Ngerekano Cia Maũndũ Moĩkaine

NĨ HARĨ bata kũhũthĩra ngerekano ikwaganĩrĩrũo na ndeto ĩrĩa ũrarĩrĩria. O na kũrĩ ũguo, nĩguo ikorũo na moimĩrĩro mega biũ, harĩ bata ningĩ ciagĩrĩre athikĩrĩria aku.

Gĩkundi kĩrĩa ũkaarĩria kĩngĩgũteithia atĩa kũmenya ngerekano iria ũkaahũthĩra? Jesu Kristo eekire atĩa? Akĩarĩria arutwo ake kana kĩrĩndĩ, Jesu ndaahũthagĩra ngerekano ciĩgiĩ maũndũ na mĩtũũrĩre ĩtaarĩ ya Isiraeli. Athikĩrĩria ake matingĩataũkĩirũo nĩ ngerekano ta icio. Kwa ngerekano, Jesu ndaigana kũgweta ũhoro wa mĩtũũrĩre ya anene a Misiri kana mĩtugo ya ndini cia India. O na kũrĩ ũguo, ngerekano ciake ciahutĩtie maũndũ mekagwo nĩ andũ thĩinĩ wa mabũrũri mothe. Nĩ aaririe ũhoro wa gũtuma nguo, kũhũũra biacara, gũte kĩndũ kĩa goro, na gũthiĩ ndĩa-inĩ cia ũhiki. Nĩ aataũkagĩrũo nĩ ũrĩa andũ maiyũkagia maũndũ-inĩ mwanya mwanya, na akĩhũthĩra ũtaũku ũcio. (Mar. 2:21; Luk. 14:7-11; 15:8, 9; 19:15-23) Tondũ mahunjio make maarongoreirio mũno andũ a Isiraeli, ngerekano cia Jesu kaingĩ ciahutagia indo na mawĩra marĩa maarutaga o mũthenya. Nĩ ũndũ ũcio, aagwetaga maũndũ ta ũrĩmi, ũrĩa ngʼondu ithikagĩrĩria mũrĩithi, na kũhũthĩra njũa cia nyamũ kũiga njohi. (Mar. 2:22; 4:2-9; Joh. 10:1-5) Ningĩ nĩ aagwetire ngerekano cia maũndũ moĩkaine historĩ-inĩ, ta kũũmbwo kwa Adamu na Hawa, Kĩguũ kĩa hĩndĩ ya Nuhu, kũniinwo gwa Sodomu na Gomora, gĩkuũ kĩa mũtumia wa Loti. (Mat. 10:15; 19:4-6; 24:37-39; Luk. 17:32) Hihi o nawe rĩrĩa ũracaria ngerekano nĩ wĩciragia biũ maũndũ marĩa mahutĩtie athikĩrĩria aku na ũndũire wao?

Ĩ angĩkorũo ũraarĩria mũndũ ũmwe kana gakundi o kanini ka andũ? Geria gũthuura ngerekano ĩrĩa ĩngĩaganĩrĩrũo biũ na andũ acio. Jesu akĩhunjĩria mũtumia Mũsamaria gĩthima-inĩ hakuhĩ na Sukaru, aahũthĩrire ciugo cia ngerekano iria ciahutĩtie ĩmwe kwa ĩmwe wĩra ũrĩa onire mũtumia ũcio akĩruta, aaririe ũhoro wa “maĩ me . . . muoyo,” ‘kwaga kũnyota o rĩ, o rĩ,’ na “gĩthima kĩa maĩ . . . gĩa gũtherũkaga gĩkĩrehage muoyo wa tene na tene.” (Joh. 4:7-15) Na rĩrĩa aaragĩria arũme arĩa maathambagia ngara ciao cia gũtega thamaki, kiugo kĩa ngerekano kĩrĩa aahũthĩrire kĩahutĩtie biacara ya thamaki. (Luk. 5:2-11) Maita macio merĩ, nĩ angĩahũthĩrire ngerekano ĩgiĩ ũrĩmi, tondũ andũ acio maatũraga kũndũ kwarĩmagwo, ĩndĩ nĩ ũndũ wa kũhũthĩra maũndũ mahutĩtie mawĩra mao kĩũmbe, aamateithirie mahũre mbica meciria-inĩ. Hihi nĩ wĩrutanagĩria gwĩka ta Jesu?

Jesu aahunjagĩria “ngʼondu, iria ciũrĩte cia nyũmba ya Isiraeli,” ĩndĩ mũtũmwo Paulo ndaatũmĩtwo tu kũrĩ Isiraeli, no nĩ kũrĩ nginya andũ a Ndũrĩrĩ. (Mat. 15:24, NW; Atũm. 9:15) Hihi ũndũ ũcio nĩ watũmaga Paulo agarũrĩre njĩra yake ya kũhunjia? Ĩĩ. Akĩandĩkĩra Akristiano a Korintho, nĩ aagwetire maũndũ marĩa andũ a Ndũrĩrĩ mangĩamenyire, ta ihĩtahĩtano, mĩtugo ya kũrĩa irio hekarũ-inĩ cia mĩhianano, na ikũngũĩro cia ũhootani.—1 Kor. 8:1-10; 9:24, 25; 2 Kor. 2:14-16.

Hihi nĩ ũcaragia na ũbacĩrĩru ta Jesu na Paulo ngerekano cia kũhũthĩra ũkĩrutana? Hihi nĩ wĩciragia ũhoro wa mĩtũũrĩre na maũndũ ma o mũthenya ma athikĩrĩria aku? Hatarĩ nganja, nĩ kũgĩte na mogarũrũku thĩinĩ wa thĩ kuuma hĩndĩ ya karine ya mbere. Andũ aingĩ nĩ mahotaga kwĩrorera mohoro ma kũndũ na kũndũ thĩinĩ wa TV. Kaingĩ nĩ mamenyaga maũndũ ma mabũrũri mangĩ. Angĩkorũo kwanyu nĩguo gũtariĩ, no ũrute ngerekano mohoro-inĩ ta macio. O na kũrĩ ũguo, maũndũ marĩa magucagĩrĩria andũ mũno kaingĩ nĩ marĩa megiĩ mĩtũũrĩre yao—mĩciĩ yao, famĩlĩ ciao, wĩra wao, irio ciao, rĩera rĩa kwao.

Angĩkorũo ngerekano yaku ĩrabatara gũtaarĩrio mũno, no kũhoteke maũndũ mayo matiũĩkaine nĩ athikĩrĩria aku. Ngerekano ta ĩyo no ĩhumbĩre ũrutani ũrĩa ũraheana. Nĩ ũndũ ũcio, athikĩrĩria mahota kũririkana ngerekano yaku ĩndĩ maage kũririkana ũrutani wa Kĩĩmaandĩko ũrĩa ũramahe.

Jesu ndaahũthagĩra ngerekano nditũ, aahũthagĩra ngerekano hũthũ ihutĩtie maũndũ ma o mũthenya. Aahũthagĩra tũmaũndũ tũnini gũtaarĩria maũndũ manene na tũmaũndũ tũhũthũ gũthathaũra maũndũ maritũ. Na njĩra ya kũgerekania maũndũ ma o mũthenya na ma cia kĩĩroho, Jesu nĩ aateithagia andũ mataũkĩrũo wega nĩcio na maciririkanage. Githĩ kĩu ti kĩonereria kĩega gĩa kũrũmĩrĩrũo!