Kũhũthĩra Bibilia Gũcokia Ciũria

TŨNGĨŨRIO ũhoro wĩgiĩ wĩtĩkio witũ, mũtũũrĩre witũ, muonere witũ wĩgiĩ maũndũ marĩa marekĩka, kĩĩrĩgĩrĩro gitũ kĩa mahinda marĩa maroka, twĩrutanagĩria kũhũthĩra Bibilia gũcokia. Nĩkĩ? Tondũ nĩyo Kiugo kĩa Ngai. Bibilia nĩyo mũthingi wa wĩtĩkio witũ. Mũtũũrĩre witũ ũtongoragio nĩ Bibilia. Nĩ ĩtũteithagia kũmenya gĩtũmi kĩa maũndũ marĩa marekĩka thĩinĩ wa thĩ. Kĩĩrĩgĩrĩro gitũ kĩa mahinda marĩa maroka kiumanĩte biũ na ciĩranĩro cia Bibilia iria itongoretio na roho.—2 Tim. 3:16, 17.

Nĩ tũmenyaga wĩra ũrĩa tũkoragwo naguo nĩ ũndũ wa rĩĩtwa ritũ. Ithuĩ tũrĩ Aira a Jehova. (Isa. 43:12) Kwoguo tũticokagia ciũria tũkĩhũthĩra morutani ma andũ, ĩndĩ tũhũthagĩra ciugo cia Jehova iria irĩ Kiugo-inĩ gĩake kĩrĩa gĩtongoretio na roho. Ma nĩ atĩ, tũrĩ mũndũ ũmwe ũmwe nĩ tũkoragwo na mawoni maitũ megiĩ maũndũ, o na kũrĩ ũguo tũrekaga Kiugo kĩa Ngai gĩtongorie muonere witũ tondũ tũtikoragwo na nganja atĩ nĩkĩo ũhoro ũrĩa wa ma. Maũndũ-inĩ maingĩ Bibilia nĩ ĩtũheaga wĩyathi wa gwĩthurĩra ũrĩa tũkwenda. Handũ ha kũruta andũ mawoni maitũ, tũmarutaga motaaro marĩa marĩ Maandĩko-inĩ, na nĩ ũndũ ũcio tũkareka mahũthĩre wĩyathi wa gwĩthurĩra ta ũrĩa tũkoragwo naguo. O ta mũtũmwo Paulo, tũthingataga gũteithia andũ ‘mathĩke nĩ ũndũ wa wĩtĩkio.’—Rom. 16:26.

Thĩinĩ wa Kũguũrĩrio 3:14 Jesu Kristo etagwo “mũira ũrĩa mwĩhokeku na ũrĩa wa ma.” Hihi aacokagia ciũria atĩa, na aahiũranagia atĩa na maũndũ marĩa oragio? Rĩmwe na rĩmwe aahũthagĩra ngerekano cia gũtũma andũ mecirie. Rĩrĩa rĩngĩ akoria mũũria arataũkĩrũo atĩa nĩ rĩandĩko rĩna. Maita maingĩ aahũthagĩra njĩra ya gũcokera ũrĩa maandĩko moigĩte, kana kũmagweta na njĩra ĩtarĩ ya ĩmwe kwa ĩmwe. (Mat. 4:3-10; 12:1-8; Luk. 10:25-28; 17:32) Hĩndĩ ya karine ya mbere, ikũnjo cia Maandĩko ciaigagwo thunagogi-inĩ. Gũtirĩ ũira wonanagia atĩ Jesu aarĩ na ikũnjo ciake mwene, no aarĩ na ũũgĩ mũingĩ wa Maandĩko na nĩ aamagwetaga kaingĩ akĩrutana. (Luk. 24:27, 44-47) Nĩkĩo oigaga atĩ ũhoro ũrĩa aarutanaga nduoimanaga nake we mwene. Aaragia maũndũ marĩa eerĩtwo nĩ Ithe.—Joh. 8:26.

Nĩ wendi witũ kũrũmĩrĩra kĩonereria kĩa Jesu. Tũtirĩ twaigua Ngai akĩaria, ta ũrĩa Jesu aaiguire. No Bibilia nĩ Kiugo kĩa Ngai. Twamĩhũthĩra ĩrĩ kĩhumo kĩa macokio maitũ, twĩthemaga kũruta andũ mawoni maitũ. Tuonanagia atĩ tũkoragwo twĩhotorete kũreka Ngai atuĩke wa ma, handũ ha kũrutana mawoni ma andũ matarĩ akinyanĩru.—Joh. 7:18; Rom. 3:4.

Ma nĩ atĩ, wendi witũ to kũhũthĩra Bibilia no nĩ gwĩka ũguo na njĩra ĩgũteithia mũthikĩrĩria biũ. Twendaga mũndũ athikĩrĩrie na njĩra egũtaũkĩrũo. Kũringana na mwerekera wa mũthikĩrĩria, no wambĩrĩrie ndeereti ya Bibilia na kuuga ũũ: “Na githĩ to wĩtĩkanie na niĩ atĩ ũndũ ũrĩa wa bata nĩ ũrĩa Ngai aroiga?” Kana no uuge ũũ: “Hihi nĩ ũĩ atĩ Bibilia nĩ yarĩrĩirie kĩũria kĩu?” Angĩkorũo ũraria na mũndũ ũtatĩĩte Bibilia-rĩ, no ũbatare kwambĩrĩria na njĩra ngũrani hanini. No ũmwĩre: “Reke twarĩrĩrie nawe ũrathi ũyũ waandĩkirũo tene.” Kana uuge: “Ibuku rĩrĩa rĩtheremetio mũno thĩinĩ wa thĩ riugaga ũũ . . . ”

Rĩmwe na rĩmwe, no ũgwete rĩandĩko na njĩra ĩtarĩ ya ĩmwe kwa ĩmwe. O na kũrĩ ũguo, kũngĩhoteka, nĩ wega makĩria kũhumbũria Bibilia yo nyene na gũthoma ũrĩa yugĩte. Onia mũndũ rĩandĩko Bibilia-inĩ yake rĩrĩa wona kwagĩrĩire. Kũhũthĩra Bibilia ũguo ĩmwe kwa ĩmwe kaingĩ nĩ kũhutagia andũ mũno.—Ahib. 4:12.

Athuri a kĩũngano nĩ mehokeirwo wĩra wa mwanya wa kũhũthĩra Bibilia rĩrĩa maracokia ciũria. Ngumo ĩmwe ĩrĩa ĩtũmaga mũrũ wa Ithe witũ agĩrĩre gũtungatĩra arĩ mũthuri nĩ ‘kũrũmia ũhoro ũrĩa wa kwĩhokeka, ũrĩa ũringaine na mũrutanĩre wake.’ (Tit. 1:9) Mũndũ thĩinĩ wa kĩũngano no atue itua iritũ ũtũũro-inĩ thutha wa kũheo ũtaaro nĩ mũthuri wa kĩũngano. Harĩ bata ũtaaro ũcio ũkorũo wĩhocetie biũ Maandĩko-inĩ. Kĩonereria kĩa mũthuri wa kĩũngano harĩ gwĩka ũguo no gĩteithie arĩa angĩ mũrutanĩre-inĩ wao.