Mabuku Marĩa Magwetetwo Thĩinĩ wa “Kabuku ka Mũcemanio wa Ũtũũro na Ũtungata”

Mabuku Marĩa Magwetetwo Thĩinĩ wa Kabuku ka Mũcemanio wa Ũtũũro na Ũtungata

MĨĨ 12-18

MŨTHITHŨ KUUMA KIUGO-INĨ KĨA NGAI THIMO 13

Ndũkanahĩngĩcwo nĩ “Tawa wa Andũ Arĩa Aganu”

it-2 196 kĩb. 2-3

Tawa

Ũrĩa Ũhũthĩrĩtwo na Njĩra Ingĩ cia Ngerekano. Kĩrĩa mũndũ ehokaga kĩmũmũrĩkĩre ũtũũro-inĩ no kĩringithanio na tawa. Nĩkĩo ibuku rĩa thimo rĩkĩaria ũhoro wa ngũrani ya andũ athingu na arĩa aganu riugaga ũũ: “Ũtheri wa andũ arĩa athingu nĩ ũcangararaga mũno, no tawa wa andũ arĩa aganu nĩ ũkaahorio.” (Thi 13:9) Tawa wa mũndũ mũthingu ũthiaga na mbere gũcangarara. No tawa wa mũndũ mwaganu o na ũngĩoneka ta ũracangarara kana njĩra yake yoneke ta ĩragaacĩra, Ngai atigagĩrĩra atĩ maumĩrĩro ma mũndũ ũcio nĩ nduma-inĩ, kũrĩa kũgũrũ gwake gũkũhĩngwo. Mũndũ o wothe ũrumaga ithe na nyina agĩaga na maumĩrĩro ta macio.—Thi 20:20.

Ningĩ gũkorũo atĩ tawa wa mũndũ nĩ ũkaahorio kuonanagia atĩ ndarĩ na mwĩhoko wa ihinda rĩũkĩte. Thimo ĩngĩ yugaga ũũ: “Tondũ mũndũ wothe wĩkaga maũndũ moru ndarĩ na mwĩhoko wa mahinda mokĩte; tawa wa andũ arĩa aganu nĩ ũkaahorio.”—Thi 24:20.

w04 7/15 31 kĩb. 6

“Mũndũ Ũrĩa Mũũgĩ Ekaga Maũndũ na Ũmenyo”

Mũndũ mũrũngĩrĩru ũrĩa wĩkaga maũndũ arĩ na ũmenyo nĩ arĩrathimagwo. Suleimani nĩ oonanirie ũũma wa ũndũ ũcio akiuga ũũ: “Mũndũ ũrĩa mũthingu arĩaga na akaniina mĩĩto yake ya kũrĩa, no nda ya mũndũ ũrĩa mwaganu ndĩkoragwo na kĩndũ.” (Thimo 13:25) Jehova nĩ oĩ ũndũ ũrĩa mwega harĩ ithuĩ maũndũ-inĩ mothe ma ũtũũro witũ ta maũndũ megiĩ famĩlĩ, ũrata witũ na arĩa angĩ, ũtungata witũ, kana o na rĩrĩa twarũngwo. Tũngĩrũmĩrĩra ũtaaro wa ũũgĩ ũrĩa ũrĩ thĩinĩ wa Kiugo gĩake, nĩ tũrĩkenagĩra ũtũũro mwega.

Kũmaatha Maũndũ ma Bata Maandĩko-inĩ

it-2 276 kĩb. 2

Wendo

Wendo no wonanio na njĩra ĩtagĩrĩire. Nĩ ũndũ ũcio, kũroneka atĩ nĩguo mũndũ onanie wendo na njĩra ĩrĩa yagĩrĩire, no mũhaka arũmĩrĩre ũtaaro ũrĩa ũrĩ thĩinĩ wa Kiugo kĩa Ngai, na amũhoe amũhe roho wake ũmũtongorie. Kwa ngerekano, mũciari no akorũo endete mwana wake. Ĩndĩ wendo ũcio no ũthiĩ ũkĩnyihaga, kana awonanie na njĩra ĩtagĩrĩire na njĩra ya kũmũhe kĩrĩa gĩothe etia atekũmũima kĩndũ o gĩothe. No age kũhingia ũigĩrĩrĩki wake arĩ mũciari wa kũrũnga mwana wake, na rĩmwe nginya kũhũthĩra rũthanju. (Thi 22:15) Ũndũ ũcio no woneke ta arĩ kuonania wendo, no ũrĩa kũrĩ nĩ atĩ nĩ mwĩyendo. Bibilia yugaga atĩ mũndũ ta ũcio nĩ gũthũũra athũire mwana wake, tondũ ndareka ũndũ ũrĩa ũngĩhonokia muoyo wa mwana ũcio.—Thi 13:24; 23:13, 14.

MĨĨ 19-25

MŨTHITHŨ KUUMA KIUGO-INĨ KĨA NGAI THIMO 14

Kũmaatha Maũndũ ma Bata Maandĩko-inĩ

it-2 1094

Ũhoti wa Gwĩciria

O na kũrĩ ũguo, mũndũ ũrĩa wĩcũranagia maũndũ, kana akahũthĩra ũhoti wake wa gwĩciria, no athũũrũo nĩ andũ. No kũhoteke ũndũ ũcio nĩguo wonanĩtio thĩinĩ wa Thimo 14:17 ĩrĩa yugaga: “Mũndũ ũrĩa wĩcũranagia maũndũ nĩ athũirũo.” Kaingĩ andũ arĩa matecũranagia maũndũ makoragwo na mawoni matagĩrĩire kwerekera arĩa mecũranagia. O ũndũ ũmwe na ũcio, arĩa mecũranagia maũndũ nĩguo mahote gwĩka wendi wa Ngai nĩ mathũirũo. Nĩkĩo Jesu Kristo aaugire ũũ: “Tondũ mũtirĩ a thĩ ĩno, ĩndĩ nĩ kũmũthuura ndĩmũthuurĩte kuuma harĩ thĩ, nĩkĩo thĩ ĩmũthũire.” (Joh 15:19) Kiugo gĩa Kĩhibirania kĩrĩa gĩtaũrĩtwo ‘gwĩcũrania maũndũ’ thĩinĩ wa Thimo 14:17 no gĩkorũo gĩkĩaria ũhoro wa gũthugunda maũndũ moru. Kwoguo mũhari ũcio no ũkorũo ũkiuga atĩ mũndũ ũrĩa ũthugundaga maũndũ moru nĩ athũirũo. Nĩkĩo Bibilia imwe itaũraga mũhari ũcio ũũ: “Na mũndũ ũrĩa ũthugundaga maũndũ moru nĩ athũirũo.”

MĨĨ 26–JUNI 1

MŨTHITHŨ KUUMA KIUGO-INĨ KĨA NGAI THIMO 15

Teithagia Andũ Arĩa Angĩ Gũkoragwo na Ngoro Njanjamũku

w10 11/15 31 kĩb. 16

Tũgũtũũra Tũthiaga na Wĩkindĩru!

Ayubu aarĩ mũtaana. (Ayub. 31:31, 32) O na gũtuĩka no tũkorũo tũtarĩ atongu, no tũhote ‘kũnyitaga andũ ũgeni hingo ciothe.ʼ (Rom. 12:13) No tũhaarĩrie kĩndũ kĩnini gĩa kũrĩanĩra na arĩa angĩ tũkĩririkanaga atĩ “kaba kũrĩa nyeni harĩa harĩ na wendo gũkĩra kũrĩa ndegwa norie harĩa harĩ na rũmena.” (Thim. 15:17) Kũrĩanĩra na mũndũ ũthiaga na wĩkindĩru o ta ithuĩ no gũtũme tũkenere nginya kĩndũ kĩu kĩnini na tũgunĩke kĩĩroho.

JUNI 2-8

MŨTHITHŨ KUUMA KIUGO-INĨ KĨA NGAI THIMO 16

Kũmaatha Maũndũ ma Bata Maandĩko-inĩ

it-1 629

Kũrũnga

Maumĩrĩro ma Gwĩtĩkĩra Kũrũngwo na Kũrega Kũrũngwo. Andũ arĩa aganu, irimũ, kana arĩa matarĩ mĩthiĩre mĩega, monanagia atĩ nĩ mathũire kũrũngwo nĩ Jehova na njĩra ya kũrega kũrũngwo. (Thb 50:16, 17; Thi 1:7) Maumĩrĩro moru ma ũndũ ũcio nĩ atĩ mabataraga kũrũngwo o na makĩria, na kaingĩ nĩ kũherithio maherithagio na njĩra nene. Nĩkĩo ibuku rĩa Thimo riugaga ũũ: “Irimũ iherithagio nĩ ũrimũ wacio.” (Thi 16:22) No merehere ũthĩni, gĩconoko, mũrimũ, kana o na gĩkuũ kĩa na ihenya. Kĩonereria kĩa Aisiraeli nĩ kĩonanagia maumĩrĩro moru ma kũrega kũrũngwo. Nĩ maaregaga gũthikĩrĩria ũtaaro ũrĩa maaheagwo nĩ anabii. Ningĩ nĩ maaregaga kũgarũrĩra rĩrĩa Jehova aamarũngaga na njĩra ya kũmehereria ũgitĩri wake na kĩrathimo gĩake. Mũthia-inĩ, makĩamũkĩra iherithia inene o ta ũrĩa meerĩtwo, na njĩra ya gũtahwo na gũtwarũo ithamĩrio.—Je 2:30; 5:3; 7:28; 17:23; 32:33; Ho 7:12-16; 10:10; Zef 3:2.

JUNI 9-15

MŨTHITHŨ KUUMA KIUGO-INĨ KĨA NGAI THIMO 17

Tũũria Thayũ Kĩhiko-inĩ Kĩanyu

g 9/14 11 kĩb. 2

Ũrĩa Ũngĩeheria Muku

Wĩthuthurie ũtekwĩheenia. Bibilia yonanagia atĩ andũ amwe nĩ ‘mahiũhaga kũrakara’ na angĩ makoragwo na “mwerekera wa kũrakara.” (Thimo 29:22) Hihi nĩguo wee ũhaana? Wĩyũrie ũũ: ‘Hihi nĩ ngoragwo na marũrũ? Hihi nĩ ndakaraga na ihenya? Hihi nĩ ndũmaga tũũndũ tũnini tũtuĩke ũndũ mũnene?’ Bibilia yugaga atĩ “mũndũ ũrĩa ũikaraga agĩcokagĩra ũndũ nĩ atigithũkanagia arata a hakuhĩ.” (Thimo 17:9; Kohelethu 7:9) Ũndũ ũcio no wĩkĩke o na thĩinĩ wa kĩhiko. Kwoguo angĩkorũo nĩ ũrĩ mwerekera wa kũiga muku, wĩyũrie, ‘Hihi no ngorũo na wetereri makĩria harĩ ũrĩa tũhikanĩtie nake?ʼ—Ũtaaro wa Bibilia: 1 Petero 4:8.

w08 5/1 10 kĩb. 6-11 kĩb. 1

Kũniina Mathĩna

1. Cariai mahinda ma kwarĩrĩria thĩna ũrĩa ũrĩ ho. “Maũndũ mothe nĩ marĩ ihinda rĩamo, . . . hĩndĩ ya gũkira na hĩndĩ ya kwaria.” (Kohelethu 3:1, 7) O ta ũrĩa ngerekano ĩyo ya mũthuri na mũtumia wake magĩcokanĩria ĩronania, mathĩna mamwe no matũme andũ magĩe na marakara manene. Ũndũ ta ũcio ũngĩhaanĩka, onania ngumo ya kwĩgirĩrĩria na njĩra ya gũkira, marakara matananeneha. No ũgitĩre kĩhiko kĩanyu gĩtigathũke ũngĩrũmĩrĩra ũtaaro ũyũ wa Bibilia: “Kwambĩrĩria mbaara nĩ ta kũhingũrĩra maĩ ma mũiyũro; haaro ĩtanatuthũka-rĩ, wĩyeherere.”—Thimo 17:14.

O na kũrĩ ũguo, nĩ kũrĩ “hĩndĩ ya kwaria.” O ta ũrĩa ria rĩongererekaga rĩngĩaga kũmunywo, no taguo mathĩna manenehaga mangĩaga kwarĩrĩrio. Kwoguo ndũkahũthie mathĩna ũkĩĩrĩgĩrĩra atĩ nĩ megũthira. Ũngĩra ũrĩa mũhikanĩtie nake mũkaarĩrĩria thĩna mũna hĩndĩ ĩngĩ, muonie gĩtĩo na njĩra ya kũmwĩra nĩ rĩ mũkaarĩrĩria thĩna ũcio. Gwĩka ũguo no kũmũteithie inyuerĩ kũrũmĩrĩra ũtaaro ũyũ wa Bibilia: “Mũtikarekage riũa rĩthũe mũrĩ o na marakara.” (Aefeso 4:26) Mwarĩkanĩra nĩ rĩ mũkaarĩrĩria thĩna ũcio, tigĩrĩrai nĩ mwawarĩrĩria.

Kũmaatha Maũndũ ma Bata Maandĩko-inĩ

it-1 790 kĩb. 2

Riitho

Ciĩko iria mũndũ areka na maitho nĩ cionanagia ũrĩa araigua. No cionanie kana arĩ na tha kana ndarĩ. Ningĩ mũndũ no ‘aune riithoʼ arĩ na kĩnyũrũri kana akĩbanga maũndũ moru. (Thb 35:19; Thi 6:13; 16:30) Mũndũ ũtarenda kũhingia ũndũ mũna kana gwĩkĩra mũndũ ũngĩ ũndũ mũna, no erũo atĩ nĩ arahinga maitho make. (Mat 13:15; Thi 28:27) Mũndũ mũkĩgu atuĩkaga atĩ maitho make morũraga “nginya ituri cia thĩ” na njĩra ya atĩ matihotaga kũrora handũ hamwe na meciria make matikindagĩria harĩa mabatiĩ. (Thi 17:24) Ningĩ maitho ma mũndũ nĩ monanagia ũgima wake wa mwĩrĩ, hinya wake, na kana nĩ mũkenu. (1Sa 14:27-29; Gũc 34:7; Ayu 17:7; Thb 6:7; 88:9) Mũthamaki Jehoshafatu eerire Jehova ũũ: “Maitho maitũ merekeire harĩ wee.”—2Ma 20:12.

JUNI 16-22

MŨTHITHŨ KUUMA KIUGO-INĨ KĨA NGAI THIMO 18

Kũmaatha Maũndũ ma Bata Maandĩko-inĩ

it-2 271-272

Mĩtĩ Ĩrĩa Yacukagwo

Gũcuka mĩtĩ nĩ njĩra yahũthagĩrũo tene gũtuithania ũndũ mũna. Gwekĩragwo tũhiga kana tũhengere twa mbaũ mĩkũnjo-inĩ ya nguo kana ndigithũ-inĩ, igacoka ikainainio. Mũndũ ũrĩa mũtĩ wake ũngĩagũire thĩ nĩwe wathuuragwo. O ta kwĩhĩta mwĩhĩtwa, gũcuka mĩtĩ kwahaanaga ta arĩ ihoya. Andũ nĩ maahoyaga Jehova ĩmwe kwa ĩmwe, kana gũcuka mĩtĩ kuo kwene gũkonwo kũrĩ njĩra ya kũhoya Jehova, na nĩ meetagĩrĩra kuona ũrĩa egũcokia. Kiugo gĩa Kĩhibirania kĩrĩa gĩtaũrĩtwo mĩtĩ nĩ kĩhũthĩrĩtwo na njĩra ya ĩmwe kwa ĩmwe kana ya mũhaano kũrũgamĩrĩra “igai” kana “rwĩga.”—Jos 15:1; Thb 16:5; 125:3; Isa 57:6; Je 13:25.

Ũrĩa mĩtĩ yahũthagĩrũo. Thimo 16:33 yugaga ũũ: “Mũtĩ ũcukagĩrũo kĩero-inĩ, no itua o rĩothe rĩaguo riumaga kũrĩ Jehova.” Rĩrĩa mĩtĩ yahũthagĩrũo ũrĩa kwagĩrĩire thĩinĩ wa Isiraeli, nĩ yateithagia kũniina ngucanio. Ibuku rĩa Thimo riugaga: “Gũcuka mĩtĩ nĩ kũniinaga ngucanio, na gũgatuithania andũ njamba mataraiguithania.” (Thi 18:18) Mĩtĩ ndĩahũthagĩrũo mathaako-inĩ kana ciũthi-inĩ. Gũtiarĩ na ciũthi cia mbeca iria andũ amwe marĩaga mbeca na angĩ makorũo nĩcio. Mĩtĩ ndĩacukagwo nĩguo ĩtongie hekarũ kana athĩnjĩri-Ngai, o na kana gũteithia athĩni. No rĩrĩa thigari cia Roma ciacukĩire nguo cia Jesu mĩtĩ o ta ũrĩa kwarathĩtwo thĩinĩ wa Thaburi 22:18, muoroto wao warĩ kwĩguna.—Mat 27:35.

JUNI 23-29

MŨTHITHŨ KUUMA KIUGO-INĨ KĨA NGAI THIMO 19

Kũmaatha Maũndũ ma Bata Maandĩko-inĩ

it-1 515

Ũtaaro, Mũtaarani

Jehova nowe tu ũkoragwo na ũũgĩ wothe. Nowe tu ũtabataraga mũndũ wa kũmũtaara. (Isa 40:13; Ro 11:34) Mũrũ wake akoragwo arĩ “Mũtaarani wa Magegania,” na nĩ aheanaga ũtongoria, tondũ arũmagĩrĩra ũtaaro wa Ithe na nĩ akoragwo na roho wa Ngai. (Isa 9:6; 11:2; Joh 5:19, 30) Ũndũ ũcio ũronania atĩ nĩgetha ũtaaro ũkorũo ũrĩ na ũguni, no mũhaka ũkorũo uumanĩte na Jehova. Ũtaaro o wothe ũrĩ mũgarũ na wendi wake ndũngĩkorũo na ũguni. Ũcio o na ndũngĩtwo ũtaaro.—Thi 19:21; 21:30.

JUNI 30–JULAĨ 6

MŨTHITHŨ KUUMA KIUGO-INĨ KĨA NGAI THIMO 20

Kũmaatha Maũndũ ma Bata Maandĩko-inĩ

it-2 196 kĩb. 7

Tawa

Kũringana na Thimo 20:27, “mĩhũmũ ya mũndũ nĩyo tawa wa Jehova, ũthuthuragia ũmũndũ wake wa thĩinĩ biũ.” Kũgerera kĩrĩa mũndũ araruta na mĩhũmũ yake, akorũo nĩ ciugo njega kana njũru, nĩ onanagia ũrĩa ũmũndũ wake wa na thĩinĩ ũhaana.