Hihi Ngai nĩ Ekũigua Mahoya Makwa?

Macokio ma Bibilia

Ĩĩ, nĩ ekũigua. Maũndũ monetwo marĩa marĩ Bibilia-inĩ na ma mahinda maya nĩ monanagia atĩ Ngai nĩ aiguaga mahoya. Bibilia yugaga ũũ: “Andũ arĩa amwĩtigĩri nĩamekagĩra ũrĩa mekwenda; o na nĩaiguaga kĩrĩro kĩao, akamahonokia.” (Thaburi 145:19) No nĩguo Ngai akũigue nĩ harĩ maũndũ wagĩrĩirũo nĩ gwĩka.

Maũndũ marĩa Ngai endaga wĩke

• Hoyaga Ngai, no ti Jesu, Mariamu, atheru, araika, kana mĩhianano. Jehova Ngai nowe tu ‘Mũigua wa mahoya.’—Thaburi 65:2.

• Hoyaga kũringana na wendi wa Ngai, ũrĩa ũrĩ thĩinĩ wa Bibilia.—1 Johana 5:14.

• Hoyaga kũgerera rĩĩtwa-inĩ rĩa Jesu, nĩguo wonanie ũnene wake. Jesu oigire ũũ: “Gũtirĩ mũndũ ũkaga harĩ Awa atagereire harĩ niĩ.”—Johana 14:6.

• Hoyaga ũrĩ na wĩtĩkio. O na no ũhoe wongererũo wĩtĩkio.—Mathayo 21:22; Luka 17:5.

• Hoyaga wĩnyihĩtie, kuuma ngoro. Bibilia yugaga ũũ: “Jehova e igũrũ mũno, nĩaroraga mũndũ mũhoreri.”—Thaburi 138:6.

• Hoya ũtegũtigithĩria. Jesu oigire ũũ: “Hoyai, na nĩmũkũheo.”—Luka 11:9.

Maũndũ marĩa Ngai ataroraga

• Rũrĩrĩ rwaku kana bũrũri ũrĩa uumĩte. “Ngai ndarĩ mũthutũkanio, no thĩinĩ wa ndũrĩrĩ ciothe, mũndũ ũrĩa ũmwĩtigĩrĩte na wĩkaga ũrĩa kwagĩrĩire nĩ etĩkĩrĩkaga nĩ we.”—Atũmwo 10:34, 35.

• Ũrĩa ũgũikara ũkĩhoya. No ũhoe ũikarĩte thĩ, ũinamĩte, ũturĩtie ndu, kana ũrũgamĩte.—1 Maũndũ ma Matukũ ma Tene 17:16; Nehemia 8:6; Danieli 6:10; Mariko 11:25.

• Kũhoya na ngoro kana wanĩrĩire. Ngai nĩ aacokagia nginya mahoya ma ngoro marĩa andũ arĩa angĩ matangĩmenya.—Nehemia 2:1-6.

• Ũritũ wa maũndũ marĩa ũrahoya. Ngai agwĩkĩraga ngoro ‘ũmũikagĩrie mĩtangĩko yaku yothe, nĩ ũndũ nĩ akũrũmbũyagia.’—1 Petero 5:7.