Hũthagĩra Mĩgarũ Ũkĩĩruta na Ũkĩrutana

Na githĩ Jesu tiwe Mũrutani ũrĩa mũnene wanatũũra gũkũ thĩ? No kũhoteke wanageria kwĩgerekania na njĩra ciake cia kũrutana, ta kũhũthĩra ciũria na ngerekano. Hihi nĩ ũrĩ wamenya atĩ kaingĩ Jesu nĩ aahũthagĩra mĩgarũ akĩrutana?

Andũ aingĩ makĩaria nĩ mahũthagĩra mĩgarũ. O nawe no gũkorũo nĩ wĩkaga ũguo kaingĩ o na ũtekũmenya. Wahota kuuga ũndũ ta ũyũ, “Moigire atĩ matunda mothe nĩ meru; no kaĩ maya nĩ methĩ-ĩ.” Kana, “Kũrĩ hĩndĩ aarĩ thoni mũno, ĩndĩ rĩu nĩ mwaria mũno.”

Maũndũ-inĩ ta macio mũndũ ambaga kũgweta ũndũ ũrĩa arenda kuuga; agacoka akonania mũgarũ akĩhũthĩra ciugo ta ĩndĩ, kaba, no, tiga o. Ningĩ no wonanie mũgarũ na njĩra ya gwĩkĩra ũndũ hinya. Rĩrĩa ũraria na njĩra ĩyo, o na no wage kũmenya atĩ nĩ wahũthĩra mũgarũ na andũ nĩ manyitaga wega kĩrĩa ũroiga.

O na gũtuĩka mĩgarũ ndĩhũthĩkaga mũno thĩinĩ wa thiomi imwe, nĩ wega kũmenya bata wayo. Nĩkĩ? Tondũ Bibilia nĩ ĩhũthagĩra mĩgarũ kũndũ kũingĩ. Jesu kaingĩ nĩ aahũthagĩra mĩgarũ. Ta ririkana ciugo ici: ‘Andũ matiakagia tawa, na macoke kũũkunĩkĩria na irebe, no kũiga maũigaga igũrũ handũ haguo.’ ‘Ndiokire kũmatharia [Mawatho], no kũmahingia.’ ‘Nĩmũiguĩte atĩ nĩkweranirũo ũũ: Ndũkanatharanie; no niĩ ngũmwĩra atĩ, o mũndũ o wothe ũngĩrora mũndũ-wa-nja . . .’ ‘Nĩmũiguĩte atĩ nĩkweranirũo ũũ: Riitho riumage riitho, o na igego riumage igego; no niĩ ngũmwĩra atĩ, mũtikagiane na mũndũ ũrĩa mũũru; no rĩrĩ, mũndũ wa gũkũgũtha rũthĩa rũa ũrĩo, mũhũgũkĩrie rũu rũngĩ naruo.’—Mat. 5:15, 17, 27, 28, 38, 39.

Nĩ kũrĩ mĩgarũ ĩngĩ ta ĩyo thĩinĩ wa mabuku marĩa mangĩ ma Bibilia. No ĩgũteithie gũtaũkĩrũo nĩ ũndũ mũna kana gwĩkĩra hinya ũndũ ũrĩa ũkwambĩte kũgwetwo. Angĩkorũo ũrĩ mũciari wĩcirie ũhoro wa mũgarũ ũyũ: ‘Na inyuĩ maithe-rĩ, mũtikanarakarie ciana cianyu, no kũrera mũcirerage na mũrutanĩre o na mũtaarĩre ũrĩa wa Mwathani.’ (Ef. 6:4) Korũo mũtũmwo Paulo oigire tu atĩ mũciari agĩrĩirũo nĩ kũrera mwana wake na mũrutanĩre na mũtaarĩre ũrĩa wa Mwathani, no angĩakorirũo aheanĩte ũtaaro mwega na wa ũũgĩ. Ĩndĩ, nĩ tũrataũkĩrũo wega nĩ ũndũ nĩ aahũthĩrire mũgarũ akiuga, ‘mũtikanarakarie ciana cianyu, no kũrera mũcirerage na mũrutanĩre o na mũtaarĩre ũrĩa wa Mwathani.’

Ningĩ o mũrango-inĩ ũcio, Paulo aandĩkire ũũ: ‘Nĩ ũndũ kũgiana gwitũ ti gwa kũgiana na arĩa me na mwĩrĩ na thakame, no nĩ gwa kũgiana na mbũtũ cia maroho moru me kũrĩa igũrũ.’ (Ef. 6:12) Mũgarũ ũcio ũratũteithia kũmenya atĩ tũrĩ na mbaara nene mũno. Ti ya kũrũa na andũ; ĩndĩ nĩ ya kũrũa na maroho mooru.

GUNĨKA KUUMANA NA MĨGARŨ

O ibuku-inĩ rĩu rĩa Aefeso no wone kũndũ kũngĩ kũingĩ kũrĩa Paulo aahũthĩrire mĩgarũ. Gwĩcũrania ũhoro wayo no gũtũteithie kũmenya ũrĩa Paulo eendaga kũrutana na no gũtũteithie kũmenya wega makĩria ũrĩa twagĩrĩirũo nĩ gwĩka.

No ũgunĩke ũngĩthuthuria ũhoro ũrĩa ũrĩ mĩcoro-inĩ ĩrĩa ĩrĩ gĩcunjĩ-inĩ gĩkĩ, ĩrĩa yonanĩtie mĩgarũ ĩmwe kuuma ibuku-inĩ rĩa Aefeso mũrango wa 4 na 5. Ũgĩthoma mĩgarũ ĩyo, wĩcirie ũhoro wa ũtũũro waku we mwene. Wĩyũrie ũũ: ‘Mwerekera wakwa nĩ ũrĩkũ? Nyonaga atĩa ũndũ ũyũ kana ũngĩ o wothe ũtariĩ taguo? Andũ mangiuga ndĩ mwena ũrĩkũ wa mũgarũ ũyũ?’ Ũngĩona atĩ kũringana na mũgarũ mũna kũrĩ ũndũ wagĩrĩirũo kũrutĩra wĩra, geria gwĩka ũguo. Reke mũgarũ ũcio ũgũteithie.

No mũhũthĩre ũhoro ũcio ũrĩ mĩcoro-inĩ hĩndĩ ya ũthathaiya wanyu wa famĩlĩ. Andũ othe thĩinĩ wa famĩlĩ no mambe mathome mĩgarũ ĩyo yothe. Ũmwe wanyu acoke agwete gĩcunjĩ kĩa mbere kĩa mũgarũ ũcio, na areke arĩa angĩ thĩinĩ wa famĩlĩ magerie kũririkana gĩcunjĩ kĩu gĩa kerĩ. Ũndũ ũcio no ũtũme mũgĩe na ndeereti njega mũno mũrĩ famĩlĩ, ya ũrĩa mũngĩhũthĩra gĩcunjĩ kĩu gĩa kerĩ na njĩra njega makĩria. Gũthuthuria mĩgarũ na njĩra ĩyo, no gũteithie andũ ethĩ o hamwe na arĩa ­akũrũ ­gũkorũo na mĩthiĩre mĩega thĩinĩ na nja wa famĩlĩ.

O ũrĩa ũgũthiĩ ũkĩmenyaga bata wa mĩgarũ, noguo ũrĩhotaga kuona kũrĩa ĩhũthĩrĩtwo thĩinĩ wa Bibilia, na nĩ ũrĩonaga atĩ nĩ ĩrĩgũteithagia mũno ũtungata-inĩ waku. Kwa ngerekano no wĩre mwene nyũmba ũũ: “Andũ aingĩ moigaga atĩ mũndũ nĩ arĩ muoyo ũtakuaga, no ta rora haha wone ũrĩa Kiugo kĩa Ngai kiugaga.” Kana ũgĩthomithia mũndũ Bibilia no ũmũrie ũũ: “Andũ aingĩ gũkũ metĩkĩtie atĩ Ngai na Jesu nĩ mũndũ ũmwe; ĩndĩ tuona Bibilia yugaga atĩa? Wee wĩtĩkĩtie atĩa?”

Maandĩko nĩ makoragwo na mĩgarũ mĩingĩ ĩrĩ na ũrutani ũngĩtũteithia kũrũmĩrĩra njĩra cia Jehova. Ningĩ no tũteithie andũ mamenye ma cia Bibilia tũkĩhũthĩra mĩgarũ.