Mũndũ Ũmwe Wahonirio Mangũ Kuonania Ngatho

Jesu erekeire itũũra-inĩ rĩa Efiraimu, mwena wa rũgongo wa Jerusalemu nĩguo mũbango wa Sanhedrini wa kũmũũraga ũtharare. Agaikara kũu na arutwo ake, nĩguo orĩre thũ ciake. (Johana 11:54) O na kũrĩ ũguo, Pasaka ya mwaka wa 33 nĩ ĩkuhĩrĩirie, kwoguo Jesu nĩ ekũbatara kuumagara rĩngĩ. Agathiĩ mwena wa rũgongo atuĩkanĩirie Samaria agakinya Galili, na rĩrĩ nĩrĩo iceera rĩake rĩa mũico gĩcigo-inĩ gĩkĩ atanakua.

Kĩambĩrĩria-inĩ kĩa rũgendo rũu, o Jesu agĩthiaga kuuma itũũra rĩmwe nginya rĩrĩa rĩngĩ, agacemania na arũme ikũmi marĩ na mangũ. Mĩthemba ĩmwe ya mũrimũ ũcio nĩ ĩtũmaga mũndũ orũo nĩ ciĩga imwe cia mwĩrĩ ta ciara cia moko, cia magũrũ, kana matũ. (Ndari 12:​10-12) Watho wa Ngai woigĩte atĩ mũndũ wĩna mangũ agĩrĩirũo gũikara kũraihu na andũ na akoigaga, “Ndĩ na thaahu! ndĩ na thaahu!”​— Maũndũ ma Alawii 13:​45, 46, The Holy Bible in Gĩkũyũ Language.

Nĩ ũndũ ũcio, andũ acio ikũmi marĩ na mangũ magaikara kũraihu na Jesu. No rĩrĩ, makanĩrĩra makoiga: “Jesu, Mũrutani, tũiguĩre tha!” Nake Jesu amona, akameera: “Thiĩi mũkeyonanie kũrĩ athĩnjĩri-Ngai.” (Luka 17:​13, 14) Na njĩra ĩyo akonania gĩtĩo harĩ Watho wa Ngai ũrĩa uugĩte atĩ athĩnjĩri-Ngai nĩo magĩrĩirũo gũtua kana mũndũ ũrarĩ na mangũ nĩ mũhonu. Thutha ũcio no rĩo angĩikarania na andũ arĩa angĩ rĩngĩ.​— Maũndũ ma Alawii 13:​9-17.

Andũ acio ikũmi nĩ metĩkĩtie atĩ Jesu nĩ arĩ ũhoti wa kũringa ciama. Kwoguo makanyita njĩra merekeire kũrĩ athĩnjĩri-Ngai o na matarĩ marahonio. Marĩ o njĩra-inĩ, wĩtĩkio wao harĩ Jesu ũkagĩa na maciaro. Makambĩrĩria kuona na kũigua atĩ nĩ macokererũo nĩ ũgima wao wa mwĩrĩ!

Arũme kenda gatagatĩ ka acio mahonio magethiĩra. No ũmwe wao, Mũsamaria, agacoka gũcaria Jesu. Nĩkĩ hihi? Arenda gũcokeria Jesu ngatho nyingĩ nĩ ũndũ wa kũmũhonia. Mũndũ ũcio mũhonu rĩu ‘aragooca Ngai na mũgambo mũnene,’ nĩ kũmenya atĩ Ngai nĩwe watũma ahone. (Luka 17:15) Ona Jesu, akagwa magũrũ-inĩ make na akamũcokeria ngatho.

Jesu akeera arĩa mamũthiũrũrũkĩirie atĩrĩ: “Andũ othe ikũmi nĩ maatherio, githĩ tiguo? Hakĩrĩ ũguo-rĩ, acio angĩ kenda makĩrĩ kũ? Hatirĩ ũngĩ wacoka kũgooca Ngai tiga o mũndũ ũyũ wa rũrĩrĩ rũngĩ?” Agacoka akeera Mũsamaria ũcio: “Ũkĩra wĩthiĩre; wĩtĩkio waku nĩ watũma ũhone.”​— Luka 17:​17-19.

Ũndũ ũcio Jesu eka wa kũhonia andũ ikũmi moima na mangũ ũkonania atĩ Jehova Ngai arĩ hamwe nake. Ũmwe wa acio ikũmi to kũhonio ahonio no hihi nĩ agĩa na mweke wa gũkona muoyo. Mahinda-inĩ maya Ngai ndarahũthĩra Jesu kũhonania na njĩra ya kĩama. O na kũrĩ ũguo, tũngĩonania wĩtĩkio harĩ Jesu no tũgĩe na mweke wa gũkona muoyo wa tene na tene. Hihi nĩ tuonanagia ngatho o ta Mũsamaria ũcio?