Atuĩria A Njata Gũceerera Jesu

Arũme aigana ũna magoka kuuma mwena wa Irathĩro. Nĩ atuĩria a njata, arĩa matuĩragia ũrĩa njata cikarĩte makoiga atĩ na njĩra ĩyo nĩ mahotaga kũmenya ũrĩa ũndũ mũna ugĩte ũtũũro-inĩ wa mũndũ. (Isaia 47:13) Matanoima kwao mwena ũcio wa Irathĩro, nĩ moonire “njata” na makĩmĩrũmĩrĩra kilomita magana maingĩ nginya Jerusalemu, no ti Bethilehemu.

Andũ acio makinya kuo, makoria atĩrĩ: “Arĩ kũ mũthamaki ũcio wa Ayahudi ũciarĩtwo? Tondũ nĩ twonire njata yake tũrĩ mwena wa Irathĩro, na rĩu tuoka kũmũinamĩrĩra.”​—Mathayo 2:​1, 2.

Mũthamaki Herode wa Jerusalemu aigua ndeto icio, akarakara mũno. Ageta athĩnjĩri-Ngai arĩa anene na atongoria angĩ a ndini ya Kĩyahudi akamoria kũrĩa Kristo aarĩ aciarĩrũo. Magacokia kũringana na Maandĩko makoiga: “Thĩinĩ wa Bethilehemu.” (Mathayo 2:5; Mika 5:2) O hĩndĩ ĩyo Herode akabanga na njĩra ya hitho atuĩria acio a njata marehwo kũrĩ we akameera ũũ: “Thiĩi mũtuĩrie wega ũhoro wĩgiĩ mwana ũcio, na mwamuona, mũgaacoka mũnjĩre, nĩguo o na niĩ thiĩ ngamũinamĩrĩre.” (Mathayo 2:8) No ũrĩa kũrĩ nĩ atĩ, Herode arenda kũmenya harĩa mwana ũcio arĩ nĩgetha amũũrage.

Atuĩria acio a njata moimagara, gũgekĩka ũndũ wa magegania. “Njata” ĩrĩa moonete rĩrĩa maarĩ mwena wa Irathĩro ĩkamatongoria. Ĩno ti njata ta iria ingĩ, no muoroto wayo gũkorũo ho nĩ kũmatongoria. Atuĩria acio a njata makamĩrũmĩrĩra nginya ĩkarũgama igũrũ wa nyũmba ĩrĩa Jusufu na Mariamu maraikara hamwe na mwana wao.

Andũ acio maingĩra nyũmba ĩyo, magakora Mariamu na mwana ũcio wĩtagwo Jesu, makamũinamĩrĩra. Makamũhe iheo cia thahabu, ũbani, na manemane. Thutha ũcio, marĩ hakuhĩ gũcoka kũrĩ Herode, Ngai akamakaania na njĩra ya kĩroto matikae gwĩka ũguo. Kwoguo magacoka bũrũri wao magereire njĩra ĩngĩ.

Ũgwĩciria nũ watũmĩte “njata” ĩyo yatongoririe atuĩria acio a njata? Ririkana atĩ ndĩamatongoririe ĩmwe kwa ĩmwe kũrĩ Jesu itũũra-inĩ rĩa Bethilehemu. Handũ ha ũguo, yamatwarire Jerusalemu, kũrĩa maacemanirie na Mũthamaki Herode ũrĩa wendaga kũũraga Jesu. Na nĩ angĩamũũragire tiga Ngai aaingĩrĩire agĩkaania atuĩria acio a njata matikeere Herode kũrĩa Jesu arĩ. Hatarĩ nganja, Shaitani thũ ya Ngai nĩwe wendaga Jesu oragwo, na aahũthĩrire njata ĩyo kũgeria kũhingia muoroto wake.