ITHOMO RĨA 2

Kwaria na Njĩra ya Ndeereti

2 Akorintho 2:17

NA NJĨRA NGUHĨ: Aria ũrĩa waragia mĩario-inĩ ya o mũthenya, na warie kuuma ngoro na njĩra ĩronania ũrĩa ũraigua igũrũ rĩgiĩ ũndũ ũrĩa ũrarĩrĩria o hamwe na athikĩrĩria aku.

ŨRĨA ŨNGĨKA ŨGUO:

Hoya na wĩhaarĩrie wega. Hoya ũteithio kũiga meciria maku harĩ ndũmĩrĩri yaku no ti harĩ wee mwene. Nyita wega meciria-inĩ maku maũndũ manene marĩa ũrabatara kwarĩrĩria. Gweta maũndũ na ciugo ciaku; ndũgacokere maũndũ marĩa maandĩke kiugo gwa kiugo.

Ũngĩbanga gũthoma kuuma Bibilia-inĩ kana ibuku rĩngĩ, tigĩrĩra nĩ wataũkĩrũo nĩ gĩcunjĩ kĩu wega nĩgetha ũthome na njĩra ĩgũthĩrĩrĩka wega. Hangĩkorũo na ciugo ciaaririo nĩ andũ angĩ, cithome na njĩra ĩrahutia ngoro, no ndũgakĩrie njano.
Aria kuuma ngoro. Wĩcirie athikĩrĩria aku marabatara kũigua ndũmĩrĩri ĩyo nĩkĩ. Wĩcirie ũhoro wao. Weka ũguo, mũrũgamĩre kana mũikarĩre waku, ũthiũ waku na ciĩko ciaku cia mwĩrĩ nĩ ikuonania atĩ ũraria kuuma ngoro na atĩ nĩ ũrakenio nĩo.

Ririkana atĩ nĩ harĩ ngũrani ya kwaria ũrĩa waragia na kwaria na njĩra ĩtarĩ na kĩhaarĩro kĩega. Onania atĩ ndũmĩrĩri yaku nĩ ya kũheeka gĩtĩo na njĩra ya gũtamũka na kũbanga ciugo wega.
Rora athikĩrĩria aku. Ikara ũkĩroraga athikĩrĩria aku angĩkorũo ũndũ ũcio ndũngĩrakaria andũ kwanyu. Ũkĩheana mĩario, rora mũndũ ũmwe ũmwe, handũ ha gũikara ũkĩũrũragia maitho kũrĩ andũ othe.