Hihi Nenda cia Ũkinyanĩria nĩ Irathũkia Mwana Waku?—Ũrĩa Bibilia Ĩngĩteithia Aciari

“Mĩrimũ ya kĩĩmeciria gatagatĩ-inĩ ka andũ ethĩ nĩ ĩingĩhĩte mũno, na nĩ tuonete atĩ kĩhumo kĩmwe kĩnene kĩa mĩrimũ ĩyo nĩ nenda cia ũkinyanĩria.”—Dr. Vivek Murthy, U.S. surgeon general, New York Times, Juni 17, 2024.

Aciari mangĩgitĩra ciana ciao atĩa kuumana na mogwati ma nenda cia ũkinyanĩria? Bibilia ĩrĩ na motaaro mangĩmateithia.

Ũrĩa aciari mangĩka

Wĩcirie ũhoro wa motaaro maya ma Bibilia.

“Ũrĩa mũũgĩ nĩ ecũranagia ikinya o rĩothe.”—Thimo 14:15.

Tondũ nenda cia ũkinyanĩria no ithũkie mwana waku, ndwagĩrĩirũo kuona ta arĩ o nginya ũmwĩtĩkĩrie gũcihũthĩra. Ũtanetĩkĩria mwana waku ahũthĩre nenda cia ũkinyanĩria, tigĩrĩra atĩ arĩ na ũhoti mwega wa kũhũthĩra mahinda wega, kũgĩa na arata arĩa magĩrĩire, na wa gwĩthema kwĩrorera maũndũ moru.

• Nĩguo wĩrute ũhoro makĩria, thoma icunjĩ irĩ na kĩongo “Je, Mtoto Wangu Atumie Mitandao ya Kijamii?” na “Mfundishe Kijana Wako Kutumia Mitandao ya Kijamii kwa Njia Salama.”

“[Hũthagĩrai] mahinda manyu wega biũ.”—Aefeso 5:16.

Angĩkorũo nĩ ũgwĩtĩkĩria mwana waku ahũthĩre nenda cia ũkinyanĩria, mũigĩre mawatho ma ũrĩa agĩrĩirũo gũcihũthĩra, na ũmũtaarĩrie ũrĩa kũrũmĩrĩra mawatho macio kũngĩmũgitĩra. Ikara ũkĩroraga kana nĩ harĩ ũndũ o wothe ũronania atĩ mĩtugo ya mwana waku nĩ ĩrathũka, ũndũ ũrĩa ũngĩgũteithia kũmenya kana nĩ kũnyihanyihia ũkũnyihanyihia mahinda marĩa arahũthĩra nenda-inĩ cia ũkinyanĩria.

• Hũthĩra video ya mbica cia gũcorũo ya Hũthĩra Intaneti na Ũũgĩ gũteithia mwana waku kuona bata wa kwĩigĩra mĩhaka akĩhũthĩra nenda cia ũkinyanĩria.

Wĩrute makĩria

Bibilia yugaga atĩ tũratũũra “mahinda ma ũgwati maritũ kũhiũrania namo.” (2 Timotheo 3:1-5) No ningĩ nĩ ĩtũheaga motaaro mangĩtũteithia kũhiũrania na moritũ. Icunjĩ makĩria ma 20 irĩ na motaaro ma Bibilia harĩ aciari na ciana nĩ cionanĩtio thĩinĩ wa gĩcunjĩ gĩkĩ kĩarĩrĩirie ũhoro wĩgiĩ mathĩna ma kĩĩmeciria harĩ matinĩnja.