Mabuku Marĩa Magwetetwo Thĩinĩ wa “Kabuku ka Mũcemanio wa Ũtũũro na Ũtungata”

Mabuku Marĩa Magwetetwo Thĩinĩ wa Kabuku ka Mũcemanio wa Ũtũũro na Ũtungata

SEPTEMBA 8-14

MŨTHITHŨ KUUMA KIUGO-INĨ KĨA NGAI THIMO 30

“Ndũkahe Ũthĩni Kana Ũtonga”

w87 5/15 30 kĩb. 8

Wĩtigagĩre Jehova na nĩ Ũrĩkoragwo na Gĩkeno

◆ 30:15, 16—Ngerekano ici ciendaga gũtũruta atĩa?

Cionanagia atĩ mũndũ ũrĩ na ũkoroku ndaiganagia. O ta ũrĩa thambara itaiganagia thakame, no taguo andũ arĩa akoroku matatigaga gwetha mbeca na ũnene. O nayo mbĩrĩra ndĩiganagia tondũ ĩikaraga ĩrĩ hingũku yetereire ciimba. Nda ĩrĩa thata yanagĩrĩra na njĩra ya mũhaano ĩkĩenda ciana. (Kĩambĩrĩria 30:1) Bũrũri mũngʼaru ũnyuaga maĩ ma mbura, na thutha wa ihinda inini ũkoneka ũrĩ mũngʼaru rĩngĩ. Naguo mwaki thutha wa gũcina indo iria ciaikio thĩinĩ waguo, ũkinyagĩra indo ingĩ ingĩhĩa iria irĩ hakuhĩ naguo. Ũguo noguo andũ arĩa akoroku makoragwo mahaana. No andũ arĩa matongoragio nĩ ũũgĩ ũrĩa uumaga kũrĩ Ngai matitongoragio nĩ merirĩria ta macio ma mwĩyendo.

w11 6/1 10 kĩb. 4

Ũrĩa Ũngĩtũũra Kũringana na Ũhoti Waku

Ũkĩenda kũgũra kĩndũ, ambaga kũiga mbeca. O na gũtuĩka ũndũ ũcio no woneke ta ũrĩ mũhĩtũke nĩ mahinda, kũiga mbeca ũtanagũra kĩndũ nĩ njĩra ĩmwe njega ya gũteithia mũndũ gwĩthema kwĩingĩria mathĩna-inĩ ma mbeca. Gwĩka ũguo nĩ gũtũmaga andũ aingĩ metheme mathiirĩ na mathĩna mangĩ ta kũrĩha maciaro manene, marĩa matũmaga mũndũ arĩhe mbeca nyingĩ gũkĩra iria kĩndũ kĩu kiumaga. Bibilia yonanagia atĩ thigiriri nĩ ĩrĩ “ũũgĩ” tondũ nĩ ĩcokanagĩrĩria “irio ciayo hĩndĩ ya magetha” nĩguo ĩgaacihũthĩra ihinda rĩũkĩte.—Thimo 6:6-8; 30:24, 25.

Kũmaatha Maũndũ ma Bata Maandĩko-inĩ

w09 4/15 17 kĩb. 11-13

Ũũgĩ wa Jehova nĩ Wonekaga Kũgerera Ũũmbi Wake

¹¹ Gĩkami nĩ kĩũmbe kĩngĩ kĩnini mũno kĩngĩtũruta maũndũ ma bata. (Thoma Thimo 30:26.) Kĩhaana thungura nene, no gĩkoragwo na matũ makuhĩ ma gĩthiũrũrĩ na magũrũ makuhĩ. Gĩikaraga kũndũ mahiga-inĩ. Nĩ gĩkoragwo na ũhoti mwega wa kuona, na ũndũ ũcio nĩ ũgĩteithagia. Ningĩ marima na mĩatũka ĩrĩa ĩkoragwo mahiga-inĩ nĩ ĩgĩteithagia kwĩhitha rĩrĩa kĩona thũ. Ikami ciendete gũikara hamwe irĩ nyingĩ, na ũndũ ũcio ũkoragwo ũrĩ ũgitĩri harĩ cio na nĩ ciĩkĩranaga ũrugarĩ hĩndĩ ya heho.

¹² Nĩ maũndũ marĩkũ tũngĩĩruta kuumana na gĩkami? Ũndũ wa mbere, nĩ atĩ gĩtiĩrekagĩrĩria ũndũ kĩngĩtharĩkĩrũo na njĩra hũthũ. Handũ ha ũguo, kĩhũthagĩra ũhoti wakĩo mwega wa kuona, gĩkahota kuona thũ irĩ o haraihu, na gĩikaraga hakuhĩ na marima na mĩatũka harĩa kĩngĩĩhitha kĩona ũgwati. O na ithuĩ nĩ tũbatiĩ gũkorũo na ũhoti mwega wa kuona na njĩra ya kĩĩroho, nĩgetha tũkahotaga kuona mogwati marĩa marĩ thĩinĩ wa thĩ ya Shaitani. Mũtũmwo Petero eerire Akristiano ũũ: “Tũũriai ũhoti wanyu wa gwĩciria, ikaragai mwĩiguĩte! Thũ yanyu Mũcukani, acangacangaga ta mũrũthi ũrararama, agĩetha mũndũ wa gũtambura.” (1 Pet. 5:8) Rĩrĩa Jesu aarĩ gũkũ thĩ, aaikaraga eiguĩte nĩgetha ndagatoorio nĩ magerio ma Shaitani ma kũgeria gũthũkia wĩhokeku wake. (Mat. 4:1-11) Nĩ aaigĩire arũmĩrĩri ake kĩonereria kĩega mũno.

¹³ Njĩra ĩmwe tũngĩonania nayo atĩ nĩ tũraikara twĩiguĩte, nĩ kũhũthĩra wega ũgitĩri wa kĩĩroho ũrĩa Jehova atũheete. Nĩ twagĩrĩirũo kwĩruta Kiugo kĩa Ngai na gũthiaga mĩcemanio tũtegũtĩrĩria. (Luk. 4:4; Ahib. 10:24, 25) Makĩria ma ũguo, o ta ũrĩa ikami ciendete gũikara hamwe irĩ nyingĩ, o na ithuĩ nĩ twagĩrĩirũo gũikara hakuhĩ na Akristiano arĩa angĩ nĩguo “twĩkĩrane ngoro.” (Rom. 1:12) Rĩrĩa twahũthĩra indo iria Jehova atũheaga cia gũtũgitĩra, tuonanagia atĩ nĩ tũretĩkania na ciugo ici cia Daudi: “Jehova nĩwe ndũmba yakwa ya ihiga na mwĩgitio wakwa na Ũrĩa ũũhonokagia. Ngai wakwa nĩwe rwaro rwakwa rwa ihiga, na njũragĩra harĩ we.”—Thab. 18:2

SEPTEMBA 15-21

MŨTHITHŨ KUUMA KIUGO-INĨ KĨA NGAI THIMO 31

Maũndũ Tũngĩĩruta Kuumana na Ũtaaro wa Mũtumia Kũrĩ Mũrũ Wake

g17.6 9 kĩb. 5

Kũruta Ciana Gũkorũo na Wĩnyihia

Mateithie kuona bata wa kũheana. Onia mwana waku atĩ “kũheana nĩ kũrĩ gĩkeno kĩnene gũkĩra kwamũkĩra.” (Atũm. 20:35) Ũngĩka ũguo atĩa? Mũrĩ hamwe, no mwandĩke marĩĩtwa ma andũ arĩa mangĩbatara ũteithio ta wa kũgũra indo, gũtwarũo handũ, kana gũthondekerũo kĩndũ. Ũcoke ũthiĩ hamwe na mwana waku gũteithĩrĩria amwe ao. Reke mwana waku one ũrĩa ũgĩaga na gĩkeno na ũkaiganĩra ũgĩteithia andũ arĩa angĩ. Weka ũguo, ũgũkorũo ũkĩruta mwana waku gũkorũo na wĩnyihia kũgerera njĩra ĩrĩa njega biũ ya kĩonereria gĩaku.—Ũtaaro wa Bibilia: Luka 6:38.

Kũmaatha Maũndũ ma Bata Maandĩko-inĩ

w92 11/1 11 kĩb. 7-8

Gĩthomo Mahinda-inĩ ma Tene ma Bibilia

⁷ Thĩinĩ wa Isiraeli, ciana ciarutagwo nĩ aciari erĩ kuuma cirĩ o nini mũno. (Gũcokerithia Maathani 11:18, 19; Thimo 1:8; 31:26) Mũthomi ũmwe wa Bibilia wĩtagwo E. Mangenot, aandĩkire ũũ thĩinĩ wa ibuku rĩmwe rĩa gũtaarĩria ciugo cia Bibilia rĩa Kĩfaranja: “Thutha wa mwana kũmenya kwaria o ũguo, nĩ aarutagwo maũndũ manini kuuma watho-inĩ. Mami wao aacokagĩra mũhari ũmwe kaingĩ, na thutha wa mwana kũũmenya, nĩ aamũrutaga mũhari ũngĩ. Thutha-inĩ, mĩhari ĩrĩa mwana aamenyete na angĩahotire kuuga na mũtwe, yacokaga ĩkaandĩkwo na akanengerũo. Na njĩra ĩyo akambĩrĩria kũrutwo gũthoma. Na atuĩka mũndũ mũgima, nĩ aathiaga na mbere kwĩruta maũndũ ma kĩĩndini na njĩra ya gũthoma na gwĩcũrania igũrũ rĩgiĩ watho wa Mwathani.”

⁸ Ũndũ ũcio ũronania atĩ njĩra ya mũthingi ĩrĩa yahũthagĩrũo kũrutana yarĩ kwĩruta maũndũ na kũmaiga ngoro-inĩ. Maũndũ marĩa mũndũ eerutaga megiĩ watho wa Jehova na ũrĩa aahiũranagia na andũ ake maabatiĩ gũikara ngoro-inĩ. (Gũcokerithia Maathani 6:6, 7) Ningĩ nĩ aabatiĩ gwĩcũrania igũrũ rĩgiĩ maũndũ macio. (Thaburi 77:11, 12) Nĩ harĩ njĩra itiganĩte ciahũthagĩrũo gũteithia andũ ethĩ na akũrũ kũririkana maandĩko. Njĩra icio nĩ ta, mĩhari ĩrũmanĩrĩire thĩinĩ wa thaburi kwambĩrĩria na ndemwa ngũrani kũringana na ũrĩa ndemwa ciarũmanĩrĩire (ta thĩinĩ wa Thimo 31:10-31); ciugo gũkorũo ciambĩrĩirie na ndemwa ĩhaanaine kana gũtamũkwo na njĩra ĩhaanaine. Ningĩ nĩ maahũthagĩra namba ta iria ihũthĩrĩtwo thĩinĩ wa Thimo 30:15-31. Athomi amwe maugaga atĩ no kũhoteke karenda ya Gezer, ĩmwe ya indo iria cia tene mũno ciandĩkĩtwo na Kĩhibirania, yaandĩkĩtwo nĩ kamwana ga cukuru ĩrĩ njĩra ya kwĩririkania maũndũ.

SEPTEMBA 22-28

MŨTHITHŨ KUUMA KIUGO-INĨ KĨA NGAI KOHELETHU 1-2

Kũmaatha Maũndũ ma Bata Maandĩko-inĩ

it “Kohelethu” kĩb. 1

Kohelethu

Kiugo gĩa Kĩhibirania Qo·heʹleth (kĩrĩa kiugĩte ũrĩa ũcokanagĩrĩria andũ) nĩ kĩonanagia wega wĩra ũrĩa mũthamaki ũrĩa wathuuragwo nĩ Jehova aarutaga thĩinĩ wa Isiraeli. (Koh 1:1, 12) Warĩ ũigĩrĩrĩki wa ũrĩa ũratongoria gũcokanĩrĩria andũ arĩa maamũrĩirũo Ngai nĩguo matũũrie wĩhokeku harĩ Ngai, ũrĩa warĩ mũthamaki wao. (1Ath 8:1-5, 41-43, 66) Nĩ ũndũ ũcio, kĩrĩa gĩatũmaga mũthamaki erũo atĩ nĩ mwega kana nĩ mũũru, nĩ kana nĩ aacokanagĩrĩria rũrĩrĩ rwa Isiraeli ũthathaiya-inĩ wa Jehova kana ndeekaga ũguo. (2Ath 16:1-4; 18:1-6) Suleimani nĩ aarutĩte wĩra mũnene wa gũcokanĩrĩria rũrĩrĩ rwa Isiraeli hamwe na andũ a kũngĩ hekarũ-inĩ. Thĩinĩ wa ibuku rĩa Kohelethu, Suleimani eendaga gũcokanĩrĩria andũ a Ngai ameherie harĩ maũndũ ma tũhũ na matarĩ ũguni ma thĩ ĩno, amateithie gwĩka ciĩko iria ingĩakenirie Ngai ũrĩa meeyamũrĩire marĩ rũrĩrĩ. Kiugo kĩrĩa kĩhũthĩrĩtwo Bibilia-inĩ ya Gĩkũyũ, gĩtaũrĩtwo kuumana na kiugo gĩa Kĩhibirania Qo·heʹleth (kĩrĩa kiugĩte ũrĩa ũcokanagĩrĩria andũ).

SEPTEMBA 29–OKTOMBA 5

MŨTHITHŨ KUUMA KIUGO-INĨ KĨA NGAI KOHELETHU 3-4

Kũmaatha Maũndũ ma Bata Maandĩko-inĩ

it “Wendo” kĩb. 39

Wendo

“Hĩndĩ ya Kwenda.” Andũ arĩa matonagio wendo nĩ arĩa Jehova onanĩtie atĩ matiagĩrĩire kuonio wendo, kana arĩa matuĩte itua rĩa gwĩka maũndũ moru. Andũ othe nĩ monagio wendo, nginya rĩrĩa mũndũ arĩonania atĩ we nĩ athũire Ngai. Kũngĩthiĩ ũguo, mũndũ ũcio nĩ atigaga kuonio wendo. Jehova Ngai na Jesu Kristo nĩ mendete ũthingu, na magathũũra uuni-watho. (Thb 45:7; Ahi 1:9) Andũ arĩa makoragwo na rũmena rũnene kwerekera Ngai ũrĩa wa ma matiagĩrĩire kuonio wendo. Hatarĩ nganja, no ũkorũo ũrĩ ũndũ wa tũhũ gũthiĩ na mbere kuonia andũ ta acio wendo, tondũ o na thutha wa gwĩka ũguo, matingĩonania atĩ nĩ mendete Ngai. (Thb 139:21, 22; Isa 26:10) Kwoguo Ngai nĩ akoragwo na gĩtũmi kĩega gĩa kũmathũũra, na ihinda rĩakinya nĩ akaamoera ikinya.—Thb 21:8, 9; Koh 3:1, 8.

OKTOMBA 6-12

MŨTHITHŨ KUUMA KIUGO-INĨ KĨA NGAI KOHELETHU 5-6

Ũrĩa Tũngĩonania Gĩtĩo Kĩnene Harĩ Ngai Witũ Mũnene

w08 8/15 15-16 kĩb. 17-18

Tĩithagia Jehova na Njĩra ya Kuonania Gĩtĩo

¹⁷ Nĩ twagĩrĩirũo kuonania gĩtĩo kĩnene rĩrĩa tũrathathaiya Jehova. Rĩandĩko rĩa Kohelethu 5:1 riugaga ũũ: “Menyagĩrĩra makinya maku rĩrĩa rĩothe ũrathiĩ nyũmba-inĩ ya Ngai ũrĩa wa ma.” Musa na Joshua, eerĩ maathirũo marute iratũ ciao rĩrĩa maarũgamĩte handũ hatheru. (Tham. 3:5; Josh. 5:15) Maabataire gwĩka ũguo ĩrĩ njĩra ya kuonania gĩtĩo kĩnene. Athĩnjĩri-Ngai a Isiraeli maathĩtwo mekĩrage inyatha cia gatani “nĩguo mahumbagĩre njaga ciao.” (Tham. 28:42, 43) Ũndũ ũcio nĩ wagiragĩrĩria matikoneke njaga ciao rĩrĩa maatungataga kĩgongona-inĩ. Mũndũ wothe wa famĩlĩ ya athĩnjĩri-Ngai, no mũhaka angĩathĩkĩire ithimi icio cia kuonania gĩtĩo harĩ Ngai.

¹⁸ Kwoguo, nĩ tũrabatara kuonania gĩtĩo kĩnene ũthathaiya-inĩ witũ. Nĩguo tũheo gĩtĩo, no mũhaka twĩke maũndũ na njĩra ya gĩtĩo. Gĩtĩo kĩrĩa tuonanagia gĩtibatiĩ gũkorũo kĩrĩ gĩa gwĩtua kana kĩhaana ta nguo twĩhumbĩte cia gũtũmenyithania. Ningĩ gĩtibatiĩ kuoneka na maitho tu, no kĩbatiĩ kuuma ngoro kũrĩa Ngai onaga. (1 Sam. 16:7; Thim. 21:2) Twagĩrĩirũo kuonanagia gĩtĩo hĩndĩ ciothe, na ũndũ ũcio nĩ wonanagio wega nĩ mĩtugo itũ, mĩerekera itũ, ũrĩa tũrũmbũyanagia na andũ arĩa angĩ, na nginya ũrĩa twĩyonaga. Hatarĩ nganja, tũbatiĩ kuonanagia gĩtĩo maũndũ-inĩ mothe marĩa tũrauga na tũgeka. Ũhoro-inĩ wĩgiĩ mĩthiĩre itũ, mwĩhumbĩre na mwĩgemerie witũ, nĩ twĩrutanagĩria kũrũmĩrĩra ũtaaro ũyũ wa mũtũmwo Paulo: “Ithuĩ tũtitũmaga kũgĩe na ũndũ o na ũmwe wa kũhĩngithia, nĩguo ũtungata witũ ndũkonerũo mahĩtia; no tuonanagia na njĩra ciothe atĩ tũrĩ ndungata cia Ngai.” (2 Kor. 6:3, 4) Twendaga ‘kũgoocithia na njĩra ciothe ũrutani wa Ngai, o we Mũhonokia witũ.’—Tit. 2:10.

w09 11/15 11 kĩb. 21

Agagĩria Mahoya Maku Kũgerera Wĩruti Waku wa Bibilia

²¹ Jesu aahoyaga na gĩtĩo na arĩ na wĩtĩkio mũnene. Kwa ngerekano, atanariũkia Lazaro, ‘Aatiirire maitho na igũrũ akiuga: “Awa, ndĩragũcokeria ngatho tondũ nĩ wanjigua. Nĩ ma, nĩ njũĩ atĩ hĩndĩ ciothe nĩ ũnjiguaga.”’ (Joh. 11:41, 42) Hihi mahoya maku nĩ monanagia gĩtĩo na wĩtĩkio ta ũcio? Ũngĩthuthuria ihoya rĩa Jesu rĩa kĩonereria, no wone atĩ maũndũ marĩa manene aagwetire, nĩ gũtherio kwa rĩĩtwa rĩa Jehova, gũka gwa Ũthamaki wake, na kũhinga kwa wendi wake. (Mat. 6:9, 10) Ta wĩcirie ũhoro wa mahoya maku wee mwene. Hihi nĩ monanagia atĩ nĩ ũrenda Ũthamaki wa Jehova ũũke, wendi wake wĩkwo, na rĩĩtwa rĩake rĩtherio? Nĩ mabatiĩ kuonania ũguo.

OKTOMBA 13-19

MŨTHITHŨ KUUMA KIUGO-INĨ KĨA NGAI KOHELETHU 7-8

‘Thiĩ Nyũmba Ĩrĩ na Macakaya’

it “Gũcakaya” kĩb. 9

Gũcakaya

Ihinda rĩa Gũcakaya. Rĩandĩko rĩa Kohelethu 3:1, 4 riugaga atĩ nĩ kũrĩ “hĩndĩ ya kũrĩra na hĩndĩ ya gũtheka; hĩndĩ ya gũcakaya na hĩndĩ ya gũthũngũtha.” Nĩ ũndũ wa ũrĩa gĩkuũ gĩkoraga andũ othe, andũ arĩa marĩ na ngoro ĩrĩ na ũũgĩ mathiaga “nyũmba ĩrĩ na macakaya” handũ ha gũthiĩ nyũmba ĩrĩ na ndĩa. (Koh 7:2, 4; ringithania Thi 14:13.) Kwoguo, mũndũ mũũgĩ ahũthagĩra mweke ũrĩa woneka wa kuonania tha na kũũmĩrĩria arĩa angĩ, handũ ha gũtiganĩria mweke ta ũcio nĩguo athiĩ kũrĩa kũrĩ na ikeno. Ũndũ ũcio ũmũteithagia kũririkana atĩ ũtũũro nĩ mũkuhĩ na akerutanĩria gũthondeka ũrata wake hamwe na Mũũmbi witũ.

OKTOMBA 27–NOVEMBA 2

Kũmaatha Maũndũ ma Bata Maandĩko-inĩ

it- “Gũtongorio nĩ Roho” kĩb. 10

Gũtongorio nĩ Roho

Kũrĩ na ũira wa kuonania atĩ arũme arĩa maahũthĩrirũo nĩ Ngai kwandĩka Bibilia, matieragwo nĩ Ngai ĩmwe kwa ĩmwe ciugo iria mekwandĩka. Ũhoro-inĩ wĩgiĩ mũtũmwo Johana, tũthomaga atĩ roho wa Ngai nĩ wamũheire Ũguũrio kũgerera mũraika na njĩra ya kũmuonia “imenyithia,” nake Johana “akĩruta ũira wĩgiĩ kiugo kĩrĩa Ngai aaheanire na wĩgiĩ ũira ũrĩa Jesu Kristo aaheanire, wĩgiĩ maũndũ mothe marĩa oonire.” (Kũg 1:1, 2) Nĩ “kũgerera ũtongoria wa roho mũtheru” Johana ‘eekorire thĩinĩ wa mũthenya wa Mwathani’ na akĩĩrũo ũũ: “Maũndũ marĩa ũkuona, maandĩke gĩkũnjo-inĩ.” (Kũg 1:10, 11) Kwoguo, Ngai nĩ oonire arĩ wega gwĩtĩkĩria aandĩki a Bibilia mahũthĩre meciria mao gũthuura ciugo cia gũtaarĩria cioneki iria moonaga. (Hab 2:2) O na kũrĩ ũguo, nĩ aamatongoragia biũ, nĩguo maũndũ marĩa maandĩkaga makorũo marĩ ma ma, ma kwĩhokeka, na maringane na wendi wake. (Thi 30:5, 6) Kĩyo kĩrĩa aandĩki a Bibilia maarĩ nakĩo nĩ kĩonanĩtio wega nĩ ciugo iria irĩ thĩinĩ wa Kohelethu 12:9, 10, ĩrĩa ĩronania atĩ meecũranagia, magathuthuria, na magacokanĩrĩria ũhoro, nĩguo maheane ‘ciugo njega na mandĩke ciugo itarĩ na mahĩtia cia ũhoro wa ma.’—Ringithania Luk 1:1-4.