Mwarĩrie Waku Kĩũmbe

KWARIA na mwarĩrie waku kĩũmbe gũtũmaga andũ makorũo na ma na ũrĩa ũraamera. Hihi no ũkorũo na ũũma na ũhoro ũraheo nĩ mũndũ ũrageria gwĩtua mũndũ ũngĩ? Nĩ ũndũ ũrĩ hinya. Gũkĩrĩ ũguo, handũ ha kwĩgerekania na mũndũ ũngĩ, aria na mwarĩrie waku kĩũmbe.

Kwaria na mwarĩrie wa mũndũ kĩũmbe ti kuuga kwaria hatarĩ kĩhaarĩro. Ti wega kũbanga ciugo ũũru, gũcitamũka ũũru, na gũcimeria. Ningĩ ti wega kũhũthĩra ciugo cia gwĩtungĩra. Hingo ciothe twendaga kwaria na gwĩka na njĩra ĩronania gĩtĩo. Mũndũ ũraaria na mwarĩrie wake kĩũmbe ndakĩragia njano na ningĩ ndacaragia kũgucĩrĩria andũ.

Wĩra-inĩ wa Kũhunjia. Hihi nĩ ũiguaga guoya rĩrĩa ũrahunjia nyũmba kwa nyũmba kana barabara-inĩ? Aingĩ aitũ nĩ tũiguaga guoya, ĩndĩ kũrĩ amwe maiguaga guoya kũrĩ arĩa angĩ. Guoya no ũtũme mũgambo wage kuuma wega kana ũtũme mũndũ ahũthĩre ciĩga cia mwĩrĩ ta moko kana kĩongo ũrĩa gũtagĩrĩire.

Kũrĩ na itũmi cigana ũna cingĩtũma mũhunjia akorũo na thĩna ũcio. Ahota gũkorũo agĩciria ũrĩa andũ maramuona na ningĩ kana mĩario yake harĩ mũndũ ũrĩa arahunjĩria nĩ ĩkũgaacĩra. Ti ũũru gwĩciria maũndũ macio, ĩndĩ nĩ marehage thĩna mangĩkĩrĩrũo mũno. Ũngĩigua guoya ũtanambĩrĩria kũhunjia-rĩ, nĩ kĩĩ kĩngĩgũteithia? Wĩhaarĩrie wega na ũhoe Jehova na kĩyo. (Atũm. 4:29) Wĩcirie ũhoro wa tha nyingĩ cia Jehova harĩ kũnyita andũ ũgeni magaakenera ũgima mũkinyanĩru na muoyo wa tene na tene thĩinĩ wa Paradiso. Wĩcirie ũhoro wa arĩa ũrageria gũteithia na ũrĩa marabatara kũigua ũhoro ũrĩa mwega.

Ningĩ ririkana atĩ andũ marĩ na wĩyathi wa gwĩthurĩra, kwoguo no metĩkĩre kana marege ndũmĩrĩri ĩyo. Ũguo noguo kwarĩ rĩrĩa Jesu aahunjagia thĩinĩ wa Isiraeli ya tene. Wĩra waku nĩ kũhunjia. (Mat. 24:14) O na andũ mangĩaga gũkũhe mweke wa kũmahunjĩria, nĩ ũraruta ũira rĩrĩa ũramacerera. Ũrĩkoragwo wĩkĩte ũrĩa kwagĩrĩire tondũ nĩ ũrareka Jehova akũhũthĩre kũhingia wendi wake. Rĩrĩa wagĩa na mweke wa kwarĩria andũ-rĩ, wagĩrĩirũo kũmaarĩria atĩa? Ũngĩĩruta gwĩciria ũhoro wa mabataro ma andũ, nĩ ũrĩmaaragĩria ũrĩa kwagĩrĩire.

Rĩrĩa ũrahunjia, ũngĩka na warie ũrĩa waragia o mũthenya, andũ no mage gũgwĩtigĩra. O na mahota kũiyũkia wega ndũmĩrĩri ya Kĩĩmaandĩko ĩrĩa ũrenda kũmahe. Handũ ha gũkorũo no we ũraria, tereta nao. Monie ũrata. Monie atĩ nĩ ũrameciria na ũmekĩre ngoro meyarie. Angĩkorũo nĩ kũrĩ mũtugo wa rũthiomi kana ũndũire wagĩrĩirũo nĩ kũrũmĩrĩrũo mũndũ akĩaria na mũndũ matoyaine, nĩ wega ũũrũmĩrĩre. No hĩndĩ ciothe koragwo wĩhaarĩirie kuonania ũcanjamũku.

Rĩarĩrio-inĩ. Rĩrĩa ũraarĩria gĩkundi kĩa andũ, nĩ wega gũtereta nao na mwarĩrie waku kĩũmbe. Hatarĩ nganja, rĩrĩa ũraarĩria andũ aingĩ nĩ ũkũbatara kuongerera mũgambo makĩria. Ũngĩgeria kũiga ciugo ciothe cia mĩario yaku meciria-inĩ kana ũkorũo wandĩkĩte maũndũ maingĩ mũno, wahota gũkorũo ũreciria ũhoro wa ciugo gũkĩria njano. Mĩbangĩre mĩega ya ciugo nĩ ya bata, ĩndĩ ĩngĩkĩrĩrũo mũno, njĩra yaku ya kwaria ndĩngĩgucĩrĩria. Ndũngĩkorũo ũkĩaria na mwarĩrie waku kĩũmbe. O na gũtuĩka nĩ wagĩrĩirũo gwĩciria kabere ũrĩa ũkwĩra athikĩrĩria aku, ti wega gũtindĩrĩra mũno ciugo iria ũkũhũthĩra.

Ũguo noguo kũrĩ rĩrĩa ũrahoywo ũhoro thĩinĩ wa mũcemanio mũna. Wĩharĩrie wega, ĩndĩ ndũgathome kana ũige macokio kiugo gwa kiugo meciria-inĩ. Aria na mũgambo waku wa ndũire nĩguo macokio maku magucĩrĩrie.

O na mwarĩrie mwega ũngĩkĩrũo nguthi athikĩrĩria no mone ũtarĩ wa ndũire. Kwa ngerekano, wagĩrĩirũo kwaria na mũgambo ũraiguĩka wega na ũtamũke ciugo ũrĩa kwagĩrĩire no ndũkareke mwarĩrie waku ũiguĩke ta arĩ wa kwĩgerekania. Ũngĩhũthĩra ciĩga cia mwĩrĩ wega ũgĩtĩtĩrithia kana ũgĩtarĩria ũndũ, no gũtũme mĩario yaku ĩgĩe na cama, ĩndĩ ũngĩhũthĩra ciĩga icio na njĩra ĩkĩrĩtie njano, ndũmĩrĩri yaku no yage kũgucĩrĩria. Aria na kayũ ga kũigana, ĩndĩ ndũkaarie na mũgambo mũnene gũkĩria njano. Rĩmwe na rĩmwe nĩ wega kuonania ũcanjamũku mĩario-inĩ yaku, ĩndĩ nĩ wagĩrĩirũo kwaga gũtororokia. Gũcenjia mũgambo, ũcanjamũku, kwaria kuuma ngoro-inĩ, maũndũ macio mothe magĩrĩirũo kũhũthĩrũo na njĩra ĩtarĩ ya gwĩthondekera rĩĩtwa kana ĩrĩa ĩngĩtũma athikĩrĩria maigue ũũru.

Andũ amwe nĩ marĩ njĩra ĩrĩa mahũthagĩra makĩaria, o na rĩrĩa matararuta mĩario. Angĩ nao nĩ mahotaga makĩria kwaria na mwarĩrie wao wa o mũthenya matekũbacĩrĩra mũno. Ũndũ ũrĩa wa bata nĩ kwaria ũrĩa kwagĩrĩire o mũthenya na gũkorũo na mũthiĩre ũronania gĩtĩo gĩa Gĩkristiano. Nĩ ũndũ ũcio, rĩrĩa ũrĩ rĩarĩrio-inĩ nĩ ũrĩhotaga gwĩka na kwaria na mwarĩrie waku kĩũmbe.

Ũgĩthoma Mbere ya Andũ. Gũthoma na mwarĩrie wa mũndũ kĩũmbe nĩ ũndũ ũbataraga kĩyo. Nĩguo ũhote gwĩka ũguo, amba ũmenye maũndũ marĩa ma bata makĩria ũhoro-inĩ ũrĩa ũgaathoma na ũmenye ũrĩa maũndũ macio marĩrĩirio. Taũkĩrũo wega nĩ maũndũ macio; kwaga ũguo, ũgũkorũo ũgĩthoma o ciugo tu. Rora mĩtamũkĩre ya ciugo iria ũtoĩ. Wĩmenyerie gũthoma na kayũ nĩguo ũhote kũgarũrĩra mũgambo wa ciugo na gũcigweta irĩ hamwe na njĩra rĩciria rĩkumĩra wega. Ĩka ũguo rĩngĩ na rĩngĩ nginya ũrĩhota gũthoma ta maĩ. Thuthuria ũhoro ũcio wega biũ ũũ atĩ rĩrĩa ũraũthoma na kayũ, ũthomi waku ũgũkorũo ũrĩ na ũcanjamũku. Kũu nĩkuo gũthoma na mwarĩrie waku kĩũmbe.

Ma nĩ atĩ ũhoro ũrĩa mũingĩ tũthomaga mbere ya andũ umaga mabuku-inĩ maitũ marĩa makoragwo na ũhoro umĩte Bibilia-inĩ. Makĩria ma gũthoma hĩndĩ ya Cukuru ya Ũtungata wa Gĩtheokrasi, nĩ tũthomaga maandĩko tũkĩhunjia na tũkĩruta mĩario rĩarĩrio-inĩ. Ariũ a Ithe witũ nĩ maheagwo wĩra wa gũthoma ibungo hĩndĩ ya Wĩruti wa Mũrangĩri na Wĩruti wa Bibilia wa Kĩũngano. Ariũ a Ithe witũ amwe arĩa marĩ na ũmenyeru nĩ maheagwo mĩario ya gũthoma hĩndĩ ya irũrũngano. Ũgĩthoma Bibilia kana mabuku mangĩ, thoma na njĩra njega maũndũ marĩa marĩtio nĩ andũ angĩ. Angĩkorũo nĩ andũ maigana ũna marĩtie, geria gũthoma ũgĩcenjagia mũgambo waku harĩ o mũndũ. Ririkana: Ndũgatororokie, ĩndĩ ĩkĩra mũcamo na ũthome na njĩra ya ndũire.

Gũthoma na mwarĩrie wa mũndũ kĩũmbe nĩ gũthoma ta arĩ kwaranĩria. Gũthoma kũu kuumaga ngoro.