MĨHARI YA BIBILIA ĨTAARĨIRIO
Thaburi 37:4—‘Tũũra Wĩkenagĩra nĩ Ũndũ wa Jehovaʼ
“Gĩaga na gĩkeno kĩnene nĩ ũndũ wa Jehova, nake nĩ arĩkũhingagĩria merirĩria ma ngoro yaku.”—Thaburi 37:4, New World Translation in Kikuyu.
“Nĩrĩo ũngĩtũũra wĩkenagĩra nĩ ũndũ wa Jehova, nake nĩarĩkũheaga maũndũ marĩa ngoro yaku ĩhoyaga.”—Thaburi 37:4, The Bible in Gikũyũ.
Ũrĩa rĩandĩko rĩa Thaburi 37:4 riugĩte
Mwandĩki wa Thaburi arekĩra ngoro arĩa mathathayagia Ngai magĩe na gĩkeno nĩ ũndũ wa gũkorũo na ũrata wa hakuhĩ hamwe nake. Arĩa othe makoragwo na ũrata ta ũcio hamwe na Jehovaa Ngai no makorũo na ma atĩ nĩ arĩmahingagĩria merirĩria mao marĩa magĩrĩire.
“Gĩaga na gĩkeno kĩnene nĩ ũndũ wa Jehova.” Ciugo ici ningĩ no itaũrũo, “kenaga nĩ ũndũ wa gũtungatĩra MWATHANI,” kana “kenaga nĩ ũndũ wa maũndũ marĩa MWATHANI akwĩrĩire.” Ikoragwo ikĩenda kuonania atĩ nĩ twagĩrĩirũo “[kũgĩaga] na gĩkeno kĩnene” nĩ ũndũ wa gũthathaiya Ngai ũrĩa wa ma. (Thaburi 37:4) Tũngiuga ũguo nĩkĩ?
Arĩa mathathayagia Jehova makoragwo na muonere wa maũndũ ta wake, ũrĩa wonanĩtio thĩinĩ wa Bibilia. Makĩria ma gũkorũo atĩ nĩ moĩ Ngai, nĩ mamenyaga atĩ nĩ ũndũ wa ũũgĩ kũmwathĩkĩra. Nĩ ũndũ ũcio, nĩ makoragwo na thamiri njega na magethema matua moru. (Thimo 3:5, 6) Kwa ngerekano, matirakaraga kana makaigua ũiru rĩrĩa andũ arĩa matarĩ ehokeku moneka ta maragaacĩra. (Thaburi 37:1, 7-9) Andũ a Ngai nĩ makenaga nĩ kũmenya atĩ ica ikuhĩ nĩ ekũniina wagi wothe wa kĩhooto na arathime andũ arĩa ehokeku nĩ ũndũ wa mĩthiĩre yao mĩega. (Thaburi 37:34) Ningĩ nĩ makoragwo na gĩkeno kĩnene nĩ kũmenya atĩ Ithe wao wa igũrũ nĩ ametĩkĩrĩte.—Thaburi 5:12; Thimo 27:11.
“Nĩ arĩkũhingagĩria merirĩria ma ngoro yaku.” Ciugo ici ningĩ no itaũrũo “nĩ arĩcokagia mahoya maku” kana “nĩ arĩkũheaga kĩrĩa wĩriragĩria mũno.” Nĩ tũĩ atĩ Jehova ndarĩtũheaga o kĩrĩa gĩothe twamũhoya. O ta mũciari mwega, Jehova nĩ oĩ kĩrĩa kĩega biũ harĩ ciana ciake. Ningĩ no mũhaka mahoya maitũ na ũtũũro witũ itwarane na ithimi ciake na wendi wake. (Thimo 28:9; Jakubu 4:3; 1 Johana 5:14) Tweka ũguo, no tũhoe “Mũigua wa mahoya” twĩ na ma atĩ nĩ egũtũthikĩrĩria.—Thaburi 65:2; Mathayo 21:22.
Ũhoro ũrĩa ũthiũrũrũkĩirie Thaburi 37:4
Thaburi 37 yaandĩkirũo nĩ Mũthamaki Daudi wa Isiraeli. Aandĩkire thaburi ĩyo kũringana na ũrĩa ndemwa cia Kĩhibirania ciarũmanĩrĩire.b
Daudi nĩ eekirũo maũndũ maingĩ matarĩ ma kĩhooto. Nĩ ooraga nĩguo ehithe Mũthamaki Saulu na andũ angĩ arĩa meendaga kũmũũraga. (2 Samueli 22:1) No hĩndĩ ciothe Daudi nĩ eehokaga Ngai biũ. Daudi nĩ aamenyaga atĩ Jehova nĩ akaaniina andũ arĩa aganu. (Thaburi 37:10, 11) O na mangĩoneka magaacĩrĩte o ta “nyeki nduru,” ũrĩa kũrĩ nĩ atĩ nĩ makaaniinwo.—Thaburi 37:2, 20, 35, 36.
Thaburi 37 yonanagia ngũrani ya maumĩrĩro ma andũ arĩa marũmagĩrĩra ithimi cia Ngai na maumĩrĩro ma arĩa matacirũmagĩrĩra. (Thaburi 37: 16, 17, 21, 22, 27, 28) Kwoguo thaburi ĩyo ĩtũteithagia kuona ũrĩa tũngĩgĩa na ũũgĩ na ũrĩa tũngĩtĩkĩrĩka nĩ Ngai.
Wĩrorere video ĩno nguhĩ wone ũhoro mũkuhĩ wĩgiĩ ibuku rĩa Thaburi.
a Jehova nĩrĩo rĩĩtwa rĩa Ngai rĩrĩa rĩhũthagĩrũo mũno na Gĩkũyũ, rĩrĩa rĩtaũrĩtwo kuuma harĩ rũthiomi rwa Kĩhibirania. Nĩguo wone kĩrĩa gĩtũmaga Bibilia nyingĩ ihũthĩre rĩĩtwa Mwathani handũ ha rĩĩtwa rĩa Ngai, rora gĩcunjĩ kĩrĩ na kĩongo “Jehova Nũũ?”
b Kũringana na mwandĩkĩre ũcio, mũhari wa mbere kana mĩhari ĩigana ũna ya mbere yambagĩrĩria na ndemwa ya mbere ya Kĩhibirania, mĩhari ĩyo ĩngĩ ĩkambĩrĩria na ndemwa ya kerĩ, ĩgathiĩ ĩrũmanĩrĩire ũguo. No kũhoteke mwandĩkĩre ũcio nĩ wateithagia andũ kũririkana thaburi ĩyo.