Kũruta Mĩario na Njĩra ya Ndeereti

KAINGĨ andũ matikoragwo na guoya magĩteereta na arata. Maticaragĩrĩria ciugo. Andũ amwe makoragwo marĩ acanjamũku; angĩ magakorũo mahoreire. O na kũrĩ ũguo, kwaria ũguo na njĩra ya ndũire nĩ kũgucagĩrĩria.

Rĩrĩa ũraaria na mũndũ ũtoĩ, ti wega kwaria nake ta arĩ mũndũ mũyaine mũno kana na njĩra ĩtarĩ baacĩrĩre. Ma nĩ atĩ, kũndũ kũmwe ndeereti ciothe hamwe na andũ mũndũ atoĩ ciambagĩrĩria na njĩra ĩbacĩrĩirũo mũno. Thutha wa kuonania gĩtĩo kĩrĩa kĩagĩrĩire, na njĩra ya ũũgĩ mũndũ no ambĩrĩrie kwaria na njĩra ya ndeereti.

Ningĩ ũrĩ rĩarĩrio-inĩ nĩ wega kwĩmenyerera. Kwaria na njĩra ĩtarĩ na kĩhaarĩro no gũthũkie gĩtĩo kĩrĩa kĩagĩrĩire mĩcemanio ya Gĩkristiano na gũtũme andũ mage kuoya na ũritũ kĩrĩa kĩraarĩrĩrio. Thiomi-inĩ imwe, nĩ kũrĩ ciugo iria ihũthagĩrũo mũndũ akĩaria na mũndũ mũkũrũ kũmũkĩra, mwarimũ, mũtongoria, kana mũciari. (Rora ciugo iria ihũthĩrĩtwo thĩinĩ wa Atũmwo 7:2 na 13:16.) Kũrĩ ciugo iria ihũthagĩrũo mũndũ akĩaria na mũndũ ũrĩa mahikanĩtie nake kana na mũrata. O na gũtuĩka tũrĩ rĩarĩrio-inĩ to mũhaka twarie na njĩra ĩbacĩrĩirũo mũno-rĩ, twagĩrĩirũo kwaria na njĩra ya gĩtĩo.

O na kũrĩ ũguo nĩ kũrĩ maũndũ mangĩtũma mĩario ya mũndũ yoneke ta ĩrĩ mĩbacĩrĩre gũkĩria njano. Ũndũ ũmwe nĩ mũbangĩre wake wa ciugo. Nĩ ũndũ ũrehaga thĩna mwaria angĩgeria gũcokera ciugo o ũrĩa icabĩtwo. Kaingĩ mũtamũkĩre wa ciugo ũkoragwo ũrĩ ngũrani na ũrĩa ciandĩkĩtwo. Ma nĩ atĩ, mũndũ akĩhaarĩria mĩario ahũthagĩra ũhoro mũcabe gwĩka ũthuthuria. No kũhoteke mũthingi wa mĩario ũkorũo ũrĩ matemo macabe. No ũngĩgweta maũndũ o ũrĩa macabĩtwo kana ũmathome o ũrĩa macabĩtwo matemo-inĩ, no ũkorũo ũrĩ ũndũ mũritũ kwaria na njĩra ya ndeereti. Nĩguo ũhote gũthiĩ na mbere kwaria na njĩra ya ndeereti, heana ũhoro na ciugo ciaku mwene na wĩtheme kũhũthĩra ciugo nditũ.

Ũndũ ũngĩ nĩ mũthiĩre. Kaingĩ mũndũ ũraria abacĩrĩire gũkĩria njano, ciugo ciake irũmanagĩrĩra irĩ na mũbango mũna na ndacenjagia mũthiĩre wake. Mũndũ arĩ ndeereti-inĩ cia o mũthenya nĩ acenjagia mũthiĩre akĩaria na agaikara agĩtithagia na njĩra itiganĩte.

Ũkĩarĩria andũ aingĩ, o na ũkĩaragia na njĩra ya ndeereti, nĩ ũkũbatara kuongerera mũgambo, gwĩkĩra ciugo hinya, na ũrĩ na ũcanjamũku nĩguo ũnyite meciria ma athikĩrĩria.

Nĩguo ũhote kwaragia na andũ na njĩra ya ndeereti ũtungata-inĩ, ũkũbatara kwĩmenyeria kwaria na njĩra njega o mũthenya. Ũguo ti kuuga atĩ ũkũbatara gũkorũo ũrĩ mũthomu mũno. No nĩ wega gũkũria mwarĩrie mwega ũrĩa ũrĩtũmaga andũ mathikĩrĩrie na gĩtĩo ũhoro ũrĩa ũramahe. Ũrĩ na maũndũ macio meciria-inĩ-rĩ, wĩcirie kana nĩ ũkũbatara kũrutĩra wĩra tũmaũndũ tũtũ ndeereti-inĩ ciaku cia o mũthenya.

1. Wĩtheme ciugo itarĩ na mũbangĩre ũrĩa wagĩrĩire wa ciugo kana iria cingĩtũma ũkuruhithanio na andũ arĩa matarũmagĩrĩra ithimi cia Ngai. Ũkĩrũmĩrĩra ũtaaro wa Akolosai 3:8, wĩtheme kũhũthĩra ciugo njũru. O na kũrĩ ũguo ti ũũru kwaria na mwarĩrie wa o mũthenya. Mwarĩrie wa o mũthenya nĩ mwĩtĩkĩrĩku kũringana na ithimi cia rũthiomi.

2. Wĩtheme gũikara ũkĩhũthagĩra ciugo o imwe ũkĩaria maũndũ matiganĩte. Wĩrute kũhũthĩra ciugo iria ironania wega biũ ũrĩa ũrenda kuuga.

3. Wĩtheme gwĩcokera. Amba ũmenye wega ũrĩa ũrenda kuuga ũtanambĩrĩria kwaria.

4. Ndũkahumbĩre maũndũ ma bata na njĩra ya kũhũthĩra ciugo nyingĩ mũno. Wĩmenyerie kũgweta wega na ciugo nyinyi ũndũ ũrĩa ũrabatara kũririkanwo.

5. Aria na njĩra ĩronania gĩtĩo harĩ andũ.