ITHOMO RĨA 10

Gũcenjia Mũgambo

Thimo 8:4, 7

NA NJĨRA NGUHĨ: Heana ũhoro ũranyitĩka wega na warahũre meciria ma athikĩrĩria aku na njĩra ya kuongerera kana kũnyihanyihia mũgambo waku, kũgarũrĩra mũgambo, kwaria na ihenya kana kahora.

ŨRĨA ŨNGĨKA ŨGUO:

Ongerera kana ũnyihanyihie mũgambo waku. Ongerera mũgambo waku nĩguo wonanie maũndũ marĩa manene na wĩkĩre athikĩrĩria aku ngoro moe ikinya. Ĩka o ta ũguo rĩrĩa ũrathoma matuĩro ma Kĩĩmaandĩko. Nyihanyihia mũgambo nĩguo ũtũme athikĩrĩria magĩe na mĩĩto ya kwenda kũmenya ũrĩa ũkuuga kana nĩguo wonanie guoya kana mĩtangĩko.

Ndũkongerere mũgambo waku maita maingĩ mũno ũndũ ũngĩtũma athikĩrĩria aku maigue ta marakũũmwo. Wĩtheme kwaria na njĩra ĩrakĩria njano, ndũgatũme athikĩrĩria merekerie mũno meciria mao harĩ wee.
Garũrĩra mũgambo waku. Angĩkorũo rũthiomi rwanyu nĩ rũretĩkĩria, no ũgarũrĩre warie na mũgambo wa igũrũ nĩguo wonanie ũcanjamũku kana ũkĩonania mũigana kana ũraihu. Aria na mũgambo wa thĩ nĩguo wonanie kĩeha kana mĩtangĩko.
Aria na ihenya kana kahora. Aria na ihenya rĩrĩa ũraheana ũhoro wa gĩkeno. Aria kahora rĩrĩa ũragweta maũndũ ma bata.

Nĩguo wĩtheme kũmakia athikĩrĩria aku, ndũgacenjie o rĩmwe warie na ihenya kana kahora. Ndũkarie na ihenya mũno nginya wage kũiguĩka wega ũrĩa ũroiga.