Mabuku Marĩa Magwetetwo Thĩinĩ wa Kabuku ka Mũcemanio wa Ũtũũro na Ũtungata
© 2025 Watch Tower Bible and Tract Society of Pennsylvania
JULAĨ 7-13
MŨTHITHŨ KUUMA KIUGO-INĨ KĨA NGAI THIMO 21
Motaaro ma Ũũgĩ Megiĩ Ũrĩa Kĩhiko Kĩngĩgĩa na Gĩkeno
w03 10/15 4 kĩb. 5
Ũngĩhota Atĩa Gũtua Matua ma Ũũgĩ?
Ũngĩhĩkĩka gũtua matua, maumĩrĩro no makorũo matarĩ mega. Thimo 21:5 yugaga: “Mĩbango ya mũndũ ũrĩ kĩyo hatarĩ nganja nĩ ĩrehaga ũgaacĩru, no arĩa othe mahĩkĩkaga gwĩka maũndũ nĩ mathĩnaga.” Kwa ngerekano, andũ ethĩ nĩ magĩrĩirũo kuoya ihinda rĩiganu matanaingĩra kĩhiko-inĩ handũ ha gũtongorio nĩ merirĩria mao. Mangĩaga gwĩka ũguo, no meyonere ũũma wa ciugo ciaandĩkirũo nĩ mwandĩki ũmwe wa tene wetagwo William Congreve. Aaugire ũũ: “Kũhĩkĩka kũingĩra kĩhiko-inĩ no gũtũme mũndũ erire thutha-inĩ.”
g 7/08 7 kĩb. 2
Ũngĩka Atĩa Nĩguo Ũkorũo na Kĩhiko Kĩega?
Koragwo ũrĩ mwĩnyihia. “Mũtikaneke ũndũ o na ũmwe na ngũĩ kana na kwĩĩkĩrĩra, ĩndĩ mũrĩ na wĩnyihia onagai arĩa angĩ marĩ a bata kũmũkĩra.” (Afilipi 2:3) Mathĩna maingĩ monekaga kĩhiko-inĩ nĩ ũndũ wa arĩa mahikanĩtie gũcokanĩrĩria mahĩtia handũ ha kũgeria gwetha kĩhonia. Gũkorũo na wĩnyihia no gũgũteithie kwagaga kuonania atĩ wee ndũrĩ na mahĩtia rĩrĩa mathĩna maumĩra.
w06 9/15 28 kĩb. 13
“Ũrokenaga Hamwe na Mũtumia wa Wĩthĩ Waku”
13 Ĩ kĩhiko kĩngĩkorũo na mathĩna nĩ ũndũ wa arĩa mahikanĩtie gwĩkanĩra maũndũ moru? No mabatare kwĩrutanĩria gwetha kĩhonia. Kwa ngerekano, no makorũo mamenyerete kwaranĩria na ciugo itarĩ njega na ũndũ ũcio ũgatuĩka mũtugo harĩ o. (Thimo 12:18) O ta ũrĩa gĩcunjĩ kĩrĩa kĩhĩtũku kĩonanĩtie, ũndũ ũcio no ũkorũo na maumĩrĩro moru. Thimo ĩmwe ya Bibilia yugaga: “Nĩ kaba gũtũũra werũ-inĩ gũkĩra gũtũũra na mũtumia wa ngũĩ na wa kũrakara na ihenya.” (Thimo 21:19) Angĩkorũo ũrĩ mũtumia kĩhiko-inĩ ta kĩu, wĩyũrie ũũ: ‘Hihi mwĩkĩre wakwa wa maũndũ nĩ ũtũmaga mũthuri wakwa one arĩ ũritũ gũkorũo hamwe na niĩ?’ Bibilia ĩraga athuri ũũ: “Thiĩi na mbere kwenda atumia anyu na mũtikamarakaragĩre mũrĩ na marũrũ.” (Akolosai 3:19) Angĩkorũo wĩ mũthuri wĩyũrie: ‘Hihi kwaga kuonania wendo na gũkorũo ndĩ mũndũ wa marakara nĩ kũratũma mũtumia wakwa ende gwetha thayũ kũndũ kũngĩ?’ Nĩ ma hatirĩ gĩtũmi o na kĩmwe gĩa gũtũma mũndũ eke ũtharia. No tondũ ũndũ ta ũcio no wĩkĩke, nĩ wega kwaranĩria mumĩranĩtie ngoro rĩrĩa mathĩna maumĩra.
Kũmaatha Maũndũ ma Bata Maandĩko-inĩ
w05 1/15 17 kĩb. 9
Maũndũ Marĩa Maarathĩtwo Megiĩ Ũthamaki wa Ngai Kũhinga
9 Ngũrani na ũrĩa Jesu aatariĩ rĩrĩa aakuuĩtwo nĩ njaũ ya ndigiri, rĩu we nĩ Mũthamaki ũrĩ hinya. Onanagio ahaicĩte igũrũ rĩa mbarathi, na thĩinĩ wa Bibilia mbarathi ĩrũgamagĩrĩra mbaara. (Thimo 21:31) Kũguũrĩrio 6:2 yugaga ũũ: “Na rĩrĩ, ngĩona mbarathi ya rangi mwerũ, na ũrĩa wamĩikarĩire aarĩ na ũta; na akĩheo thũmbĩ, agĩthiĩ akĩhootanaga nĩguo arĩkie ũhootani wake.” Ningĩ Daudi aaugire ũũ igũrũ rĩgiĩ Jesu thĩinĩ wa thaburi: “Jehova nĩ agaatambũrũkia mũthĩgi wa hinya waku kuuma Zayuni, oige ũũ: ‘Thiĩ ũgĩtooranagia gatagatĩ-inĩ ga thũ ciaku.’”—Thaburi 110:2.
JULAĨ 14-20
MŨTHITHŨ KUUMA KIUGO-INĨ KĨA NGAI THIMO 22
Motaaro ma Ũũgĩ Megiĩ Kũrera Ciana
w06 4/1 9 kĩb. 4
Aciari, Koragwoi Mũrĩ Kĩonereria Kĩega Harĩ Ciana Cianyu
Nĩ ma ciana nĩ ciana, no ciana imwe nĩ ikoragwo na mwerekera wa ũremi. (Kĩambĩrĩria 8:21) Aciari mangĩka atĩa? Bibilia yugaga ũũ: “Ũrimũ ũkoragwo wohanĩtio ngoro-inĩ ya mwana, no rũthanju rwa kũrũnga nĩ rũrĩweheragia ũgakorũo haraya nake.” (Thimo 22:15) Aciari amwe monaga kũhũthĩra rũthanju ũrĩ ũndũ mũhĩtũke nĩ mahinda. Na ũrĩa kũrĩ nĩ atĩ, Bibilia ndĩtĩkĩrĩtie ũhinya wa mũthemba o wothe. O na gũtuĩka rĩmwe aciari nĩ mabataraga kũhũthĩra rũthanju, kiugo “rũthanju” kĩrũgamagĩrĩra ũigĩrĩrĩki ũrĩa mũciari aheetwo wa kũrũnga ciana ciake arĩ na wendo na ategũkĩria njano, nĩ ũndũ wa kũrũmbũiya ũtũũro wao wa thutha-inĩ.—Ahibirania 12:7-11.
JULAĨ 21-27
MŨTHITHŨ KUUMA KIUGO-INĨ KĨA NGAI THIMO 23
Motaaro ma Ũũgĩ Megiĩ Kũnyua Njohi
w04 12/1 19 kĩb. 5-6
Tũũria Mawoni Maigananĩru Megiĩ Kũhũthĩra Njohi
5 Ĩ mũndũ angĩnyua njohi, no akemenyerera ndakanyue ũndũ ekuoneka nĩ mũrĩĩu? Andũ amwe mationekaga marĩ arĩĩu o na thutha wa kũnyua njohi nyingĩ mũno. No mũndũ gwĩciria atĩ mũtugo ũcio ndũngĩmũthũkia nĩ kwĩheenia. (Jeremia 17:9) O kahora kahora mũndũ no ekore atĩ ndangĩikara atekũnyua njohi nginya atuĩke “ngombo [ya] ndibei nyingĩ.” (Tito 2:3) Mwandĩki ũmwe wĩtagwo Caroline Knapp aaugire ũũ ũhoro wĩgiĩ ũrĩa mũndũ atuĩkaga ngombo ya kũnyua njohi: “Mũndũ ambagia o kahora, ikinya gwa ikinya, agekora arĩ na mũtugo ũcio atekumenya.” No tuuge atĩ kũhũthĩra njohi gũkĩria gĩthimi nĩ mũtego ũkoragwo ũrĩ ũgwati mũno!
6 Ningĩ ta wĩcirie mũkaana ũyũ Jesu aaheanire: “Mwĩmenyagĩrĩrei nĩguo ngoro cianyu itikanakorũo iritũhĩirũo nĩ kũrĩa na kũnyua gũkĩria gĩthimi, na mĩtangĩko ya ũtũũro, naguo mũthenya ũcio ũmũkorerere hinahi o ta mũtego. Tondũ ũgaakora andũ arĩa othe matũũraga thĩinĩ wa thĩ yothe.” (Luka 21:34, 35) O na mũndũ angĩnyua njohi mũno na age kũrĩĩo, thutha wa ihinda no age hinya wa mwĩrĩ na agũũtare kĩĩmwĩrĩ na kĩĩroho. Ĩ mũthenya wa Jehova ũngĩmũkorerera ahaana ũguo?
it-1 656
Ũrĩĩu
Bibilia nĩ Ĩkaananĩtie Ũrĩĩu. Bibilia nĩ ĩkaananĩtie mũtugo wa kũnyua njohi mũno nginya mũndũ akarĩĩo. Mwandĩki wa ibuku rĩa Thimo nĩ aataarĩirie maumĩrĩro moru ma kũnyua njohi gũkĩria gĩthimi, na sayansi nĩ yonanĩtie atĩ ciugo ciake nĩ cia ma. Aaugire ũũ: “Nũũ ũkoragwo na nguraro hatarĩ gĩtũmi? Nũũ ũkoragwo na haaro? Nũũ ũkoragwo na mĩtangĩko? Nũũ ũkoragwo na ngũĩ? Nũũ ũkoragwo na mateta? Nũũ ũkoragwo atunĩhĩte maitho? Nĩ arĩa mahũthagĩra mahinda maingĩ makĩnyua ndibei; arĩa macaragia ndibei ĩrĩa ĩtukanĩtio. Ndũkarorage ũtune wa ndibei rĩrĩa ĩrakenga ĩrĩ gĩkombe-inĩ [rĩrĩa ndibei yonekaga ĩkĩgucĩrĩria] na rĩrĩa ĩramerũka o kahora, tondũ marigĩrĩrio-inĩ ĩrũmaga o ta nyoka, na ĩkaruta thumu o ta nyoka ĩrĩ thumu [no ĩtũme mũndũ arware mũrimũ wa ini na wa meciria, na mũndũ no akue]. Maitho maku marĩonaga maũndũ mataramenyeka, [njohi ĩhutagia mwĩcirĩrie wa mũndũ, akauga kana ageka maũndũ atangĩka korũo ti mũrĩĩu, akona maũndũ matarĩ ho, akaheana ngʼano nyingĩ, na ageka maũndũ atekwĩgirĩrĩria], na ngoro yaku ĩkaria maũndũ moru [mũndũ aragia maũndũ marĩa akoragwo aigĩte ngoro-inĩ].”—Thi 23:29-33; Ho 4:11; Mat 15:18, 19.
Mwandĩki wa thimo aathiire na mbere kuuga ũũ ũhoro wĩgiĩ mũrĩĩu: “Na ũrĩkoragwo ũtariĩ ta mũndũ ũkomete iria-inĩ gatagatĩ, [agatukanĩrũo ta mũndũ ũratwarũo nĩ maĩ, na mũthia-inĩ akaga kwĩigua], o ta mũndũ ũkomete igũrũ rĩa gĩtugĩ kĩa meri [tondũ hau nĩho meri ĩinainagĩra mũno, ũtũũro wa mũrĩĩu ũkoragwo ũgwati-inĩ wa gwĩkora akisdenti-inĩ, kũhũũrũo, kwĩingĩria mbara-inĩ, na maũndũ mangĩ ta macio]. Ũriugaga atĩrĩ: ‘Nĩ mangũtha, no ndinaigua ngĩgũthwo. Nĩ mahũũra, no ndinamenya ngĩhũũrũo [ciugo icio ironania ũrĩa mũrĩĩu atamenyaga ũrĩa kũrathiĩ, nginya ihera rĩrĩa aherithagio nĩ ũndũ wa mũtugo wake]. Hihi ndĩrĩũkĩra rĩ? Nĩ ngwenda kũnyua ndibei ĩngĩ [thutha wa kũrĩĩo no gũkoma akomaga, no akoragwo arĩ ngombo ya njohi kwoguo no endaga kũnyua rĩngĩ ona mweke].’” Mũndũ ũcio atuĩkaga mũthĩni nĩ ũndũ wa kũhũthĩra mbeca nyingĩ kũgũra njohi, na nĩ ũndũ wa kwaga kwĩhokeka akaremwo nĩ kũruta wĩra.—Thi 23:20, 21, 34, 35.
Kũmaatha Maũndũ ma Bata Maandĩko-inĩ
w04 11/1 31 kĩb. 2
Ciũria Kuuma Kũrĩ Athomi
Kwa ngerekano gũtunguha mũno no gũkorũo kũrĩ ndariri ya kuonania mũndũ nĩ mũkoroku, no ti hingo ciothe gũkoragwo ũguo. Mũndũ no akorũo e mũtungu mũno nĩ ũndũ wa mũrimũ. Ningĩ mũndũ no akorũo e mũtungu mũno tondũ ũguo nĩguo famĩlĩ yao ĩkoragwo ĩhaana. Twagĩrĩirũo kũririkana atĩ mũndũ gũkorũo e mũtungu mũno nĩ ũrĩa onekaga na nja, no ũkoroku ũhutĩtie muonere wa meciria ma mũndũ wĩgiĩ irio. Ciugo gũkorũo mũndũ e mũtungu mũno itaaragĩrio nĩ gũkorũo mũndũ ena maguta maingĩ mũno mwĩrĩ -inĩ. Nacio ciugo ũkoroku nĩ mũndũ kũremwo kwĩgirĩrĩria kũrĩa irio. Kwoguo tũtingiuga mũndũ nĩ mũkoroku nĩ ũndũ wa ũrĩa aigana, no nĩ kũringana na mwerekera wake wĩgiĩ irio. Mũndũ no akorũo ti mũtungu mũno no nĩ mũkoroku. Andũ kuuma kũndũ na kũndũ makoragwo na mawoni ngũrani megiĩ ũrĩa mũndũ ahaana.
JULAĨ 28–AGOSTI 3
MŨTHITHŨ KUUMA KIUGO-INĨ KĨA NGAI
Ĩkĩra Wĩtĩkio Waku Hinya nĩ Ũndũ wa Hĩndĩ ya Moritũ
it-2 610 kĩb. 8
Kũnyarirũo
Akristiano nĩ macokagia ngatho mũno nĩ ũndũ wa kĩheo kĩrĩa arĩa megũkirĩrĩria nginya mũico makamũkĩra. Jesu aaugire ũũ ũhoro-inĩ wĩgiĩ kĩheo kĩu: “Gũkena-rĩ, nĩ arĩa manyarirĩtwo nĩ ũndũ wa ũthingu, nĩ gũkorũo Ũthamaki wa igũrũ nĩ wao.” (Mat 5:10) Gũkorũo na ũmenyo wa kĩĩrĩgĩrĩro kĩa atĩ andũ nĩ makariũkio, na kũmenya ũrĩa wĩ na ũhoti wa gwĩka ũguo, nĩ kũũmagĩrĩria Akristiano mũno. Ũndũ ũcio nĩ ũtũmaga maikare marĩ ehokeku harĩ Jehova o na rĩrĩa merũo nĩ mekũũragwo nĩ arĩa mamanyariraga. Nĩ ũndũ wa gũkorũo na wĩtĩkio wĩgiĩ ũndũ ũrĩa gĩkuũ kĩa Jesu kĩahingirie, nĩ makũũrĩtwo kuuma ũkombo-inĩ wa gwĩtigĩra gĩkuũ. (Ahi 2: 14, 15) Gũkorũo na mwerekera ũrĩa wagĩrĩire nĩ kwa bata mũno harĩ mũkristiano nĩguo ahote gũtũũria wĩhokeku ona akĩgeragĩra ũkararia mũnene. Bibilia yugaga ũũ: “Ikaragai mũrĩ na mwerekera ũyũ wa meciria ta ũrĩa warĩ na Kristo Jesu, ũcio. . . nĩ eenyihirie na agĩathĩka o nginya gĩkuũ, ĩni, nginya rĩrĩa aakuĩrĩire mũtĩ-inĩ wa kũnyarirĩrũo.” (Afi 2: 5-8) “Nĩ ũndũ wa gĩkeno kĩrĩa kĩaigĩtwo mbere yake, [Jesu] nĩ aakirĩrĩirie mũtĩ wa kũnyarirĩrũo na ndaamakirio nĩ gũconorithio.”—Ahi 12:2; ningĩ rora 2Ko 12:10; 2The 1:4; 1Pe 2: 21-23.
w09 12/15 18 kĩb. 12-13
Tũũria Gĩkeno o na Rĩrĩa Ũrĩ na Mĩtangĩko
12 Thimo 24:10 yugaga: “Ũngĩkua ngoro mũthenya wa mĩtangĩko, hinya waku ũgũkorũo ũrĩ mũnini.” Nayo thimo ĩngĩ ĩkauga: “Ruo rwa ngoro nĩ rũhehenjaga roho.” (Thim. 15:13) Akristiano amwe makuĩte ngoro ũũ atĩ, nĩ matiganĩirie ũthomi wao wa Bibilia na magatiga gwĩcũrania ũhoro ũrĩa ũrĩ thĩinĩ wa Kiugo kĩa Ngai. Mahoya mao magatuĩka ta arĩ o mũtugo, na makeyamũrania na Akristiano arĩa angĩ. Ma nĩ atĩ mũndũ angĩthiĩ na mbere gũkua ngoro, ũndũ ũcio no ũkorũo ũrĩ ũgwati.—Thim. 18:1, 14.
13 Ngũrani na ũguo, gũkorũo na mwerekera ũria wagĩrĩire, no gũtũteithie gũthingata maũndũ marĩa mangĩtũrehera gĩkeno ũtũũro-inĩ witũ. Daudi aaugire ũũ: “Niĩ ngenagio nĩ gwĩka wendi waku, wee Ngai wakwa.” (Thab. 40:8) Rĩrĩa maũndũ maitũ matarathiĩ wega ũtũũro-inĩ, tũtiagĩrĩirũo gũtiganĩria maũndũ ma kĩĩroho. Ũrĩa kũrĩ nĩ atĩ, nĩguo tũhiũranie na kĩeha, twagĩrĩirũo gwĩka maũndũ mangĩtũrehera gĩkeno. Jehova atwĩraga atĩ no tũkoragwo na gĩkeno tũngĩthomaga Kiugo gĩake o mũthenya na tũgecũranagia. (Thab. 1:1, 2; Jak. 1:25) Nĩ twamũkagĩra “ciugo njega” iria itũmaga ngoro citũ icanjamũke kuuma Maandĩko-inĩ Matheru na mĩcemanio-inĩ ya Gĩkristiano.—Thim. 12:25; 16:24.
Kũmaatha Maũndũ ma Bata Maandĩko-inĩ
w09 10/15 12
Ciũria Kuuma Kũrĩ Athomi
Mahinda-inĩ ma Bibilia, mwanake angĩendire gwaka nyũmba yake, kana kwambĩrĩria famĩlĩ na njĩra ya kũhikania, aabataraga kwĩyũria ũũ, ‘Hihi nĩ ndĩhaarĩirie kũrũmbũyia mabataro ma mũtumia na ciana iria tũngĩgĩa thutha-inĩ?ʼ Atanambĩrĩria famĩlĩ, nĩ aarutaga wĩra wa kũrĩma. Bibilia ya Today’s English Version yugaga: “Ndũkanake nyũmba kana wambĩrĩrie mũciĩ nginya rĩrĩa maciaro maku magakoruo makũrĩte ũndũ mangĩgethwo, na ũkorũo na ma atĩ nĩ ũkoona mbeca cia mabataro.” Hihi no tũhũthĩre ũtaaro ũcio ũmũthĩ?
Ĩĩ no tũũhũthĩre. Mwanake ũrenda kũhikania nĩ arabatara kwĩhaarĩria wega nĩguo ahote kũhingia mabataro ma famĩlĩ yake. Angĩkorũo ti mũrũaru no mũhaka arute wĩra. Ma nĩ atĩ, mũthuri ndagĩrĩirũo o kwĩrutanĩria tu kũhingĩria famĩlĩ yake mabataro ma kĩĩmwĩrĩ. Kiugo kĩa Ngai kiugaga atĩ mũndũ ũtahingagĩria famĩlĩ yake mabataro ma kĩĩmwĩrĩ, ma ngoro, na ma kĩĩroho nĩ mũũru gũkĩra mũndũ ũtarĩ wĩtĩkio. (1 Tim. 5:8) Nĩ ũndũ ũcio, rĩrĩa mwanake areharĩria kũhikania na kũgĩa famĩlĩ, agĩrĩirũo kwĩyũria ciũria ici: Hihi nĩ ndĩharĩirie kũhingagĩria famĩlĩ yakwa mabataro ma kĩĩmwĩrĩ? Hihi nĩ ndĩharĩirie gũtongoragia maũndũ ma kĩĩroho famĩlĩ-inĩ yakwa? Nĩ ndĩhotaga gũtongoria wĩruti wa Bibilia ũtaratĩrĩrio hamwe na mũtumia wakwa na ciana? Kiugo kĩa Ngai nĩ gĩtĩtĩrithĩtie maũndũ macio ma bata.—Gũcok. 6:6-8; Ef. 6:4.
Kwoguo mwanake ũretha mũndũ wa kũhikania nake nĩ arabatara gwĩciria na njĩra ndikĩru ũtaaro wa Thimo 24:27. O ũndũ ũmwe na ũcio, mũirĩtu nĩ arabatara kwĩyũria kana nĩ ehaarĩirie kũhingagia itemi rĩake e mũtumia kana mũciari. Andũ arĩa mataikarĩte kĩhiko-inĩ ihinda iraihu no meyũrie ciũria o ta icio rĩrĩa mareciria kana nĩ mekũgĩa ciana. (Lu 14:28) Gũtũũra kũringana na motaaro marĩa matongoretio nĩ roho wa Ngai no mateithie ndungata ciake gwĩthema mathĩna maingĩ na makenere ũtũũro wao wa famĩlĩ.
AGOSTI 4-10
MŨTHITHŨ KUUMA KIUGO-INĨ KĨA NGAI THIMO 25
Motaaro ma Bibilia Mangĩtũteithia Kwaragia na Njĩra Njega
w95 4/1 17 kĩb. 8
Ũrĩa Ũngĩkĩra Andũ Ngoro Mende Ũtungata
8 Ithuothe no twĩkĩrane ngoro kũgerera kĩonereria gitũ tũgĩtungatĩra Ngai. Hatarĩ nganja, Jesu nĩ eekĩrire ngoro athikĩrĩria ake. Nĩ eendete ũtungata na aaũigaga mbere. Aaugire atĩ ũtungata watariĩ ta irio harĩ we. (Johana 4:34; Aroma 11:13) Kĩonereria ta kĩu no kĩhutie andũ arĩa angĩ mũno. Hihi no ũreke andũ arĩa angĩ mone gĩkeno kĩrĩa ũgĩaga nakĩo nĩ ũndũ wa ũtungata? No ũtaarĩrie aarĩ na ariu a Ithe witũ kĩũngano-inĩ maũndũ mega marĩa wĩyoneire ũtungata-inĩ, na wĩtheme kwĩgaathĩrĩria ũgĩka ũguo. Rĩrĩa mũrahunjia na andũ arĩa angĩ, mateithagie kũgĩa na gĩkeno kĩrĩa kiumanaga na kwĩra andũ arĩa angĩ ũhoro wĩgiĩ Jehova, Mũũmbi Witũ Ũrĩa Mũnene.—Thimo 25:25.
Kũmaatha Maũndũ ma Bata Maandĩko-inĩ
it-2 399
Ũhooreri
Mũndũ mũhooreri akũragia ngumo ĩyo nĩ ũndũ wa gũkorũo na wĩtĩkio. Nĩ ahotaga kwĩgirĩrĩria na agatũũria ũhoti mwega wa gwĩciria. Mũndũ no age ũhooreri nĩ ũndũ wa kũigua ataiganĩire, gũkua ngoro, kwaga wĩtĩkio, kwaga kĩĩrĩgĩrĩro, na kwaga mwĩhoko. Rĩandĩko rĩa Thimo rĩtaarĩirie mũndũ ũtarĩ mũhooreri ũũ: “O ta itũũra rĩanangĩku, rĩtarĩ na rũthingo, noguo mũndũ ũrĩa ũtangĩhota kũgirĩrĩria marakara make atariĩ.” (Thi 25:28) Mũndũ ta ũcio ndahotaga kũgirĩrĩria meciria moru marĩa mangĩcũngĩrĩria ciĩko njũru.
AGOSTI 11-17
MŨTHITHŨ KUUMA KIUGO-INĨ KĨA NGAI
Ikaraga Haraihu na “Mũndũ Mũkĩgu”
it-2 729 kĩb. 6
Mbura
Mahinda. Bũrũri-inĩ wa Kĩĩranĩro kwarĩ na mahinda ma ũrugarĩ na ma mbura. (Ringithania Thb 32:4; Rwĩ 2:11, kohoro ka magũrũ-inĩ) Kuuma gatagatĩ-inĩ ka Ĩpuro nginya gatagatĩ-inĩ ka Oktomba gwakoragwo na mbura nini. Mahinda-inĩ macio nĩguo maakoragwo makĩgetha. Thimo 26:1 yonanagia atĩ mbura kuura hĩndĩ ya magetha warĩ ũndũ ũtarĩ mwagĩrĩru. (Ringithania 1Sa 12:17-19.) Mahinda-inĩ ma mbura, mbura ndĩauraga ĩrũmanĩrĩirie tondũ mĩthenya ĩmwe nĩ yakĩaga. Gwakoragwo na heho nyingĩ mũno mahinda-inĩ macio ma mbura. (Eza 10: 9, 13) Kwoguo mũndũ nĩ angĩakenire mũno ena handũ hega ha gũikara.—Isa 4:6; 25:4; 32:2; Ayu 24:8.
w87 10/1 19 kĩb. 12
Kũrũngwo nĩ Kũrĩ Maumĩrĩro Mega
12 Andũ amwe nĩ mabataraga kuoerũo makinya maritũ. Rĩandĩko rĩa Thimo 26:3 riugaga ũũ: “Kĩboko nĩ kĩa mbarathi, matamu nĩ ma ndigiri, naruo rũthanju nĩ rwa mũgongo wa andũ arĩa akĩgu.” Rĩmwe Jehova nĩ aarekagĩrĩria andũ a rũrĩrĩ rwa Isiraeli mahiũranie na mathĩna marĩa meerehagĩra. Bibilia yugaga ũũ: “Tondũ nĩ maaremeire kiugo kĩa Ngai; naguo ũtaaro wa Ũrĩa ũrĩ Igũrũ Mũno makĩwagĩra gĩtĩo. Nĩ ũndũ ũcio agĩtũma ngoro ciao ciĩnyihie kũgerera moritũ; makĩhĩngwo, na gũtiarĩ na mũndũ wa kũmateithia. Magĩkaĩra Jehova hĩndĩ ĩrĩa maarĩ na mĩtangĩko; nake akĩmahonokia kuuma thĩna-inĩ ũcio wao.” (Thaburi 107:11-13) Andũ amwe akĩgu nĩ momagia ngoro ciao ũũ atĩ matiĩtĩkagĩra njĩra o yothe ya kũmarũnga. “Mũndũ ũrĩa ũmagia ngingo yake thutha wa kũrũngwo mũno akooinwo o rĩmwe ũndũ atangĩhona.”—Thimo 29:1.
it-2 191 kĩb. 4
Wonje
Ũrĩa thimo ĩyo ĩhũthĩkaga. Mũthamaki Suleimani aaugire: “O ta mũndũ ũrĩa wonjagia kũgũrũ gwake mwene na akegera ngero no taguo mũndũ ũrĩa wĩhokagĩra mũndũ mũkĩgu maũndũ atariĩ.” Mũndũ angĩandĩka mũndũ mũkĩgu wĩra nĩ ta wonje erehagĩra we mwene. Hatarĩ nganja ekuona wĩra wake ũgĩthira nĩ ũndũ wa matua make.—Thi 26:6.
Kũmaatha Maũndũ ma Bata Maandĩko-inĩ
it-1 846
Kĩrimũ
Gũcokeria mũndũ mũkĩgu “kũringana na ũrimũ wake” na njĩra ya gũkararania nake, ũndũ ũcio ũtũmaga ũrĩa ũrakararania nake etĩkanie na mwĩcirĩrie wake ũtarĩ mwega kana njĩra ciake cia gwĩka maũndũ. Nĩguo gũtigathiĩ ũguo, tũheetwo ũtaaro ũyũ thĩinĩ wa thimo: “Ndũgacokagĩrie mũndũ mũkĩgu kũringana na ũrimũ wake.” O na kũrĩ ũguo, Thimo 26:4, 5 yonanagia atĩ gũcokeria mũndũ mũkĩgu “kũringana na ũrimũ wake” na njĩra ya gũthuthuria mĩerekera yake, tũkonania atĩ nĩ ya ũrimũ, na ningĩ tũkonania atĩ maũndũ marĩa arauga nĩ ngũrani na ũrĩa kũrĩ, no gũkorũo na ũguni.
AGOSTI 18-24
MŨTHITHŨ KUUMA KIUGO-INĨ KĨA NGAI
Ũrĩa Tũgunĩkaga Kuumana na Arata a Ma
it-2 491 kĩb. 3
Mũndũ wa Itũũra
Ibuku rĩa Thimo nĩ rĩheanĩte ũtaaro wĩgiĩ kwĩhoka mũrata na kũmũhoya ũteithio rĩrĩa mũndũ arĩ na ũbataro. Riugaga ũũ: “Ndũkanatiganĩrie mũrata waku kana mũrata wa thoguo, na ndũkanaingĩre kwa mũrũ wa nyũkwa mũthenya ũrĩa ũũru ũgaagũkora. Kaba mũndũ wa itũũra ũrĩa ũrĩ hakuhĩ gũkĩra mũrũ wa nyina na mũndũ ũrĩa ũrĩ kũraihu.” (Thi 27:10) Mwandĩki wa Thimo ĩno eendaga kuonania atĩ mũrata wa hakuhĩ nĩ wa bata na no aheane ũteithio o na gũkĩra mũndũ wa hakuhĩ wa famĩlĩ ta mũrũ wa nyina na mũndũ, tondũ angĩkorũo mũndũ ũcio wa famĩlĩ arĩ kũraihu, no aremwo nĩ kũheana ũteithio ta ũrĩa mũrata wa hakuhĩ angĩka.
Kũmaatha Maũndũ ma Bata Maandĩko-inĩ
w06 9/15 19 kĩb. 12
Matemo Kuuma Ibuku-inĩ rĩa Thimo
27:21. Kũgaathĩrĩrio no kuonanie ũrĩa tũhaana. Nĩ tuonanagia wĩnyihia rĩrĩa twacokereria Jehova rũgooco thutha wa kũgaathĩrĩrio, na ũndũ ũcio nĩ ũtwĩkĩraga ngoro gũthiĩ na mbere kũmũtungatĩra. No tũngĩgaathĩrĩrio twĩigue tũrĩ a mwanya, ũndũ ũcio no wonanie atĩ tũtirĩ na wĩnyihia.
AGOSTI 25-31
MŨTHITHŨ KUUMA KIUGO-INĨ KĨA NGAI THIMO 28
Ngũrani Gatagatĩ ka Mũndũ Mwaganu na Mũndũ Mũthingu
w93 5/15 26 kĩb. 2
Hihi nĩ Wathĩkagĩra Jehova Biũ?
“ARĨA athingu makoragwo na ũmĩrĩru o ta mũrũthi.” (Thimo 28:1) Nĩ monanagia wĩtĩkio, makehoka Kiugo kĩa Ngai biũ, na marĩ na ũmĩrĩru magathiĩ na mbere na ũtungata wa Jehova o na makĩngʼethanagĩra na ũgwati o wothe.
it-2 1139 kĩb. 3
Ũtaũku
Arĩa Mahũgũkagĩra Kĩhumo kĩa Ũtaũku. Mũndũ ũrĩa wĩkaga maũndũ moru akoragwo atigĩte gwĩciria ũhoro wa Ngai rĩrĩa aratua matua kana arabanga maũndũ make. (Ayu 34:27) Mũndũ ta ũcio arekaga ngoro yake ĩmũheenie eke maũndũ moru, na ndakoragwo na ũtaũku. (Thb 36:1-4) O na angĩkorũo augaga atĩ arathathaiya Ngai, aigaga morutani ma andũ mbere ya ma Ngai, na ma andũ nĩmo onaga marĩ ma bata. (Isa 29:13, 14) Etetagĩra na akona gwĩka maũndũ moru ta arĩ o “mũthaako” tu (Thi 10:23), na agakorũo na mwĩcirĩrie muogomu na wa ũrimũ, nginya agakinyĩrĩra gwĩciria atĩ Ngai ndonaga mĩtugo yake mĩũru na ta atakoragwo na ũhoti wa gwĩciria. (Thb 94:4-10; Isa 29:15, 16; Je 10:21) Kũgerera ciĩko ciake, nĩ ta akoragwo akiuga, “Gũtirĩ Jehova” (Thb 14:1-3), na ndeciragia ũhoro wake ũtũũro-inĩ. Tondũ ndatongoragio nĩ motaaro ma Ngai, ndangĩkorũo na muonere mwega wa maũndũ, na ndangĩthuthuria maũndũ mothe megiĩ ũndũ mũna, na nĩ ũndũ ũcio ndangĩhota gũtua matua mega.—Thi 28:5.
it-1 1211 kĩb. 4
Wĩkindĩru
Gũtũũra mũtũũrĩre wa wĩkindĩru nĩ ũndũ ũngĩhoteka, no ti kũgerera hinya witũ ithuĩ ene, ĩndĩ nĩ kũgerera wĩtĩkio mũrũmu na kwĩhoka Jehova na hinya wake wa kũhonokania. (Thb 25:21) Ngai eranĩire atĩ arĩkoragwo arĩ “ngo” na “mwĩgitio,” na nĩ arĩgitagĩra njĩra ya arĩa mathiaga na wĩkindĩru. (Thi 2:6-8; 10:29; Thb 41:12) Tondũ nĩ meciragia mũno ũrĩa mangĩtĩkĩrĩka harĩ Jehova, nĩ makoragwo na ũtũũro mwega, ũrĩa ũmahotithagia gũkinyĩra mĩoroto yao. (Thb 26:1-3; Thi 11:5; 28:18) O ta ũrĩa Ayubu eeyoneire, mũndũ ũtarĩ ũcuke no athĩnĩke nĩ ũndũ wathani wa andũ arĩa aganu na akue hamwe nao. No Jehova eranĩire atĩ nĩ amenyaga maũndũ marĩa mũndũ ũcio acemanagia namo, na akeranĩra atĩ igai rĩake rĩgaatũũra tene na tene. Ũtũũro wake wa mahinda mokĩte ũgaakorũo ũrĩ wa thayũ, na nĩ akaagaya maũndũ mega. (Ayu 9:20-22; Thb 37:18, 19, 37; 84:11; Thi 28:10) O ta ũrĩa kwarĩ harĩ Ayubu, mũndũ gũkorũo arĩ na wĩkindĩru nĩkuo gũtũmaga akorũo arĩ wa bata na aheo gĩtĩo, no ti ũtonga. (Thi 19:1; 28:6) Ciana iria ikoragwo na mũciari ta ũcio nĩ ikenaga (Thi 20:7), ikagĩa na igweta nĩ ũndũ wa kĩonereria kĩega gĩa ithe, igakena gwĩtanio nake na kũheo gĩtĩo.
Kũmaatha Maũndũ ma Bata Maandĩko-inĩ
w01 12/1 11 kĩb. 3
Wĩtheme Kũgĩa na Mathĩna ma Kĩĩroho
Kwĩĩtĩkia mũno. Andũ aingĩ arĩa magĩaga na mũrimũ wa ngoro, makoragwo na ma biũ atĩ marĩ na ũgima mwega wa mwĩrĩ mbere ya kũgĩa na mũrimũ ũcio. Mationaga bata wa gũthiĩ kũrorũo nĩ ndagĩtarĩ ũrĩa mwĩrĩ wao ũhaana. O ũndũ ũmwe na ũcio, andũ amwe no mecirie atĩ tondũ nĩ makoretwo magĩtungatĩra Jehova kwa ihinda iraihu, gũtirĩ ũndũ ũngĩhaanĩka harĩ o. No makorũo mategwĩthuthuria kana ũrata wao na Jehova no mwega o nginya rĩrĩa kũriumĩra thĩna wa kĩĩroho. Nĩ ũndũ wa bata kũririkanaga ũtaaro ũyũ mwega wa kwaga kwĩĩtĩkia ũrĩa waheanirũo nĩ mũtũmwo Paulo: “Mũndũ ũrĩa wĩciragia atĩ nĩ arũgamĩte nĩ emenyagĩrĩre ndakae kũgwa.” Nĩ ũndũ wa ũũgĩ kũririkanaga atĩ tũtirĩ akinyanĩru na nĩ twagĩrĩirũo gũikara tũkĩroraga ũrĩa ũrata witũ na Jehova ũhaana.—1 Akorintho 10:12; Thimo 28:14.