‘Ũguo Nĩguo Woonire Kwagĩrĩire’”

1. Nĩ kĩĩ gĩatũmĩte Jesu aaiyũrũo nĩ ‘gĩkeno kũgerera roho mũtheru’? (Rora mbica kĩambĩrĩria-inĩ gĩa gĩcunjĩ gĩkĩ.)

TA HŨŨRA mbica ũrĩa Jesu Kristo onekaga atariĩ rĩrĩa aaiyũrĩtwo nĩ ‘gĩkeno kũgerera roho mũtheru.’ No kũhoteke nĩ aacanjamũkĩte mũno. Nĩ kĩĩ kĩamũcanjamũrĩte ũguo? No kahinda kanini gaathirĩte kuuma atũma arutwo ake 70 makahunjie ũhoro ũrĩa mwega wa Ũthamaki wa Ngai. Nĩ eendaga mũno kuona ũrĩa mangĩarutire wĩra ũcio tondũ warĩ na thũ nyingĩ na ciarĩ na hinya. Imwe cia cio ciarĩ Afarisai na aandĩki marũa arĩa monagwo marĩ ogĩ na athomu mũno. Ciatũmaga andũ aingĩ manyarare Jesu, makamuona tu arĩ fundi wa mbao na makona arutwo ake marĩ ‘andũ matathomete wega, na andũ o ũguo.’ (Atũm. 4:13; Mar. 6:3) O na kũrĩ ũguo, arutwo ake makiuma wĩra-inĩ wa kũhunjia maacokire makenete mũno. Maahunjĩtie biũ o na magĩũkagĩrĩrũo nĩ nginya ndaimono! Nĩ kĩĩ kĩamateithĩtie gũkorũo na gĩkeno na ũmĩrĩru?​—Thoma Luka 10:​1, 17-​21.

2. (a) Arutwo a Jesu maatariĩ ta twana na njĩra ĩrĩkũ? (b) Nĩ kĩĩ gĩateithagia arũmĩrĩri a Kristo gũtaũkĩrũo nĩ ma cia bata cia kĩĩroho?

² Ta rora ũrĩa Jesu eerire Jehova: ‘Awa, Mwathani wa igũrũ o na wa thĩ, ndakũgaatha nĩ ũndũ nĩ ũhithĩte andũ arĩa ogĩ na imenyi maũndũ macio, ũkamaguũrĩria tũkenge: noguo Awa, nĩ gũkorũo ũguo nĩguo woonire kwagĩrĩire.’ (Mat. 11:​25, 26) Ma nĩ atĩ, Jesu ndeendaga kuuga atĩ arutwo ake nĩ ciana. O na kũrĩ ũguo, nĩ aamenyaga atĩ moonekaga matariĩ ta ciana makĩringithanio na imenyi na andũ arĩa maarĩ athomu mũno, arĩa meeyonaga marĩ ogĩ maitho-inĩ mao ene. Makĩria ma ũguo, Jesu aarutĩte arũmĩrĩri ake matuĩke ta twana, ũguo nĩ kuuga maikarage marĩ enyihia na andũ mangĩrutĩka. (Mat. 18:​1-4) Maagunĩkaga atĩa nĩ ũndũ wa gũkorũo marĩ enyihia? Jehova nĩ aamateithagia kũgerera roho wake mũtheru magataũkĩrũo nĩ ma cia bata cia kĩĩroho nacio imenyi na andũ ogĩ arĩa maamanyũrũragia magaikara matumumarĩtio nĩ Shaitani na mwĩtĩo wao.

3. Nĩ maũndũ marĩkũ tũgũthuthuria gĩcunjĩ-inĩ gĩkĩ?

³ Nĩkĩo Jesu aaiyũrĩtwo nĩ gĩkeno ũguo! Aakenete nĩ kuona njĩra ĩrĩa Jehova ahũthagĩra kũguũrĩria andũ enyihia a mĩthemba yothe ma ndikĩru cia kĩĩroho, gũtekũmakania gĩthomo kana ũmenyo ũrĩa marĩ naguo. Aarĩ na gĩkeno nĩ kuona atĩ njĩra ĩyo ya kũrutana nĩyo Ithe onire yagĩrĩire. Hihi Jehova nĩ agarũrũkĩte? Onanagia atĩa atĩ ĩyo nĩyo njĩra ĩrĩa onaga yagĩrĩire o na ũmũthĩ? Tũgĩthuthuria macokio ma ciũria icio nĩ tũkuona atĩ ũndũ ũcio nĩ ũgũtũrehera gĩkeno kĩnene o ta ũrĩa wareheire Jesu.

GŨTAARĨRIA MA IRIA NDIKĨRU NA NJĨRA HŨTHŨ

4. Ngathĩti ya Mũrangĩri ya rũthiomi rũhũthie ĩkoretwo ĩrĩ kĩheo kĩa wendo na njĩra irĩkũ?

⁴ Mĩaka-inĩ ya ica ikuhĩ, ithondeka rĩa Jehova rĩkoretwo rĩkĩrutana na njĩra hũthũ andũ megũtaũkĩrũo nĩyo. Ta wĩcirie ũhoro wa ngerekano ithatũ. Ya mbere, kũrĩ na ngathĩti ya Mũrangĩri ya rũthiomi rũhũthie.a Ngathĩti ĩyo ĩkoretwo ĩrĩ kĩheo kĩa wendo harĩ arĩa matarĩ na gĩthomo kĩingĩ kana mareruta rũthiomi. Famĩlĩ nyingĩ nĩ ciĩyoneire atĩ nĩ ũndũ wa riuma rĩu rĩa rũthiomi rũhũthie, ciana ciao rĩu nĩ itaũkagĩrũo wega nĩ Wĩruti wa Mũrangĩri, njĩra ĩrĩa nene Jehova ahũthagĩra gũtũhe irio cia kĩĩroho. Andũ aingĩ nĩ mandĩkĩte marũa ma gũcokia ngatho. Mwarĩ wa Ithe witũ ũmwe aandĩkire atĩ hau kabere nĩ aaiguaga guoya gũcokia ciũria hĩndĩ ya Wĩruti wa Mũrangĩri. Thutha wa kũhũthĩra riuma rĩu rĩa rũthiomi rũhũthie, aandĩkire ũũ: “Rĩu njokagia ciũria makĩria ma riita rĩmwe, na guoya nĩ wathirire! Nĩ ngatho ngũcokeria Jehova o hamwe na inyuĩ.”

5. Moguni mamwe ma riuma rĩerũ rĩa New World Translation of the Holy Scriptures nĩ marĩkũ?

⁵ Ngerekano ya kerĩ nĩ ya riuma rĩerũ rĩa Bibilia ya Gĩthũngũ ya New World Translation of the Holy Scriptures, ĩrĩa yarutirũo Oktomba 5, 2013, hĩndĩ ya mũcemanio wa o mwaka.b Rĩu Maandĩko maingĩ thĩinĩ wa Bibilia ĩyo mahũthagĩra ciugo nini, o na kũrĩ ũguo, matitete o na hanini rĩciria rĩrĩa magĩrĩirũo gũkorũo narĩo na nĩ mahũthũ gũtaũkĩrũo nĩmo. Kwa ngerekano, Ayubu 10:1 yarĩ na ciugo 27 no rĩu ĩrĩ na ciugo 19; Thimo 8:6 yarĩ na ciugo 20 no rĩu ĩrĩ na 13. Mĩhari ĩyo yerĩ thĩinĩ wa Bibilia ĩyo njerũ nĩ mĩhũthũ mũno gũtaũkĩrũo nĩyo. Mũrũ wa Ithe witũ ũmwe mũitĩrĩrie maguta ũrĩa ũkoretwo arĩ mwĩhokeku mĩaka mĩingĩ oigire ũũ: “Rĩrĩa ndathomire ibuku rĩa Ayubu thĩinĩ wa Bibilia ĩyo njerũ, ndaaiguire ta arĩ hĩndĩ ndarĩthoma riita rĩa mbere!” Andũ aingĩ nĩ moigĩte ũndũ o ta ũcio.

6. Wonaga atĩa ũtaũku mwerũ ũrĩa tũgĩte naguo wa Mathayo 24:​45-​47?

⁶ Ngerekano ya gatatũ nĩ ya ũtaũku mwerũ ũrĩa tũgĩte naguo ica ikuhĩ. Kwa mũhaano, nĩ twakenire mũno nĩ ũndũ wa ũtaũku mwerũ wĩgiĩ “ngombo ĩrĩa ĩĩhokekete na njũgĩ” ũrĩa warĩ thĩinĩ wa Mũrangĩri wa Julaĩ 15, 2013 (Mat. 24:​45-​47) Nĩ twatarĩirio atĩ ngombo ĩrĩa ĩĩhokekete nĩyo Kĩama Kĩrĩa Gĩtongoragia, nao ‘andũ a nyũmba yake’ nĩ arĩa othe maheagwo irio cia kĩĩroho nĩ ngombo ĩyo, o na angĩkorũo nĩ aitĩrĩrie maguta, kana nĩ a “ngʼondu ingĩ.” (Joh. 10:16) Na githĩ ti gĩkeno kĩnene kwĩruta ma ta icio na kũruta andũ angĩ! Nĩ na njĩra irĩkũ ingĩ Jehova onanĩtie nacio atĩ nĩ onaga ũrĩ ũndũ mwagĩrĩru kũruta andũ na njĩra hũthũ, ĩrĩa megũtaũkĩrũo nĩyo?

GŨTAARĨRIA ŨHORO ŨRĨA ŨRĨ BIBILIA-INĨ NA NJĨRA HŨTHŨ BIŨ

7, 8. Heana ngerekano cia maũndũ mamwe thĩinĩ wa Bibilia marĩa makoragwo marĩ kĩĩruru kĩa maũndũ marĩa magoka.

⁷ Angĩkorũo ũkoretwo ũgĩtungatĩra Jehova mĩaka mĩingĩ, no kũhoteke nĩ wĩyoneire ũrĩa gũthiĩte gũkĩgĩaga na ũgarũrũku harĩ ũrĩa mabuku maitũ mataaragĩria mohoro mamwe marĩa marĩ Bibilia-inĩ. Nĩ ũgarũrũku ũrĩkũ? Kaingĩ mabuku maitũ tene maagwetaga ũhoro mũna thĩinĩ wa Bibilia magacoka makonania ũrĩa ũkaahingio na njĩra nene mahinda marĩa maroka. Ũhoro ũcio woonagwo ũrĩ kĩĩruru nakuo kũhinga kwa guo gwa thutha-inĩ gũkonwo nĩkuo ũndũ ũrĩa warũgamĩrĩirũo nĩ kĩruru kĩu. Hihi nĩ kũrĩ na itũmi njega cia gũtaarĩria ũhoro ũrĩa ũrĩ Bibilia-inĩ na njĩra ĩyo? Ĩĩ irĩ ho. Kwa ngerekano, Jesu nĩ aagwetire ũhoro wa ‘kĩama kĩa mũnabii Jona.’ (Thoma Mathayo 12:​39, 40.) Jesu aataarĩirie atĩ thikũ iria Jona aaikarire nda ya kĩũngũyũ ciarũgamĩrĩire kana ciarĩ kĩĩruru gĩa thikũ iria Jesu angĩaikarire mbĩrĩra-inĩ.

⁸ Ma nĩ atĩ, nĩ kũrĩ maũndũ mangĩ thĩinĩ wa Bibilia makoragwo marĩ kĩĩruru kĩa maũndũ marĩa magoka. Mũtũmwo Paulo nĩ aarĩrĩirie mamwe mamo. Kwa ngerekano, ũkuruhanu wa Iburahimu na Hagari na wa Iburahimu na Sara warĩ kĩĩruru kĩa ũkuruhanu ũrĩa Jehova angĩagĩire naguo na rũrĩrĩ rwa Isiraeli na gĩcunjĩ gĩa kũrĩa igũrũ kĩa ithondeka rĩa Jehova. (Gal. 4:​22-​26) Ningĩ, hema-ya-gũtũnganwo, hekarũ, Mũthenya wa Horohio, mũthĩnjĩri-Ngai-mũnene, na indo ingĩ igwetetwo thĩinĩ wa Watho ciarĩ “kĩĩruru kĩa maũndũ marĩa mega magoka.” (Ahib. 9:​23-​25; 10:1) Kwĩruta maũndũ ta macio na kĩrĩa marũgamĩrĩire nĩ gwĩkagĩra wĩtĩkio witũ hinya mũno. O na kũrĩ ũguo-rĩ, hihi nĩ kuuga atĩ mũndũ, ũndũ, kana kĩndũ o gĩothe kĩgwetetwo thĩinĩ wa Bibilia nĩ kĩĩruru kĩa maũndũ mangĩ?

9. Rũgano rwa Bibilia rwĩgiĩ Nabothu rwataragĩrio atĩa tene?

⁹ Mahinda marĩa mahĩtũku, njĩra ĩyo nĩ yahũthagĩrũo kaingĩ gũtaarĩria maũndũ mamwe thĩinĩ wa Bibilia. Kwa ngerekano ta wĩcirie ũhoro wa rũgano rwa Nabothu, ũrĩa wabangĩirũo njaama ya kũũragwo nĩ Jezebeli mũtumia wa mũthamaki Ahabu, atĩ nĩguo mũthuriwe oe mũgũnda wa mĩthabibũ wa Nabothu. (1 Ath. 21:​1-​16) Mwaka-inĩ wa 1932 ngathĩti ya Mũrangĩri yaatarĩirie atĩ Ahabu na Jezebeli maarũgamĩrĩire Shaitani na ithondeka rĩake; Nabothu aarũgamĩire Jesu; gũkua kwa Nabothu nakuo kwarũgamĩrĩire kũũragwo kwa Jesu. Mĩaka mĩingĩ thutha ũcio ibuku rĩa,“Let Your Name Be Sanctified,” rĩrĩa rĩacabirũo 1961 rĩatarĩirie atĩ Nabothu aarũgamĩrĩire Akristiano aitĩrĩrie maguta, nake Jezebeli akarũgamĩrĩra ndini iria ciĩĩtaga cia Gĩkristiano. Nakuo kũnyarirũo kũrĩa Nabothu anyaririthirio nĩ Jezebeli kwarũgamĩrĩire kũnyarirũo kwa Akristiano aitĩrĩrie maguta matukũ-inĩ maya ma kũrigĩrĩria. Kwa ihinda rĩa mĩaka mĩingĩ njĩra ĩyo ya gũtaarĩria maũndũ thĩinĩ wa Bibilia nĩyekagĩra wĩtĩkio wa andũ a Jehova hinya mũno. Gũkĩrĩ ũguo-rĩ, nĩ kĩĩ gĩtũmĩte tũgarũrĩre?

10. (a) Ũtaũku ũteithĩtie ngombo ĩrĩa ĩĩhokekete atĩa kwĩmenyerera mũno rĩrĩa ĩrataarĩria maũndũ mamwe Bibilia-inĩ? (b) Nĩ kĩĩ mabuku maitũ mekagĩrĩra mũno ũmũthĩ?

¹⁰ Ihinda-inĩ rĩa mĩaka mĩingĩ Jehova nĩ ateithĩtie “ngombo ĩrĩa ĩĩhokekete na njũgĩ” ĩthiĩ ĩkĩgĩaga na ũtaũku makĩria. Nĩ ũndũ ũcio, ngombo ĩyo nĩ ĩkoretwo ĩkĩĩmenyerera mũno ndĩkoige atĩ ũhoro mũna thĩinĩ wa Bibilia nĩ kĩĩruru kĩa ũndũ ũgooka o tiga harĩa harĩ na ũira mũiganu wa Kĩĩmandĩko wa kuonania ũguo. Makĩria ma ũguo, nĩ kuonekete atĩ maũndũ mamwe ma tene marĩa mataarĩirio na njĩra ĩyo ya kuuga atĩ ũndũ mũna nĩ kĩĩruru kĩa ũndũ ũngĩ ũgooka makoragwo marĩ maritũ mũno gũtaũkĩra andũ aingĩ. Ningĩ tondũ njĩra ĩyo ya kũrutana nĩ ĩkoragwo na maũndũ maingĩ, ndũkoragwo ũrĩ ũndũ mũhũthũ kũmaririkana na kuona ũrĩa marahũthĩka. Ningĩ, gwĩciria mũno kĩrĩa kĩrũgamĩrĩirũo nĩ ũndũ mũna ũrĩa tũrathoma thĩinĩ wa Bibilia no gũtũme twage kuona morutani ma bata ma kĩĩroho marĩa mangĩkorũo thĩinĩ waguo. Mahinda-inĩ maya mabuku maitũ mekagĩrĩra mũno morutani mahũthũ na marĩa mangĩteithia andũ, ta marĩa megiĩ wĩtĩkio, ũkirĩrĩria, wĩyamũrĩri Ngai, na ngumo ingĩ cia bata iria twĩrutaga kuuma Bibilia-inĩ.c

11. (a) Rĩu ũtaũku witũ wĩgiĩ ũhoro wa Nabothu nĩ ũrĩkũ, na nĩkĩ ithuothe no tũgunĩke nĩ kĩonereria gĩake? (b) Nĩkĩ mĩaka-inĩ ya ica ikuhĩ mabuku maitũ matikoretwo makĩhũthĩra mũno njĩra ya kũrutana ya kuuga kĩndũ kĩmwe nĩ kĩĩruru gĩa kĩndũ kĩngĩ? (Rora gĩcunjĩ “Ciũria Kuuma Kũrĩ Athomi” thĩinĩ wa riuma rĩrĩ.)

¹¹ Gũkĩrĩ ũguo-rĩ, ũtaũku witũ wĩgiĩ ũhoro wa Nabothu nĩ ũrĩkũ rĩu? Na njĩra nguhĩ na hũthũ, mũthuri ũcio aakuire tondũ nĩ aarũmĩtie wĩkindĩru wake no ti tondũ atĩ aarũgamĩrĩire Jesu kana Akristiano aitĩrĩrie maguta. O na gũtuĩka nĩ aanyarirĩkire mũno nĩ ũndũ wa wathani mũũru, aarũmirie Watho wa Jehova biũ. (Ndar. 36:7; 1 Ath. 21:3) Nĩ ũndũ ũcio, no tũgunĩke nĩ kĩonereria gĩake tondũ o na ithuĩ no tũcemanie na mĩnyamaro o ta ĩyo. (Thoma 2 Timotheo 3:​12.) Andũ a mĩthemba yothe no mahote gũtaũkĩrũo, kũririkana, na kũhũthĩra ũrutani ũrĩa ũrĩ thĩinĩ wa rũgano rũu rwa Nabothu.

12. (a) Nĩ ũndũ ũrĩkũ tũtagĩrĩirũo gũtua rĩrĩa tũrathoma ũhoro ũrĩa ũrĩ thĩinĩ wa Bibilia? (b) Nĩ kĩĩ gĩtũteithagia gũtaũkĩrũo nĩ nginya maũndũ marĩa marikĩru ma Bibilia? (Rora kohoro ka magũrũ-inĩ.)

¹² Hihi twagĩrĩirũo gũtua atĩ ũhoro o wothe tũrathoma Bibilia-inĩ ũrongoreirio tu gũtũruta ũndũ mũna tũngĩhũthĩra ũtũũro-inĩ? Aca. Ithenya rĩa kũhũthĩra njĩra ya kũrutana ya kuuga atĩ kĩndũ nĩ kĩĩruru gĩa kĩndũ kĩngĩ, rĩu mabuku maitũ matũtaaragĩria makĩria ũrĩa ũhoro mũna thĩinĩ wa Bibilia ũkonainie na ũrĩa ũngĩ. Kwa ngerekano, no tuuge atĩ wĩkindĩru wa Nabothu rĩrĩa aanyaririrũo na akĩũragwo, ũtũririkanagia wĩkindĩru wa Kristo na wa Akristiano aitĩrĩrie maguta. Ningĩ wĩkindĩru ũcio wa Nabothu nĩ ũtũririkanagia wĩhokeku wa Akristiano aingĩ a ‘ngʼondu iria ingĩ’ cia Mwathani. Kũringithania maũndũ ũguo nĩ njĩra hũthũ ya kũrutana.d

GŨTAARĨRIA NGEREKANO CIA JESU NA NJĨRA HŨTHŨ BIŨ

13. Heana mĩhaano ya ũrĩa rĩu tũtaũkĩirũo na njĩra hũthũ nĩ ngerekano imwe cia Jesu.

¹³ Jesu Kristo nĩwe Mũrutani ũrĩa mũnene mũno wanatũũra gũkũ thĩ. Njĩra ĩmwe eendete kũhũthĩra ũrutani-inĩ wake nĩ kwaria na ngerekano. (Mat. 13:34) Ngerekano nĩ iteithagia andũ gwĩciria o na ikamakinyĩra ngoro. Kwa ihinda rĩa mĩaka mĩingĩ, mabuku maitũ nĩ makoretwo magĩtaarĩria na njĩra hũthũ ngerekano iria Jesu aahũthĩrire. Kwa ngerekano, ngathĩti ya Mnara wa Mlinzi ya Julaĩ 15, 2008, nĩ ĩtũteithagia gũtaũkĩrũo makĩria nĩ ngerekano cia Jesu ciĩgiĩ ndawa ya kũimbia, kahĩndĩ ga karatarĩ, na rũgara rwa ndigi. Rĩu nĩ tũtaũkĩirũo wega atĩ ngerekano icio ciaragĩrĩria ũhoro wa Ũthamaki wa Ngai ũrĩa ũteithĩtie andũ kuuma thĩinĩ wa thĩ ĩno njũru magatuĩka arutwo a Kristo.

14. (a) Tene twataragĩria atĩa rũgano rwa Mũsamaria mwega? (b) Ũmũthĩ tũtaũkĩirũo atĩa nĩ rũgano rũu?

¹⁴ Ĩ nacio ngʼano iria Jesu aaganaga akĩenda kũrutana ũndũ mũna? Imwe ikoragwo irĩ ngerekano na ingĩ ũrathi; nacio ingĩ igakorũo na ũtaaro ũngĩhũthĩrũo ũtũũro-inĩ. Tũngĩmenya ngũũrani yacio atĩa? Tũthiĩte tũgĩtheragĩrũo nĩcio. Kwa ngerekano, ta wĩcirie ũrĩa tene twataragĩria rũgano rwa Mũsamaria mwega. (Luk. 10:​30-​37) Ngathĩti ya The Watch Tower ya 1924, yoigĩte atĩ Mũsamaria arũgamĩrĩire Jesu, nayo njĩra ĩrĩa yaikũrũkaga yumĩte Jerusalemu gũthiĩ Jeriko ĩkarũgamĩrĩra ũrĩa andũ mathiĩte makĩrikagĩra mũno mehia-inĩ kuuma rĩrĩa Adamu na Hawa meehirie, nao atunyani makarũgamĩrĩra ahũri biacara akoroku na mathondeka mao; nake mũthĩnjĩri-Ngai na Mũlawii makarũgamĩrĩra ndini iria ciĩĩtaga cia Gĩkristiano. Ũmũthĩ mabuku maitũ mahũthagĩra ngerekano ĩyo gũtũririkania atĩ tũtiagĩrĩirũo gũkorũo na mũthutũkanio rĩrĩa tũrahe andũ ũteithio, makĩria wa kĩĩroho. Na githĩ ti gĩkeno kĩnene kuona ũrĩa Jehova atũrutaga na njĩra hũthũ?

15. Gĩcunjĩ kĩrĩa kĩrũmĩrĩire gĩkaarĩrĩria ũndũ ũrĩkũ?

¹⁵ Gĩcunjĩ-inĩ kĩrĩa kĩrũmĩrĩire, tũkaarĩrĩria rũgano rũngĩ rwa Jesu​—rũrĩa rwa airĩtu ikũmi. (Mat. 25:​1-​13) Jesu eendaga arũmĩrĩri ake matukũ-inĩ maya ma kũrigĩrĩria mataũkĩrũo atĩa nĩ rũgano rũu? Hihi eendaga tũtaũkĩrũo atĩ mũndũ, kĩndũ, kana ũndũ o wothe ũgwetetwo thĩinĩ wa rũgano rũu nĩ kĩĩruru kĩa ũndũ ũgooka? Kana hihi wendi wake warĩ twĩrute maũndũ marĩa mangĩtũteithia mahinda-inĩ maya ma kũrigĩrĩria? Rekei tuone.