MĨHARI YA BIBILIA ĨTAARĨIRIO
Thimo 16:3—“Wĩhokagĩre MWATHANI Mĩbango Yaku”
“Rekagĩrĩria Jehova ũndũ o wothe ũrĩkaga, na mĩbango yaku nĩ ĩrĩgaacagĩra.”—Thimo 16:3, New World Translation in Kikuyu.
“Wĩhokagĩre MWATHANI mĩbango yaku na nĩrĩgaacagĩra.”—Thimo 16:3, The Holy Bible in Gĩkũyũ Language.
Ũrĩa rĩandĩko rĩa Thimo 16:3 riugĩte
Rĩandĩko rĩrĩ rĩrahe arĩa mathathayagia Ngai ũũma wa atĩ mĩbango yao nĩ ĩrĩgaacagĩra angĩkorũo nĩ marĩmwĩhokaga na njĩra ya gwethaga ũtongoria wake na kũũrũmĩrĩra.
“Rekagĩrĩria Jehova ũndũ o wothe ũrĩkaga.” Mbere ya gũtua matua, athathaiya a Jehovaa nĩ meethaga ũtongoria wake marĩ na wĩnyihia. (Jakubu 1:5) Nĩkĩ? Gĩtũmi kĩmwe nĩ atĩ, andũ matingĩhota kũgirĩrĩria maũndũ marĩa mangĩmakora ũtũũro-inĩ. (Kohelethu 9:11; Jakubu 4:13-15) Ningĩ no maage ũũgĩ wa gwĩka maũndũ marĩa mangĩenda. Nĩ ũndũ wa itũmi icio, andũ aingĩ mehokagĩra Ngai mĩbango yao. Meekaga ũguo na njĩra ya kũmũhoya amahe ũtongoria na gwĩka kũringana na wendi wake ota ũrĩa wonanĩtio kiugo-inĩ gĩake Bibilia.—Thimo 3:5, 6; 2 Timotheo 3:16, 17.
Ciugo “wĩhokagĩre MWATHANIb mĩbango yaku,” ingĩtaũrũo kiugo gwa kiugo no ciuge, “garagarĩria MWATHANI mawĩra maku.” Kũringana na ũthuthuria ũmwe, ciugo icio ironania “mũndũ kũruta mũrigo mũgongo-inĩ wake, akaũigĩrĩra mũgongo-inĩ wa mũndũ wĩna hinya makĩria ũngĩhota kũũkuua.”Arĩa meehokaga Ngai marĩ na wĩnyihia, makoragwo na ma atĩ nĩ arĩmateithagia na akamatiirĩrĩra.—Thaburi 37:5; 55:22.
Ciugo “ũndũ o wothe ũrĩkaga” itironania atĩ Ngai nĩ arĩrathimaga mĩbango ĩrĩa yothe andũ marĩkoragwo nayo. Nĩgetha Jehova arathime mĩbango ĩyo, no mũhaka ĩtwarane na ithimi ciake na wendi wake. (Thaburi 127:1; 1 Johana 5:14) Ngai ndarathimaga andũ arĩa matamwathĩkagĩra. Handũ ha ũguo, nĩ “athararagia mĩbango ya andũ arĩa aganu.” (Thaburi 146:9) No nĩ ateithagia arĩa mamwĩnyihagĩria na njĩra ya gũtĩĩa ithimi ciake iria ikoragwo thĩinĩ wa Bibilia.—Thaburi 37:23.
“Na mĩbango yaku nĩ ĩrĩgaacagĩra.” Thĩinĩ wa Maandĩko ma Kĩhibirania kana marĩa meetagwo Kĩrĩkanĩro Kĩrĩa Gĩkũrũ, kiugo kĩrĩa gĩtaũrĩtwo kũgaacĩra, gĩkoragwo na rĩciria rĩa kũhanda mũthingi, na kaingĩ kĩaragĩrĩria ũhoro wa ũrĩa ũũmbi wa Ngai ũkoragwo ũrũmĩte. (Thimo 3:19; Jeremia 10:12) O ũndũ ũmwe na ũcio, Ngai nĩ atũmaga mĩbango ya arĩa meekaga ũrĩa kwagĩrĩire ĩgaacĩre kana ĩĩhande, na akamateithia gũkorũo na ũtũũro mwega, ũrĩ na ũgitĩri, na gĩkeno.—Thaburi 20:4; Thimo 12:3.
Ũhoro ũrĩa ũthiũrũrũkĩirie Thimo 16:3
Mũhari ũyũ waandĩkirũo nĩ Mũthamaki Suleimani, ũrĩa waandĩkire mĩhari mĩingĩ ya ibuku rĩa Thimo. Aahotire kwaria thimo ngiri nyingĩ tondũ aarĩ na ũũgĩ ũrĩa aaheetwo nĩ Ngai.—1 Athamaki 4:29, 32; 10:23, 24.
Thĩinĩ wa Mũrango wa 16, Suleimani aambĩrĩirie na kũgaathĩrĩria ũũgĩ wa Ngai, na kuonania ũrĩa athũire andũ arĩa etĩi. (Thimo 16:1-5) Mũrango ũcio ũcokaga ũkonia mũthomi ũndũ ũyũ wa bata ũrĩa ũcokeretwo mũno ibuku-inĩ rĩa Thimo: Andũ no makorũo marĩ ogĩ na magaacĩre angĩkorũo tu nĩ mekuonania wĩnyihia na metĩkĩrie Ngai atongorie makinya mao. (Thimo 16:3, 6-8, 18-23) Ũndũ ũcio wa ma nĩ ũcokeretwo maita maingĩ thĩinĩ wa Bibilia.—Thaburi 1:1-3; Isaia 26:3; Jeremia 17:7, 8; 1 Johana 3:22.
Wĩrorere video ĩno nguhĩ wone ũhoro mũkuhĩ wĩgiĩ ibuku rĩa Thimo
a Jehova nĩrĩo rĩĩtwa rĩa Ngai. (Thaburi 83:18) Rora gĩcunjĩ kĩrĩ na kĩongo “Jehova Nũũ?”
b Ũhoro wa kwambĩrĩria wa Bibilia ya The Holy Bible in Gĩkũyũ Language ũtaarĩirie atĩ harĩa hothe rĩĩtwa rĩa Ngai ‘Yahwe’ (kana Jehova) rĩrĩ, handĩkĩtwo rĩĩtwa ‘MWATHANI.’ Nĩguo wone nĩkĩ ũndũ ũcio no ũhĩngĩce mũthomi, rora gĩcunjĩ kĩrĩ na kĩongo “Isaya 42:8— ‘Mimi Ni BWANA.’”