Andũ a Jehova nĩ Mendete Ũthingu

1. Nĩ igerio rĩrĩkũ Jusufu aacemanirie narĩo, na eekire atĩa?

JUSUFU mũrũ wa Jakubu nĩ aacemanirie na igerio iritũ. Eerirũo ũũ nĩ mũtumia wa Potifa mwathi wake: “Koma na niĩ.” No Jusufu nĩ aaregire gũkoma nake. Ũmũthĩ mũndũ no eyũrie ũũ: ‘Jusufu aareganire na igerio rĩu nĩkĩ?’ Potifa ndaarĩ hakuhĩ. Makĩria ma ũguo, Jusufu aarĩ ngombo mũciĩ-inĩ ũcio na mũtumia ũcio nĩ angĩamũritũhĩirie ũtũũro nĩ ũndũ wa kũregana na wendi wake. No Jusufu aathiire na mbere kũrega o na mũtumia ũcio athiĩ na mbere kũmũtindĩkĩrĩria. Nĩkĩ? Aaugire ũũ: “Ingĩkĩhota atĩa gwĩka ũndũ ũcio mũũru ũguo njĩhĩrie Ngai?”—Kĩam. 39:7-12.

2. Jusufu aamenyire atĩa atĩ gwĩka ũtharia nĩ mehia maitho-inĩ ma Ngai?

² Jusufu aamenyire atĩa atĩ Ngai angĩonire ũtharia ũrĩ ‘ũndũ mũũru mũno’? Watho wa Musa ũrĩa warĩ na rĩathani rĩa ĩmwe kwa ĩmwe wa “Ndũkanatharie,” wacokire kwandĩkwo mĩaka ta magana merĩ thutha ũcio. (Tham. 20:14) No Jusufu nĩ aamenyete Jehova wega nginya agakinya gũtaũkĩrũo atĩ Jehova ndangĩakenirio nĩ gĩĩko ta kĩu. Kwa ngerekano, Jusufu nĩ ooĩ atĩ Jehova aathondekete kĩhiko gĩkorũo kĩrĩ kĩa mũthuri ũmwe na mũtumia ũmwe. Na no kũhoteke nĩ aaiguĩte ũrĩa Jehova aagitĩrire Sara, cũcũ wa ithe, maita merĩ kuumana na ũgwati wa kuoywo nĩ mũndũrũme ũngĩ. Na njĩra o ta ĩyo, Jehova nĩ aaingĩrĩire nĩguo agitĩre Rebeka mũtumia wa Isaaka. (Kĩam. 2:24; 12:14-20; 20:2-7; 26:6-11) Jusufu ecũrania maũndũ ta macio nĩ aataũkĩirũo nĩ maũndũ marĩkũ Jehova onaga marĩ mega na nĩ marĩkũ onaga marĩ moru. Tondũ Jusufu nĩ eendete Ngai wake, ũndũ ũcio nĩ watũmire ende ithimi cia Jehova cia ũthingu na akĩĩhotora gũcirũmia.

3. Tũkwarĩrĩria maũndũ marĩkũ gĩcunjĩ-inĩ gĩkĩ?

³ Hihi wee nĩ wendete ũthingu? Hatarĩ nganja nĩ ũwendete. No ithuothe tũtirĩ akinyanĩru, na tũngĩaga kwĩmenyerera, muonere wa thĩ ĩno wĩgiĩ ũthingu no ũtũhutie na njĩra hũthũ. (Isa. 5:20; Rom. 12:2) Kwoguo nĩ tũkwarĩrĩria ũthingu nĩ kĩĩ, na ũrĩa tũngĩgunĩka nĩ ũndũ wa kwenda athingu. Thutha ũcio nĩ tũkwarĩrĩria makinya matatũ tũngĩoya nĩguo matũteithie gwĩkĩra hinya wendo witũ harĩ ithimi cia Jehova.

ŨTHINGU NĨ KĨĨ?

4. Andũ aingĩ makoragwo na mawoni marĩkũ mahĩtanu megiĩ ũthingu?

⁴ Rĩrĩa andũ aingĩ maigua ũhoro wa mũndũ mũthingu, no mecirie nĩ mũndũ mwĩtĩi, ũroraga mahĩtia ma andũ arĩa angĩ, na wĩyonaga atĩ we nĩ mwega gũkĩra andũ arĩa angĩ. No Jehova ndendete ngumo ta icio o na hanini. Rĩrĩa Jesu aarĩ gũkũ thĩ, nĩ aamenereirie atongoria a ndini a hĩndĩ ĩyo, nĩ ũndũ wa kwĩigĩra ithimi ciao ene cia ũthingu. (Koh. 7:16; Luk. 16:15) Mũndũ mũthingu ndeyonaga arĩ mwega gũkĩra andũ arĩa angĩ.

5. Kũringana na Bibilia-rĩ, ũthingu nĩ kĩĩ? Heana ngerekano.

⁵ Ũthingu nĩ ngumo njega mũno. Na njĩra nguhĩ, ũthingu nĩ gwĩka ũndũ ũrĩa Jehova onaga wagĩrĩire. Thĩinĩ wa Bibilia, ciugo iria cionanagia “ũthingu,” irehaga rĩciria rĩa mũndũ ũratũũra kũringana na ithimi cia gĩkĩro kĩa igũrũ cia Jehova. Kwa ngerekano, Jehova aathire ahũũri biacara mahũthagĩre “ithimi . . . cia kwĩhokwo.” (Gũcok. 25:15, Holy Bible in Gĩkũyũ.) Kiugo kĩa Kĩhibirania kĩrĩa gĩtaũrĩtwo “kwĩhokwo” ningĩ no gĩtaũrũo “ũthingu.” Kwoguo Mũkristiano ũrenda gũkorũo arĩ mũthingu maitho-inĩ ma Ngai no mũhaka akorũo arĩ mwĩhokeku maũndũ-inĩ make mothe ma kĩĩbiacara. Ningĩ mũndũ mũthingu nĩ endete kĩhooto, na nĩ athũire kuona mũndũ ũngĩ agĩkwo maũndũ matarĩ ma kĩhooto. Na “nĩguo [akenagie Jehova] biũ,” mũndũ mũthingu kũna nĩ ecũranagia ũrĩa Jehova ekuona matua marĩa aratua.—Kol. 1:10.

6. Nĩ kĩĩ kĩngĩtũma twĩhoke ithimi cia Jehova cia ũndũ ũrĩa mwega na ũrĩa mũũru? (Isaia 55:8, 9)

⁶ Bibilia ĩtaaragĩria atĩ Jehova nĩwe Kĩhumo kĩa ũthingu. Nĩ ũndũ ũcio, etagwo “gĩikaro kĩa ũthingu.” (Jer. 50:7) Tondũ Jehova nĩwe Mũũmbi, nowe tu ũrĩ na kĩhooto gĩa kũiga ithimi cia ũndũ ũrĩa mwega na ũrĩa mũũru. Tondũ Jehova nĩ mũkinyanĩru, ũhoti wake wa gũkũũrana ũndũ ũrĩa mwega na ũrĩa mũũru nĩ wa igũrũ mũno ũringithanĩtio na witũ, tondũ muonere witũ nĩ ũhutagio nĩ kwaga gũkinyanĩra. (Thim. 14:12; thoma Isaia 55:8, 9.) O na kũrĩ ũguo, tondũ tũmbĩtwo na mũhianĩre wa Ngai, no tũhote gũtũũra kũringana na ithimi ciake cia ũthingu. (Kĩam. 1:27) Na nĩ twendete gwĩka ũguo. Wendo witũ kwerekera Ithe witũ nĩ ũtũtindĩkaga twĩke ũrĩa wothe tũngĩhota kwĩgerekania nake.—Ef. 5:1.

7. Gũkorũo kũrĩ na ithimi cigĩtwo cia gwĩka maũndũ kũngĩtũteithia atĩa? Heana ngerekano.

⁷ Nĩ tũgunĩkaga rĩrĩa twarũmĩrĩra ithimi cia Jehova cia ũndũ ũrĩa mwega na ũrĩa mũũru. Tũngiuga ũguo nĩkĩ? Ta geria kũhũũra mbica ũrĩa kũngĩthiĩ korũo o taũni thĩinĩ wa bũrũri ũmwe ĩkoragwo na marũũri mayo ngũrani ma barabara. Maũndũ matingĩthiĩ wega. Nao arigitani mangĩaga gwathĩkĩra mawatho marĩa maigĩtwo ma kũrigita arwaru, arwaru amwe no makue. Hatarĩ nganja rĩrĩa gwakorũo na ithimi cigĩtwo cia gwĩka maũndũ, ũndũ ũcio ũkoragwo ũrĩ ũgitĩri. Na njĩra o ta ĩyo, ithimi cia Ngai cia ũndũ ũrĩa mwega na ũrĩa mũũru nĩ itũgitagĩra.

8. Nĩ irathimo irĩkũ andũ arĩa mendete gwĩka maũndũ marĩa magĩrĩire makoona?

⁸ Jehova nĩ arathimaga arĩa merutanagĩria gũtũũra kũringana na ithimi ciake. Eranĩire ũũ: “Andũ arĩa athingu nĩ makaagaya thĩ, na magaatũũra thĩinĩ wayo tene na tene.” (Thab. 37:29) Ta hũũra mbica ũrĩa gũgaakorũo na ũrũmwe, thayũ, na gĩkeno rĩrĩa andũ othe magaakorũo makĩrũmĩrĩra ithimi cia Jehova? Jehova endaga ũkorũo na ũtũũro ta ũcio. Hatarĩ nganja o ũmwe witũ arĩ na itũmi njega cia kwenda ũthingu. Tũngĩkĩra hinya wendo witũ atĩa kwerekera ngumo ĩyo? Rekei tuone makinya matatũ tũngĩoya.

ĨKĨRA HINYA WENDO WAKU KWEREKERA ITHIMI CIA JEHOVA

9. Nĩ kĩĩ kĩngĩtũteithia kwenda ũthingu?

⁹ Ikinya rĩa 1: Enda Ũrĩa ũigĩte ithimi icio. Nĩgetha twende ũthingu, nĩ tũrabatara gũkorũo na wendo mũnene harĩ Jehova, ũrĩa ũigĩte ithimi cia ũndũ ũrĩa mwega na ũrĩa mũũru. O ũrĩa tũrĩendaga Jehova makĩria, noguo tũrĩendaga gũtũũra kũringana na ithimi ciake cia ũthingu. Kwa ngerekano, korũo Adamu na Hawa nĩ meendete Jehova, matingĩagire kũmwathĩkĩra.—Kĩam. 3:1-6, 16-19.

10. Iburahimu eekire atĩa nĩguo ataũkĩrũo nĩ mwĩcirĩrie wa Jehova wega?

¹⁰ Tũtingĩenda gwĩka mahĩtia ta macio Adamu na Hawa meekire. No twĩtheme gwĩka ũguo na njĩra ya gũthiĩ na mbere kwĩruta igũrũ rĩgiĩ Jehova, gũkenagio nĩ ngumo ciake, na kwĩrutanagĩria gũtaũkĩrũo nĩ mwĩcirĩrie wake. Tweka ũguo, wendo witũ harĩ Jehova nĩ ũrĩongererekaga. Ta wĩcirie ũhoro wa Iburahimu. Nĩ eendete Jehova mũno. O na hĩndĩ ĩrĩa ũtaarĩ ũndũ mũhũthũ harĩ we gũtaũkĩrũo nĩ matua ma Jehova, Iburahimu ndaaremeire Jehova. Handũ ha ũguo, nĩ eerutanĩirie kũmenya Jehova wega makĩria. Kwa ngerekano, rĩrĩa Iburahimu aamenyire atĩ Jehova nĩ aatuĩte itua rĩa kwananga Sodomu na Gomora, kĩambĩrĩria-inĩ nĩ aarigagwo kana “Mũtuanĩri Ciira wa thĩ yothe” nĩ angĩaniinanĩirie mũndũ mũthingu hamwe na mũndũ mwaganu. Iburahimu oonaga atĩ ũndũ ta ũcio ndũngĩhoteka na kwoguo akĩũria Jehova ciũria arĩ na wĩnyihia. Jehova nĩ aamũcokeirie ciũria ciake arĩ na wetereri. Mũthia-inĩ, Iburahimu nĩ aataũkĩrũo atĩ Jehova nĩ athuthuragia ngoro cia andũ othe, na gũtirĩ hĩndĩ angĩherithanĩria mũndũ ũrĩa mũthingu hamwe na ũrĩa wĩhĩtie.—Kĩam. 18:20-32.

11. Iburahimu oonanirie atĩa atĩ nĩ eendete Jehova na akamwĩhoka?

¹¹ Iburahimu nĩ aahutirio mũno nĩ ndeereti ĩyo agĩire nayo hamwe na Jehova ĩgiĩ matũũra ma Sodomu na Gomora. No mũhaka akorũo nĩ eendire Jehova makĩria na akĩmũhe gĩtĩo o na makĩria. Mĩaka mĩingĩ thutha ũcio, ũhoti wa Iburahimu wa kwĩhoka Jehova nĩ wageririo na njĩra nene. Jehova aamwĩrire arute mũrũ wake Isaaka arĩ igongona. No Iburahimu rĩu nĩ aamenyete Jehova wega, kwoguo ihinda-inĩ rĩu ndaamũririe ciũria. Iburahimu no gwĩtĩkĩra eetĩkĩrire gwĩka ũrĩa Jehova aamwĩrire. No ta wĩcirie ruo rũrĩa aarĩ naruo ngoro-inĩ akĩĩhaarĩria gũthiĩ kũruta wĩra ũcio. No mũhaka akorũo Iburahimu nĩ eeciririe na njĩra ndikĩru igũrũ rĩgiĩ maũndũ marĩa eerutĩte megiĩ Jehova. Nĩ aamenyaga atĩ Jehova ndangĩekire ũndũ o na ũmwe ũtarĩ wa ũthingu kana ũtarĩ wa wendo. Kũringana na mũtũmwo Paulo, Iburahimu aatuire atĩ Jehova nĩ angĩahotire kũriũkia Isaaka kuuma kũrĩ arĩa akuũ. (Ahib. 11:17-19) Nĩ angĩatuire ũguo tondũ Jehova nĩ eeranĩire atĩ Isaaka nĩ angĩgaatuĩka ithe wa rũrĩrĩ, na gũkinyĩria hĩndĩ ĩyo Isaaka ndaarĩ na ciana. Iburahimu nĩ eendete Jehova, kwoguo nĩ eehokire atĩ Jehova nĩ angĩekire ũndũ ũrĩa wagĩrĩire. Nĩ aathĩkire nĩ ũndũ wa wĩtĩkio, o na gũtuĩka ndwarĩ ũndũ mũhũthũ.—Kĩam. 22:1-12.

12. Tũngĩĩgerekania atĩa na Iburahimu? (Thaburi 73:28)

¹² Tũngĩĩgerekania atĩa na Iburahimu? O take, nĩ tũrabatara gũthiĩ na mbere kwĩruta igũrũ rĩgiĩ Jehova. Rĩrĩa tũreruta nĩ tũrĩkuhagĩrĩria Jehova makĩria, na tũkamwenda o na makĩria. (Thoma Thaburi 73:28.) Nĩ tũrĩmenyeragia thamiri citũ gũtongoragio nĩ mwĩcirĩrie wa Ngai. (Ahib. 5:14) Tũngĩka ũguo, o na rĩrĩa andũ mageria gũtũma twĩke ũndũ ũtagĩrĩire, tũtirĩtĩkagĩra. Nĩ tũkũmena biũ nginya rĩciria rĩa gwĩka ũndũ o wothe ũngĩtuurithia Ithe witũ wa igũrũ, kana ũngĩthũkia ũrata witũ hamwe nake. Nĩ ũndũ ũrĩkũ ũngĩ tũngĩka tuonanie atĩ nĩ twendete ũthingu?

13. Tũngĩka atĩa nĩguo tũhote gũthingata ũthingu? (Thimo 15:9)

¹³ Ikinya rĩa 2: Wĩrutanagĩrie kuongerera wendo waku kwerekera ũthingu mũthenya o mũthenya. Tũngĩenda mĩĩrĩ itũ ĩkorũo ĩrĩ na hinya nĩ twĩmenyeragia o mũthenya, na kĩyo ta kĩu nĩkĩo tũbataraga nĩguo tũhote gũkũria wendo harĩ ithimi cia Jehova cia ũthingu. No tũhote gwĩkaga ũguo o mũthenya. Jehova nĩ arĩ ũigananĩru, na ndangĩrĩgĩrĩra twĩke makĩria ma ũrĩa tũngĩhota. (Thab. 103:14) Atwĩrĩte atĩ “nĩ endete mũndũ ũrĩa ũthingataga ũthingu.” (Thoma Thimo 15:9.) Tũngĩkorũo tũgĩthingata muoroto mũna ũtungata-inĩ wa Jehova, nĩ twĩkĩraga kĩyo nĩguo tũũkinyĩre. Ũguo noguo kũrĩ harĩ gũthingata ũthingu. Na Jehova nĩ arĩtũteithagia gũthiĩ twagagĩrĩtie ngumo ĩyo kahora o kahora.—Thab. 84:5, 7.

14. “Gako ga gĩthũri karĩa ka ũthingu” karũgamĩrĩire kĩĩ, na tũkabataraga nĩkĩ?

¹⁴ Jehova atũririkanĩtie atĩ gũthingata ũthingu ti ũndũ mũritũ. (1 Joh. 5:3) Ngũrani na ũguo, nĩ gũtũgitagĩra na nĩ tũbataraga ũgitĩri ũcio o mũthenya. Ta wĩcirie ũhoro wa indo cia mbaara iria mũtũmwo Paulo aagwetire. (Ef. 6:14-18) Nĩ kĩĩ kĩagitagĩra ngoro ya Mũkristiano? Nĩ “gako ga gĩthũri karĩa ka ũthingu” karĩa karũgamĩrĩire ithimi cia Jehova cia ũthingu. O ta ũrĩa gako ga gĩthũri kagitagĩra ngoro, no taguo ithimi cia Jehova cia ũthingu igitagĩra ngoro itũ ya mũhaano, kana ũmũndũ witũ wa na thĩinĩ. Kwoguo wĩrutanĩrie biũ gũtigagĩrĩra atĩ ũrĩ na gako ga gĩthũri karĩa ka ũthingu.—Thim. 4:23.

15. Ũngĩĩhumba atĩa gako ga gĩthũri karĩa ka ũthingu?

¹⁵ Ũngĩĩhumba atĩa gako ga gĩthũri karĩa ka ũthingu? No wĩke ũguo na njĩra ya gwĩcũrania ithimi cia Ngai ũgĩtua matua o mothe marĩa ũrĩtuaga o mũthenya. Rĩrĩa ũratua nĩ maũndũ marĩkũ ũkwaria igũrũ rĩamo, nĩ nyĩmbo irĩkũ ũgũthikĩrĩria, nĩ maũndũ marĩkũ ũkwĩrorera, kana nĩ mabuku marĩkũ ũgũthoma, nĩ wega kwamba kwĩyũria ũũ: ‘Nĩ maũndũ marĩkũ ngũkorũo ngĩreka maingĩre ngoro-inĩ yakwa? Hihi maũndũ macio nĩ maretĩkĩrĩka harĩ Jehova? Kana hihi marĩ na ngomanio itagĩrĩire, ũhinya, ũkoroku, mwĩyendo, maũndũ marĩa Jehova onaga matarĩ ma ũthingu?’ (Afil. 4:8) Angĩkorũo matua marĩa ũrĩtuaga nĩ marĩkoragwo magĩtwarana na wendi wa Jehova, ũrĩkoragwo ũgĩtĩkĩria ithimi ciake cia ũthingu igitĩre ngoro yaku.

16-17. Isaia 48:18 ĩtũheaga ũũma ũrĩkũ atĩ no tũhote gũtũũra kũringana na ithimi cia Jehova tene na tene?

¹⁶ Hihi nĩ wonaga ta ũtangĩhota gũthiĩ na mbere gũtũũra kũringana na ithimi cia Jehova cia ũthingu mũthenya o mũthenya ihinda rĩa mĩaka mĩingĩ? Ta rora ngerekano ĩrĩa Jehova aahũthĩrire thĩinĩ wa Isaia 48:18. (Thoma.) Jehova atwĩrĩire atĩ ũthingu witũ no “ũhaane o ta makũmbĩ ma iria.” Ta hũũra mbica ũrũgamĩte rũteere-inĩ rwa iria inene, ũkĩĩrorera makũmbĩ magĩthiĩ matekũrũgama, o ikũmbĩ thutha wa rĩrĩa rĩngĩ. Ũrĩ kũndũ kũu kũhooreru, ndũngĩciria atĩ kũrĩ hĩndĩ makũmbĩ macio magatiga gũthiĩ. Nĩ ũĩ atĩ makũmbĩ macio matũũrĩte mathiaga kwa ihinda rĩa mĩaka mĩingĩ, na megũtũũra ũguo.

¹⁷ Ũthingu waku no ũhaane o ta makũmbĩ macio ma iria. Na njĩra ĩrĩkũ? Rĩrĩa wabatara gũtua itua, ambaga gwĩciria ũrĩa Jehova angĩenda wĩke. Ũcoke wĩke ũguo. O na itua rĩu rĩngĩkorũo rĩrĩ iritũ atĩa, Ithe witũ ũkwendete nĩ arĩkoragwo hamwe nawe, nĩguo agũteithie gũikara ũrũmĩte na ũrĩ na hinya, na ũhote gũtũũra o mũthenya kũringana na ithimi ciake cia ũthingu.—Isa. 40:29-31.

18. Twagĩrĩirũo gwĩthema gũtuagĩra arĩa angĩ kũringana na ithimi citũ nĩkĩ?

¹⁸ Ikinya rĩa 3: Reke Jehova atuanagĩre. Tũkĩĩrutanĩria gũtũũra kũringana na ithimi cia Jehova cia ũthingu, nĩ twagĩrĩirũo gwĩthema gũtuagĩra arĩa angĩ na kwĩyonaga tũrĩ athingu. Handũ ha kuonaga andũ arĩa angĩ ta matareka ũrĩa kwagĩrĩire, ta tũrĩ na kĩhooto gĩa kũmatuĩra kũringana na ithimi citũ, twagĩrĩirũo kũririkanaga atĩ Jehova nĩwe “Mũtuanĩri Ciira wa thĩ yothe.” (Kĩam. 18:25) Jehova ndatũheete wĩra wa gũtuĩra arĩa angĩ. Ririkana Jesu aatwathire ũũ: “Tigai gũtuagĩra andũ arĩa angĩ nĩguo mũtikanatuĩrũo.”—Mat. 7:1.b

19. Jusufu oonanirie atĩa atĩ nĩ eehokete Jehova arĩ we Mũtuanĩri Ciira?

¹⁹ Reke twĩcirie rĩngĩ ũhoro wa kĩonereria kĩa Jusufu. Nĩ eethemaga gũtuĩra andũ arĩa angĩ, nginya arĩa maamwĩkĩte maũndũ moru. Ariũ a ithe nĩ maamũtharĩkĩire, makĩmwendia ũkombo-inĩ, na makĩiguithia baba wao atĩ Jusufu nĩ aakuĩte. Mĩaka mĩingĩ thutha ũcio, Jusufu nĩ aacokanirũo rĩngĩ na famĩlĩ yao. Hĩndĩ ĩyo Jusufu nĩ aatuĩkĩte mũtongoria ũrĩ na hinya, na nĩ angĩatuĩrĩire ariũ a ithe atarĩ na tha na erĩhĩrie. Ariũ a ithe na Jusufu nĩ moonaga ta angĩka ũguo, o na gũtuĩka hĩndĩ ĩyo nĩ meerirĩte kuuma ngoro nĩ maũndũ marĩa meekĩte. No Jusufu aamatĩtĩrithĩirie ũũ: “Tigai gwĩtigĩra. Kaĩ njoete ithenya rĩa Ngai?” (Kĩam. 37:18-20, 27, 28, 31-35; 50:15-21) Nĩ ũndũ wa wĩnyihia, Jusufu nĩ aatigĩire Jehova wĩra wa gũtuanĩra.

20-21. Tũngĩĩthema atĩa kwĩyona tũrĩ athingu?

²⁰ O ta Jusufu tũtigagĩra Jehova wĩra wa gũtuanĩra. Kwa ngerekano, tũtigeragia kwĩihũrĩria kĩrĩa gĩtũmaga aarĩ na ariũ a Ithe witũ meke maũndũ ũrĩa mekaga. Ithuĩ tũtingĩhota gũthoma ngoro, no Jehova nowe tu “[ũthuthuragia] mĩoroto.” (Thim. 16:2) Endete andũ a mĩthemba yothe, kuuma mĩrerere-inĩ yothe, na ũndũire-inĩ o wothe. Na Jehova atwĩkagĩra ngoro ‘tũhingũre ngoro citũ biũ.’ (2 Kor. 6:13) Twĩrutanagĩria kwenda aarĩ na ariũ a Ithe witũ othe no ti kũmatuĩra.

²¹ Ũguo nĩ kuonania atĩ tũtiagĩrĩirũo gũtuĩra nginya andũ arĩa marĩ nja wa kĩũngano. (1 Tim. 2:3, 4) Hihi no ũtuĩre mũndũ wa famĩlĩ ũrĩa ũtarĩ Mũira wa Jehova uuge atĩ, “Ũrĩa gũtirĩ hĩndĩ agooka ũhoro-inĩ wa ma”? Aca, tondũ ũngĩka ũguo ũngĩkorũo ũkĩĩyona ũrĩ mũthingu, na ũkĩruta wĩra wa Jehova wa gũtuanĩra. Jehova no aheete “andũ othe kũndũ guothe” mweke wa kwĩrira. (Atũm. 17:30) Hingo ciothe ririkanaga atĩ kwĩyona ũrĩ mũthingu nĩ kwaga ũthingu.

22. Ũtuĩte itua rĩa kwenda ũthingu nĩkĩ?

²² Rĩrĩa twenda ithimi cia Jehova cia ũthingu nĩ tũrĩkoragwo na gĩkeno na tũgakorũo twĩ kĩonereria kĩega harĩ andũ arĩa angĩ, na ũndũ ũcio ũgatũma matwende na makuhĩrĩrie Jehova makĩria. Nĩ tũtuei itua rĩa kwaga gũtiga ‘kũhũtagĩra na kũnyotera maũndũ ma ũthingu.’ (Mat. 5:6) Koragwo na ma atĩ Jehova nĩ onaga kĩyo gĩaku, na hingo ciothe nĩ akenaga ona ũkĩĩrutanĩria. O ũrĩa andũ thĩinĩ wa thĩ ĩno marathiĩ na mbere gũkorũo matarĩ athingu, wĩhe hinya. Hingo ciothe ririkanaga atĩ “Jehova nĩ endete andũ arĩa athingu.”—Thab. 146:8.