GĨCUNJĨ KĨA WĨRUTI KĨA 33
RWĨMBO NA. 4 “Jehova Nĩwe Mũrĩithi Wakwa”
Ĩtĩkia atĩ Jehova nĩ Akwendete
“Ngũgucĩrĩirie harĩ niĩ na wendo mwĩhokeku.”—JER. 31:3.
ŨNDŨ ŨRĨA WARĨRĨIRIO
Nĩ tũkuona nĩkĩ nĩ ũndũ wa bata gwĩtĩkia atĩ Jehova nĩ atwendete, na tuone ũrĩa tũngĩka nĩguo tũkorũo na ma biũ na ũndũ ũcio.
1. Nĩ kĩĩ gĩatũmire wĩyamũrĩre Jehova? (Ningĩ rora mbica.)
HIHI no ũririkane rĩrĩa weyamũrĩire Jehova? Watuire itua rĩu tondũ nĩ wakinyĩrĩire kũmũmenya, na ũkĩmwenda. Nĩ wamwĩrĩire atĩ ũrĩigaga wendi wake mbere ũtũũro-inĩ waku, na atĩ nĩ ũgũthiĩ na mbere kũmwenda na ngoro yaku yothe, muoyo waku wothe, meciria maku mothe, na hinya waku wothe. (Mar. 12:30) Kuuma hĩndĩ ĩyo, wendo waku harĩ we nĩ ũkũrĩte o na makĩria. Nĩ ũndũ ũcio-rĩ, ũngĩcokia atĩa mũndũ angĩkũria kĩũria gĩkĩ, “Hihi nĩ wendete Jehova?” Hatarĩ nganja ũngĩmũcokeria ũũ ũtekũmaĩrĩria, “Ndĩmwendete gũkĩra mũndũ kana kĩndũ kĩngĩ o gĩothe!”
Hihi nĩ ũririkanaga wendo ũrĩa warĩ naguo harĩ Jehova rĩrĩa wamwĩyamũrĩire na ũkĩbatithio? (Rora kĩbungo kĩa 1)
2-3. Jehova endaga ũkorũo na ma na ũndũ ũrĩkũ, na nĩ kĩĩ tũkwarĩrĩria gĩcunjĩ-inĩ gĩkĩ? (Jeremia 31:3)
2 No hihi ũngĩcokia atĩa mũndũ angĩkũũria ũũ, “Wĩ na ma atĩ Jehova nĩ akwendete?” Hihi no ũhindahinde gũcokia ũgĩciria atĩ ndũragĩrĩra kwendwo nĩ Jehova? Mwarĩ wa Ithe witũ ũmwe warĩ na ũtũũro mũritũ agĩkũra aaugire ũũ: “Ndikoragwo na nganja atĩ nĩ nyendete Jehova. No kaingĩ nĩ njĩkagĩrĩra nganja kana Jehova nĩ anyendete.” Hihi nĩ kĩĩ kĩngĩgũteithia kũmenya ũrĩa Jehova aiguaga gũkwerekera?
3 Jehova endaga ũkorũo na ma atĩ nĩ akwendete. (Thoma Jeremia 31:3.) Ma nĩ atĩ Jehova nĩwe wakũgucĩrĩirie harĩ we. Na rĩrĩa wamwĩyamũrĩire na ũkĩbatithio, nĩ aakũheire kĩheo kĩa mwanya kĩa wendo wake mwĩhokeku. Ũguo nĩ kuuga atĩ akoragwo na wendo mũnene gũkwerekera, na ndarĩ hĩndĩ angĩgũtiga. Wendo ũcio ũtũmaga one ndungata ciake njĩhokeku irĩ “kĩndũ kĩa goro,” na kwoguo akuonaga ũrĩ wa goro mũno. (Mal. 3:17, kohoro ka magũrũ-inĩ) O ta ũrĩa mũtũmwo Paulo aarĩ na ma atĩ Jehova nĩ aamwendete, noguo Jehova endaga ũkorũo na ma atĩ nĩ akwendete. Paulo aandĩkire ũũ: “Ndĩ na ũũma atĩ o na gĩkuũ kana muoyo kana araika kana thirikari kana maũndũ marĩa marĩ kuo rĩu kana maũndũ marĩa magooka kana mahinya kana ũraihu wa na igũrũ kana ũriku kana ũũmbi ũngĩ o wothe, gũtirĩ kĩndũ kĩngĩhota gũtũtigithũkania na wendo wa Ngai.” (Rom. 8:38, 39) Gĩcunjĩ-inĩ gĩkĩ, nĩ tũkuona nĩkĩ nĩ ũndũ wa bata gũkorũo na ma biũ atĩ Jehova nĩ atwendete, na tuone nĩ kĩĩ kĩngĩtũteithia gwĩka ũguo.
NĨKĨ NĨ ŨNDŨ WA BATA GWĨTĨKIA ATĨ JEHOVA NĨ ATWENDETE?
4. Nĩ wara ũrĩkũ ũmwe Shaitani ahũthagĩra, na tũngĩregana naguo atĩa?
4 Gwĩtĩkia atĩ Jehova nĩ atwendete no gũtũteithie gwĩtiiria “mawara” ma Shaitani. (Ef. 6:11) Shaitani no eke ũndũ o wothe nĩguo atũme tũtige gũtungatĩra Jehova. Wara ũmwe Shaitani ahũthagĩra nĩ gũtũheenereria twĩtĩkie atĩ Jehova ndatwendete. Ririkanaga atĩ Shaitani endaga kũhũthĩra kaanya o gothe ona. Kaingĩ atũtharĩkagĩra rĩrĩa tũũrĩtwo nĩ hinya, ta rĩrĩa tũkuĩte ngoro nĩ ũndũ wa maũndũ twahĩtũkĩire tene, moritũ marĩa tũragerera ihinda-inĩ rĩrĩ, kana nĩ ũndũ wa kwaga kũmenya ũrĩa rũciũ gũkahaana. (Thim. 24:10) Shaitani atariĩ ta mũrũthi ũracaria nyamũ ĩtarĩ na hinya ya gũtambura. Nĩkĩo ageragia gũtũtharĩkĩra rĩrĩa tũũrĩtwo nĩ hinya, akĩenda gũtũma tũtige gũtungatĩra Jehova. No tũngĩka ũrĩa wothe tũngĩhota nĩguo tũkorũo na ma biũ atĩ Jehova nĩ atwendete, nĩ tũrĩkoragwo twĩhaarĩirie ‘kũregana’ na Shaitani na mawara make.—1 Pet. 5:8, 9; Jak. 4:7.
5. Nĩkĩ nĩ ũndũ wa bata kũigua atĩ Jehova nĩ atwendete?
5 Gwĩtĩkia atĩ Jehova nĩ atwendete nĩ gũtũmaga tũmũkuhĩrĩrie makĩria. Nĩ kĩĩ kĩngĩtũma tuuge ũguo? Tondũ Jehova aatũmbire twĩ na merirĩria ma kũigua twendetwo, na kwendana. Rĩrĩa mũndũ atuonia wendo, nĩ tũiguaga tũgĩtindĩkwo kũmwenda. Kwoguo o ũrĩa tũkũigua twendetwo nĩ Jehova, noguo tũkũmwenda o na makĩria. (1 Joh. 4:19) Na o ũrĩa wendo witũ harĩ we ũkuongerereka, noguo arĩtwendaga o na makĩria. Bibilia yugaga ũũ: “Kuhĩrĩriai Ngai, nake nĩ ekũmũkuhĩrĩria.” (Jak. 4:8) No hihi tũngĩka atĩa nĩguo tũkorũo na ma biũ atĩ Jehova nĩ atwendete?
NĨ KĨĨ KĨNGĨTŨTEITHIA GWĨTĨKIA ATĨ JEHOVA NĨ ATWENDETE?
6. Nĩ ũndũ ũrĩkũ ũngĩhoya igũrũ rĩaguo angĩkorũo nĩ ũritũhagĩrũo gwĩtĩkia atĩ Jehova nĩ akwendete?
6 Hoyaga ũtegũtigithĩria, ũkera Jehova agũteithie gũtaũkĩrũo atĩ nĩ akwendete. (Luk. 18:1; Rom. 12:12) O mũthenya, hoyaga Jehova maita maingĩ o ũrĩa kũngĩbatarania nĩguo agũteithie kwĩyona ũrĩa akuonaga. Rĩmwe ngoro yaku no ĩgũciirithie, ĩtũme ũritũhĩrũo gwĩtĩkia atĩ Jehova nĩ akwendete. No ririkanaga atĩ Jehova nĩ mũnene gũkĩra ngoro yaku. (1 Joh. 3:19, 20) Nĩ akũĩ wega o na gũkĩra ũrĩa wĩyũĩ; na nĩ onaga ngumo ciaku njega iria ũngĩkorũo ũtegũciona. (1 Sam. 16:7; 2 Maũ. 6:30) Kwoguo ndũgetigĩre ‘kũmũitũrũrĩra’ ngoro yaku, ũmwĩre agũteithie gũkorũo na ma atĩ nĩ akwendete. (Thab. 62:8) Thutha ũcio wĩke kũringana na mahoya maku, na njĩra ya gwĩka maũndũ maya marũmĩrĩire.
7-8. Mĩhari ĩmwe ya Thaburi ĩtũteithagia atĩa gũkorũo na ma atĩ Jehova nĩ atwendete?
7 Ĩtĩkagia ũrĩa Jehova augĩte. Akĩhũthĩra roho wake mũtheru, nĩ aateithirie aandĩki a Bibilia gũtaarĩria ũrĩa atariĩ kũna. Ta wĩcirie ciugo ici Daudi mwandĩki wa thaburi aahũthĩrire gũtaarĩria ũcayanĩri wa Jehova: “Jehova akoragwo hakuhĩ na arĩa mathuthĩkĩte ngoro; nĩ ahonokagia arĩa makuĩte ngoro.” (Thab. 34:18, kohoro ka magũrũ-inĩ) Rĩrĩa ũkuĩte ngoro, no ũigue ta ũtiganĩirio. No Jehova eranĩire atĩ hĩndĩ ta ĩyo akoragwo hakuhĩ nawe, tondũ nĩ oĩ atĩ nĩrĩo ũrabatara ũteithio wake o na makĩria. Ningĩ Daudi aandĩkire ũũ thĩinĩ wa thaburi ĩngĩ: “Cokanĩrĩria maithori makwa cuba-inĩ yaku.” (Thab. 56:8) Jehova nĩ onaga rĩrĩa ũrĩ na moritũ. Nĩ akũrũmbũyagia mũno, na agataũkĩrũo nĩ ruo rũrĩa wĩ naruo. Nĩ ta acokanagĩrĩria maithori maku cuba-inĩ na akamona marĩ ma bata, o ta ũrĩa mũndũ ũrĩ thabarĩ-inĩ onaga maĩ marĩa akuuĩte cuba-inĩ marĩ ma bata. Nayo Thaburi 139:3 yugaga: “[Jehova] nĩ ũĩ njĩra ciakwa ciothe.” Jehova nĩ onaga njĩra ciaku ciothe, no aigaga meciria harĩ maũndũ mega marĩa wĩkaga. (Ahib. 6:10) Ekaga ũguo tondũ nĩ akenaga mũno nĩ ũrĩa wĩrutanagĩria kũmwathĩkĩra.a
8 Kũgerera maandĩko ta macio ma kũũmĩrĩria, nĩ ta Jehova akoragwo agĩkwĩra ũũ: “Menya atĩ nĩ ngwendete mũno, na nĩ ngũrũmbũyagia.” No o ta ũrĩa tuonire, Shaitani endaga wĩtĩkie atĩ Jehova ndakwendete. Kwoguo rĩrĩa wekĩrĩra nganja kana Jehova nĩ akwendete, tithia na wĩyũrie ũũ, ‘Hihi ngwĩtĩkia “ithe wa maheeni” kana “Ngai wa ũhoro wa ma”?’—Joh. 8:44; Thab. 31:5.
9. Nĩ ũndũ ũrĩkũ Jehova erĩire arĩa mamwendete? (Thama 20:5, 6)
9 Wĩcũranagie ũrĩa Jehova aiguaga kwerekera andũ arĩa mamwendete. Ta wĩcirie ũrĩa Jehova eerire Musa na Aisiraeli. (Thoma Thama 20:5, 6.) Jehova eranĩire atĩ nĩ arĩonanagia wendo mwĩhokeku harĩ arĩa mamwendete. Ciugo icio iratũhe ũũma atĩ, tondũ Jehova nĩ mwĩhokeku, gũtirĩ hĩndĩ angĩaga kwenda athathaiya ake arĩa mamwendete. (Neh. 1:5) Kwoguo rĩrĩa waritũhĩrũo gwĩtĩkia atĩ Jehova nĩ akwendete, tithia na wĩyũrie ũũ, ‘Hihi nĩ nyendete Jehova?’ Angĩkorũo nĩ ũmwendete na nĩ wĩrutanagĩria biũ kũmũkenia, korũo na ma atĩ nĩ akwendete mũno. (Dan. 9:4; 1 Kor. 8:3) Ũguo nĩ kuuga atĩ angĩkorũo ndũrĩ na nganja atĩ nĩ wendete Jehova, ndũbatiĩ gwĩkĩrĩra nganja wendo wake gũkwerekera. Kwoguo korũo na ma atĩ Jehova nĩ akwendete mũno, na gũtirĩ hĩndĩ agaagũtiga.
10-11. Jehova endaga tũkorũo na mawoni marĩkũ kwerekera ũkũũri? (Agalatia 2:20)
10 Wĩcũranagie ũhoro wĩgiĩ ũkũũri. Kĩheo kĩrĩa kĩnene mũno Jehova anahe andũ, nĩ igongona rĩa ũkũũri rĩa Jesu Kristo. (Joh. 3:16) No hihi nĩ wonaga ta Jesu aakuire nĩ ũndũ waku wee mwene? Ta wĩcirie ũhoro wa mũtũmwo Paulo. Atanatuĩka Mũkristiano nĩ eekĩte mehia mamwe maritũ, na ningĩ nĩ aabataraga gũthiĩ na mbere na kũrũa na mawathe ma kwaga gũkinyanĩra. (Rom. 7:24, 25; 1 Tim. 1:12-14) No nĩ aagĩire na ma atĩ Jehova aaheanire kĩheo gĩa ũkũũri nĩ ũndũ wake mwene. (Thoma Agalatia 2:20.) Ririkana atĩ Jehova nĩwe watongoririe Paulo kwandĩka ciugo icio. Na ũhoro wothe ũrĩ Bibilia-inĩ wandĩkirũo ũrĩ wa gũtũruta. (Rom. 15:4) Ciugo icio cia Paulo cionanagia atĩ Jehova endaga wone ũkũũri ũrĩ kĩheo akũheete wee mwene. Gũkorũo na mawoni ta macio kwerekera ũkũũri, nĩ kũrĩgũteithagia gũkorũo na ma biũ atĩ Jehova nĩ akwendete.
11 Nĩ tũcokagĩria Jehova ngatho nĩ ũndũ wa gũtũma Jesu oke akue nĩ ũndũ witũ. No ũndũ ũngĩ watũmire Jesu oke gũkũ thĩ, nĩ kũmenyithia andũ ũhoro wa ma wĩgiĩ Ngai. (Joh. 18:37) Ũndũ ũcio nĩ wahutĩtie kũmenyithania ũrĩa Jehova endete ciana ciake cia gũkũ thĩ.
ŨRĨA JESU ATŨTEITHAGIA GWĨTĨKIA ATĨ JEHOVA NĨ ATWENDETE
12. Nĩkĩ tũtingĩkorũo na nganja na maũndũ marĩa Jesu aaugire megiĩ Jehova?
12 Rĩrĩa Jesu aarĩ gũkũ thĩ, nĩ eendete gũtaarĩria andũ ũrĩa Jehova atariĩ. (Luk. 10:22) Tũtingĩkorũo na nganja o na hanini na maũndũ marĩa aaugire megiĩ Jehova. Gĩtũmi nĩ tondũ Jesu nĩ aatũũranĩtie na Jehova kũrĩa igũrũ ihinda iraihu mũno. (Kol. 1:15) Kwoguo nĩ eeyoneire wega ũrĩa Jehova amwendete, na ũrĩa endete araika, na ciana ciake njĩhokeku cia gũkũ thĩ. Hihi Jesu atũteithĩtie atĩa gwĩtĩkia atĩ Jehova nĩ atwendete?
13. Jesu endaga tũtaũkĩrũo nĩ ũndũ ũrĩkũ wĩgiĩ Jehova?
13 Jesu endaga tuone Jehova ta ũrĩa amuonaga. Thĩinĩ wa mabuku ma Injiri, Jesu etĩte Jehova “Awa” makĩria ma maita 115. Na rĩrĩa aaragia na arũmĩrĩri ake, nĩ aahũthagĩra ciugo ta “Ithe wanyu” kana “Ithe wanyu wa igũrũ.” (Mat. 5:16; 6:26) Mahinda-inĩ ma tene, ndungata cia Ngai nĩ cietaga Jehova ikĩhũthĩra marĩĩtwa ma ũnene ta ‘Mwene Hinya Wothe,’ ‘Ũrĩa ũrĩ Igũrũ Mũno,’ na ‘Mũũmbi.’ No kaingĩ Jesu eetaga Jehova ‘Awa,’ na ũndũ ũcio nĩ wonanagia atĩ Jehova nĩ endaga ndungata ciake ikorũo na ũrata wa hakuhĩ hamwe nake. Kwoguo Jesu aatũrutaga atĩ Jehova atwendete ta ũrĩa mũciari akoragwo endete ciana ciake. Rekei tuone mahinda-inĩ merĩ Jesu aahũthĩrire ciugo “Ithe wanyu” na “Awa.”
14. Jesu oonanirie atĩa atĩ o ũmwe witũ nĩ wa bata maitho-inĩ ma Ithe witũ wa igũrũ? (Mathayo 10:29-31) (Ningĩ rora mbica.)
14 Reke twambĩrĩrie na gũthuthuria ciugo cia Jesu iria irĩ thĩinĩ wa Mathayo 10:29-31. (Thoma.) Tũnyoni tũtithathayagia Jehova kana tũkamwenda, no Jesu aaugire atĩ gũtirĩ o na kamwe gatuo kangĩgwa thĩ na Ithe witũ age kũmenya. Angĩkorũo ũguo nĩguo kanyoni gakoragwo karĩ ka bata harĩ Jehova-rĩ, na githĩ ndakĩonaga o ũmwe witũ arĩ wa bata makĩria ithuĩ tũmwendete na tũmũthathayagia? Ningĩ Jesu aaugire atĩ Ithe witũ nĩ akoragwo atarĩte njuĩrĩ cia mĩtwe itũ. Angĩkorũo Jehova nĩ oĩ nginya tũmaũndũ tũrĩa tũnini tũtwĩgiĩ-rĩ, na githĩ to tũgĩkorũo na ma biũ atĩ nĩ atũrũmbũyagia mũno? Hatarĩ nganja Jesu endaga tũkorũo na ma biũ atĩ o ũmwe witũ nĩ wa bata mũno maitho-inĩ ma Ithe witũ wa igũrũ.
Jehova nĩ onaga kanyoni kamwe karĩ ka bata, ũũ atĩ o na kangĩgwa thĩ nĩ amenyaga. Na githĩ wee ũmwendete na ũmũthathayagia ndũkĩrĩ wa bata o na makĩria harĩ we! (Rora kĩbungo gĩa 14)
15. Ciugo cia Jesu iria irĩ thĩinĩ wa Johana 6:44 ikũrutaga atĩa igũrũ rĩgiĩ Ithe witũ wa igũrũ?
15 Reke twarĩrĩrie ihinda rĩngĩ Jesu aahũthĩrire kiugo “Awa.” (Thoma Johana 6:44.) Ithe witũ wa igũrũ nĩwe wakũgucĩrĩirie ũhoro-inĩ wa ma. Eekire ũguo nĩkĩ? Tondũ arora ngoro yaku nĩ oonire atĩ ũrĩ na mwerekera ũrĩa wagĩrĩire. (Atũm. 13:48) Rĩrĩa Jesu aagwetire ciugo iria irĩ thĩinĩ wa Johana 6:44, kwahoteka aahũthagĩra ciugo ici cia Jehova iria irĩ thĩinĩ wa rĩandĩko rĩa mũthingi: “Ngũgucĩrĩirie harĩ niĩ na wendo mwĩhokeku [kana, thiĩte na mbere gũkuonia wendo mwĩhokeku].” (Jer. 31:3 kohoro ka magũrũ-inĩ; Ringithania Hosea 11:4.) Ta wĩcirie ũndũ ũcio, hingo ciothe Ithe witũ wa igũrũ ũtwendete nĩ onaga ngumo ciaku njega iria hihi ũngĩkorũo ũtegũciona.
16. (a) Nĩ atĩa Jesu atũrutaga, na twagĩrĩirũo kũmwĩtĩkia nĩkĩ? (b) Ũngĩka atĩa nĩguo ũgĩe na ma biũ atĩ Jehova nĩwe Baba ũrĩa mwega ũngĩgĩa nake? (Rora gathandũkũ, “Ithe Witũ Ũrĩa Ithuothe Tũbataraga.”)
16 Jesu atũrutaga atĩ Jehova nĩ Ithe witũ ithuothe, to harĩ we tu. Nĩ endaga ũkorũo na ma atĩ Jehova nĩ akwendete, na nĩ akũrũmbũyagia mũno. Kwoguo rĩrĩa waritũhĩrũo gwĩtĩkia atĩ Jehova nĩ akwendete, tithia na wĩyũrie, ‘Na githĩ ndiagĩrĩirũo kwĩhoka ciugo cia Mũrũ wa Ngai, ũrĩa ũĩ Ithe witũ wega makĩria na waragia ma hingo ciothe?’—1 Pet. 2:22.
WĨRUTANAGĨRIE BIŨ KŨNIINA NGANJA
17. Nĩkĩ nĩ twagĩrĩirũo gũthiĩ na mbere gũkorũo na ma biũ atĩ Jehova nĩ atwendete?
17 Nĩ tũrabatara gwĩkaga ũrĩa wothe tũngĩhota, nĩguo tũkorũo na ma biũ atĩ Jehova nĩ atwendete. O ta ũrĩa tweruta, Shaitani thũ itũ ĩrĩa nene nĩ ekaga ũrĩa wothe angĩhota nĩguo atũme tũtige gũtungatĩra Jehova. Kwoguo nĩ egũthiĩ na mbere kũhũthĩra wara, nĩguo twĩtĩkie atĩ Jehova ndatwendete, akĩgeria gũtũma tũkue ngoro. Tũtibatiĩ kũreka Shaitani atũtoorie!—Ayub. 27:5.
18. Wagĩrĩirũo gũthiĩ na mbere gwĩka atĩa nĩguo ũkoragwo na ma atĩ Jehova nĩ akwendete?
18 Gĩcunjĩ-inĩ gĩkĩ, nĩ tuona maũndũ ũngĩka nĩguo ũkorũo na ma biũ atĩ Jehova nĩ akwendete. Thiĩ na mbere kũmũhoya agũteithie kwĩyona ta ũrĩa we akuonaga. Wĩcũranagie na njĩra ndikĩru mĩhari ya Bibilia ĩrĩa yonanagia ũrĩa Jehova atwendete. Ririkanaga atĩ Jehova nĩ endete mũndũ o wothe ũmwendete. Ndũkanariganĩrũo atĩ Jehova aarutire Mũrũwe arĩ ũkũũri nĩ ũndũ waku mwene. Na ũkoragwo na ma na ciugo cia Jesu, atĩ Jehova nĩ Ithe witũ wa igũrũ. Kwoguo mũndũ angĩkũria ũũ: “Wĩ na ma atĩ Jehova nĩ akwendete?” ũrĩmũcokagĩria ũũ ũrĩ na ma: “Ĩĩ nĩ anyendete! Na o mũthenya nĩ ndĩrutanagĩria ũrĩa wothe ingĩhota kũmuonia atĩ nĩ ndĩmwendete.”
RWĨMBO NA. 154 Wendo Ũtangĩthira