Mabuku na Maandĩko Marĩa Magwetetwo Thĩinĩ wa Kabuku ka Mũcemanio wa Ũtũũro na Ũtungata
NOVEMBA 4-10
MŨTHITHŨ KUUMA KIUGO-INĨ KĨA NGAI | 1 JOHANA 1-5
“Mũtikende Thĩ o na Kana Indo Iria Irĩ Thĩinĩ wa Thĩ”
w05 1/1 10 kĩb. 13
Rũmagĩrĩra Kĩonereria kĩa Jesu
13 Andũ amwe no moige atĩ ti maũndũ mothe makoragwo marĩ moru thĩinĩ wa thĩ. O na kũrĩ ũguo, thĩ no ĩtũgucĩrĩrie o hamwe na maũndũ marĩa marĩ thĩinĩ wayo tũtige gũtungatĩra Jehova. Na gũtirĩ kĩndũ thĩ ĩheanaga kĩngĩtũteithia gũkuhĩrĩria Ngai. Nĩ ũndũ ũcio, tũngĩkũria wendo harĩ indo iria irĩ thĩinĩ wa thĩ, hamwe na indo iria itonekaga irĩ njũru, no tũkorũo tũkĩĩingĩria ũgwati-inĩ. (1 Timotheo 6:9, 10) Makĩria ma ũguo, maũndũ maingĩ marĩa marĩ thĩinĩ wa thĩ nĩ moru na no matũthũkie. Tũngĩĩroragĩra thenema kana ibindi cia TV iria ironania maũndũ ma ũhinya, kwenda indo cia kĩĩmwĩrĩ, kana ngomanio itagĩrĩire, no twambĩrĩrie kuona maũndũ macio ta magĩrĩire na macoke mambĩrĩrie gũtũgucĩrĩria. Tũngĩgĩa ũrata na andũ arĩa muoroto wao mũnene arĩ kwagagĩria ũtũũro wao kana kũgaacĩra biacara-inĩ, maũndũ macio no matuĩke nĩmo ũndũ ũrĩa mũnene ũtũũro-inĩ witũ o na ithuĩ.—Mathayo 6:24; 1 Akorintho 15:33.
Kũmaatha Maũndũ ma Bata Maandĩko-inĩ
it-1 862 kĩb. 5
Kuohanĩra
Nĩ ũndũ mwagĩrĩru kũhoya Ngai ohere andũ arĩa angĩ o na angĩkorũo nĩ kĩũngano kĩgima. Musa nĩ eekire ũguo ũhoro-inĩ wĩgiĩ rũrĩrĩ rwa Isiraeli, akiumbũra mehia ma rũrĩrĩ ruothe na akĩhoya moherũo, na Jehova akĩmũigua. (Nda 14:19, 20) Ningĩ hĩndĩ ĩrĩa hekarũ yaamũragwo, Suleimani nĩ aahoire Jehova ohere andũ ake mangĩehirie na macoke magarũrũke matigane na mĩthiĩre yao mĩũru. (1Ath 8:30, 33-40, 46-52) Ezara nĩ aarũgamĩrĩire Ayahudi arĩa maarĩ ithamĩrio akiumbũra mehia mao. Mahoya make ma kuuma ngoro na mathaithana nĩ maatũmire andũ othe moe ikinya nĩguo moherũo nĩ Jehova. (Eza 9:13–10:4, 10-19, 44) Jakubu eekĩrire ngoro mũndũ ũrĩa ũrwarĩte kĩĩroho ete athuri a kĩũngano mamũhoere na “angĩkorũo nĩ ekĩte mehia, nĩ ekuoherũo.” (Jak 5:14-16) O na kũrĩ ũguo, nĩ harĩ “rĩhia rĩrehaga gĩkuũ” rĩrĩa mũndũ atangĩoherũo, nĩrĩo kwĩhĩria roho mũtheru, kana kũmenyera gwĩkaga mehia mũndũ akĩmenyaga. Mũkristiano ndagĩrĩirũo kũhoera andũ arĩa mehagia na njĩra ĩyo.—1Joh 5:16; Mat 12:31; Ahi 10:26, 27.
w04 10/1 29
Ciũria Kuuma Kũrĩ Athomi
Mũtũmwo Johana aandĩkire atĩ “wendo ũrĩa mũkinyanĩru nĩ ũingataga guoya.” Ciugo “wendo ũrĩa mũkinyanĩru” ciugĩte atĩa, na “guoya” ũrĩa ũingatagwo nĩ ũrĩkũ?
Mũtũmwo Johana aandĩkire ũũ: “Wendo ndũrĩ guoya, ĩndĩ wendo ũrĩa mũkinyanĩru nĩ ũingataga guoya, tondũ guoya nĩ ũtũgiragĩrĩria. Ti itherũ, mũndũ ũrĩa ũkoragwo na guoya ndatuĩtwo mũkinyanĩru thĩinĩ wa wendo.”—1 Johana 4:18.
Ũhoro ũrĩa ũthiũrũrũkĩirie mũhari ũcio ũronania atĩ Johana aaragia ũhoro wĩgiĩ wĩyathi wa kwaria, na makĩria ũrĩa wendo harĩ Ngai ũhutanĩtie na wĩyathi wa kũmwarĩria. Ũndũ ũcio no woneke kuumana na ciugo iria irĩ mũhari-inĩ wa 17 iria ciugaga: “Ũguo nĩguo wendo ũtuĩtwo mũkinyanĩru thĩinĩ witũ, nĩgetha tũgaakorũo na wĩyathi wa kwaria mũthenya wa ciira.” Gĩkĩro kĩrĩa Mũkristiano endete Ngai nakĩo na ũrĩa aiguaga Ngai amwendete no itũme mũndũ akorũo na wĩyathi kana age gũkorũo naguo rĩrĩa araria na Ngai kũgerera mahoya.
Ciugo “wendo ũrĩa mũkinyanĩru” nĩ cia bata. Kũringana na ũrĩa kiugo “mũkinyanĩru” kĩhũthĩrĩtwo Bibilia-inĩ, ti hingo ciothe kĩonanagia gũkinyanĩra biũ kana na gĩkĩro kĩa igũrũ biũ, no kaingĩ kĩonanagia gũkinyanĩra na gĩkĩro kĩna. Kwa ngerekano, Jesu ooigire ũũ hĩndĩ ya Mahunjio make ma Kĩrĩma-inĩ: “Nĩ ũndũ ũcio no mũhaka mũkoragwo mũrĩ akinyanĩru, ta ũrĩa Ithe wanyu wa igũrũ arĩ mũkinyanĩru.” Jesu eeraga arũmĩrĩri ake atĩ mangĩendire o andũ arĩa mamendete, wendo wao ndũngĩarĩ mũkinyanĩru, ũngĩarĩ mũtingiaru. Maagĩrĩirũo kũũtua mũkinyanĩru na njĩra ya kwenda nginya thũ ciao. Na njĩra o ta ĩyo, rĩrĩa Johana aandĩkire ũhoro wa “wendo ũrĩa mũkinyanĩru,” aaragia ũhoro wĩgiĩ kwenda Ngai na ngoro yothe, maũndũ-inĩ mothe ma ũtũũro.—Mathayo 5:46-48; 19:20, 21.
Rĩrĩa Mũkristiano arahoya nĩ aririkanaga atĩ arĩ na mehia na ti mũkinyanĩru. O na kũrĩ ũguo, angĩkorũo nĩ endete Ngai na ngoro yothe na nĩ aiguaga atĩ Ngai nĩ amwendete biũ, ndarĩĩtigagĩra atĩ Ngai no age kũmwĩtĩkĩra. Handũ ha ũguo, nĩ arĩkoragwo na wĩyathi wa kwaria agĩitũrũrĩra Ngai ngoro yake na akĩhoya oherũo kũgerera mũthingi wa igongona rĩa ũkũũri, rĩrĩa Ngai aaheanire na njĩra ya wendo kũgerera harĩ Jesu Kristo. Nĩ arĩkoragwo na ũũma atĩ Ngai nĩ aiguaga mahoya make.
Nĩ na njĩra ĩrĩkũ mũndũ ‘angĩtuwo mũkinyanĩru thĩinĩ wa wendo’ na kũgerera njĩra ĩyo ‘aingate guoya’ wa kuona ta atangĩtĩkĩrĩka? Mũtũmwo Johana ooigire ũũ: “Mũndũ ũrĩa ũrũmagĩrĩra kiugo [kĩa Ngai], wendo wa Ngai hatarĩ nganja nĩ ũtuĩtwo mũkinyanĩru thĩinĩ wake.” (1 Johana 2:5) Wĩcirie ũndũ ũyũ: Angĩkorũo Ngai aatwendire hĩndĩ ĩrĩa twarĩ ehia-rĩ, na githĩ to atwende o na makĩria angĩkorũo nĩ tũkwĩrira na ‘tũrũmagĩrĩre kiugo gĩake’ tũrĩ na kĩyo? (Aroma 5:8; 1 Johana 4:10) Hatarĩ nganja, angĩkorũo nĩ tũrĩkoragwo tũrĩ ehokeku, nĩ tũrĩkoragwo na ũũma ta ũrĩa mũtũmwo Paulo aarĩ naguo rĩrĩa ooigire ũũ igũrũ rĩgiĩ Ngai: “Tondũ o na ndaagirĩrĩirie Mũrũ wake mwene anyamarĩke, no aamũneanire nĩ ũndũ witũ ithuothe-rĩ, na githĩ marĩ hamwe na mũrũ wake matigũgĩtũtuga na indo icio ingĩ ciothe?”—Aroma 8:32.
NOVEMBA 11-17
MŨTHITHŨ KUUMA KIUGO-INĨ KĨA NGAI | 2 JOHANA 1–JUDASI
“No Mũhaka Twĩrutanĩrie Biũ Nĩguo Tũtũũre Ũhoro-inĩ wa Ma”
w04 9/15 11-12 kĩb. 8-9
“Thiĩi na Mbere Kũgĩa na Hinya Thĩinĩ wa Mwathani”
8 Tũtirigĩtwo nĩ mawara ma Mũcukani tondũ Maandĩko nĩ maguũrĩtie njĩra iria ahũthagĩra. (2 Akorintho 2:11) Mũcukani akĩgeria Ayubu aahũthĩrire maũndũ ta mathĩna maritũ ma kĩĩmbeca, gĩkuũ kĩa andũ a famĩlĩ, ũkararia kuuma kũrĩ andũ a famĩlĩ, mathĩna ma mwĩrĩ, na inyũrũri kuuma kũrĩ arata a maheeni. Ayubu aaiguire akuĩte ngoro na akĩigua ta Ngai aamũtiganĩirie. (Ayubu 10:1, 2) O na gũtuĩka Shaitani no age gũtũrehera mathĩna macio ĩmwe kwa ĩmwe mahinda-inĩ maya, Akristiano aingĩ nĩ macemanagia na maũndũ ta macio, na Mũcukani no amahũthĩre nĩgetha ahingie muoroto wake.
9 Mogwati ma kĩĩroho nĩ maingĩhĩte mũno matukũ-inĩ maya ma mũthia. Andũ thĩinĩ wa thĩ ĩrĩa tũratũũra mekĩrĩire mũno gũkinyĩra indo cia kĩĩmwĩrĩ gũkĩra mĩoroto ya kĩĩroho. Indo cia mohoro cionanagia ngomanio itagĩrĩire ta arĩ kĩhumo gĩa gĩkeno handũ ha kĩhumo kĩa ruo rwa ngoro. Na andũ aingĩ “mendete ikeno handũ ha kwenda Ngai.” (2 Timotheo 3:1-5) Mwĩcirĩrie ũcio no ũtũthũkie kĩĩroho tũngĩaga ‘kũrũa mbaara nene ya wĩtĩkio.’—Judasi 3.
Kũmaatha Maũndũ ma Bata Maandĩko-inĩ
it-2 279
Maruga ma Wendo
Bibilia ndĩtaarĩirie ũrĩa maruga macio ma wendo maahaanaga na o na ndĩonanĩtie meekagwo maita maigana. (Judasi 12) Ti Jesu Kristo kana atũmwo ake maathanĩte maruga macio mekagwo, na nĩ kuonekaga atĩ matiagĩrĩire kuonwo ta maarĩ ma o mũhaka. Andũ amwe moigaga atĩ maakoragwo marĩ mahinda marĩa Akristiano arĩa atongu makoragwo na maruga na mageeta Akristiano arĩa athĩni. Ciana iria itaarĩ maithe, atumia a ndigwa, andũ atongu, na andũ arĩa athĩni maarĩanagĩra hamwe metha-inĩ ĩmwe marĩ ariũ a Ithe ũmwe.
it-2 816
Ihiga
Nĩ harĩ kiugo kĩngĩ gĩa Kĩngiriki, spi·lasʹ, kĩrĩa kiugĩte ihiga rĩhithĩtwo rungu rwa maaĩ. Kĩhũthĩrĩtwo nĩ Judasi gũtaarĩria athuri amwe arĩa maaingĩrĩte kĩũngano-inĩ gĩa Gĩkristiano matarĩ na muoroto mwega. Athuri acio maarĩ ũgwati harĩ andũ arĩa angĩ kĩũngano-inĩ, o ta ũrĩa mahiga mahithĩtwo rungu rwa maaĩ maarĩ ũgwati harĩ meri. Oigĩte ũũ igũrũ rĩgiĩ athuri ta acio: “Acio nĩo ndwaro cia mahiga iria ciĩhithaga rungu rwa maĩ maruga-inĩ manyu ma wendo rĩrĩa mararĩanĩra na inyuĩ.”—Judasi 12.
NOVEMBA 18-24
MŨTHITHŨ KUUMA KIUGO-INĨ KĨA NGAI | KŨGUŨRĨRIO 1–3
“Nĩ Njũĩ Ciĩko Ciaku”
w01 1/15 20-21 kĩb. 20
Twaranaga na Ithondeka rĩa Jehova
20 Nĩguo tũtwarane na ithondeka rĩa Jehova nĩ twagĩrĩirũo nĩ kũmenya atĩ Jesu Kristo nĩwe ũheetwo nĩ Ngai wĩra wa gũkorũo arĩ “mũtwe wa kĩũngano.” (Aefeso 5:22, 23) Ningĩ rĩandĩko rĩa Isaia 55:4 nĩ rĩgwetete ũndũ wa bata, harĩa twĩrĩtwo ũũ: “Atĩrĩrĩ, ũcio nĩ ndamũtuire mũira kũrĩ ndũrĩrĩ, na ngĩmũtua mũtongoria na mũnene wa ndũrĩrĩ.” Hatarĩ nganja, Jesu nĩ oĩ gũtongoria. Nĩ oĩ ngʼondu ciake o hamwe na ciĩko ciacio. O na rĩrĩa aathuthuragia ciũngano mũgwanja cia Asia Nini, ooigire ũũ maita matano: “Nĩ njũĩ ciĩko ciaku.” (Kũguũrĩrio 2:2, 19; 3:1, 8, 15) Ningĩ Jesu nĩ oĩ mabataro maitũ, o ta Ithe, Jehova. Mbere ya kũrutana Ihoya rĩa Kĩonereria, Jesu ooigire ũũ: “Ithe wanyu nĩ amenyaga maũndũ marĩa mũbataraga o na mũtanamũhoya.”—Mathayo 6:8-13.
Kũmaatha Maũndũ ma Bata Maandĩko-inĩ
w09 1/15 31 kĩb. 1
Matemo Kuuma Ibuku-inĩ rĩa Kũguũrĩrio—I
2:7—“Paradiso ya Ngai” nĩ kĩĩ? Tondũ ciugo ici iraria ũhoro wa Akristiano aitĩrĩrie maguta, no mũhaka gũkorũo paradiso ĩrĩa ĩrarĩrĩrio haha nĩ paradiso ya kũrĩa igũrũ, kũrĩa Ngai we mwene aikaraga. Akristiano aitĩrĩrie maguta ehokeku nĩ makaaheo ngerenwa ya kũrĩa “kuumana na mũtĩ wa muoyo.” Makaaheo muoyo ũtangĩkua.—1Ko 15:53.
NOVEMBA 25–DICEMBA 1
MŨTHITHŨ KUUMA KIUGO-INĨ KĨA NGAI | KŨGUŨRĨRIO 4–6
Kũmaatha Maũndũ ma Bata Maandĩko-inĩ
re 76-77 kĩb. 8
Ũgemu wa Gĩtĩ kĩa Ũthamaki kĩa Jehova Kũrĩa Igũrũ
8 Johana nĩ aamenyaga atĩ athĩnjĩri-Ngai maamũrĩtwo nĩguo matungatage gĩikaro-inĩ kĩrĩa kĩamũre mahinda-inĩ ma tene. Kwoguo no gũkorũo nĩ aamakire nĩ kuona maũndũ marĩa aacokire gũtaarĩria rĩrĩa ooigire ũũ: “Na gĩtĩ kĩu kĩa ũnene gĩathiũrũrũkĩirio nĩ itĩ 24 cia ũnene, na ngĩona itĩ icio cia ũnene cikarĩirũo nĩ athuri 24 mehumbĩte nguo cia rangi mwerũ, na maarĩ na thũmbĩ cia thahabu igũrũ rĩa mĩtwe yao.” (Kũguũrĩrio 4:4) Handũ ha athĩnjĩri-Ngai, haarĩ na athuri 24 maikarĩire itĩ cia ũnene na mahumbĩtwo thũmbĩ ta athamaki. Athuri acio nĩa? Nĩ Akristiano aitĩrĩrie maguta a kĩũngano gĩa Gĩkristiano mariũkĩtio na makamũkĩra ngerenwa ĩrĩa Jehova aamerĩire kũrĩa igũrũ. Tũmenyaga ũguo atĩa?
re 80 kĩb. 19
Ũgemu wa Gĩtĩ kĩa Ũthamaki kĩa Jehova Kũrĩa Igũrũ
19 Ciũmbe icio irũgamĩrĩire kĩĩ? Kĩoneki kĩngĩ gĩtaarĩirio nĩ mũnabii Ezekieli nĩ gĩtũteithagia kuona macokio. Ezekieli oonire Jehova aikarĩire gĩtĩ kĩa ũnene ngaari-inĩ yake ya igũrũ arĩ hamwe na ciũmbe irĩ muoyo ihaanaine na iria Johana oonire. (Ezekieli 1:5-11, 22-28) Thutha-inĩ Ezekieli nĩ oonire ngaari ĩyo o rĩngĩ ĩthiũrũrũkĩirio nĩ ciũmbe irĩ muoyo. No ihinda-inĩ rĩrĩ eetire ciũmbe icio irĩ muoyo akerubi. (Ezekieli 10:9-15) Ciũmbe inya irĩ muoyo iria Johana oonire irũgamĩrĩire akerubi a Ngai, ciũmbe cia gĩkĩro kĩa igũrũ iria irĩ ithondeka-inĩ rĩa Jehova rĩa kĩĩroho. Johana ndangĩeciririe atĩ nĩ ũndũ wa mwanya kuona akerubi marĩ hakuhĩ ũguo na Jehova tondũ mũbango-inĩ wa gĩikaro kĩamũre mahinda-inĩ ma tene, haarĩ na akerubi erĩ a thahabu gĩkunĩko-inĩ kĩa ithandũkũ rĩa kĩrĩkanĩro rĩrĩa rĩarũgamagĩrĩra gĩtĩ kĩa ũnene kĩa Jehova. Gatagatĩ-inĩ ka akerubi acio nĩho mũgambo wa Jehova waiguĩkagĩra ũkĩheana maathani kũrĩ rũrĩrĩ rwa Isiraeli.—Thama 25:22; Thaburi 80:1.
cf 36 kĩb. 5-6
“Mũrũthi Ũrĩa wa Mũhĩrĩga wa Juda”
5 Mũrũthi ũĩkaine nĩ ũndũ wa ũcamba. Hihi nĩ ũrĩ wangʼethanĩra na mũrũthi wa njamba ũthiũ kwa ũthiũ? Angĩkorũo waneka ũguo, no kũhoteke waikarĩte handũ hagitĩre ũtangĩkinyĩrũo nĩ nyamũ ĩyo, kana gũkorũo mũrũthi ũcio warĩ handũ hairigĩre. Na o na angĩkorũo nĩguo kwarĩ, ũndũ ta ũcio no ũtũme wĩtigĩre. Ũkarora mũrũthi ũcio mũnene na ũrĩ hinya ũkũrorete, ũgĩciragia ũrĩa arĩ ũndũ mũritũ harĩ mũrũthi kũũrĩra kĩndũ o gĩothe nĩ ũndũ wa guoya. Bibilia yugaga atĩ “mũrũthi, [nĩ] nyamũ ĩrĩa ĩrĩ hinya mũno harĩ iria ingĩ, na gũtirĩ mũndũ yeheragĩra.” (Thimo 30:30) Kristo akoragwo na ũcamba o ta ũcio.
6 Reke twarĩrĩrie ũrĩa Jesu oonanirie ũcamba ta wa mũrũthi kũgerera njĩra ithatũ: gũtetera ũhoro wa ma, kũrũmia kĩhooto, na kũngʼethanĩra na ũkararia. Ningĩ nĩ tũkuona atĩ ithuothe, tũkorũo nĩ tũrĩ ũcamba kana tũtirĩ, no twĩgerekanie na Jesu harĩ kuonania ũcamba.