa ũrahiũrania na moritũ manene, no ũigue ta ũracũgacũgio ta meri ĩyo. Rĩmwe no ũigue ũkuĩte ngoro, na rĩrĩa rĩngĩ ũkaigua ũrĩ na hinya. Mahinda mamwe no ũigue ũrĩ na ma atĩ Jehova nĩ akwendete na atĩ nĩ aragũteithia, no mahinda mangĩ ũgekĩrĩra nganja kana o na nĩ arona maũndũ marĩa ũragerera. (Thab. 10:1; 13:1) Mũrata waku no akũũmĩrĩrie, na ũndũ ũcio ũkũhoorerie kwa ihinda. (Thim. 17:17; 25:11) No thutha-inĩ ũkagĩa na nganja rĩngĩ. O na no wambĩrĩrie kuona ta Jehova agũtiganĩirie. Hihi nĩ nanga ĩrĩkũ ya mũhaano ĩngĩgũteithia kwĩhanda mahinda-inĩ ta macio? Kana na ciugo ingĩ-rĩ, ũngĩka atĩa nĩguo hingo ciothe ũkoragwo na ma atĩ Jehova nĩ akwendete na nĩ arĩgũteithagia?
3. Ciugo “wendo mwĩhokeku” ikoragwo ikiuga atĩa o ta ũrĩa Thaburi 31:7 na 136:1 yonanĩtie, na nĩ kĩĩ kĩngĩtũma tuge atĩ Jehova nĩwe kĩonereria kĩrĩa kĩega biũ harĩ kuonania wendo ũcio? (Ningĩ rora mbica.)
3 Ũndũ ũmwe ũngĩgũteithia kwĩhanda hĩndĩ ya moritũ nĩ kũririkana wendo mwĩhokeku wa Jehova. (Thoma Thaburi 31:7; 136:1.) Ciugo “wendo mwĩhokeku” ikoragwo ikĩonania wendo mũnene na wa gũtũũra ũrĩa mũndũ angĩonia mũndũ ũngĩ. Jehova nĩwe kĩonereria kĩrĩa kĩega biũ harĩ kuonania wendo mwĩhokeku. O na Bibilia yugaga atĩ “aiyũirũo nĩ wendo mwĩhokeku.” (Tham. 34:6, 7) Ningĩ nĩ yugaga ũũ igũrũ rĩgiĩ Jehova: “Wendo waku mwĩhokeku nĩ mũingĩ harĩ arĩa othe magũkayagĩra.” (Thab. 86:5) Maandĩko macio maronania atĩ gũtirĩ hĩndĩ Jehova atiganagĩria ndungata ciake njĩhokeku. Kũririkana atĩ Jehova nĩ mwĩhokeku no gũgũteithie kwĩhanda rĩrĩa ũracemania na moritũ manene.—Thab. 23:4.
O ta ũrĩa nanga ĩteithagia meri ndĩgacũgacũgio rĩrĩa kwĩ na kĩhuhũkanio, no taguo gũkorũo na ma atĩ Jehova nĩ atwendete kũngĩtũma tũikare twĩhandĩte rĩrĩa tũracemania na moritũ (Rora kĩbungo gĩa 3)
ONAGA WENDO WA JEHOVA ŨRĨ ŨRUTANI WA MŨTHINGI WA BIBILIA
4. Heana ngerekano cia morutani ma mũthingi ma Bibilia, na ũtaarĩrie kĩrĩa gĩtũmaga tũkorũo tũmetĩkĩtie biũ.
4 Ũndũ ũngĩ ũngĩgũteithia kwĩhanda hĩndĩ ya moritũ nĩ kuonaga wendo wa Jehova ũrĩ ũrutani wa mũthingi wa Bibilia. Ciugo “ũrutani wa mũthingi wa Bibilia” ciugĩte atĩa? No tuuge nĩ morutani marĩa twĩrutĩte kuuma Kiugo-inĩ kĩa Ngai. Kwa ngerekano, nĩ wĩrutĩte atĩ Ngai etagwo Jehova, Jesu nĩ Mũrũ wa mũmwe wa Ngai, arĩa makuĩte gũtirĩ ũndũ moĩ, na atĩ thĩ nĩ ĩgaatuĩka paradiso na andũ matũũre thĩinĩ wayo tene na tene. (Thab. 83:18; Koh. 9:5; Joh. 3:16; Kũg. 21:3, 4) Rĩrĩa wetĩkirie morutani macio, gũtirĩ mũndũ ũngĩakũgarũrire. Nĩkĩ? Tondũ nĩ wamenyire atĩ morutani macio maumanĩte na ũhoro wa ma. Reke tuone ũrĩa kuona wendo wa Jehova ũrĩ ũrutani wa mũthingi kũngĩtũteithia kweheria rĩciria rĩa atĩ Jehova ndonaga moritũ marĩa tũhiũranagia namo kana agatindanĩra namo.
5. Taarĩria ũrĩa mũndũ ahotaga gũtigana na morutani ma maheeni.
5 Rĩrĩa wambĩrĩirie kwĩruta Bibilia-rĩ, nĩ kĩĩ gĩagũteithirie gũtigana na morutani ma maheeni? Kwahoteka kĩrĩa gĩagũteithirie nĩ kũringithania maũndũ marĩa werutaga ndini-inĩ yanyu na marĩa werutaga kuuma Bibilia-inĩ. Kwa ngerekano, nĩ tũtue atĩ kũrĩ hĩndĩ wetĩkĩtie atĩ Jesu nĩ Ngai Mwene-Hinya-Wothe. No rĩrĩa werutaga Bibilia, nĩ weyũragia kana ũrutani ũcio nĩ wa ma. Thutha wa gũthuthuria ũrĩa Bibilia ĩrutanaga, ũkĩmenya atĩ ũrutani ũcio ti wa ma. Thutha ũcio nĩ watiganire na ũrutani ũcio wa maheeni na ũkĩambĩrĩria gwĩtĩkia ũrutani wa Bibilia wa atĩ Jesu nĩ “irigithathi harĩ ũũmbi wothe,” na “Mũrũ wa mũmwe wa Ngai.” (Kol. 1:15; Joh. 3:18) Nĩ ma, morutani ma maheeni no makorũo “marũmĩte mũno” na marĩ maritũ gũtigana namo. (2 Kor. 10:4, 5) No rĩrĩa wahotire gũtigana namo, ndwacokire gwĩtĩkia rĩngĩ morutani macio ma maheeni.—Afil. 3:13.
6. Nĩ kĩĩ kĩngĩtũma ũkorũo na ma atĩ wendo mwĩhokeku wa Jehova “ũtũũraga tene na tene”?
6 No twĩcũranie na njĩra o ta ĩyo igũrũ rĩgiĩ ũrĩa Bibilia ĩrutanaga ũhoro-inĩ wĩgiĩ wendo wa Jehova. Ũngĩcemania na igerio na wambĩrĩrie gwĩkĩrĩra nganja wendo wa Jehova, no wĩyũrie, ‘Hihi nĩ ndĩreciria na njĩra ĩrĩa yagĩrĩire?’ Ringithania nganja iria wĩ nacio ciĩgiĩ wendo wa Jehova na ciugo cia rĩandĩko rĩa mũthingi rĩa gĩcunjĩ gĩkĩ rĩa Thaburi 136:1. Nĩ kĩĩ gĩtũmaga Jehova auge atĩ wendo wake nĩ “mwĩhokeku”? Nĩ kĩĩ gĩtũmĩte ciugo “wendo wake mwĩhokeku ũtũũraga tene na tene” icokerũo maita 26 mũrango-inĩ ũcio wa Thaburi? O ta ũrĩa tuona, wendo mwĩhokeku wa Jehova ũrĩa onagia ndungata ciake nĩ ũrutani wa mũthingi wa Bibilia, o ta morutani marĩa mangĩ wĩrutĩte kuuma Bibilia-inĩ na ũkametĩkia. Rĩciria rĩa atĩ Jehova akuonaga ũrĩ mũndũ wa tũhũ kana ũtangĩendeka nĩ rĩa maheeni. Regana na maheeni macio o ta ũrĩa ũngĩregana biũ na morutani marĩa mangĩ ma maheeni!
7. Nĩ maandĩko ta marĩkũ mangĩgũteithia gũkorũo na ma atĩ Jehova nĩ akwendete?
7 Bibilia nĩ ĩkoragwo na ciugo ingĩ nyingĩ ingĩtũteithia gũkorũo na ma atĩ Jehova nĩ atwendete. Kwa ngerekano, Jesu eerire arũmĩrĩri ake ũũ: “Inyuĩ mũrĩ a bata gũkĩra tũnyoni tũingĩ.” (Mat. 10:31) Na Jehova we mwene eerire andũ ake ũũ: “Nĩ ngũgwĩkĩra hinya, ĩni, nĩ ngũgũteithia, ngũkũnyita biũ na guoko gwakwa kwa ũrĩo kwa ũthingu.” (Isa. 41:10) Ciugo icio itironania nganja o na hanini. Jesu ndaugire, ‘No gũkorũo mũrĩ a bata gũkĩra tũnyoni,’ no aaugire ũũ: “Mũrĩ a bata gũkĩra tũnyoni.” Na Jehova ndaugire, ‘Ndahota gũgũteithia,’ no aaugire ũũ: “Nĩ ngũgũteithia.” Maandĩko macio maragia ũrĩa kũrĩ. Kwoguo ũngĩgakorũo na nganja igũrũ rĩgiĩ wendo wa Jehova wacemania na igerio, maandĩko ta macio no magũteithie kũigua Jehova akwendete, na makĩria ma ũguo magũteithie gũkorũo na ma biũ atĩ nĩ akwendete. Ũngĩĩcũrania na njĩra ndikĩru igũrũ rĩgiĩ maandĩko ta macio, no wĩtĩkanie na ciugo ici cia 1 Johana 4:16: “Nĩ tũmenyete na tũgetĩkia wendo ũrĩa Ngai akoragwo naguo harĩ ithuĩ.”a
8. Ũngĩka atĩa angĩkorũo rĩmwe nĩ wĩkagĩrĩra nganja kana Jehova nĩ akwendete?
8 Ĩ angĩkorũo rĩmwe nĩ wĩkagĩrĩra nganja kana Jehova nĩ akwendete? Ringithania ũrĩa ũraigua ngoro-inĩ na maũndũ marĩa ũĩ mamwĩgiĩ. Ngoro no ĩheenanie, no ũhoro ũrĩa Bibilia ĩrutanaga wĩgiĩ wendo wa Jehova nĩ wa kwĩhokeka. Tũngĩaga gwĩtĩkia atĩ Jehova nĩ atwendete, tũngĩkorũo tũkĩhũthia ngumo yake ĩrĩa nene ya wendo.—1 Joh. 4:8.
WĨCŨRANAGIE ŨRĨA JEHOVA ‘AKWENDETE’
9-10. Jesu aaragĩrĩria ũhoro ũrĩkũ rĩrĩa aaugire ciugo ici irĩ thĩinĩ wa Johana 16:26, 27: “Awa we mwene nĩ amwendete”? (Ningĩ rora mbica.)
9 No twĩrute makĩria igũrũ rĩgiĩ wendo wa Jehova tũngĩcũrania ciugo ici Jesu eerire arũmĩrĩri ake: “Awa we mwene nĩ amwendete.” (Thoma Johana 16:26, 27.) Jesu ndaamerire ciugo icio akĩenda tu kũmakenia. Ũhoro ũrĩa ũthiũrũrũkĩirie mũhari ũcio ũronania atĩ aaragĩrĩria ũhoro wa mahoya.
10 Jesu aakoretwo era arutwo ake atĩ magĩrĩirũo kũhoya na rĩĩtwa rĩake no ti kũmũhoya we mwene. (Joh. 16:23, 24) Nĩ maabataraga kũmenya ũndũ ũcio. Thutha wa Jesu kũriũka, arutwo ake nĩ mangĩendire kũmũhoya tondũ nĩ maakinyĩrĩire kũmenyana nake na agatuĩka mũrata wao. Nĩ ũndũ wa ũrĩa aamendete, nĩ mangĩonire ta ũndũ ũcio ũngĩatũmire athikĩrĩrie mahoya mao na amathaithanĩrĩre harĩ Ithe. No Jesu nĩ aamateithirie kuona atĩ matibatiĩ gwĩciria na njĩra ĩyo. Nĩkĩ? Tondũ aameerire ũũ: “Awa we mwene nĩ amwendete.” Ũguo nĩ kuuga atĩ Jehova atwendete mũno ũũ atĩ we mwene nĩwe ũthikagĩrĩria mahoya maitũ. Ũndũ ũcio nĩ ũhutanĩtie na ũrutani wa mũthingi wa Bibilia wĩgiĩ mahoya. Hihi ũndũ ũcio ũrakũhutia atĩa? O nawe nĩ ũkinyĩrĩire kũmenya Jesu na kũmwenda, kũgerera kwĩruta Bibilia. (Joh. 14:21) No o ta arutwo acio a Jesu, no ũhoe Jehova ũrĩ na ma atĩ nĩ egũkũigua tondũ ‘we mwene nĩ akwendete.’ Nĩ wonanagia atĩ nĩ wĩtĩkĩtie ciugo icio rĩrĩa rĩothe wahoya Jehova.—1 Joh. 5:14.
No ũhoe Jehova ũrĩ na ma atĩ nĩ egũkũigua, tondũ ‘we mwene nĩ akwendete’ (Rora kĩbungo gĩa 9-10)b
KŨŨRANA KĨRĨA GĨTŨMAGA ŨKORŨO NA NGANJA
11. Nĩ kĩĩ kĩngĩtũma Shaitani akene tũngĩambĩrĩria gwĩkĩrĩra nganja wendo wa Jehova?
11 Nĩ kĩĩ gĩtũmaga tũkorũo na nganja kana Jehova nĩ atwendete? Wahota kuuga nĩ Shaitani ũtũmaga tũkorũo na nganja icio, na nĩ ma nĩ acangĩire ũndũ-inĩ ũcio. Shaitani nĩ endaga ‘gũtũtambura,’ na kwoguo no akene mũno tũngĩkĩrĩra nganja wendo wa Jehova. (1 Pet. 5:8) Ma nĩ atĩ, wendo nĩguo watindĩkire Jehova kũruta ũkũũri, no Shaitani endaga tuone ta tũtaragĩrĩra kũgunĩka kuumana naguo. (Ahib. 2:9) Ta wĩcirie ũndũ ũyũ! Hihi nũũ ũkenaga rĩrĩa twekĩrĩra nganja wendo wa Jehova kana rĩrĩa twakua ngoro nĩ ũndũ wa moritũ? Hatarĩ nganja nĩ Shaitani. Shaitani endaga twĩcirie atĩ Jehova ndatwendete, no ũrĩa kũrĩ nĩ atĩ we nĩwe ũtendetwo nĩ Jehova. ‘Wara’ ũmwe mũnene ahũthagĩra nĩ gũtũma tuone ta arĩ ithuĩ tũtendetwo nĩ Jehova na tũregetwo nĩwe. (Ef. 6:11) Kũmenya atĩ ũcio nĩ wara wa Shaitani, no gũtũme tũtue itua irũmu rĩa ‘kũregana nake.’—Jak. 4:7.
12-13. Nĩ na njĩra ĩrĩkũ kwaga gũkinyanĩra gwitũ kũngĩtũma twĩkĩrĩre nganja wendo wa Jehova?
12 Ũndũ ũngĩ ũngĩtũma twĩkĩrĩre nganja wendo wa Jehova nĩ kwaga gũkinyanĩra gwitũ kũrĩa twagaire. (Thab. 51:5; Rom. 5:12) Mehia nĩ maamũranirie andũ na Ngai. Ningĩ nĩ maathũkirie meciria na ngoro citũ, na ũgima witũ wa mwĩrĩ.
13 Rĩrĩa twehia no tũigue tũgĩthumbũrũo nĩ thamiri, tũrĩ na mĩtangĩko, na tũkaigua tũtarĩ na ũgitĩri na tũconokete. Ningĩ no tũigue ũguo tondũ nĩ tũririkanaga atĩ tũrĩ andũ matarĩ akinyanĩru, na ũguo tiguo Jehova aatũmbire. (Rom. 8:20, 21) O ta ũrĩa ngaari ĩrĩ na kũgũrũ gũtarĩ mĩrukĩ ĩngĩaga gũthiĩ ũrĩa kwagĩrĩire, no taguo kwaga gũkinyanĩra gwitũ gũtũmaga twage gwĩka maũndũ na njĩra nginyanĩru ta ũrĩa tuombĩtwo. Nĩkĩo rĩmwe tũgĩaga nganja kana Jehova nĩ atwendete. Rĩrĩa twagĩa na nganja icio, twagĩrĩirũo kũririkana atĩ Jehova nĩ “Ngai mũnene na wa magegania ũrĩa [wonanagia] wendo mwĩhokeku harĩ arĩa mamwendete na makahingia maathani make.”—Neh. 1:5.
14. Gwĩcũrania ũhoro wĩgiĩ ũkũũri kũngĩtũteithia atĩa gũkorũo na ma atĩ Jehova nĩ atwendete? (Aroma 5:8) (Ningĩ rora gathandũkũ, “Wĩmenyerere ‘Hinya wa Maheeni wa Mehia.’”)
14 Rĩmwe no tũigue ta tũtaragĩrĩra kwendwo nĩ Jehova. Ma nĩ atĩ tũtikoragwo tũkĩagĩrĩra kwendwo nĩwe, na ũndũ ũcio nĩguo ũtũmaga wendo wake ũkorũo ũrĩ wa mwanya. Gũtirĩ ũndũ tũngĩka twagĩrĩre kwendwo nĩ Jehova. O na kũrĩ ũguo, Jehova nĩ aatindĩkirũo nĩ wendo kũruta ũkũũri nĩguo tuoherũo mehia maitũ. (1 Joh. 4:10) Ningĩ ririkana atĩ Jesu ookire kũhonokia andũ ehia no ti andũ akinyanĩru. (Thoma Aroma 5:8.) Gũtirĩ mũndũ ũngĩhota gwĩka maũndũ na njĩra nginyanĩru, na Jehova ndangĩrĩgĩrĩra twĩke ũguo. Rĩrĩa twataũkĩrũo atĩ kwaga gũkinyanĩra gwitũ no gũtũme twĩkĩrĩre nganja kana Jehova nĩ atwendete, ũndũ ũcio no ũtũteithie kwĩhotora o na makĩria kũrũa na nganja icio.—Rom. 7:24, 25.
TUA ITUA RĨA GŨTŨŨRA ŨRĨ MWĨHOKEKU
15-16. Tũngĩkorũo na ma na ũndũ ũrĩkũ tũngĩtũũra tũrĩ ehokeku harĩ Jehova, na nĩkĩ? (2 Samueli 22:26)
15 Jehova endaga tũtue itua rĩrĩa rĩagĩrĩire rĩa “kwĩgwatania nake.” (Gũcok. 30:19, 20) No tũkorũo na ma atĩ tũngĩka ũguo, o nake egũtũũra arĩ mwĩhokeku harĩ ithuĩ. (Thoma 2 Samueli 22:26.) Tũngĩtũũra tũrĩ ehokeku harĩ Jehova, no tũkorũo na ma atĩ nĩ arĩtũteithagia ũndũ-inĩ o wothe tũngĩcemania naguo ũtũũro-inĩ.
16 O ta ũrĩa tuona, tũrĩ na itũmi njiganu cia gũikara twĩhandĩte rĩrĩa tũracemania na moritũ. Nĩ twĩrutĩte kũgerera Bibilia atĩ Jehova nĩ atwendete na nĩ arĩtũteithagia. Tũngĩgakorũo na nganja kana Jehova nĩ atwendete, no tũige meciria harĩ ũhoro wa ma ũrĩa tũĩ ũmwĩgiĩ, handũ ha ũrĩa tũraigua ngoro-inĩ. Rekei tũkoragwo na ma atĩ wendo mwĩhokeku wa Jehova ũtũũraga tene na tene, o ta ũrĩa Bibilia ĩrutanaga.
RWĨMBO NA. 159 Heaga Jehova Riri
a Maandĩko mangĩ nĩ ta Gũcokerithia Maathani 31:8, Thaburi 94:14, na Isaia 49:15.
b GŨTAARĨRIA MBICA: Mũrũ wa Ithe witũ akĩhoya Jehova amũteithie kũrũmbũiya mũtumia wake mũrwaru, kũhũthĩra mbeca ciake wega, na kũruta kairĩtu kao kwenda Jehova.