Kũruta Itũmi Njega

ŨNGIUGA ũndũ mũna, athikĩrĩria aku marĩ na kĩhooto gĩa kwĩyũria: “Ũhoro ũcio nĩ wa ma nĩkĩ? Kũrĩ na itũmi irĩkũ cia gũtũma njĩtĩkie atĩ ũrĩa mwaria aroiga nĩguo?” Ũrĩ mwarimũ, nĩ wĩra waku gũcokia ciũria ta icio kana gũteithia athikĩrĩria aku mone macokio. Angĩkorũo nĩ ũndũ wa bata mĩario-inĩ yaku, tigĩrĩra atĩ nĩ wahee athikĩrĩria aku itũmi njega cia kũwĩtĩkia. Gwĩka ũguo nĩ kũrĩtũmaga ndeto yaku ĩhutie ngoro cia athikĩrĩria.

Mũtũmwo Paulo aahũthĩraga njĩra yahutagia ngoro. Na njĩra ya kũhũthĩra itũmi njega, ihooto irathingatana wega, na kũringĩrĩria mũno, nĩ eerutanagĩria gũteithia athikĩrĩria ake magarũrĩre mwĩcirĩrie wao. Nĩ aatũigĩire kĩonereria kĩega. (Atũm. 18:4; 19:8) Kũrĩ andũ mahũthagĩra njĩra ya kũhutia athikĩrĩria ao ngoro nĩguo mamahĩtithie. (Mat. 27:20; Atũm. 14:19; Kol. 2:4) Mahota kũhũthĩra ndeto cia kwĩgereria, ũhoro umĩte ihumo-inĩ itangĩhokeka, ũtarĩ na mũthingi mũrũmu, maregane na ihooto cia ma iria itaranyita mbaru mawoni mao, kana magucĩrĩrie ngoro cia andũ handũ ha kũmahe ihooto. Twagĩrĩirũo gwĩthema kũhũthĩra njĩra ciothe ta icio.

Ũhoro Wĩhocetie Biũ Kiugo-inĩ kĩa Ngai. Tũtiagĩrĩirũo gwĩtungĩra maũndũ marĩa tũkũrutana. Twĩrutanagĩria kwĩra andũ maũndũ marĩa twĩrutĩte kuuma Bibilia-inĩ. Nĩ tũteithĩtio mũno nĩ indo iria ihaarĩirio nĩ ngombo ĩrĩa ĩĩhokekete na njũgĩ tũkĩruta wĩra ũcio. Indo icio nĩ itũteithagia gũthuthuria Maandĩko wega. Nĩ ũndũ ũcio, tũhũthagĩra Bibilia tũkĩaria na andũ nĩguo tũmateithie meyonere o ene ũrĩa yugaga, no ti getha twĩyonanie nĩ ithuĩ twaragia ma. Twĩtĩkanagia na ũrĩa Jesu Kristo eerire Ithe mahoya-inĩ: “Ũhoro waku nĩguo ũhoro-ũrĩa-wa-ma.” (Joh. 17:17) Gũtirĩ ũnene ũkĩrĩte wa Jehova Ngai, Mũũmbi wa igũrũ na thĩ. Angĩkorũo ndeto iria tũrarutana nĩ igũkorũo irĩ cia ma, no mũhaka mũthingi wacio ũkorũo nĩ Kiugo gĩake.

Rĩmwe na rĩmwe wahota kwaria na andũ matoĩ Bibilia wega kana matetĩkĩtie atĩ nĩ Kiugo kĩa Ngai. Wagĩrĩire kũhũthĩra ũũgĩ kũmenya nĩ rĩ na nĩ na njĩra ĩrĩkũ ũkũhũthĩra Bibilia. Ĩndĩ wagĩrĩirũo kwĩrutanĩria kwerekeria andũ Kiugo-inĩ kĩa Ngai na ihenya o ũrĩa kũngĩhoteka.

Hihi kũgwetera mũndũ rĩandĩko rĩna rĩkonainie na ũhoro ũrĩa ũrarĩrĩria nĩ kũiganu kũheana ihooto itangĩkarario? To mũhaka. No ũbatare kũhũthĩra ũhoro ũrĩa ũrĩthiũrũrũkĩirie kuonania atĩ kũna rĩandĩko rĩu nĩ rĩranyita mbaru kĩrĩa ũrarutana. Angĩkorũo nĩ ũtaaro mũna ũrenda kũruta thĩinĩ wa rĩandĩko na mĩhari ĩrĩa ĩrĩthiũrũrũkĩirie ndĩarĩrĩirie ũhoro ũcio, no ũbatare kuonania ũira makĩria. No ũbatare kũhũthĩra maandĩko mangĩ marĩa makonainie na ũhoro ũcio nĩguo athikĩrĩria mone biũ atĩ Maandĩko nĩmo mũthingi wa kĩrĩa ũroiga.

Ũkĩonania ũrĩa rĩandĩko rĩngĩhũthĩrũo wĩtheme kuongerera maũndũ matarĩ ma ho. Rĩthome na ũbarĩrĩru. Rĩandĩko rĩu rĩahota gũkorũo rĩkonainie na ndeto ĩrĩa ũrarĩrĩria. O na kũrĩ ũguo, nĩguo ihooto ciaku ihutie ngoro, no mũhaka mũthikĩrĩria waku one biũ thĩinĩ wa rĩo atĩ ũguo ũroiga nĩguo.

Ũhoro Ũngĩ wa Kũnyita Mbaru. Makĩria ma kũhũthĩra Bibilia, rĩmwe na rĩmwe nĩ wega kũhũthĩra ũira kuuma kĩhumo-inĩ kĩngĩ gĩa kwĩhokeka gũteithia andũ mataũkĩrũo nĩ ũrĩa Maandĩko moigĩte.

Kwa ngerekano, no ũhũthĩre igũrũ na thĩ iria tuonaga kuonania atĩ nĩ kũrĩ Mũũmbi. No warie ũhoro wa mawatho ma ndũire, ta hinya wa ũgucania, ũkĩonania atĩ mawatho ta macio nĩ ũira wa atĩ nĩ kũrĩ Mũheani Watho. Ihooto ciaku irĩkoragwo irĩ njega angĩkorũo nĩ irĩtwaranaga na maũndũ marĩa marĩ Kiugo-inĩ kĩa Ngai. (Ayub. 38:31-33; Thab. 19:1; 104:24; Rom. 1:20) Ũira ta ũcio nĩ wa bata tondũ nĩ wonanagia atĩ ũrĩa Bibilia yugaga nĩ ũtwaranaga na ũira wa indo iria cionekaga.

Hihi nĩ ũrerutanĩria gũteithia mũndũ one atĩ Bibilia kũna nĩyo Kiugo kĩa Ngai? Wahota kũmũgwetera ciugo cia andũ athomu arĩa moigaga nĩ Kiugo kĩa Ngai, no hihi ũcio nĩ ũira mũiganu? Kũgweta ciugo ta icio gũteithagia tu arĩa maheete andũ acio gĩtĩo. Hihi no ũhũthĩre maũndũ ma sayansi kuonania atĩ Bibilia nĩ ya ma? Ũngĩhũthĩra mawoni ma athomi matarĩ akinyanĩru a sayansi kũheana ihooto ciaku, ũngĩkorũo ũgĩaka igũrũ rĩa mũthingi ũtarĩ mũrũmu. Ĩndĩ, ũngĩambĩrĩria na Kiugo kĩa Ngai ũcoke ũgwete maũndũ ma sayansi marĩa monanagia ũũma wa Bibilia, ndeto yaku ĩgwakwo igũrũ rĩa mũthingi mũrũmu.

Heana ũira mũiganu ũhoro-inĩ o wothe ũrenda kuonania atĩ nĩ wa ma. Mũigana wa ũira ũrĩa ũkũbatarania wĩhocetie harĩ athikĩrĩria aku. Kwa ngerekano, angĩkorũo ũrarĩrĩria matukũ ma kũrigĩrĩria thĩinĩ wa 2 Timotheo 3:1-5, no ũgwetere athikĩrĩria aku ũndũ mũna ũĩkaine ũrarĩ mohoro-inĩ ũrĩa ũronania atĩ andũ ‘matirĩ na wendani ũrĩa wa ndũire.’ Ngerekano ĩyo ĩmwe no ĩigane kuonania atĩ gĩcunjĩ kĩu gĩa kĩmenyithia kĩa matukũ ma kũrigĩrĩria nĩ kĩrahinga ũmũthĩ.

Kaingĩ ũringanu wa maũndũ merĩ marĩ na tũmaũndũ tũhanaine no ũteithie. Ũringanu ũcio ti mũiganu kuonania ũũma wa ũndũ; no mũhaka ũtwarane na ũrĩa Bibilia yugaga. No ũringanu wa maũndũ no ũteithie mũndũ kuona ihooto cia ũndũ mũna. Kwa ngerekano, ũringanu ta ũcio no ũhũthĩrũo mũndũ agĩtaarĩria atĩ Ũthamaki wa Ngai nĩ thirikari. No wonanie atĩ Ũthamaki wa Ngai, o ta thirikari cia andũ, nĩ ũrĩ athani, raiya, mawatho, acirithania, na tabarĩra ya gĩthomo.

Maũndũ marĩa monetwo no mahũthĩrũo kaingĩ kuonania bata wa kũrũmĩrĩra ũtaaro wa Bibilia. O namo maũndũ marĩa wĩyoneire no ũmahũthĩre kũnyita mbaru ũhoro waku. Kwa ngerekano, ũgĩteithia mũndũ one bata wa gũthoma na kwĩruta Bibilia, no ũmũtaarĩrie ũrĩa gwĩka ũguo gũgũteithĩtie. Agĩkĩra ariũ a Ithe ngoro, mũtũmwo Petero aamagweteire ũhoro wa kĩoneki kĩa Jesu kũgarũrũka ũrĩa aatariĩ, kĩrĩa we mwene eeyoneire na maitho. (2 Pet. 1:16-18) O na Paulo nĩ aahũthagĩra maũndũ marĩa aahĩtũkĩire we mwene. (2 Kor. 1:8-10; 12:7-9) Wagĩrĩirũo kũhũthĩra na gĩthimi maũndũ marĩa wĩyoneire wee mwene, nĩguo ndũkerongorerie wee mwene ũrĩa gũtagĩrĩire.

Tondũ mwĩcirĩrie na mĩrerere ya andũ nĩ ĩtiganĩte, ihooto iria cingĩiguithia mũndũ ũmwe no ciage kũiguithia ũngĩ. Nĩ ũndũ ũcio, wĩcirie mawoni ma athikĩrĩria aku rĩrĩa ũrahaarĩria ihooto iria ũkũhũthĩra na ũrĩa ũgũcihũthĩra. Thimo 16:23 yugaga ũũ: “Ngoro ya mũndũ mũũgĩ nĩyũhĩgagia kanua gake, ĩgakĩongerera mĩromo yake ndeto cia wĩruti.”