Wagĩrĩirũo Kwĩruta Bibilia Nĩkĩ?

Hihi nĩ ũrĩ weyũria ciũria ta icio? Angĩkorũo nĩguo-rĩ, ndũrĩ wiki. Andũ thĩinĩ wa thĩ yothe nĩ makoragwo na ciũria nyingĩ imathumbũraga ciĩgiĩ ũtũũro. Hihi no wone macokio ma ciũria icio?

Andũ milioni nyingĩ mangiuga, “Ĩĩ!” Nĩkĩ? Tondũ nĩ monete macokio mega ma ciũria ciao kuuma Bibilia-inĩ. Hihi no wende kũmenya ũrĩa Bibilia yugaga? Angĩkorũo no wende, no ũgunĩke nĩ mũbango wa kwĩruta Bibilia ũrĩa ũtwarithagio na mbere nĩ Aira a Jehova hatarĩ marĩhi.a

Ma nĩ atĩ, hakinya nĩ gũthuthuria Bibilia, andũ amwe moigaga ũũ: “Ndĩna wĩra mũingĩ.” “Nĩ nditũ mũno.” “Nĩ ndĩtigagĩra kũremwo nĩ kũmĩrũmĩrĩra.” No angĩ makoragwo na mawoni ngũrani. Nĩ metĩkagĩra mweke wa kwĩruta ũrĩa Bibilia ĩrutanaga. Ta wĩcirie ngerekano ici ciigana ũna:

• Gill, kuuma Ngeretha oigire ũũ: “Nĩ thiĩte ndini ya Gatoreki, cia Gĩprotestanti, hekarũ ya Karathingʼa, na kwa Buddha, na ngathomera maũndũ ma ndini thĩinĩ wa yunivasĩtĩ. No ndionire macokio ma ciũria ciakwa ciĩgiĩ Ngai. Thutha ũcio, Mũira ũmwe wa Jehova nĩ aaceerire gwitũ mũciĩ. Macokio make moimĩte Bibilia-inĩ nĩ maangenirie mũno, nĩ ũndũ ũcio ngĩtĩkĩra kwĩruta Bibilia.”

• Koffi, kuuma Benin oigire, “Nĩ ndaarĩ na ciũria nyingĩ mũno ciĩgiĩ ũtũũro, no ndiaiganĩire nĩ macokio ma pasta wa kanitha witũ. No Mũira wa Jehova nĩwe wanjokeirie ciũria ciakwa akĩhũthĩra Bibilia iki tu. Rĩrĩa aanjũririe kana no nyende kwĩruta makĩria, nĩ ndeetĩkĩrire ngenete.”

• José, kuuma Brazil ataarĩirie ũũ: “Nĩ ndeendaga mũno kũmenya kũrĩa mũndũ akua athiaga. Ndetĩkĩtie atĩ akuũ no marehere arĩa marĩ muoyo maũndũ moru, no nĩ ndeendaga kũmenya ũrĩa Bibilia yugĩte. Nĩ ũndũ ũcio ngĩambĩrĩria kwĩruta Bibilia na mũrata wakwa warĩ Mũira wa Jehova.”

• Dennize, kuuma Mexico oigire ũũ: “Nĩ ndaageragia gũthoma Bibilia no ndiataũkagĩrũo nĩyo. Aira a Jehova magĩcoka magĩũka, makĩndaarĩria wega biũ morathi maigana ũna ma Bibilia. Nĩ ndeendire kũmenya nĩ ũndũ ũrĩkũ ũngĩ ingĩĩruta.”

• Anju, kuuma Nepal oigire, “Nĩ ndeyũragia kana hihi Ngai nĩ anũmbũyagia. Nĩ ũndũ ũcio, ngĩtua itua rĩa kũhoya Ngai ũrĩa warĩrĩirio nĩ Bibilia. Mũthenya ũyũ ũngĩ Aira a Jehova magĩceera gwitũ mũciĩ, na ngĩtĩkĩra kwĩruta Bibilia.”

Ũndũ ũrĩa wonetwo nĩ andũ acio twagweta, ũtũririkanagia ciugo ici cia Jesu: “Gũkena-rĩ, nĩ arĩa mahũtagĩra maũndũ marĩa ma ũthingu, na makamanyotera.” (Mathayo 5:6) Andũ maciaragwo marĩ na wendi wa kũmenya Ngai. No Ngai tu ũngĩhingia wendi ũcio, na ekaga ũguo kũgerera Kiugo gĩake, Bibilia.

Nĩ ũndũ ũcio-rĩ, wĩruti wa Bibilia wĩkagwo atĩa? Ũngĩkũguna atĩa? Ciũria ici nĩ igũcokio thĩinĩ wa gĩcunjĩ kĩrĩa kĩrũmĩrĩire.